Rikaenōm̧m̧an ro Jej Aikuji
Ewōr ippam̧ anemkwoj in kāālet eo n̄an kāālet jum̧ae ak kōm̧m̧an aeņōm̧m̧an. Ij libjerjer kom̧ n̄an kāālet n̄an erom̧ juon rikaenōm̧m̧an, kiiō im iien otemjej.
Ro jeiū im jatū jitōnbōro, ej juon lan̄lōn̄ n̄an pād ippāmi. Ilo allōn̄ ko jiljino rej jem̧lo̧k ļo̧k, kom̧ ļak kar pād wōt ilo ļōmņak eo aō im ilo jar ko aō. Ij jar bwe Jetōb Kwojarjar enaaj lewaj ta eo Irooj ej kōņaan bwe kom̧ij ron̄ ilo aō kōnono n̄an kom̧ kiiō.
Ilo tōre in iien internship in m̧wijm̧wij eo aō elōn̄ iiō remootļo̧k, ikar jipan̄ juon rim̧wijm̧wij me ekar jep juon ne elukkun ļap an jorrāān. Iien m̧wijm̧wij eo ekar pen. Innām, n̄an kobaikļo̧k n̄an iien eo epen, juon iaan ro ilo kumi eo ekar jab em̧m̧an an jerbal, im rim̧wijm̧wij eo ekar jidimkij an illu. Lukwaļpen an illu, ekar kadkad kōn bakbōk in m̧wijm̧wij eo an eobrak kōn kūj. Ekar jok ilo jibūn peiū!
Aolep ro ilo ruum̧ in m̧wijm̧wij eo—ijello̧kin rim̧wijm̧wij eo ellu—rekar obrak kōn mijak kōn kauwōtata eo an jab ļoor meļļan jerbal in m̧wijm̧wij. Kam̧m̧oolol bwe ikar jab jorrāān. Bōtaab menin ekar waļo̧k ekar lukkuun jelet eō. Ilo awa eo wōt, ikar kallim̧uri eō make bwe jekdo̧o̧n ta ewaļo̧k ilo ruum̧ in m̧wijm̧wij eo aō, ijjamin luuj kantōrool n̄an en̄jake ko aō. Ikar barāinwōt kallim̧ur ilo raan eo n̄an jamin kadkad kōn jabdewōt men ilo illu—men̄e bakbōk in m̧wijm̧wij ko ak naan ko.
Jekdo̧o̧n kiiō, n̄oul iiō tokālik, ij lō aō make ļōmņak eļan̄n̄e bakbōk in m̧wijm̧wij eo ekar kūjkūj me ekar jok ilo peiū ekar ļapļo̧k an baijin in jum̧ae eo ejelet kam̧m̧ao ko ad n̄an doon im elōn̄ jem̧jerā ko ad make rainin. Jouj im jeļā ņae eo āinwōt emōj an jakoļo̧k ilo tōre in an lōn̄ jepel bōro im kōņaan wōt jum̧ae.
Lāj, lo ņotan, im kōnono nana kōn ro jet emakijkijļo̧k aer waļo̧k. Ekanooj ļōn̄ riņakņōk ro, rikien ro, rikam̧ōņōņō ro, im ro eļap kilaer jet ejjab m̧ūjkōk aer ba naan ko renana kōn ro jet. Ekanooj ļap aō inepata bwe ekanooj lōn̄ armej ro āinwōt rej tōmak bwe elukkuun em̧m̧an n̄an liaakļo̧k, kōmattōr, im kōnono nana ņae jabdewōt eo ejjab errā ippāer. Elōn̄ āinwōt rekijooror in kakkure etan bar juon kōn naan ko rekabūrom̧ōjm̧ōj im kōmettak.
Illu ejamin kipel. Lāj ejjab kōkajoorļo̧k juon. Iakwelel ejjamin tōl n̄an uwaak ko reim̧we. Nana eo, jet iien jej lo m̧wil in jum̧ae em̧ool ippān ro m̧ōttad. Jej ron̄ kōn ro me rej jab kaorōk ro pāleer im ajri ro nejier, ro rej kōjerbal jidimkij in illu n̄an kōjbwebweik ro jet, im kōn ro me rej kaje ro uwaan baam̧le eo ilo aer “jab kōnono.” Jej ron̄ kōn an jodikdik ro im ajri ro me rej kōmennin̄ im kōn an rijerbal ro me rej kakkure etan rijerbal ro m̧ōttaer.
Ro jeiū im jatū jitōnbōro, menin ejjab aikuj in āindein. Āinwōt rikaļoor ro an Jisōs Kraist, jej aikuj in erom̧ waanjon̄ak ko kōn ekōjkan ikitōltōl ippān ro jet—eļap tata n̄e eoktak ļōmņak ko ad jān doon. Juon iaan wāween ko repidodo tata n̄an kile juon rikaļoor em̧ool an Jisōs Kraist ej ewi jon̄an an armej eo meanwōd ilo kōm̧m̧an n̄an armej ro jet.
