Juon Ainikien Em̧m̧an!
Kalōk tampeļ ko ekar juon iaan kōttōpar ko im̧aan tata reļļap an aolep rikanaan ro an jān kar Rikanaan Josep Smith.
“Kiiō, ta jej ron̄ ilo gospel eo me jaar bōke? Juon ainikien em̧m̧an! Juon ainikien tūriam̧o jān lan̄; im juon ainikien m̧ool jān ilo laļ; …juon ainikien em̧m̧an kōn eo emour im eo emej; juon ainikien em̧m̧an n̄an ro remour im ro remej; ennaan ko rem̧m̧an kōn lan̄lōn̄ eļap.”1
Ro jeiū im jatū, enan̄in lukkuun in pen ron̄ naan kein jān Rikanaan Josep Smith im jab mōkaj in ettōn̄ dikdik.
En̄jake eo an Josep eļap em̧ool ej kwaļo̧k tarlep im wōj in lan̄lōn̄ eo loe ilo karōk in m̧ōņōņō eo eļap an Anij Jemedwōj Ilan̄, bwe emōj An kam̧ool n̄an kōj, “bwe armej ren, bwe ren maron̄ m̧ōņōņō .”2
Jaar aolep lam̧ōj kōn lan̄lōn̄3 ilo mour eo ad m̧okta ke jaar ron̄ karōk in m̧ōņōņō eo an Anij, im jej wōnm̧aanļo̧k wōt in lam̧ōj kōn lan̄lōn̄ eo ijin ilo ad mour ekkar n̄an karōk eo An. Bōtaab ta lukkuun kar ļamļam eo n̄an kean̄ m̧ōņōņō in jān Rikanana eo? Ta eo ej kōllowetak en̄jake kein rem̧wilaļ im m̧ool?
Rikanaan Josep ekar katakin kōn petpaij kōn ro remej. Menin ilo m̧ool ekar juon revelesōn aiboojoj me kar bōke kōn būruōn kam̧m̧oolol. Ke membōr ro an Kabun̄ in raar ekkatak kake jinoin tata bwe remaron̄ kar peptaij kōn jitōnbōro ro aer raar mej, raar lan̄lōn̄. Wilford Woodruff ekar ba, “Tōre eo ikar ron̄ kake, aō [ekar] ļap an lan̄lōn̄!”4
Peptaij kōn ro remej ekar jab m̧ool eo de eo Irooj ekar kwaļo̧k im kōjepļaaktok. Ekar bar lōn̄ menin letok ko jet, ak menin letok kwojarjar ko, me Anij ekar kijooror in letok ioon ļaddik ro im leddik ro Nejin.
Menin letok ko jet kar koba mālim an priesthood eo, bujen im kain̄i ko, m̧are ko me renaaj n̄an indeeo, liāp eo an ajri ro n̄an ro jineer im jemeer ilo baam̧le eo an Anij, im āliktata kōjeraam̧m̧an eo an bar ro̧o̧l n̄an kapijuknen n̄an im̧aan mejān Anij, Jemedwōj Ilan̄, im Nejin, Jisōs Kraist. Aolep kōjeraam̧m̧an kein raar kapidodik kōn Pinmuur eo an Jisōs Kraist.
Kōnke Anij ekar watōk men kein ren ibwilijin kōjeraam̧m̧an ko An routiej im ekwojarjar tata,5 E ekar kōmeļeļeik im̧ōko rekwojarjar ren ekkal ijo E emaron̄ leļo̧k menin letok kein raorōk ioon ajri ro Nejin.6 Im̧ōkein renaaj im̧weo Im̧ōn ioon laļ in. Mōn ekkaļ kein renaaj tampeļ ko ijo im ekar liape ak lukwōje ioon laļ in ilo Etan, kōn naan ko An, im malim eo An enaaj lukwōje ilo lan̄ ko.7
Āinwōt membōr ro an Kabun̄ in rainin, jet iaad emaron̄ in pidodo n̄an kōj n̄an bōk m̧ool indeeo kein raiboojoj kōn ālikinjepep. Raar make waļo̧k tok n̄an kōj ilo iien eo em̧ōkaj. Jet iien ej jipan̄ n̄e jej lo tampeļ ko kōn mejān ro me rej ekkatak kōn er ilo iien eo jinoin tata. Menin ekar erom kein kam̧ool n̄an eō kōn juon en̄jake kiiō epaak.
