2023
Jisōs Kraist Ej Kajoor n̄an Pāāren Ro
Māe 2023
15:13

Jisōs Kraist Ej Kajoor n̄an Pāāren Ro

Jān Elder Dieter F. Uchtdorf

Jān Doulul eo an Jon̄oulruo Rijilōk ro

Jipan̄ ajri ro nejum̧ kalōk tōmak ilo Jisōs Kraist, iakwe gospel in An im Kabun̄ in An, im kepooj er n̄an juon mour ejjeļo̧k jem̧ļo̧kin kōn kāālet ko rejim̧we.

Juon tōre, juon baba ekar tin etal n̄an juon kweilo̧k in jota an bisoprik. Leddik eo nejin 4 an iiō eaar jutak im̧aan mejen, kōņak nuknuk pajama im jibwe juon kape in Bwebwenato ko an Bok in Mormon.

Eaar kajjitōk, “etke kwoj etal n̄an kweilo̧k en?”

Eaar uwaak, “kōnke ij juon rikakpilōklōk ilo bisoprik.”

“Ak kwoj jema!” leddik eo nejin eaar jum̧ae.

Eaar bukwelōlō im̧aan mejen. Eaar ba, “nejū” “ijeļā kwoj kōņaan bwe in riit n̄an eok bwe kwon kiki, ak jotenin ij aikuj jipan̄ bisop eo.”

Leddik eo nejin euwaak, “ejimwe ke ewōr jemān bisop eo n̄an jipan̄ e bwe en kiki?”

Kōm̧ij lukkuun kam̧m̧oolol membōr ro rej jerbal tiljek ilo Kabun̄ in an Jisōs Kraist aolep raan. Ami wūjlepļo̧k em̧ool ekwojarjar.

Ak ilo an leddik in kajjieon̄ meļeļe, ewōr men eo āinjuon ekwojarjar—men eo eban bōk jikin—ilo an jinen im jemān kōkaajririik juon ajri. Ej kwaļo̧k jon̄ak eo an lan̄.1 Jemedwōj Ilan̄, ro Jined im Jemād Rekwojarjar, rej lukkuun m̧ōņōņō n̄e ajri ro Nejin rej katak im kōkaajririik jen ro jineer im jemeer ilaļ.7

Pāāren ro, kom̧ em̧m̧ool kōn men otemjeļo̧k komij kōm̧m̧ane n̄an kōkaajririik ajri ro nejimi. Im ajri raņ, kom̧ em̧m̧ool kōn men otemjeļo̧k komij kōm̧m̧ane n̄an jipan̄ jinemi im jememi, kōnke āinwōt an ro jinemi im jememi jeļā, ekkā ad katak jān ajri ro nejid kōn tōmak, kōjatdikdik, im iakwe em̧ool ilo aer katak jān kōj!

Ro Jineer im Jemeer Ewōr juon aer Eddo Ekwojarjar

Kwonan̄in ke kar ļōmņak kōn jekjek eo eļap Jemedwōj Ilan̄ ej bōk kajjojo iien Ej jilkintok juon ajri n̄an laļin? Errein rej ļaddik im leddik jetōb ro Nejin. Ewōr aer maron̄ n̄an erom̧ armej ro rem̧m̧an. Aer mejān kajik n̄an erom̧ armej ro rōm̧m̧an im raiboojoj, jouj, im m̧ool. Im aaet rej itok n̄an laļin kōn ejjeļo̧k jipan̄, jab lukkuun maron̄ kōm̧m̧an jabdewōt men ijello̧kin aer lam̧ōj im kajjitōk jipan̄. Ememļo̧kjeņ eo aer im̧aan mejen Anij em̧ōj meļo̧kļo̧ke, ippānļo̧k jeļāļo̧kjeņ eo kōn wōn lukkuun er im wōn remaron̄ in erom̧. Rej ejaake jeļā eo aer kōn mour, iakwe, Anij, im An karōk pedped ioon ta eo rej loe jān armej ro ipeļaakier—eļaptata jineer im jemeer,wōn, m̧ool, rej kajjieon̄ in pukot mejļan men ko n̄an er make.

