Nuuj ko an Kabun̄ in
Lale Iiō ko Ļalem in Jerbal in Karejar eo an Būreejtōn Russell M. Nelson āinwōt Būreejtōn eo an Kabun̄ in
Ilo ennaan eo an im̧aan tata ilo public āinwōt kein 17 Būreejtōn an Kabun̄ eo an Jisōs Kraist im Armej ro Rekwojarjar ilo Raan-ko Āliktata, ekar kwaļo̧k ļalem iiō ko remootļo̧k, Būreejtōn Russell M. Nelson ekar kōnono ejjab kōn e make ak kōn Jisōs Kraist innām erreim̧aanļo̧k.
“Irooj aolep iien ewōr im aolep iien enaaj kōmeļeļeiki im im̧we rikanaan ro An,” ekar kean̄. “Irooj ej pād ilo jōbwe eo. Kōj ro rekar ekkapit n̄an kwaļo̧k kam̧ool kōn āt eo Etan ekwojarjar ipeļaakin laļ in naaj wōnm̧aanļo̧k im pukōt n̄an jeļā Ankilaan im ļoor e” (Ilo Ad Etal im Wōnm̧aanļo̧k Ippān Doon,” Liaona, Eprōļ 2018, 6).
Bōk Revelesōn n̄an Tōl Kabun̄ in
Būreejtōn Nelson ekar jerbal kōn tōl eo an Irooj ilo an kar itok itak n̄an 35 laļ ko, ukukōt doulul an Kabun̄ in, kōjerbal technology n̄an kwaļo̧k gospel eo, tōl Kabun̄ in ilo ajeded in nan̄inmej eo, elleļok kūr ko repād ilo bwebwenato, im ejaki jemjerā ko.
Ilo iien eo an āinwōt Būreejtōn an Kabun̄ in, Būreejtōn Nelson ekar kōnono n̄an bukwi taijin Armij ro Rekwojarjar ilo Raan-ko Āliktata im kar loļo̧k kiin̄ ro, būreejtōn ro, im prime minister ro. Ekar kaenōm̧m̧an rijorrāān ro an kakkure im ro jet me raar būrom̧ōj im kar kam̧wilaļļo̧k jemjerā ko ippān ritōl ro reutiej an National Association for the Advancement of Colored People (NAACP), im bōk juon kūr n̄an kōnono ilo 2019 NAACP kweilo̧k ilo Detroit, Michigan, USA.
Kōn revelesōn im kōn rejtake eo an Būreejtōnji eo Kein Kajuon im Doulul eo an Jon̄oulruo Rijilōk ro, ekar barāinwōt kōm̧m̧ani oktak in elōn̄ kakien ilowaan Kabun̄ in.
Iumin im̧we in tōl eo an, ritōl ro an Armij ro Rekwojarjar ilo Raan-ko Āliktata rekar bōk jikin rūkaki in m̧ōko im rūkaki in loļo̧k m̧ōko kōn jerbal in karejar; kar ukukōt jikejuuļ in kweilo̧k ko an Jabōt n̄an ņa jikin pedped ilo m̧weo, rejtak jān Kabun̄ in ekkatak gospel eo; im kar kajjitōk ippān membōr ro n̄an kōjerbal likio im jim̧we in etan Kabun̄ in. Kabun̄ in ekar likūt juon kakien me ekar kōtļo̧k an ripālele ro me raar m̧are ilo kien n̄an liāp ilo tampeļ ilo iien eo wōt rej pojak; kar bar kwaļo̧k juon etan tithing settlement āinwōt tithing declaration; im kar ejake juon kakien ej kōtļo̧k an kōrā ro jerbal āinwōt rikam̧ool ro an liāp ko an tampeļ im kōrā ro, jodikdik ro, im ajri ro me rej membōr erreo an Kabun̄ in n̄an jerbal āinwōt rikam̧ool ro n̄an peptaij ko.
“Juon iaan men ko Jetōb eo emakijkij an im̧we ļōmņak eo aō jān tōre eo kūr in aō ekāāl āinwōt Būreejtōn eo an Kabun̄ in ej ewi jon̄an an Irooj m̧ōņōņō in kwaļo̧k ļōmņak im Ankilaan,” Būreejtōn Nelson ekar ba ilo an Kabun̄ in kweilo̧k eo eļap ilo Eprōļ 2018 (“Revelesōn n̄an Kabun̄ in, Revelesōn n̄an Mour ko Ad,” Liaona, Mae 2018, 94).