IIō eo ļo̧k, m̧okta wōt jān bar aje eo an Tokyo Japan Tampeļ, elōn̄ rilotok ro rejjab jān tōmak in ad raar alooje tampeļ eo. Baj juon iien kaalojoj ekar koba juon ritōl em̧m̧an jān bar juon kabun̄. Kōm kar katakin rilotok eo am kōn karōk in m̧ōņōņō eo an Jemedwōj Ilan̄, jerbal eo eļap an Jisōs Kraist ilo karōk eo, im katak eo bwe baam̧le ko remaron̄ koba indeeo kōn kain̄i eo an liāp.
Ilo jem̧ļo̧kin iien kaloojoj eo, ikar kajjitōk ippān eo m̧ōttam n̄an kwaļo̧k en̄jake ko an. Ilo unin kōnono eo kōn koba an baam̧le ko—etto, kiiō, im jekļaj—em̧m̧aan in em̧m̧an ekar kajjitōk kōn aolep m̧ool, “Membōr ro ilo tōmak eo am rej ke ilo m̧ool meļeļe kōn ewi jon̄an an ļap an em̧m̧an katak in?” Ekar kakobaba, “Menin emaron̄ juon iaan katak ko wōt me emaron̄ kobaik laļ in eo me ekanooj jepelļo̧k.”
Ekkatak in ej juon eo ekajoor. Em̧m̧aan in ekar jab m̧weiur kōn aiboojoj eo eļap an tampeļ eo bōtaab kōn katak eo ekabwilōn̄lōn̄ em̧wilaļ bwe baam̧le ko rej koba im loklok n̄an Jemedwōj Ilan̄ im Jisōs Kraist n̄an indeeo.8
Innām, jejjab aikuj ilbōk, em̧ool n̄e juon armej ejjab jān kabun̄ in ad ej kile wōj eo kōn ta eo ej waļo̧k ilo tampeļ eo. Ta eo emaron̄ erom bōro kuk ak iminene n̄an kōj ej jet iien āinwōt eļap im wōj jān ro jet me rej ron̄ ak en̄jake ilo iien eo jinoin tata.
Mekarta tampeļ ko rekar waļo̧k jemaanļo̧k, kōn Jeplaaktok eo an gospel eo an Jisōs Kraist, kalōk tampeļ ko ekar juon iaan kōttōpar ko im̧aan tata reļļap an aolep rikanaan ro an jān kar Rikanaan Josep Smith. Im epidodo meļeļe etke.
Ke Rikanaan Josep ekar katakin kōn peptaij kōn ro remej, ekar kwaļo̧k bar juon m̧ool eļap. Ekar katakin: “In kam̧ool n̄an kom̧ bwe erkein rej pedped ko kōn ro remej im ro remour im reban maron̄ watōki bajjōk im eļļā jāni, āinwōt aer ekkejelļo̧k n̄an lo̧mo̧o̧ren eo ad. Bwe lo̧mo̧o̧r eo an rimej ro ad ej menin aikuj im eļap an aorōk n̄an ad lo̧mo̧o̧r… er jab kōn kōj jab maron̄ kar kōm̧m̧an wānōk—ainwōt maron̄ kōj jab kōn ad rimej kar kōm̧m̧an wānōk.”9
Ilo ad lale, aikuj eo n̄an tampeļ ko im jerbal eo me ej kōm̧m̧an n̄an jim̧or ro remour im ro remej ej erom lukkuun alikkar.
Rikapo eo ejeļā. An kajoor ej kamijake kōn kain̄i ko im bujen ko kōm̧m̧ani ilo tampeļ ko, im ej kōm̧m̧an jabdewōt men emaron̄ n̄an kajjieon̄ kabōjrak jerbal eo. Etke? Kōnke ejeļā kōn kajoor eo me ej itok jān jerbal in ekwojarjar. Ilo an kajjojo tampeļ ko ekāāl aje, lo̧mo̧o̧r in kajoor eo an Jisōs Kraist ej ajedeed ipelaakin laļin n̄an bōbare kijejeto ko an rikapo eo im n̄an kōjparok kōj ilo ad itok n̄an E. Ilo an tampeļ ko im rikojparok bujen ko eddōkļo̧k ilo numba, rikapo eo ej mojno̧ļo̧k.
