Elder Ahmad S. Corbitt

Ritōl Eutiej an Jiljilimjuonn̄oul an Kabun̄ in

Elder Ahmad S. Corbitt ej ba jerbal in karejar aolepen laļ in āinwōt juon rikapilōklōk an Būreejtōnji eo Eutiej an Likao ro ekar jipan̄ boktok n̄an kūr eo an ekāāl “juon maron̄ eļapļo̧k n̄an ron̄jake tōl im naan in kōmeļeļe an rikanaan im rijilōk kōn eļapļo̧k kea im tōmak.”

Kar kūr n̄an jerbal ilo Būreejtōnji eo Eutiej Doulul eo an Likao ro ilo Eprōļ 2020, Elder Corbitt ekar joļo̧k iiō ko jilu rej jem̧ļo̧kļo̧k im jerbal ippān ritōl ro jet an jodikdik ro n̄an kōkajoorļo̧k diktak in epepen eo im n̄an kajjitōk ippāer n̄an niknik ilo bōk konaer ilo jerbal in lo̧mo̧o̧r im mour indeo in.

“Ijjab ļōmņak en̄jake in libijerjer eo aō n̄an kōkajoorļo̧k diktak in epepen eo ejjamin naaj makunļo̧k,” ekar ba. “Er renaaj ritōl ro rem̧m̧anļo̧k jān kōj kōnke renaaj rūttōļo̧k kōn iien ko rem̧m̧an n̄an kōm̧m̧ane jerbal in lo̧mo̧o̧r eo im mour indeeo ilo wāwein eo eutiejļo̧k im kwojarjarļo̧k.”

Ahmad Saleem Corbitt, 60, ekar ļotak ilo O̧kwōj 16, 1962 n̄an James Earl Corbitt im Amelia Corbitt, ilo Philadelphia, Pennsylvania, USA Ilo raan in ļotak eo an kein ka 18, Ahmad ekar kobatok ilo Kabun̄ in, ālkin an jinen im bar jet jein im jatin kar deļo̧n̄ ilo dān in peptaij eo. Ļeo jemen kein karuo (stepfather) ekar peptaij iiō eo tok juon.

Ālikin an jikuuļ ilo Ricks College (kiiō Brigham Young University-Idaho) im jerbal lo Puerto Rico San Juan Mijen eo jān 1982 n̄an 1984 eo, ekar ioone Jayne Joslin ilo juon tūrāāp in tampeļ an rūm̧man ded ro ejjeļo̧k rejtaer. Ripālele in rekar m̧are ilo O̧kwoj 1985 ilo Washington D.C. Temple. Rej jinen im jemān jiljino ajri ro.

Elder Corbitt ewōr an degree jān eo ņae etan kio Stockton University ilo New Jersey im jān Rutgers University School of Law eo. Ekar jerbal āinwōt juon būreejtōn an Dominican Republic Santo Domingo East Mission, stake būreejtōn, rikapilōkllōk n̄an ruo stake būreejtōnji ko, im high councilor.

Brother Corbitt ekar jerbal āinwōt juon trial lawyer, ilo public im government relations, āinwōt juon directōr an Church’s New York Office of Public and International Affairs, im āinwōt juon eria mission specialist.