Kōlm̧enļo̧kjen eo Aō ekar Pen ilo Ļōmņak in Kōn Jisōs Kraist.
Ilo am̧ wōnm̧aanļo̧k ilo niknik n̄an dāpij ļōmņak eo kōn Jisōs Kraist, ij kallim̧ur eok ejjab kōn tōl an lan̄ wōt ak kajoor an lan̄.
Ilo iien Ijtō in aiboojoj, ij ron̄ jar in al in ekajoor “Guide us, O thou great Jehovah.”1
Juon bwebwenato ekabwilōn̄lōn̄ ilo Bok in Mormon ej kwaļo̧k kōn juon likao jān juon baam̧le em̧m̧an etan Alma, eo me jeje ko rekwojarjar ej kōmeļeļeiki āinwōt juon rinana eo ejjab tōmak.2 E kar aejemjem im jeļā kipel, an kōjerbal riab n̄an kōketak ro jet n̄an ļo̧o̧r e. Kailibōkbōk, juon enjeļ ekar waļo̧k n̄an Alma im ro m̧ōttan. Alma ekar okjak n̄an laļ im kar lukkun m̧ōjņo̧ ke rekar jibweļo̧k n̄an m̧weo mōn jemen. Ekar jaje m̧akutkut iumwin jilu raan ko.3 Tokālik, ekar kōmelele bwe ke ekar jaje m̧akutkut im̧aan mejen ro ipeļaakin, kōļmenļo̧kjeņ eo an eaar emourur ke jetōb eo an ej būrom̧ōj, ļōmņak kōn mour eo an n̄an kajekdoon kien ko an Anij. Ekar kōmeleleik kōļmenļo̧kjeņ eo an āinwōt “ikimmaļ kōn ememļo̧kjen kōn jerawiwi ko [an] rellōn̄”4 im “jepool kōn tomede in mej ejjeļo̧k jemļo̧kier.”5
Ilo inepata eo an em̧wilaļ, ekar keememej aer kar katakin e ke ekar jodikdik kōn “itok eo an juon Jisōs Kraist, juon Nejin Anij, n̄an pinmuur kōn jerawiwi ko an laļ.”6 Ālkin ekar kwaļo̧k kōlmenlokjen in im ba: “Ke kōļmenļo̧kjeņ eo aō eaar pen ilo ļōmņak in, iaar kūr ilo buruō: O Jisōs, kwe Nejin Anij, kwōn tūriam̧o kake eō.”7 Ilo an kajjitōk ļo̧k kōn kajoor eo ekwojarjar an Rilo̧m̧o̧o̧r, juon kabwilōn̄lōn̄ ekar waļo̧k: “Ke iaar ļōmņak men in,” ekar ba, “iaar jab bar keememejļo̧k metak ko aō.”8 Ekar kaju en̄jake aenōm̧m̧an im meram̧. Ejjeļo̧k jabdewōt [ekar] eaiboojojlo̧k im tōn̄al āinwōt kar mōņōņō eo aō,”9 ekar kwaļo̧k.
Alma “pen ilo ļōmņak” in kōn Jisōs Kraist. N̄e jenkar kōjerbal naan kein “pen ioon” ilo juon jekjek in kanniōk, jemaron̄ ba, “Ekar pen ilo kein dāpdep eo ilo an kar wōtlok,” meļeļein e maron̄ kair im lukkuun dāpij juon men epen āinwōt juon pedped.
Ilo wāween eo an Alma, kar kōlmenļo̧kjen eo an eo ekar etal im kapen m̧ool in ekajoor kōn en̄taan in pinmuur eo an Jisōs Kraist. Jerbal ilo tōmak ilo m̧ool in, im kōn kajoor im tūriamo̧ eo an Anij, kar kōjparoke jān metak im obrak kōn kōjatdikdik.
Ilo an en̄jake ko ad maron̄ jab ļap āinwōt eo an Alma, mekarta rej aorōk indeeo. Ļōmņak ko ad em̧ōj bar “pen ilo ļōmņak in” kōn Jisōs Kraist im wūjlepļo̧k in tūriamo eo An, im jetōb ko ad rekar en̄jake meram̧ im lan̄lōn̄ ko rej itok.