Ilo 2020 eo Kabun̄ in ekar keememe rūbuki iiō ko an Visōn eo M̧oktata an Josep Smith, ejjab kōn juon keemem kileplep bōtaab kōn an ritōl ro an Kabun̄ in kajjitōk ippān Armej ro Rekwojarjar ilo Raan-ko Āliktata aolepān laļ in n̄an ekkatak n̄an em̧m̧anļo̧k aer ron̄ ainikien Irooj im emakijkijļo̧k. Ilo juon kōnono an Eprōļ 2020 kweilo̧k eo eļap, Būreejtōn Nelson ekar kwaļo̧k juon kean̄ epād ilo bwebwenato, “Jepļaaktok eo an Tarlep in Gospel eo an Jisōs Kraist: Juon Naan in Kean̄ n̄an Laļ in ilo rūbuki iiō ko,” (ron̄jake “Ron̄jake E,” Liaona, Mae 2020, 91–92).
Tōl Kabun̄ in ilo COVID-19
Kōn jeļā eo an āinwōt juon rim̧wijm̧wij menono eo im̧aan tata bōtaab eļap tata āinwōt rikanaan eo an Irooj im ritōl eo an juon kabun̄ epād aolepān laļ in, Būreejtōn Nelson ekar tōl Kabun̄ in ilo nan̄inmij in COVId-19 me ekar ijjino ilo 2020 eo.
Uwaak eo an Latter-day Saint Charities ko n̄an ajeded in nan̄inmej eo ekar erom uwaak eo eļap tata ilo bwebwenato an Kabun̄ in, kōn kein jipan̄ kar liļo̧k ilo elōn̄ļo̧k jān 150 laļ in.
Ilo Mae 2020 interview ippān Nuuj an Kabun̄, Būreejtōn Nelson ekar ba, “jekdoon ilo kōdo in būrom̧ōj, enaj baj wōr wōt men em̧m̧an jej loi” (in Sarah Jane Weaver, “Video: President Nelson Talks about the ‘Painful’ Decision to Close Temples amid COVID-19,” Nuuj an Kabun̄, Juļae 27, 2020, thechurchnews.com). Men eo em̧m̧an kōn ajeded in nan̄inmej eo, ekar ba, ekar lo wāween ko n̄an kobaik Armej ro Rekwojarjar ilo Raan-ko Āliktata ilo jab iuwe ilo juon baļuun. Kōn technology, Būreejtōn Nelson ekar kōnono n̄an Armij ro Rekwojarjar ilo Raan-ko Āliktata ilo Venezuala im Europe im bar ilo Califoria, Canada, im Okahoma. Ekar bar kōnono n̄an rūm̧m̧an ded ro aolepen laļ in.
Ilo O̧kwōj 2022, Būreejtōn Nelson ekar itok itak itulik in Utah ejkab kein kajuon jān ajeded in nan̄inmej eo būltōn̄tōn̄ ilo M̧aaj in 2020 n̄an bar aje eo an Washington D.C Tampeļ eo.
Kar bōk Gandhi-King-Mandela Peace Prize eo
Morehouse College, juon college an Rikilmej ebun̄bun̄ ilo Georgia, USA, ekar kōjeļļā bwe enaaj kar leļo̧k Gandhi-King-Mandale Peace Prize eo im̧aan tata n̄an Būreejtōņ Nelson. Jikuuļ eo ekar leļo̧k kautiej in ioon rikanaan eo 98-iiō-dettan ilo Eprōļ 13, 2023, ilo Worldhouse Interfaith im Interdenominational Assembly ilo Martin Luther King Jr. International Chapel eo ilo Atlanta.
Nebar in ekar etōņake etan Mahatma Gandhi, Martin Luther King Jr., im Nelson Mandela. Ilo jibadbad eo an, jikuuļ eo ekaba, n̄an juon eo me ej kōkōm̧anm̧anļo̧k aenōm̧m̧an im positive social oktak eo kōn ejjeļo̧k kakkure im ej kōjerbal tōl in aolepān laļ in eo aer n̄an kapen aenōm̧m̧an, jim̧we, oktak, im koba in elōn̄ jān juon.
Būreejtōn Nelson ekar bōk nebar eo ilo video call, im Tabernacle Choir ilo Temple Ssquare rekar al ilo video eo.
Ļalem iiō ko in an rikanaan eo jerbar rekar obrak kōn kōketak n̄an iakwe im kautiej aolep. Ilo juon m̧akūtkūt ilo 2018 kar kemem 40 iiō in revelesōn eo ilo 1978 kōn kōjeraam̧m̧an ko an priesthood me kar leļo̧k n̄an aolep membōr ro rerreo jān aolep nukwi ko, ekar katakin Armij ro Rekwojarjar n̄an “kalōk būrij in karejar ko ijelo̧kin wall in jepelļo̧k” (“Building Bridges,” New Era, O̧kwoj, 2018, 6).