N̄aat Kwoj Bōk Petriak Kōjeraam̧m̧an Eo Am̧
N̄e kwoj bōk kōjeraam̧m̧an eo am̧, kwonaaj kile im en̄jake ekōjkan an Jemedwōj Ilan̄ im Jisōs Kraist iakwe eok im ekōjkan Aer kalimjōk eok makeļo̧k.
Inne eo m̧ōtta jitōnbōro Elder Randall K. Bennett ekar kōnono kōn kōjeraam̧m̧an ko an petriak. Ekar juon ennaan eo em̧m̧an im kar im̧we kōj aolep. Ro jeiū im jatū jitōnbōro, imaron̄ ke kōnono kōn kōjeraam̧m̧an ko an petriak barāinwōt? Petriak ro, āinwōt kajjitōk bwe kōjeraam̧m̧an ko an petriak ren lōn̄ļo̧k, ij jar bwe Irooj enaaj kōjeraam̧m̧an eok ilo am̧ kakūrm̧ool kūr eo am̧.
Ilo aō etal n̄an kweilo̧k ko an stake, iien otemjej ij loļo̧k stake petriak eo im eo pāleen. Petriak ro rem̧m̧an, repokake, im ritōl ro rekabwilōn̄lōn̄ kar kūr jān Anij. Rej jiron̄ eō elōn̄ en̄jake in jetōb raiboojoj. Ij kajjitōk ippāer kōn armej eo edik tata im armej eo erūtto tata me raar leļo̧k juon kōjeraam̧m̧an n̄an e. N̄an kiiō, eo edik tata ekar 11, im eo erūtto tata ekar 93.
Ikar bōk petriak kōjeraam̧m̧an eo aō āinwōt juon membōr kāāl an Kabun̄ in, ke ej 19 iiō detta, ruo iiō ko ālkin aō kar peptaij. Petriak eo aō ekar kanooj in rūtto. Ekar kobatok ilo Kabun̄ in ilo 1916 eo im ekar juon bainiier an Kabun̄ in ilo Japan. Ekar aō utiej eļap n̄an bōk petriak kōjeraam̧m̧an eo aō jān rikaļoor in ejej uwaan an Irooj. Kajin Japan eo an ekar bwe an pen n̄an aō meļeļe, bōtaab ekar kajoor.
Petriak ro ikar ioon er rej ba n̄an n̄a bwe elōn̄ kajjojo armej raar bōk kōjeraam̧m̧an in petriak ko aer m̧okta jān jerbale juon mijen. Likao ro im jiron̄ ro, pāāren ro, im bisop ro, petriak kōjeraam̧m̧an ko rejjab wōt n̄an kōppopo n̄an jerbale juon mijen. Membōr ro raar peptaij im rōrreo remaron̄ bōk petriak kōjeraam̧m̧an eo aer n̄e iien ejetjet n̄an er.1
Membōr ro rōrūtto jitōnbōro, jet iaami rejjan̄in de bōk kōjeraam̧m̧an in petriak ko ami. Keememej, ejjeļo̧k jon̄an iiō.
Kōrā eo jinen kōrā eo karejera ekar juon membōr in Kabun̄ in ekanooj niknik, jerbal āinwōt rūkaki an Doulul eo an Kōrā ro m̧ae iien eo ekar jako ke ekar 90 iiō. Ikar būromōj n̄an jeļā bwe ekar jab bōk juon kōjeraam̧m̧an an petriak. Ekar ioon elōn̄ men eppen ko ilo mour eo an, im kōnke ekar ejjeļo̧k juon rikabwijer priesthood ilo m̧weo m̧ōn; ekar jab bōk elōn̄ kōjeraam̧m̧an ko an priesthood. Juon petriak kōjeraam̧m̧an maron̄ kar leļo̧k n̄an kaenōm̧m̧an e ke ekar aikuj eļap tata.
