Irooj Jisōs Kraist Ej Katakin Kōj n̄an Jerbal in Karejar
Kōn jipan̄ an Rilo̧mo̧o̧r eo ad, jemaron̄ iakwe sip ko An raorōk im jerbal in karejar n̄an er āinwōt An nej kar.
Irooj Jisōs Kraist ekar ba:
“N̄a seperd em̧m̧an; seperd eo em̧m̧an ej leļo̧k mour eo an n̄an sip ko. …
“Āinwōt Jema e jeļā n̄a, im N̄a I jeļā Jema; im Ij likūt Aō mour kōn sip ko.”1
Ilo ukook eo an kajin Greek ilo jeje ko rekwojarjar, naan eo n̄an em̧m̧an ej bar m̧eļeļe in “aiboojoj, bōtata.” Kōn menin rainin, ikōņaan kōnono kōn Seperd eo Em̧m̧an, Seperd eo Aiboojoj, Seperd Bōtata, em̧ool Jisōs Kraist.
Ilo Kallim̧ur Ekāāl, Ej ņaetan “seperd eo e ļap,”2 “Seperd eḷap,”3 im “Seperd eo im Ri Lale [jetōb] ko ad.”4
Ilo Kallim̧ur M̧okta, Aisea ekar je “enaaj naajdik bwij eo An āinwōt juon ri lale sip.”5
Ilo Bok in Mormon eo, Ej ņaetan “seperd eo em̧m̧an”6 im “seperd eo eļap im em̧ool.”7
Ilo Katak im Bujen Ko, Ekar kwaļo̧k, “Kōn menin, N̄a ij pād ilubwiljimi, im N̄a ij seperd eo em̧m̧an.”8
Ilo tōre in ad, Būreejtōn Russell M. Nelson ekar kwaļo̧k: “Seperd eo Em̧m̧an ej kea ilo iakwe n̄an aolep sip ko ilo oror eo An, im kōj jej ro rijipan̄ seperd ro An rem̧ool. Jim̧we eo ad ej n̄an kwaļo̧k iakwe eo An im n̄an kobaik iakwe eo ad make n̄an ro m̧ōttad im rūturid—naajdrik, lale, im kōkkaajriri er—āinwōt n̄e Rilo̧mo̧o̧r eo ekar kōņaan bwe jen kōm̧man.”9
Kiiō epaak, Būreejtōn Nelson eaar ba: “Juon kadkad ej kwaļo̧k kadkad eo em̧ool an Irooj im Kabun̄ eo an emour enaaj aolep iien ejaak, tōl kijejeto n̄an karejar n̄an kajjojo ajri ro nejin Anij im baam̧le ko aer. Kōnke Kabun̄ eo An in, jej āinwōt rikarejar ro An renaaj karejar n̄an juon, āinwōt Ekar kōm̧m̧ane. Jenaaj karejar ilo Etan, kōn kajoor im maron̄ eo An, im kōn An iakwe im jouj.”10
Ke Parisi ro im skraib ro rekar elotaane Irooj, “ba, Armej in ej bōk ri jero̧wiwi im m̧ōn̄ā ippāer,”11 E ekar uwaak ilo An kwaļo̧k jilu bwebwenato ko raiboojoj me jekar jeļā kaki āinwōt pārabōļ eo kōn sip eo ejōbwābwe, būrabōļ eo kōn jāān dekā eo ejako, im būrabōl eo kōn nejin eo ejerwaan.
Ekaitoktok limo n̄an kile bwe ke Luk, rijeje gospel eo, ej kwaļo̧k kadkad in bwebwenato kein jilu, ej kōjerbal naan eo pārabōļ ilo juon wōt, ejjab ilo elōn̄ļo̧k.12 Ej waļo̧k bwe Irooj ej katakin juon katak ejej uwaan kōn bwebwenato ko jilu—bwebwenato ko rej jutak kōn nōm̧ba ko rooktak: 100 sip, 10 jāān dekā, im 2 ļaddik.