Nin̄nin̄ ej kab ļotak

Anij eaar leļo̧k n̄an ro jinen im jemān juon “aer eddo ekwojarjar n̄an kōkkajririk ajri ro ilo io̧kwe im jim̧we, n̄an kabwe aikuj ko aer ilo jetōb im kanniōk, im n̄an katakin er n̄an … kōjparok kien ko an Anij.”4

Ebwe n̄an kōketak ro jinen im jemān kōn eddo eo aer n̄an ro nejier.

Ennaan eo aō n̄an aolep pāāren ro ej en̄in:

Irooj ej iakwe eok.

E ej pād ippām.

E ej jutak iturum.

E ej am̧ kajoor n̄an tōl ajri ro nejum̧ n̄an kōm̧m̧ani kāālet ko rejim̧we.

Bōk jeram̧m̧an im eddo in ilo peran im lan̄lōn̄. Jab aje eddo in āinwōt kōjeraam̧m̧an jān lan̄ n̄an jabdewōt. Ilowaan ejja men ko raorōk an gospel in im pedped ko, kom̧ij ro rej tōl ajri eo ilo dipdikin kōmeļeļe ko kōn jokālet ko kajjojo raan. Jipan̄ ajri ro nejum̧ kalōk tōmak ilo Jisōs Kraist, iakwe gospel in An im Kabun̄ in An, im kepooj er n̄an juon mour ejjeļo̧k jem̧ļo̧kin kōn kāālet ko rejim̧we. Ilo m̧ool, en̄in ej karōk eo an Anij n̄an pāāren ro.

Setan enaaj jum̧aik eok, kōjekdo̧o̧n eok, kajjieon̄ kabweer eok.

Ak aolep ajri em̧ōj aer bōk Meram in Kraist āinwōt juon tōl jān lan̄. Im bwe Rilo̧mo̧o̧r enaaj jipan̄ eok, tōl eok, im rōjan̄ eok. Pukot An jipan̄. Kajjitōk ippān Irooj!

Irooj Jisōs Kraist

Āinwōt an Jisōs Kraist kajoor eo n̄an Jodikdik ro, Jisōs Kraist ej barāinwōt kajoor eo n̄an pāāren ro.

An Iakwe Eļap

Jet iien jej ļōmņak bwe ro jet em̧m̧anļo̧k aer tōl im katakin ajri ro nejid. Ak jekdo̧o̧n ewi jon̄an likjab eo kwoj en̄jake, ewōr ippam men eo em̧m̧anļo̧k ejenoļo̧k ippam: iakwe eo am̧ n̄an ajri eo nejūm̧.

Iakwe an pāāren ro n̄an ajri eo ej juon kipel eo ekajoor ilo laļin. Ej juon iaan jejjo̧ men ko ioon laļin em̧ool enaaj indeeo.

Kiiō, bōlen kwoj ļōmņak jem̧jerā eo am̧ ippān ajri eo nejum̧ edik. En̄in ijo kajoor eo an Rilo̧mo̧o̧r ej itok ie. E ej kōmour rinan̄inmej, im E emaron̄ kōmour jem̧jerā ko. E eaar kōļapļo̧k pilawā ko im ek ko, im E emaron̄ kōļapļo̧k iakwe im m̧ōņōņō ilo m̧weeo im̧ōm̧.

Am̧ iakwe n̄an ajri ro nejum̧ ej ejaake juon mejatoto in kwaļo̧k m̧ool im kalōk tōmak. Kōm̧m̧an bwe m̧weeo im̧ōm̧ en juon im̧ōn jar, ekkatak, im tōmak, juon im̧ōn m̧ōņōņō kōn en̄jake ko; juon im̧ōn en̄jake ruwainene, im juon im̧ōn Anij.5 Im “jar n̄an Jemād kōn aolep kajoor in bōro, bwe [kom̧in] maron̄ obrak kōņ iakwe eo [An], eo Eaar leļo̧k ioon… rikaļoor ro an Nejin, Jisōs Kraist.”6

E ej Kakūrm̧ool Kijejeto ko Reddik im Reļam Waan

Bar juon kajoor ewōr ippāmi, āinwōt juon pāāren, ej eddo eo kajjojo raan, eo ejjeļo̧k jem̧ļo̧kin. Ro m̧ōttam, rūkaki ro, im ro ilo media rej itok im etal. Ak kwomaron̄ juon eo ej waanjon̄ak ejejjet im edim ilo mour eo an ajri eo nejūm̧.

