Pukōt Aenōm̧m̧an eo Am̧ Make
Ij jar bwe kom̧ maron̄ lo aenōm̧m̧an, jipan̄ elōn̄ ro jet n̄an pukōte, im jaketo jaketak.
Ro jeiū im jatu jitōnbōro, em̧ōj ad jeraam̧m̧an kōn katakin eo eim̧we im al ko raiboojoj me raar un̄ur kōj ilo m̧wen̄an in kōppeļo̧k in an kweilo̧k in eļap. Kōmij kam̧oolol kom̧ kōn ami bōk koņaami im ami tōmak.
Rainin inaaj kōnono kōn ta eo ikar ekkatak kake kōn mennin kabwilōn̄lōn̄ eo kōn pukōt aenōm̧m̧an eo an juon make, jekdo̧o̧ņ ta jekjek ko ad. Rilo̧mo̧o̧r ejeļā bwe aolep ajri ro nejin Jemedwōj Ilan̄ rej jan̄nuwaad n̄an bōk aenōm̧m̧an, im Ekar ba bwe Emaron̄ letoke n̄an kōj. Kwoj keememej ke naan ko an Jisōs Kraist kar ļo̧o̧ki ilo bok in Jon: “Aenōm̧m̧an Ij likūt ņa ippemi, aō aenōm̧m̧an Ij lewōj n̄an kom̧. N̄a ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.”1
Ta meļeļe in An ba aenōm̧m̧an im ekōjkan An maron̄ letok n̄an kōj rej waļo̧k kōn jekjek ko an ro me raar ron̄ An kōnono naan ko. Ron̄jake bwebwenato eo ilo Jon kōn iien eo eļap tata ilo jerbal in karejar eo an Kraist. Kajoor ko rekajoor an nana raar kajjieon̄ kabōjrak E im ejjab to kabōjrak rikaļoor ro An.
Erkein naan ko an Rilo̧mo̧o̧r:
“Eļan̄n̄e kom̧ij yokwe eō, kōjparok kien ko aō.
“Im I naaj jar im kajjitōk ippān Jema, im enaaj lewōj n̄an kom̧ bar juon Riaenōm̧m̧an, bwe En pād ippemi indeeo;
“Jetōb in m̧ool; Eo laļ e ban bōk E, bwe e jab lo E, im e jab jeļā E: A kom̧ jeļā, bwe Ej jokwe ippemi, im Enaaj pād ilo kom̧
“I jāmin likūt kom̧ atajinemjen: I naaj iwōj n̄an kom̧.
“A jidik iien, im laļ e jāmin bar lo Eō, a kom̧ij lo Eō; kōn Aō mour, kom̧ naaj mour barāinwōt.
“Ilo raan eo kom̧ naaj jelā N̄a ilo Jema, im kom̧ ilo N̄a, im N̄a ilo kom̧.
“Eo kien ko Aō ippān, im ej kōjparoki, e in ej iakwe eō. Im eo ej yokwe eō: Jema enaaj yokwe e im inaaj yokwe e im Inaaj kwaļok eō n̄an e.
“Judas (jab Iskariōt) e ba n̄an e, Irooj, ekōjkan am̧ naaj kwaļo̧k eok n̄an kōm, im jab n̄an laļ?
“Jisōs e uwaak im ba n̄an e, Eļan̄n̄e armej ej yokwe eō, e naaj kōjparok aō in naan: im naan eo Jema enaaj yokwe e, im kōm naaj itok n̄an e, im jokwe ippān.
“Eo e jab yokwe eō e jab kōjparok naan ko aō, a an Jema eo eo ear jilkintok eō.
“Men kein iaar kōnono n̄an kom̧, aaet rej waļo̧k n̄an kom̧.
“A Ri Kaaenōm̧m̧an, e Jetōb Kwojarjar, eo Jema enaaj jilkintok ilo eta, Enaaj katakin kom̧ men otemjej, im kakememej men otemjej n̄an kom̧, men ko Iar ba n̄an kom̧.
“Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧. N̄an Ij lewōj n̄an kom̧, jab āinwōt an laļ lewōj. En jab pok būruemi, im en jab lōļn̄o̧n̄.”2.
Ikar ekkatak diktata ļalem m̧ool ko jān katak jab in an Rilo̧mo̧o̧r.