Ki namba eo ilo kajjojo bwebwenato kein, mekarta, ej namba juon. Im juon katak jemaron̄ bōk jān namba in ej bwe kwomaron̄ juon rijipan̄ seperd n̄an 100 elder ro im ro renaaj erom elder ro ilo doulul eo an elder ro, ak juon rikapilōk n̄an 10 jiron̄ ro, ak juon rūkaki n̄an 2 ajri in Būraimere, bōtaab kwoj aolep iien, aolep iien jerbal in karejar n̄an er, kea kōn er im iakwe er juon ilo̧k juon, kajjojo. Kwo jamin ba, “Ta juon sip ebwebwe,” ak “Ālkin aolep men, ijjab lukkuun aikuji jāān dekā eo” ak “juon nejin m̧aan ejum̧ae.” Elan̄n̄e kwe im n̄a ewōr ippād “iakwe eo erreo an Kraist,”13 kōj, āinwōt em̧m̧aan eo ilo bwebwenato in sip eo ejōbwābwe, naaj “likūt ruwatimjuonn̄oul im ruwatimjuon … im ilo̧k ilo̧kōnļo̧k eo e jako, n̄an tōre eo [… n̄an tōre eo … n̄an tōre eo jej] loe.”14 Ak āinwōt kōrā eo ilo bwebwenato in jāān dekā eo ejako,. jenaaj “tile ḷaaṃ, im pooke ṃweo, im eḷap an pukote [… niknik] ñan iien eo [… n̄an tōre eo … n̄an tōre eo jej] lo e.”15 Eļan̄n̄e ewōr ippād “iakwe eo erreo an Kraist,” jenaaj ļoor waanjon̄ak eo an baba eo ilo bwebwenato in nejin eo ejerwaan, eo ke ļeo nejin “ej ettoḷọk wōt, … ej kile e, im tūriaṃokake, im ettōr, im bun̄ ioon kōnwan, im mejenmaik e.”16
Jemaron̄ ke en̄jake aorōk eo ilo būruōn em̧m̧an eo me ekar jako wōt juon nejin sip? Ak aorōk eo ilo būruōn kōrā eo me ekar jako juon an jāān dekā? Ak iakwe eo eļap im tūriam̧okake eo ilo būruōn jemen nejin eo ejerwaan?
Lio pāleeō, Maria Isabel, im n̄a kar jerbal ilo Central America, kar pedped ilo Guatemala City. Ijōņ ekar wōr aō iien em̧m̧an n̄an ioon Julia, juon membōr etiljek an Kabun̄ in. Kar im̧we eō n̄an kajjitōk ippān kōn baam̧le eo an. Jinen ekar mej kōn kāānjer ilo 2011 eo. Jemen ekar juon ritōl etiljek ilo stake eo an, jerbal āinwōt juon bisop im āinwōt juon rikakpilōklōk n̄an stake būreejtōn eo an ium̧win jejjo iiō ko. Ekar juon rijipan̄ seperd eo em̧ool an Irooj. Julia ekar jiron̄ eō kōn kijejeto ko an ejjeļo̧k jem̧ļo̧kier n̄an loļo̧k, n̄an jerbal in karejar, im n̄an jerbal. Ilo m̧ool ekar m̧ōņōņō ilo naajrik im lale sip eo eaorōk an Irooj. E kar bar m̧arre im niknik wōt ilo Kabun̄ in.
Jejjo iiō tokelik, ekar jepel, im kiiō ej aikuj in etal n̄an jar make iaan bar juon alen. Ekar en̄jake an jab ruwainene im barāinwōt en̄jake bwe jet armej raar kōraate kōnke kōn jepel eo an. Ekar bōjrak an etal n̄an jar ilo an juon jetōb enana kar kobrak būruōn.