Ilo raan ko m̧oktata an Kabun̄ in, jet rekōn inepata n̄e juon tampeļ ekāāl kar kōjjeļā kake, bwe rekōn ba, “Jejjan̄in jino kalōk juon tampeļ ilo an jab baj wōr jum̧ae ko.” Bōtaab Brigham Young ekar peran ilo ba, “Ikōņaan bar jelm̧ae jum̧ae ko.”10
Ilo mour in, jejjamin naaj ko jān tariņae, bōtaab emaron̄ wōr ad kajoor n̄an anjo̧ ioon rikōjdet eo. Kajoor im kōkajoorļo̧k eo ej itok jān Jisōs Kraist ilo ad kōm̧m̧an im kōjparok bujen ko an tampeļ.
Būreejtōn Russell M. Nelson ekar katakin: “Tōre eo ej itok wōt n̄e ro rejjab pokake Irooj renaaj jenolo̧k jān ro rej pokake. Injurōņ eo ad em̧m̧antata ej n̄an wōnm̧aanļo̧k wōt ilo erreo n̄an deļon̄e m̧weo Im̧ōn ekwojarjar.”11
Erkein rej jet iaan kōjeraam̧m̧an ko Anij ekar kallim̧uri kōj kōn rikanaan eo An:
Kwoj aikuj ke mennin bwilōn̄ ko? Rikanaan eo ad emōj an ba, “Ij kallim̧uri kom̧ bwe Irooj enaaj bōktok kabwilōn̄lōn̄ ko Ejeļā ke kom̧ij aikuji ilo ami kōm̧m̧an kaarmejete ko n̄an jerbal im kabun̄jar ilo tampeļ ko An.”12
Kwoj ke aikuji kajoor in kemour eo im kōkajoorļo̧k eo an Rilo̧mo̧o̧r Jisōs Kraist? Būreejtōn Nelson ej kam̧ool n̄an kōj bwe. “men otemjej katakin ilowaan tampeļ eo … ej kōļapļo̧k ad meļeļe kōn Jisōs Kraist. … Ilo ad kōjparoki bujen ko ad, E ej letok n̄an kōj An kōmour, kajoor in kōkajoorļo̧k. Im o, ewi jon̄an ad naaj aikuji kajoor eo An ilo raan ko rej pād im̧aan.”13
Ilo Palm Sunday eo m̧oktata ke Jisōs Kraist ekar deļo̧n̄ļo̧k in anjo̧ ilo Jerusalem, juon jarlepju in rikaļoor ro An raar “lan̄lōn̄ im nebar Anij kōn juon ainikien eļaaj im ba, E m̧ōņōņō Kiin̄ eo Ej itok ilo etan Irooj.”14
Bwe ejja wōt ilo kar Palm Sunday in 1836 eo, Kirtland Tampeļ eo ekar aje. Ilo ejja iien ne wōt rikalo̧o̧r ro an Jisōs Kraist rekar lan̄lōn̄ ilo iien eo. Ilo jar in aje eo, Rikanaan Josep Smith ekar kwaļo̧k ilo naan in nebar:
O Irooj Anij Ekajoor Bōtata, ron̄jake kōm … im uwaake kōm jān lan̄, … ijo Kwōj jijet ioon tūroon, kōn aiboojoj, utiej, kajoor, rajimjim, [im] maron̄. …
“… Jipan̄ kōm jān kajoor in Jetōb eo Am̧, bwe kōmin maron̄ kobaik ainikiōm ippān ro remeram, enjeļ ro rejjatōltōl ipeļaakin tūroon eo Am̧, ippān kwaļo̧k ko in nebar, im al Hosana n̄an Anij im Lamb eo!
“Im kōtļo̧k bwe rein … ro rekwōjarjar Am̧ ren lam̧ōj eļļaaj kōn lan̄lōn̄.”15
Ro jeiū im jatu, rainin ilo Palm Sunday in, jān ro rej rikalo̧o̧r an Jisōs Kraist barāinwōt nebar an Anij ekwojarjar im lan̄lōn̄ ilo em̧m̧an eo An n̄an kōj. “Ta jej ron̄ ilo gospel eo me jaar bōke?” Em̧ool “juon ainikien em̧m̧an!”16
Ij kam̧ool bwe enaaj ļapļo̧k im ļapļo̧k ami en̄jake lan̄lōn̄ in ilo ami deļo̧n̄e im̧ōko rekwojarjar imōn Irooj. Ij kam̧ool bwe konaaj en̄jake lan̄lōn̄ E ej karool n̄an kwe, ilo etan Jisōs Kraist, amen.