M̧oktata, menin letok eo an aenōm̧m̧an ej letok ālkin an wōr ad tōmak n̄an kōjparok kien ko An. N̄an ro me rej membōr ribujen ro an Kabun̄ eo an Irooj, pokake ej ta eo jaar kadede kallim̧ur n̄an kōm̧m̧ane.
Ruo, Jetōb Kwojarjar eo enaaj itok im jokwe ilo kōj. Irooj ej ba bwe ilo ad wōnm̧aanļo̧k wōt n̄an tiljek, Jetōb Kwojarjar eo enaaj jokwe ilo kōj. En̄in ej kallim̧ur eo ilo jar in kwojkwoj eo me Jetōb eo enaaj eo m̧ōttad im bwe jenaaj en̄jake, ilo būruōd im ļōmņak ko, An rikaenōm̧m̧an.
Jilu, Rilo̧mo̧o̧r ej kallim̧ur bwe ilo ad kōjparok bujen ko ad, jemaron̄ en̄jake iakwe eo an Jemedwōj Ilan̄ im Nejin n̄an doon im n̄an kōj. Jemaron̄ en̄jake epaaktok eo Aer ilo mour wabanban ko ad, ejja āinwōt ilo ad naaj n̄e jej jeraam̧m̧an n̄an pād Ippāer n̄an indeeo.
Emen, kōjparok kien eo an Irooj ej aikuji eļapļo̧k jān pokake. Jej aikuj iakwe Anij kōn aolepān būruōd, maron̄, ļōmņak, im jetōb.3
Ro me rejjab iakwe E rejjab kōjparok kien ko An. Im kōn menin rejjamin naaj bōk menin letok eo an aenōm̧m̧an ilo mour in im ilo laļ eo ej itok.
Ļalem, ealikkar bwe Irooj ekar iakwe kōj n̄an kōļļāik wōņāān jerawiwi ko ad bwe jen maron̄—kōn ad tōmak ilo E im ad ukweļo̧k, kōn tokjen Pinmuur eo An—bōk menin letok eo an aenōm̧m̧an eo me “eļļā jān jeļā otemjej,”4 ilo mour in im Ippān indeeo.
Jet iaami, bōlen elōn̄, rejjab en̄jake aenōm̧m̧an eo Irooj ekar kallim̧ur kake. Kwomaron̄ in kar jar kōn aenōm̧m̧an an juon make im kaenōm̧m̧an ilo jetōb. Ak kwomaron̄ en̄jake bwe lan̄ ko rej ikōn̄ kōn akweļap eo am̧ kōn aeņōm̧m̧an.
Ewōr juon rikōjedāt an jetōb eo am̧ me ejjab kōņaan bwe kwe im ro kwoj iakwe n̄an lo aenōm̧m̧an eo. E ejjab maron̄ lan̄lōn̄ kake. Ej jerbal n̄an bōbrae eok jān em̧ool kōņaan lo aenōm̧m̧an eo Rilo̧mo̧o̧r im Jemedwōj Ilan̄ rekōņaan bwe jen bōke.
Kijejeto ko an Setan n̄an katōk dike im akweel ilo ipeļaakid āinwōt eļapļo̧k. Jej lo kein kam̧ool eo kōn an waļo̧k ibwilijin laļ ko im bukōn ko, ilo peļaakid, ilo electronic media, im ilo aolepān laļ in.
Kōn menin ewōr unin n̄an lo̧udin̄din̄: ej Meram eo an Kraist kar likūt ilo mour eo an aolep ajri nin̄inin̄. Kōn menin letok eo ekilep ej itok juon en̄jake kōn ta in meram, juon ikdeelel n̄an iakwe im bōk iakwe. Ewōr juon en̄jake eo ej pād an jim̧we im m̧ool ilo aolep ajri nejin Anij ilo an itok n̄an mour in.
Lo̧udin̄din̄ eo ad kōn aenōm̧m̧an an juon make n̄an ajri ro me rej pād ilo kōjparok eo an armej ro ej jokwe ippāer. Eļan̄n̄e ro me rej rejtak im jipan̄ er kar kate er n̄an bōk menin letok eo an aenōm̧m̧an jān Rilo̧mo̧o̧r eo, renaaj, kōn waanjon̄ak an juon make im kijejeto, kōketak tōmak an ajri ro n̄an karbōb n̄an menin letok eo eļap tata an aenōm̧m̧an.