Rilo̧mo̧o̧r ekar kalikkar menin ilo kwaļo̧k ko An n̄an rikaļoor ro ilo laļ ko jim̧or. “Em̧ōņōņō ro Rej Kōm̧m̧an Aenōṃṃan,” Ekar ba.1 “Jabdewōt eo enaaj ubrare anmooņ in jepam̧, kwōn bar oktak n̄an rājetan.”2 Innām, aaet, Ekar letok kapilōk eo me ej idajon̄jon̄e kōj kajjojo: “Kom̧win yokwe ro ri kōjdāte kom̧, im jar kōn ro rej matōrtōr kom̧, im ikkure kake kom̧.”3
M̧okta jān mej eo An, Rilo̧mo̧o̧r eo ekar kakien Rijilōk ro Jon̄oulruo ro An n̄an iakwe doon āinwōt An kar iakwe er.4 Innām Ekar kakobaba, “Ilo men in armej otemjej renaaj jeļā bwe kom̧ij rikaļoora, eļan̄n̄e kom̧ij yokwe doon.”5
Ennaan eo an Rilo̧mo̧o̧r eo ealikkar: rikaļoor ro An rem̧ool rej kalōk, kotak, kōketak, kareel, im im̧we—jekdo̧o̧n jon̄an pen in jekjek eo. Rikaļoor ro rem̧ool an Jisōs Kraist rej rikaenōm̧m̧an ro.6
Rainin ej Palm Sunday. Jej m̧aanjabpopo n̄an kakeememej iien eo eļap tata an aorōk kar ļo̧o̧ke ioon laļ in, eo ej Pinmuur eo im Jerkakpeje eo an Irooj Jisōs Kraist. Juon iaan wāween ko rem̧m̧an tata jemaron̄ kautiej Rilo̧mo̧o̧r eo ej n̄an erom̧ juon rikaenōm̧m̧an.7
Rilo̧mo̧o̧r eo ekar kapidodoik n̄an kōj n̄an anjo̧ ioon aolep nana—ekoba jum̧ae. Lale ekar bōd am̧ ļōmņak: jum̧ae ej nana! Jisōs Kraist ekar kean̄ bwe ro me ewōr “jetōb in jum̧ae” ilo e ejjab jān E, ak ej “jān devil, ej jemān jum̧ae, im [devil] ej pukwōj būruōn armej n̄an aetwerōk kōn illu, ippān doon.”8 Ro rej kōketak jum̧ae rej kōm̧m̧ane ejja wāween eo Setan ekar kōm̧m̧ane, men̄e rej kile ak jaab. “Ejjeḷọk armej ej jerbal n̄an ruo irooj.”9 Jejjab maron̄ rie karōk ko an Setan kōn illu eo ad ejidimkij im kakkure in naan innām ļōmņak bwe jej maron̄ wōt jerbal n̄an Anij.
Ro jeiū im jatū jitōnbōro, ad kōm̧m̧an n̄an doon elukkuun aorōk! Wāween ad kōnono n̄an im kōn ro jet ilo m̧weo, ilo m̧ōn jar eo, ilo jerbal, im online relukkun aorōk. Rainin, ij kajjitōk ippād n̄an ikitōltōl ippān doon ilo juon wāween eutiejļo̧k, ekwojarjarļo̧k. Jouj im kanooj ron̄jake. “Eļan̄n̄e ewōr jabdewōt men wānōk, karbōb, ak em̧m̧an ekkōnono kake ak nebare”10 en̄in jemaron̄ ba kōn bar juon armej—men̄e jiron̄ļo̧k mejān ak ba ilo an jab jeļā—en̄in ej aikuj in jon̄ak in ekōnono eo ad.
Eļan̄n̄e juon ripālele ilo ward eo am̧ ej jepel, ak juon mijenede ej m̧ōkaj an ro̧o̧l, ak juon jodikdik ej pere naan in kam̧ool eo an, rejjab aikuji ekajet eo am̧. Rej aikuj in en̄jake iakwe eo erreo an Jisōs Kraist ej waļo̧k ilo naan ko am̧ im kōm̧m̧an ko.
Eļan̄n̄e juon m̧ōttad ilo social media ewōr ippān ļōmņak ko rekajoor ilo political ak social me rej kakkure aolep men kwoj tōmak ilo, illu, ņa mejļan kōn lāj jān kwe ejjamin naaj jipan̄. Ejaak jem̧doon ko rem̧m̧an ippān ro jet enaaj aikuj eļap jān eok, ak ej lukkuun ta eo ro m̧ōttam̧ rej aikuji.