Rūtto ro, eļan̄n̄e kom̧ij jan̄in de bōk juon petriak kōjeraam̧m̧an, jouj jab inepata! Laajrak in iien ilo jetōb an aolep eoktak. Eļan̄n̄e kwoj 35 ak 85 im ewōr am̧ kōņaan, kōnono ippān bisop eo am̧ kōn bōk kōjeraam̧m̧an eo am̧.
Membōr ro rekāāl an Kabun̄ in, kwonan̄in ke ron̄ kōn petriak kōjeraam̧m̧an ko? Ijjab jeļā kōn iien eo em̧m̧an n̄an bōk juon ke ikar kobatok ilo Kabun̄ in, bōtaab bisop eo aō ejitōnbōro ekar jiron̄ eō kōn petriak kōjeraam̧m̧an ko im kōketak eō n̄an kōppopo n̄an bōk eo aō ālkin aō kar peptaij. Membōr ro m̧ōtta jitōnbōro, kwomaron̄ bōk juon petriak kōjeraam̧m̧an barāinwōt. Irooj enaaj jipan̄ eok kōppopo n̄an iien in em̧m̧an ekwojarjar.
Jen ļōmņak kōn ruo un ko n̄an juon kōjeraam̧m̧an an petriak:
-
Juon petraik kōjeraam̧m̧an epād ie kapilōk eo juon make jān Irooj n̄an kwe.2
-
Juon kōjeraam̧m̧an an petriak ej kwaļo̧k bwij eo am̧ ilo m̧weo im̧ōn Israel.
Kōjeraam̧m̧an in petriak eo am̧ ej barāinwōt juon ennaan jān Jemāmi Ilan̄ im naaj bōlen kitbuuj kallim̧ur ko im kapilōk eo eim̧we n̄an tōl eok ilo aolepān am̧ mour. Juon petriak kōjeraam̧m̧an ejjamin naaj jiron̄ eok aolep men ilo mour eo am̧ ak uwaake aolep kajjitōk ko am̧. Eļan̄n̄e ejjab ba juon iien aorōk ilo mour eo am̧, jab watōke meļeļe in ejjeļo̧k am̧ iien em̧m̧an. Ejja wōt, ejjab ba aolep men ilo kōjeraam̧m̧an eo am̧ renaaj kūrm̧ool ilo mour in. Juon petriak kōjeraam̧m̧an ej n̄an indeeo, im eļan̄n̄e kwoj mour erreo, kallim̧ur ko me rejjab kūrm̧ool ilo mour in renaaj liwaj ilo mour eo tok juon.3
Ilo am̧ bōk juon kean̄ in bwij, kwonaaj jeļā bwe kwoj jān im̧ōn Israel im ineen Ebream.4 N̄an meļeļe aorōk eo an menin, kalimjōk kallim̧ur ko Irooj ekar kōm̧m̧ani n̄an m̧weo im̧ōn Israel kōn Ebream.
Kallim̧ur ko ekitbuuj:
-
“Ro bwijjin renaaj pata (lale Jenesis 17:5–6; Ebream 2:9; 3:14).
-
“Ineen, ak ro bwijjin, renaaj bōk gospel eo im kotak priesthood eo (lale Ebream 2:9).
-
“Jān jerbal in karejar an ineen, ‘aolep nokwe ko an laļ [renaa] jeraam̧m̧an, em̧ool kōn kōjeraam̧m̧an ko an Gospel eo, ko rej kōjeraam̧m̧an ko in lo̧mo̧o̧r, em̧ool mour indeeo’ (Ebream 2:11).”5
Āinwōt ro uwaan Kabun̄ in, jej ajri in bujen ro.6 Jej bōk kōjeraam̧m̧an ko an bujen eo an Ebream ilo ad pokake kien ko im kain̄i ko an gospel in.
Kōppopo n̄an petriak kōjeraam̧m̧an eo am̧ enaaj jipan̄ eok kōļapļo̧k tōmak eo am̧ ilo Jemedwōj Ilan̄ im Jisōs Kraist. Im n̄e kwoj bōk kōjeraam̧man eo an petriak im riiti im kejekļo̧kjeņ kake, kwomaron̄ mije emakijkij ļo̧k.