Kapen Ļōmņak eo kōn Jisōs Kraist
Jar eo aō ilo iien Ijtō in ej bwe ļōļātāt ko ad renaaj ļam̧ļam, kajoorļo̧k, im dāpij ļōmņak in eaorōk ilo Jisōs Kraist ilo būruōer,10 kōtļo̧k bwe en ikutkut im ikdeelel an lutōk tok n̄an kōļmenļo̧kjeņ ko ad, tōl kōj ilo ta ko jej ļōmņaki im kōm̧m̧ani, im boktok lan̄lōn̄ eo em̧m̧an kōn iakwe eo an Rilo̧m̧o̧o̧r.11
Koobrak kōlmenļo̧kjen ko ad kōn kajoor eo an Jisōs Kraist ejjab meļeļein ļōmņak eo ad ej kōn E wōt. Ak ej meļeļein bwe aolepen ļōmņak ko ad rej pād ilo jon̄an iakwe eo An, mour eo An, im katak ko An, im en̄taan in pinmuur eo An im Jerkakpeje eo aiboojooj. Jisōs ejjab aikuj pād ilo juon jikin em̧ōkaj meļo̧klo̧ke, bwe ļōmņak ko ad kōn E rej aolep iien pād im “aolep men [ippād rej kautiej] E!”12 Jej jar im ekkatak ilo ļōmņak ko ad en̄jake ko me rekar kepaakeļo̧k kōj n̄an E. Jej karuwainene n̄an ļōmņak ko ad pija ko rekwojarjar, jeje ko rekwojarjar, im al ko reim̧we n̄an kamera kajjojo ļōmņak ko rej waļo̧k ilo mour in poub ko ad. Iakwe eo ad n̄an E ejjab pinej kōj jān būromōj im ajļo̧k ilo mour in, ak ej kōtlo̧k kōj n̄an etetal ilo apan̄ ko kōn kajoor eo eļap jān jon̄an eo eped ippād make.
Jisōs, ej ļōmņak eo kōn e
Kōn iakwe ej kobrak ubō;
Ak emeeoeo n̄an an mejen loe
Im an pād ej kakkije.13
Keememej, kwoj juon ajri in jetōb nejin Jemed Ilan̄. Āinwōt an Rijilōk Paul kōm̧eļeļe, kōj jej “ro nejin Anij.”14 Kwaar mour āinwōt kwe make m̧okta jān am̧ itok n̄an laļ in. Jemed ekar kōm̧m̧ane juon karōk ejejjet n̄an kōj n̄an itok n̄an laļin, ekkatak, im rool Ippān. E kar jilkintok Nejin Ejitōnbōro bwe kōn kajoor in Pinmuur im Jerkakpeje eo An ejjeļo̧k jemļo̧kin, jej mour im eļļāļo̧k ioon ioon lōb; im ilo an naaj kōjerbal tōmak ilo E im ukweļo̧k jān jerawiwi ko ad,15 jej jeorļo̧k ad bōd im bōk kōjatdikdik eo an mour indeeo.16
Niknik n̄an Mije kōļmenļo̧kjeņ im Jetōb eo Ad
Ilo mour in, jej aikuj lukkun mije kōlmenļo̧kjen im jetōb eo ad.17 Jetōb ko ad rej kōtļo̧k bwe jen mour, kāālet, im lale ta ko rem̧m̧an im nana.18 Jetōb ko ad rej bōk kam̧ool eo bwe Anij ej Jemed, bwe Jisōs Kraist ej Nejin Anij, im bwe katak ko Aer rej ad kein tōl n̄an m̧ōņōņō ilo mour in im ilo mour indeeo eļļāļo̧k ioon lōb.