Jum̧ae ej kadiwōjļo̧k Jetōb eo—aolep iien. Jum̧ae ej kapenļo̧k ļōmņak eo ebōd bwe jum̧ae ej wāween eo n̄an ņa mejļan oktak ko; bōtaab ejjamin. Jum̧ae ej juon kāālet. Kōm̧m̧an aeņōm̧m̧an ej juon kāālet. Ewōr ippam̧ anemkwoj in kāālet eo n̄an kāālet jum̧ae ak kōm̧m̧an aeņōm̧m̧an. Ij libjerjer kom̧ n̄an kāālet n̄an erom̧ juon rikaenōm̧m̧an, kiiō im iien otemjej.11
Ro jeiū im jatū, jemaron̄ ilo m̧ool kōm̧m̧an oktak ilo laļ in—juon armej im juon jelm̧ae doon ilo juon iien. Ewi wāween? Ilo ad kwaļo̧k kilen kōpeļaake oktak in ļōmņak ko ilo m̧ool ilo kautiej im kōnono jouj.
Oktak in ļōmņak ko rej m̧ōttan mour. Ij jerbal aolep raan ippān ro rikarejeran Irooj reniknik me rejjab aolep iien lo juon unin kōnono ilo juon wōt wāween. Rejeļā ikōņaan ron̄jake ļōmņak ko aer im en̄jake ko rem̧ool kōn aolep men ko kōmij kōnono kaki—eļap tata unin kōnono ko raorōk.
Rikakpilōklōk ro aō rem̧m̧an, Būreejtōn Dallin H. Oaks im Būreejtōn Henry B. Eyring, rej waanjon̄ak ilo wāween eo rej kwaļo̧k en̄jake ko aer—eļap tata n̄e reoktak jān ro jet. Rej kōm̧m̧ane menin kōn iakwe erreo n̄an doon. Ejjeļo̧k ej elmakote ke ejeļā ļo̧k jān bar juon im kōn menin aikuj pen ilo an jojomar ļōmņak eo an. Rejjab kwaļo̧k kein kam̧ool ko me aikuji n̄an jiāe ippān doon. Kōnke kajjojo ej obrak kōn iakwe-em̧ool, “iakwe eo erreo an Kraist,”12 ko̧o̧njeļ ko am remaron̄ tōl jān Jetōb eo an Irooj. Ij iakwe im kautiej em̧m̧aan rein ruo rem̧m̧an!
Iakwe-em̧ool ej unokan akweel. Iakwe-em̧ool ej menin letok an jetōb me ej kōm̧m̧an ad julo̧k lukkuun piktok in armej eo, eo ej lōmņak kōn e make im jojomare ļōmņak ko an. Iakwe-em̧ool ej pedped in katak kōn kadkad in juon rikaļoor em̧ool an Jisōs Kraist.13 Iakwe-em̧ool ej kōmeļeļeik juon rikaenōm̧m̧an.
N̄e jej kōttāik kōj make im̧aan Anij im jar kōn aolepān kajoor an būruōd, Anij enaaj letok iakwe-em̧ool iood.14
Ro kar kōjeraam̧man er kōn menin letok eo kwojarjar rej kijenmej im jouj. Rejjab juun m̧aadeik doon im rejjab ļōmņak kōn aorōk eo aer make. Ejjab pidodo kalluik er im jab ļōmņak nana kōn ro jet.15
Ro jeiū im jatū, iakwe-em̧ool ej uwaak eo n̄an jum̧ae eo me ejelet kōj rainin. Iakwe-em̧ool ej iuun kōj “n̄an ineek eddo ko an ro jet”16 ijello̧kin kaddoikļo̧k eddo eo an doon. Iakwe eo erreo an Kraist ej kōtļo̧k kōj “n̄an jutak āinwōt rikam̧ool ro an Anij ilo aolep iien ko im ilo aolep men otemjeļo̧k”17—eļap tata ilo jekjek ko reppen. Iakwe-em̧ool ej kōm̧m̧an bwe jen kwaļo̧k ekōjkan an em̧m̧aan ro im kōrā ro an Kraist kōnono im kōm̧m̧an—eļap tata n̄e rej illu.
Kiiō, ijjab kōnono kōn “aenōm̧m̧an lo ejjeļo̧k ņota.”18 Ij kōnono kōn kōm̧m̧an n̄an ro jet ilo wāween ko me rejejjet ilo am̧ kōjparok bujen eo kwar kōm̧m̧ani n̄e kwoj bōk m̧ōttan kwojkwoj eo. Kwoj bujen n̄an aolep iien keememej Rilo̧mo̧o̧r. Ilo iien ko me renana im robrak kōn jum̧ae, ij kajjitōk ippam̧ n̄an keememej Jisōs Kraist. Jar n̄an bōk peran im māletlet n̄an ba ak kōm̧m̧an ta eo En kar ba im kōm̧m̧ane. Ilo ad ļoor Irooj in Aenōm̧m̧an, jenaaj erom̧ rikaenōm̧m̧an ro An.