Būreejtōn Thomas S. Monson ekar kōmeļeļeik, “Ejja Irooj in wōt me ekar kōpooj juon Liaona n̄an Liai ej kōpooje n̄an kwe im n̄a rainin juon menin letok ejeja im aorōk n̄an letok iaļ eo n̄an mour ko ad, n̄an kakōļļeik kauwōtata ko n̄an ad kōjparok, im n̄an ba kajien iaļ eo, em̧ool iaļ eo em̧m̧an—ejjab n̄an juon ānen kallim̧ur, ak n̄an kapijuknen eo ad ilan̄.”7
Bisop ro, pāāren ro, būreejtōn ro an doulul eo an elder ro im Doulul eo an Kōrā ro rejitōnbōro, ritōl ro an ward mijen, m̧aan im kōrā in jerbal in karejar ro, jouj im kōketak likao ro im jiron̄ ro, membōr ro rōrūtto, im membōr kāāl ro me rejjan̄in de bōk petriak kōjeraam̧m̧an eo aer n̄an pukōt tōl eo an Irooj im jipan̄ ilo kōpooj er make n̄an kōm̧m̧ane.
Emakijkij aō jar im riiti petriak kōjeraam̧m̧an eo aō; ej iien otemjej letok n̄an eō kōketak. Ij kile ta eo Irooj ej kōtmene jān eō, im ekar jipan̄ eō ukweļo̧k im ettā. N̄e ij riiti im kejekļo̧kjeņ kake, ij kōņaan mour erreo n̄an bōk kōjeraam̧m̧an ko an kar kallim̧ur kaki.
Ejja āinwōt jeje ko rekwojarjar jej riiti elōn̄ alen ewōr an meļeļe kāāl n̄an kōj tokālik, petriak kōjeraam̧m̧an eo ad enaaj wōr an meļeļe eoktak n̄an kōj ilo iien ko jet. Eo aō ekar wōr juon an meļeļe eoktak kiiō jān ke ikar 30 im ke ikar 50. Ejjab bwe naan ko rej oktak, bōtaab jej lo er ilo juon wāween eoktak.
Būreejtōn Dallin H. Oaks ekar kean̄ bwe juon petriak kōjeraam̧m̧an “ej letok ium̧win im̧we eo an Jetōb Kwojarjar im aikuj riiti im ukōte ium̧win kareel eo an ejja Jetōb in wōt. Meļeļe eo im aorōk eo an juon petriak kōjeraam̧m̧an naaj katakin lain im bar lain ilo jekjek in iien eo kōn kajoor eo an ejja Jetōb in wōt me ekar im̧we [e].”8
Ro jeiū im jatū, ij kwaļo̧k aō kam̧ool bwe Jemedwōj Ilan̄ im Nejin Ejitōnbōro Emake Wōt, Irooj Jisōs Kraist, emour. Rej iakwe kōj. Petriak kōjeraam̧m̧an ko rej menin letok ko rekwojarjar jān Er. N̄e kwoj bōk kōjeraam̧m̧an eo am̧, kwonaaj kile im en̄jake ekōjkan Aer iakwe eok im ekōjkan Aer kalimjōk eok makeļo̧k.
Bok in Mormon ej bar juon kallim̧ur kōn Jisōs Kraist. Im ij kam̧m̧oolol kōn tōl jān juon rikanaan emour, Būreejtōn Russell M. Nelson.
Ij kanooj kam̧m̧oolol kōn ad Rilo̧mo̧o̧r, Jisōs Kraist. Ijtō Jabōt in inaaj kalimjōk wōt E im Jerkakpeje eo An im kabun̄jar n̄an E im leļo̧k kam̧m̧oolol kōn en̄taan eo An. Ijeļā E ekar lukkuun en̄taan kōnke ekanooj m̧wilaļ An iakwe kōj. Ijeļā E ekar jerkakpeje kōnke kōn An iakwe kōj. E ej lukkuun m̧ool in. Ij lukkuun in kam̧ool ilo etan Jisōs Kraist, amen.