Kijejeto ko am̧ remaron̄ dik n̄an keidi n̄an ainikien ko reļļaaj n̄an an ro nejum̧ ron̄ ilo laļin. Jet tōre kwomaron̄ en̄jake kwojjab kōm̧m̧an eļap jerbal. Ak keememej bwe “kōn men ko reddik Irooj emaron̄ kwaļo̧k men ko reļļap.”7 Ilo juon nokon in jota, kōnono kōn gospel in, ak juon waanjon̄ak eban ukōt mour eo an ajri eo nejum̧, eļapļo̧k jen baj jidik pili in wōt n̄an kōm̧m̧an bwe en eddōk m̧ōkaj wut eo. Ak jen men ko reddik im ļam waan, jen raan n̄an raan, kōkaajririk ajri ro nejum̧ em̧m̧anļo̧k jān juon kōttan kōm̧m̧ane ilo iien ko rejeja.8

En̄in ej iaļ eo an Irooj. E ej kōnono n̄an eok im ajri eo nejum̧ kōn ainikien edik, im emera, ak ejjab ainikien juon jourur.9 E eaar kōmour Neaman ejjab kōn “jabdewōt men eo eļap” ak kōn men eo edik, bar karreeo.10 Ro nejin Israel raar m̧ōņōņō kōn kejota eo ilo āne jem̧aden, ak ta eo eaar dāpij mour ko aer ekar kōn men ko reddik im reļam waan kōn kabwilōn̄lōn̄ eo an manna—m̧ōn̄ā eo kajjojo raan.11

Ro jeiū im jatū, m̧ōn̄ā eo kijed kajjojo raan ej pojak im ajeej ilo m̧weeo. Tōmak im naan in kam̧ool rej kajoorļo̧k ilo wāween ko rekkar, jidik kōn jidik, ilo iien ko reddik im ļam waan, ilo kajjojo raan in mour.12

Aolep iien ej iien katakin. Aolep naan im kōm̧m̧an remaron̄ erom̧ juon tōl n̄an kōm̧m̧ani jokālet ko.13

Kwomaron̄ jab lo an m̧ōkaj in jelet kijejeto ko am̧. Bōtaab jej jab ebbwer. “Ak men otemjeļo̧k raikuj kūrm̧ool ilo iien eo aer,” Irooj ekar ba. “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap.”14 Jerbal ta eo emaron̄ ļapļo̧k jen jipan̄ ajri ro nejin Anij raiboojoj katak wōn lukkuun er n̄an kalōk tōmak eo aer ilo Jisōs Kraist, An gospel, im Kabun̄ eo An? Jisōs Kraist enaaj kōjeraam̧m̧an im kakūrm̧ool kijejeto ko am̧.

E ej letok Revelesōn

Bar juon Irooj ej jipan̄ pāāren ro ej ilo menin letok an revelesōn ko an juon make. Anij ej kōņaan in lutōkleplep An Jetōb n̄an tōl pāāren ro.

Ilo am̧ lukkuun jar im pukot Jetōb, E enaaj kakkōl eok kōn kauwōtata ko rettiņo.15 E enaaj kwaļo̧k menin letok ko an ajri ro nejum̧, kajoor ko aer, im n̄ūrbōktak ko aer jab maron̄ kōnono kaki.17 Anij enaaj jipan̄ eok lo ajri ro nejum̧ āinwōt An lo er—jen tulikier im n̄an būruweer.17

Kōn jipan̄ an Anij, kwomaron̄ katak n̄an jeļā kajjein ajri ro nejum̧ ilo juon wāween ekwojarjar. Ij kajjitōk ippāmi n̄an bōk menin letok in an Anij n̄an tōl baam̧le eo am̧ kōn revelesōn an juon make. Pukot An tōl ilo am̧ jar.18

“Juon Oktak Ekajoor”

Bōlen jipan̄ eo eaorōktata Jisōs Kraist ej leļo̧k n̄an pāāren ro ej “oktak ekajoor” ilo burueer.19 Ej juon kabwilōn̄lōn̄ eo jej aolep aikuji.