Julie ekar nōbar ilo an kōnono kōn rijpan̄ seperd eo em̧m̧an, eo ekar juon em̧m̧aan eniknik, iakwe im meanwōd. Ikar kanooj keememej en̄jake eo kōn aorōk eo ekar itok n̄an eō ke liin ekar kōmeļeļeik e. Ikar kōnaan wōt kōm̧m̧an juon men n̄an em̧m̧aan in, juon em̧m̧aan me ekar kōm̧m̧an eļap ilo iiō ko.
Liin ekar letok nōm̧ba in cell phone eo an im ikar jino ko̧o̧ļ e, kōjatdikdik n̄an juon iien n̄an ioone. Ālkin jet wiik ko im elōn̄, elōn̄ ko̧o̧ļ ko rekar jab tōprak, āliktata juon raan ekar uwaake talboon eo.
Ikar jiron̄ e bwe em̧ōj aō ioon Julia, leddik eo nejin, im bwe ekar lukkuun po buruō kōn wāween eo ekar jerbal, jerbal in karejar, im iakwe sip eo eaorōk an Irooj ium̧win elōn̄ iiō ko. Ekar jab kōtmen ennaan rōt in. Ikar jiron̄ ļein bwe ikar lukkuun kōņaan loļo̧k e bwe kom̧ro en jeļmae doon, lo mejen doon. Ekar kajjitōk ippa kōn kōttōpar eo aō ilo kajjitōk eo aō n̄an ioone. Ikar uwaak, “Ilukkuun kōņaan ioon baba eo an juon jiron̄ eo em̧m̧an.” Innām ium̧win jejjo jōkōn ko ekar wōr ikōn̄ ilo talboon eo—jejjo jōkon kar āinwōt n̄an n̄a āinwōt mour indeeo. Ekar ba, “N̄āāt im ia?”
Raan eo ikar ioon ļein, ikar karuwaineneiki n̄an kwaļo̧k n̄an eō jet iaan en̄jake ko an ke ekar lo̧ļo̧k, jerbal in karejar, im jerbal n̄an sip eo eaorōk an Irooj. Ke ekar kwaļo̧k jet iaan bwebwenato ko reim̧we, ikar kile bwe tōņ eo an ainikien ekar oktak im ejja jetōb eo wōt me ekar en̄jake elōn̄ kattōn āinwōt juon rijipan̄ seperd eo kar ro̧o̧ltok. Kiiō mejān ekar obrak kōn kōmejaaļaļ ko. Ikar jeļā bwe iien eo in ekar jejjet n̄an n̄a, bōtaab ikar lo bwe ikar jab jeļā ta eo in ba. Ikar jar ilo ļōmņak eo aō, “Jema, jipan̄ eō.”
Ejjab to, ikar ron̄jake aō make ba, “Būratōr Florian, āinwōt juon rijerbal an Irooj, ij joļo̧k am̧ bōd kōn am̧ kar jab pād ijo n̄an kwe. Jouj, jeorļo̧k am bōd. Letok n̄an kōm bar juon iien n̄an kwaļo̧k n̄an kwe bwe kōmij iakwe eok. Bwe kōmij aikuji eok. Bwe kwoj aorōk n̄an kōm.”
Jabōt eo tok juon ļein ekar bar ro̧o̧ltok. Ekar aitok an bwebwenato ippān bisop eo an im kar pād wōt im niknik. Jejjo allōn̄ tokālik ekar mej—bōtaab emōj an kar ro̧o̧ltok. Em̧ōj an rooltok. Ij kam̧ool bwe kōn jipan̄ an Rilo̧mo̧o̧r eo ad, jemaron̄ iakwe sip ko An raorōk im jerbal in karejar n̄an er āinwōt An nej kar. Im kōn menin, ijeņ ilo Guatemala City Irooj Jisōs Kraist ekar bar karool tok juon sip eaorōk n̄an oror eo An. Im Ekar katakin eō juon katak kōn jerbal in karejar me ijjab maron̄ meļo̧kļo̧k. Ilo etan Seperd eo Em̧m̧an, Seperd eo Aiboojoj, Seperd Bōtata eo, em̧ool Irooj Jisōs Kraist, amen.