Ilo iien in kwomaron̄ ļōmņak bwe ennaan in elukkuun in jipan̄ juon eo kwojeļā kake. Bōlen kwoj kōjatdikdik bwe enaaj jipan̄ e jouj ļo̧k wōt n̄an kwe. Ij kōjatdikdik enaaj! Bōtaab ij kōjatdikdik bwe kwonaaj ilo tum̧wilaļ in etale būruōm̧ n̄an lo eļan̄n̄e ewōr m̧ōttan jiddik in utiej bōro ak ebanban me ej dāpij eok jān erom̧ juon rikaenōm̧m̧an.19
Eļan̄n̄e kwoj m̧ool kōn jipan̄ aiintok Israel im kōn ejaaki jemjerā ko me naaj pād n̄an indeeo, kiiō ej iien eo n̄an door ņai iturejet kūtōtō. Kiiō ej iien eo n̄an kabōjrak akweļap ke ej wāween eo am̧ im ejjeļo̧k bar iaļ. Kiiō ej iien eo n̄an kōbōjrak kōm̧m̧ani men ko me ekōm̧m̧an an ro jet kōjparok ta ko rej kōm̧m̧ani kōn mijak in kalluik eok. Kiiō ej iien eo n̄an kalbwin aolep kein tariņae ko am̧.20 Eļan̄n̄e am̧ kōnono eobrak kōn kakkure ko im lo ņotaan ko, kiiō ej iien eo n̄an doori laļļo̧k.21 Kwonaaj jerkak tok āinwōt juon em̧m̧aan im kōrā ro rekajoor ilo jetōb an Kraist.
Tampeļ eo emaron̄ jipan̄ kōj ilo jibadbad in ad. Ijōņ jej bōk menin letok kwojarjar eo kōn kajoor an Anij, ej letok n̄an kōj maron̄ eo n̄an anjo̧ ioon Setan, im rikōjerak eo an aolep jum̧ae.22 Joļo̧k e jān jemjerā ko am̧! Jeļā bwe jej barāinwōt rie rikapo eo aolep iien jej kōmour likjab in meļeļe ak m̧akoko in metak ilo en̄jake. Ijello̧kin, jemaron̄ kwaļo̧k tūriam̧o kake eo me ej kwaļo̧k kadkad in rikaļoor ro rem̧ool an Jisōs Kraist. Rikaenōm̧m̧an ro rej bōbrae rikapo eo.
Āinwōt juon armej jen erom̧ juon meram em̧ool ioon juon toļ—juon meram me “ejamin ņojak.”23 Jen kwaļo̧k bwe ewōr juon wāween eaeņōm̧m̧an im kautiej n̄an ņa mejļan unin kōnono rekapokpok im juon iaļ in kōmeramļo̧k n̄an jerbali jab errā ko ad. Ilo am̧ kwaļo̧k iakwe-erreo eo me rikaļoor ro rem̧ool an Jisōs Kraist rej kwaļo̧k, enaaj kanooj ļap an Irooj kōļapļo̧k kijejeto ko am̧.
Gospel net eo ej net eo ekileptata ilo laļ in. Anij ekar kajjitōk ippān aolep n̄an itok n̄an E, “kilmeej im mouj, rilokjak im rianemkwoj, m̧aan im kōrā.”17 Ewōr ruum̧ n̄an aolep. Ijoke, ejjeļo̧k ruum̧ n̄an kalijōkļo̧k, liaakeļo̧k, ak akweel an jabdewōt kain.
Ro jeiū im jatū, ijo em̧m̧an tata ej itok wōt n̄an ro me rej joļo̧k aer mour n̄an kalōk ro jet. Rainin ij kajjitōk ippam̧ n̄an etale mour in rikaļoor eo am̧ ilowaan wōt jekjek in wāween eo kwoj kōm̧m̧an n̄an ro jet. Ij kōjeraam̧m̧an kom̧ n̄an kōm̧m̧an jabdewōt oktak ko me remaron̄ in menin aikuj bwe bōnjam̧ en leļo̧k kautiej, jeļā ņae, im ribōk jikin juon rikaļoor em̧ool an Jisōs Kraist.
Ij kōjeraam̧m̧an kom̧ n̄an bōk jikin m̧wil wōtan kōn ettā, kōjdāt kōn meļeļe, im jum̧ae kōn aeņōm̧m̧an.
Anij emour! Jisōs ej RiKraist eo. E ej jeban Kabun̄ in. Jej ro Rikarejeran. E enaaj jipan̄ kōj n̄an erom̧ rikaenōm̧m̧an ro An. Āindein ij kam̧ool ilo āt eo ekwojarjar etan Jisōs Kraist, amen.