Ilo jidik iien, pijaik m̧ōk jekjek in: Kopād ilo m̧ōnjar, ron̄jake katak eo kōn baam̧le. Rikōnono eo ej kōmeļeļeik em̧ eo epolemen im baam̧le eo ewāppen. Ļeo im lieo pālele rejjab akweļ. Ajri ro ej bōjrak aer riiti jeje ko rekwojarjar n̄e eiien wōt kōm̧m̧an katak. Im al eo “Love One Another”20 ej jan̄. M̧okta jen an rikōnono eo itok n̄an m̧ōttan eo kōn an aolep m̧ōņōņō in kobaļo̧k n̄an karreoiki m̧ōn kōppojak eo, em̧ōj am̧ jino ļōmņake, “ejjeļo̧k kōjatdikdik ilo baam̧le eo aō.”

Ro jeiū im jatū rejitōnbōro, pād wōt! Aolep ro ilo jarlepju eo rej bar ļōmņake ejja menin wōt! Ilo m̧ool, aolep pāāren ro rej inepata kōn aer jab lukkuun em̧m̧an.

Jeraam̧m̧an, ewōr kein jipan̄ ekwojarjar n̄an jipan̄ pāāren ro: Ej ilo Jisōs Kraist. E ej oktak eo ekajoor ilo bōro.

Ilo am̧ kōpeļļo̧k buruōm̧ n̄an Rilo̧mo̧o̧r im katak ko An, E enaaj kwaļo̧k m̧ōjņo ko am̧. N̄e kwoj kōttāik eok make im̧aan mejen Kraist, E enaaj kōm̧m̧an bwe m̧ōjņo ko ren erom̧ kajoor.21 E ej Anij in menin bwilōn̄ ko.

Ej ke meļeļein bwe kwe im baam̧le eo am̧ renaaj weeppān? Jaab. Ak kom̧ naaj em̧m̧anļo̧k. Kōn jouj eo an Rilo̧mo̧o̧r, jidik kōn jidik, kwonaaj kōļapļo̧k m̧wiļ ko pāāren ro rej aikuji: iakwe Anij im ro Nejin, kijenmej, jatōr, tōmak ilo Kraist, im peran n̄an kōm̧m̧ane jokālet ko rejim̧we.

Jisōs Kraist ej Letok Jipan̄ ilo Kabun̄ in An

Kijejeto eo ad n̄an kalōk tōmak ilo Jisōs Kraist ej ilo m̧weeo, pedped ioon kajjojo armej. Im Kabun̄ in ej jipan̄. Ijello̧kin leļo̧k jeje ko rekwojarjar im naan ko an rikanaan ro, Kabun̄ eo an Rilo̧mo̧o̧r ej letok elōn̄ kein katakin ko n̄an jipan̄ pāāren im ajri ro kōm̧m̧ani kāālet ko rejim̧we.

N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko

  • N̄an Kōkajoorļo̧k Jodikdik Ro: Juon Bok in Tōl n̄an Kōm̧m̧ani Kāālet ko ejjab lewaj n̄an kwe elaajrak in men ko aikuj kōm̧m̧ani ak jab kōm̧m̧ani. Ej kwaļo̧k m̧ool ko indeeo n̄an jipan̄ eok kōm̧m̧ani kāālet ko rej pād ioļap in mour im katakin ko an Jisōs Kraist. Riiti ippān ajri ro nejum̧. Kōtļo̧k bwe ren kōnono kake. Jipan̄ er n̄an bōk m̧ool ko indeeo im rekwojarjar tōl er ilo kāālet ko.22

  • Kweilo̧k FSY rej bar jet kein katak ko rem̧m̧an. Ij kōjatdikdik aolep jodikdik renaaj kobatok. Ij karuwaineneik ro rūm̧m̧an ded n̄an kobatok n̄an kweilo̧k kein āinwōt rikatakin im rikakpilōklōk ro. Ij karuwaineneik pāāren ro n̄an kōkajoorļo̧k mour in jetōb ko an ro nejumi ālkin aer ro̧o̧lwaj jān kweilo̧k ko an FSY.