“Kōlm̧enļo̧kjen eo an Alma ekar pen ilo ļōmņak in kōn Jisōs Kraist. Ekar ukōt mour eo an. Kweilo̧k eo eļap ej juon iien n̄an meļeļe ta eo Irooj enaaj kōņaan bwe kōj jen jeļā im erom̧. Ej barāinwōt bar juon iien n̄an kōļmenļo̧kjeņ kōn eddōkļo̧k eo ad. Ilo an jerbal ko aō bōk eō n̄an aolepen laļin, em̧ōj aō lale ļo̧k juon kajoor in jetōb eļapļo̧k ilo ro rewānōk, membōr ro retiljek ilo Kabun̄ in.
Ļalem iiō ko remootļo̧k, kar kajjitōk ippād n̄an likūt Rilo̧m̧o̧o̧r ilo aolep men jej kōm̧m̧an ilo ad kōjerbal m̧ool in etan Kabun̄ eo an Jisōs Kraist im Armej ro Rekwojarjar ilo Raan ko Āliktata.19 Jej kōnono kōn Etan kōn eļapļo̧k kautiej.
Emān iiō emootļo̧k, ilo kadikļo̧k awa eo n̄an iien kwojkwoj eo, jekar kōlapļo̧k mije k ko ad ioon bōk kwojkwoj eo an Irooj. Jej kōlapļo̧k ad kōļmenļo̧kjeņ kōn Jisōs Kraist im lukkuun m̧ool ilo kallim̧ur eo n̄an iien otemjej keememej E.20
Kōn makeļo̧k iaad kōn ajedeed in nan̄inmej eo ipeļaakin laļin, im jipan̄ eo an Itok, Ļo̧o̧r Eō, katak ko kōn Jisōs rekar ļapļo̧k ilo m̧ōko, jipan̄ kabun̄jar eo ad n̄an Rilo̧mo̧o̧r ilo juon wiik.
Ilo ad ļoore kapilōk eo an Būreejtōn Russell M. Nelson “ron̄jake E,”21 jej kōkāāl ad maron̄ n̄an kile unoojdikdik ko an Jetōb Kwojarjar im n̄an loe pein Irooj ilo mour ko ad.
Kōn kōjeļļā im dedeļo̧k ko an tampeļ ko, ikutkutļo̧k ad deļo̧n̄e m̧weo m̧ōn Irooj im bōk kōjeram̧m̧an ko Ekar kallim̧ur. Jej en̄jake eļapļo̧k kajoor in aiboojoj eo ejjeļo̧k āinwōt an ad Rilo̧mo̧o̧r im Ripinmuur.
Būreejtōn Nelson ekar ba: “Ejjeļo̧k juon men epidodo ak enej make kōm̧m̧an n̄an erom̧ [juon] [rikaļoor] rōt in ekajoor. Mije eo ad ej aikuj in dim ilo Rilo̧mo̧o̧r eo im gospel eo An. Menin ej aikuj kijejeto ko ad ilo kōļmenļo̧kjeņ n̄an reilo̧k n̄an E ilo aolep ļōmņak.”22
Ilo ad mije kōļmenļo̧kjeņ ko ad ioon Jisōs Kraist, aolep men ipeļaakid—jekdoon n̄e kiiō—ej kwaļo̧k jān iakwe eo ad n̄an E. Kōmad ko rejjab aorōk rej jakoļo̧k, im jej joļo̧k men ko me rejjab pedped ioon An meram̧ im m̧wil. Ilo am̧ wōnmaanļo̧k n̄an mije ilo pen ilo ļōmņak in kōn Jisōs Kraist, lōke E, im kōjpārok kien ko An, ij kallim̧ur n̄an kwe ejjab kōn tōl in lan̄ wōt ak kōn kajoor in lan̄—kajoor me ej boktok maron̄ n̄an bujen ko am̧, aenōm̧m̧an n̄an men ko reppen n̄an eok, im m̧ōņōņō n̄an kōjeram̧m̧an ko am̧.
Keememej Jisōs Kraist
Jejjo wiik remootļo̧k, komro Kathy kar lo̧ļo̧k m̧weo m̧ōn Matt im Sarah Johnson. Ilo kilin m̧weo kar juon pija in baam̧le in, juon pija in Rilo̧m̧o̧o̧r eaiboojoj im juon jin̄a in tampeļ eo.