  • Ajri ro im jodikdik ro an Kabun̄ eo an Jisōs Kraist im Armej ro Rekwojarjar ilo Raan ko Āliktata ewōr rikaki, rikapilōk ro, im rikatakin etijemļo̧k. Ekkā ami deļo̧n̄e mour an juon armej ilo iien apan̄ n̄an kalōk im jipan̄ tōmak im naan in kam̧ool. Jet iami ejjeļo̧k pāleer. Jet ejjeļo̧k make nejier. Ami jerbal eļap lan̄lōn̄ ie n̄an ro nejin Anij ekwojarjar ilo mejen Anij.23

Jab ebweer kōn Kabwilōn̄lōn̄ in

Ro jera rejitōn bōro, ro jeiū im jatū rejitōn bōro, kalōk tōmak ippān juon ajri ej āinwōt jipan̄ juon wut eddōk. Koban kanōk lukwōn bwe en eddōk m̧ōkaj. Koban boje nien wut eo bwe en m̧ōkaj an eddōk. Im koban kajekdo̧o̧n wut eo im kōtmene bwe en eddōk ak kalle leen.

Ta eo kwomaron̄e im aikuj kōm̧m̧ane n̄an diktak in epepen in n̄an kalōk pedped eo aer, kōn men ko rekwojarjar an lan̄. Joļo̧k aolep menin kapan̄pan̄ ko im jabdewōt men ej pinej meram jān lan̄. Ejaake jekjek ko rem̧m̧antata n̄an eddōkļo̧k. Kijenmej ilo an diktak in epepen in kōm̧m̧ani jokālet ko reim̧we im kōtļo̧k an Anij jerbale menin bwilōn̄ ko. Uwaak enaaj em̧m̧anļo̧k im ļapļo̧k im m̧ōņōņōļo̧k jen jabdewōt men kwomaron̄ kōttōpraki kōn kwe make.

Ilo karōk eo an Jemedwōj Ilan̄, jem̧jera ko an baam̧le eļap tokjeer n̄an indeeo. En̄in ej unin, āinwōt juon pāāren, kwon jab ebweer, men̄e kwojjab m̧ōņōņō kōn wāween an men ko rekar waļo̧k m̧oktaļo̧k.

Kōn Jisōs Kraist, M̧aajta in Kōmour, enaaj aolep iien erom̧ juon ijjino ekāāl; E ej letok kōjatdikdik aolep iien.

Jisōs Kraist ej kajoor n̄an baam̧le ko.

Jisōs Kraist ej kajoor n̄an jodikdik ro.

Jisōs Kraist ej kajoor n̄an pāāren ro.

Jān menin ij kam̧ool ilo etan Jisōs Kraist, amen.

Kakeememej ko

  1. “Eiten aolep jinen im jemān ajri ro ewōr aer ikdeleel n̄an katakin ro nejier mour em̧m̧an. En̄in ej mōttan eo ekabwilōn̄lōn̄ ilo karōk eo an Jemādwōj Ilan̄. Ekōņaan bwe ro Nejin ren itok n̄an laļ in, ļoor jon̄ak indeeo an baam̧le ko me raar baj ejaak wōt ilo lan̄. Baam̧le ko jet rej mōttan ko raorōk ilo karōk eo n̄an indeeo, innām E ej kōm̧m̧an karōk n̄an er barāinwōt n̄an mōttan ko jet raorōk ilo laļ in. Men̄e baam̧le ko ilo laļ in rejjab wānōk, rej karuwaineneik ajri ro nejin Anij n̄an laļ in kōn iakwe eo me ej āinwōt iakwe eo jaar en̄jake ilo lan̄—iakwe an ro jined im jemād. Families are also the best way to preserve and pass on moral virtues and true principles that are most likely to lead us back to God’s presence” (Henry B. Eyring, “Gathering the Family of God,” Liahona, May 2017, 20).