Leddik ro emen nejier, Maddy, Ruby, Claire, im June, rekar kōnono ilo m̧ōņōņō kōn jon̄an aer iakwe jineer.
Emootļo̧k jān juon iiō kiiō in an Sarah jikejuuļ iien an baam̧le eo etal n̄an tampeļ ippān doon bwe leddik ro ren bōk koņaer ilo peptaij n̄an ro uwaan baam̧le eo aer rekar mour m̧okta.
Ilo Nobōm̧ba iiō eo ļo̧k, Sarah ekar jikejuuļ juon an baam̧le iien tampeļ n̄an wiik eo āliktata ilo Tijem̧ba ilo Taije ijelo̧kin Jadede. “Ij kōjatdikdik em̧m̧an ippam̧,” ekar ba n̄an Matt.
Kar kalikkar ke Sarah ewōr an cancer, bōtaab takto rekar kōtmene ke enaaj mour iumwin bar ruo ak jilu iiō. Ilo iien jar, Sarah ekar kwaļo̧k naan in kam̧ool eo ekajoor, ekar ba bwe jekdoon ta men eo enaaj waļo̧k n̄an e, ej iakwe Rilo̧m̧o̧o̧r kōn aolepen būruōn im bwe “mej ekar anjo̧” kōn E. Ilo an Tijem̧ba wōnm̧aanļo̧k, ilo jab kōtmene ājmour eo an Sarah ekar nana ļo̧k, im e kar deļo̧n̄ ilo aujpitōļ. Ilo jibbon̄ in Taije, Tijem̧ba 29, ekar kadedeļo̧k mour eo an ioon laļ. Matt ekar pād turin Sarah ilo aolepen bon̄en eo.
Kōn buruōn erup, im kar lukkun m̧ōk ilo kanniōk im kōlmenļo̧kjen, ekar tōpar tok m̧weo m̧ōn, būrom̧ōj ippān leddik ro nejin. Ke Matt ej kalimjōk ļo̧k taļeboon eo an, ekar kile juon kakeememej in iien tampeļ eo Sarah ekar jikejuuļi n̄an tokālik ilo raan eo. Matt eba, “Ke ikar loe, ikar ļōmņak, menin eban tōprak.”
Bōtaab kōļmenļo̧kjeņ eo an Matt ekar pen ilo ļōm̧ņak in: “Riļo̧m̧o̧o̧r emour. Ejjeļo̧k juon jikin kōm kōņaan pād ie āinwōt juon baam̧le jān m̧weo Imōn ekwojarjar.”
Matt, Maddy, Ruby, Claire, im June rekar tōparļo̧k tampeļ eo n̄an iien eo Sarah ekar jikejuuļi n̄an er. Kōn kemjaļaaļ ej wōtļo̧k ilo mejāer, Matt ekar kōm̧m̧ani peptaij ko ippān leddik ro nejin. Ekar m̧wilaļ aer en̄jake iakwe im ekkejel eo indeeo ippān Sarah, im rekar en̄jake iakwe eļap im jokne in aenōm̧m̧an eo an Rilo̧m̧o̧o̧r. Matt ekar kwaļo̧k ilo meoeo, “Ilo aō en̄jake būrom̧ōj im ajļo̧k, Ij lamōj kōn m̧ōņōņō, ilo aō jeļā kōn karōk in lo̧m̧o̧o̧r eo em̧man an Jema.”
Ilo iien Ijtō in, ij kam̧oole dedeļo̧k im lukkun m̧ool eo an pinmuur eo an Rilo̧m̧o̧o̧r im aiboojoj in Jerkakpeje eo An. Ilo an kōļmenļo̧kjeņ eo am̧ pād wōt ilo pen im n̄an indeeo pād ioon ļōmņak eo ilo Jisōs Kraist, im ilo am̧ wōnmaanļo̧k ilo mije mour eo am̧ eļapļo̧k ilo Rilo̧mo̧o̧r, ij kallim̧ur n̄an eok bwe kwonaaj en̄jake kōjatdikdik eo An, aenōm̧m̧an eo An, im iakwe eo An. Ilo etan Jisōs Kraist, amen.