  2. Aaet, jej jeļā bwe Anij eban aolep iien kadedeļo̧k “ilaļ, barāinwōt i lan̄” (Matu 6:10). Āinwōt ro jinen im jemān ro rejjab weeppān ilo mour in ebwe an ettoļo̧k keidi n̄an Anij. E ej lukkuun loe. E ej jan̄ kōn aolep būrum̧ōj im rub bōro ko ilo jem̧jerā ko an baam̧le. Im aaet E ejjab ebweer ilo baam̧le. Im E eban, bwe Anij ewōr an karōk ajri ro Nejin rej jibadōk ļo̧k indeeo Im aaet io̧ļap in karōk eo ej baamle.

  3. Lale Matu 18:1–5; Mosaia 3:19.

  4. “Baam̧le Eo: Juon Kean̄ n̄an Laļin,” ChurchofJesusChrist.org; lale barāinwōt Katak im Bujen Ko 68:25–28.

  5. Lale “Learning at Home Is Founded on Relationships,” Teaching in the Savior’s Way: For All Who Teach in the Home and in the Church (2022), 30–31; bar lale Katak im Bujen Ko 109:8.

  6. Moronia 7:48.

  7. 1 Nipai 16:29; bar lale Alma 37:6–7.

  8. Lale “Learning at Home Consists of Small, Simple, Consistent Efforts,” Teaching in the Savior’s Way, 31. Būreejtōn David O. McKay eaar kwaļo̧k: “Let us not think that, because some [things] … seem small and trivial, that they are unimportant. Life, after all, is made up of little things. Our life, our being, physically, is made up of little heart beats. Let that little heart stop beating, and life in this world ceases. The great sun is a mighty force in the universe, but we receive the blessings of [its] rays because they come to us as little beams, which, taken in the aggregate, fill the whole world with sunlight. The dark night is made pleasant by the glimmer of what seem to be little stars; and so the true Christian life is made up of little Christ-like acts performed this hour, this minute—in the home” (Teachings of Presidents of the Church: David O. McKay [2003], 219).

  9. Lale Hilamōn 5:30.

  10. Lale 2 Kiin̄ Ro 5:9–14.

  11. Lale Exodus 16

  12. Lale “Kepooj Ajiri ro Nejid n̄an Mour Indeeo ilo Iaļan Bujen eo an Anij,” tok, Ļoor Eō—N̄an Kajjojo Armej im Baam̧le Ko: Kallim̧ur Ekāāl 2023, appendix (digital wot).

  13. See “Learning at Home Can Be Planned but Also Spontaneous,” Teaching in the Savior’s Way, 31; 1 Peter 3:15.

  14. Katak im Bujen ko 64:32–33.

  15. Lale Matu 2:13.

  16. Lale Alma 40:1; 41:1; 42:1.

  17. Lale 1 Samuel 16:7.

  18. Lale 1 Nipai 15:8.

  19. Alma 5:13.

  20. Lale “Love One Another,” Hymns, no. 308.

  21. Lale Ether 12:27.

  22. “In the case of children, the responsibility of giving moral guidance rests with the parents. They know the disposition, understanding, and intelligence of each child. Parents spend a lifetime seeking to establish and maintain good communications with each of their children. They are in the best position to make the ultimate moral decisions as to the welfare and well-being of their offspring” (James E. Faust, “The Weightier Matters of the Law: Judgment, Mercy, and Faith,” Ensign, Nov. 1997, 54).

  23. Ebar wōr ruo kein katak ko raorōk: kakkobaba eo ekāāl an iiō in ilo Come, Follow Me kein katak ko ekitbuuj juon taitōļ kāāl “Preparing Your Children for a Lifetime on God’s Covenant Path.” Ej elmokwot pidodo, ļōmņak ko ilo io̧lepen m̧weeo n̄an katakin ajri ro pojak n̄an peptaij im bujen im kain̄i ko jet. Im oktak eo ekāāl kar etale Teaching in the Savior’s Way ewōr juon an taitōļ kāāl “Home and Family” me ej kōmeļeļeik elmen an pedped ko an āinwōt Kraist jerbal katakin ilo m̧weeo (lale peij 30–31).