En̄in ej ta eo jeje ko rekwojarjar ej kallim̧ur: “Katakin juon ajri ilo iaļ eo en etal ie: im n̄e e rūtto ejāmin iļo̧k jān e.”5 Enaaj aikuji eo ej eddo kōn kōjparok eo an ajri eo im naajdik n̄an erreo n̄an bōk menin letok eo an aenōm̧m̧an.
Būrom̧ōj, jej aolep en̄jake metak ke ajri ro kar lale er jān ro jinen im jemen reim̧we—jet iien juon jinen ak jemen emake wōt—im ajri rein tokālik kāālet, ālkin juon tōre in mour an tōmak im aenōm̧m̧an, n̄an bōk iaļ in būrom̧ōj eo.
Jekdo̧o̧n n̄e būromōj in ej waļo̧k, lo̧udin̄din̄ eo aō ej pedped ioon bar juon menin letok jān Irooj rikaļoor ro An rōlōke. En̄in: bwe E ej bōklōn̄tak elōn̄ rikōm̧m̧an aeņōm̧m̧an ro ibwiljin rikaļoor ro An me Ej lōke er. Raar en̄jake aenōm̧m̧an im iakwe eo an Anij. Ewōr ippāer Jetōb Kwojarjar eo ilo būruwier, im Irooj emaron̄ tōl er n̄an pukōtļo̧k sip ko rōjbwābwe.
Ikar lo ilo aolepān mour eo aō aolepān laļ in. Kwar loe barāinwōt. Ilo iien ko, n̄e kwoj tōl n̄an lo̧mo̧o̧ren, emaron̄ in āinwōt lo ilo jide.
Juon iien, ikar baj kajjitōk ippān juon ikar ioone ilo juon tūreep, Kwomaron̄ ke jiron̄ eō jidik kōn baam̧le eo am̧? Bwebwenato eo ekar tōlļo̧k eō n̄an lo juon pija in leddik eo nejin erūtto, eo ekar ba ekar lo apan̄. Ikar ilbōk kōn em̧m̧an eo ilo turin mejān leddik eo ilo pija eo. Ikar en̄jake im̧we n̄an kajjitōk eļan̄n̄e jemaron̄ bōk email address eo an. Leddik eo ekar jōbwābwe ilo iien eo im ļōmņak eļan̄n̄e Anij ewōr jabdewōt ennaan n̄an e. E ekar. Ekar menin “Irooj ej iakwe eok. Ekar aolep iien. Irooj ekōņaan bwe kwon bar ro̧o̧ltok. Kōjeraam̧man ko kallim̧ur kaki am̧ rej pād wōt ilo jikier.
Membōr ro aolepān Kabun̄ in kar en̄jake menin letok eo an aenōm̧m̧an an juon make an Irooj. E ej kōketak aolep n̄an jipan̄ ro jet wōr aer iien em̧man n̄an itok n̄an E im karbōb n̄an ejja aenōm̧m̧an in wōt kōn er make. Innām, renaaj kāālet n̄an kappukōt im̧weo n̄an jeļā ekōjkan aer maron̄ leļok menin leļo̧k in n̄an ro jet.
Diktak in epepen eo enaaj erom rinaajdik epepen eo n̄an tokālik. Lōn̄ļo̧k in an jelet enaaj kwaļo̧k kabwilōn̄lōn̄. Enaaj ajeeded im eddōkļo̧k ilo iien ko, im aelōn̄ in kiin̄ eo an Irooj ioon laļ in enaaj pojak n̄an karuwainene E kōn lamōj ko in hosanna. Enaaj wōr aenōm̧m̧an ioon laļ.
Ij kwaļo̧k aō kam̧ool em̧ool bwe Rilo̧mo̧o̧r eo emour im Ej tōl Kabun̄ in. Ikar en̄jake An iakwe ilo mour eo aō im An iakwe im inepata kōn ajri ro nejin Jemedwōj Ilan̄. Kūr eo an Rilo̧mo̧o̧r n̄an itok n̄an E ej juon joortak in iakwe.
Būreejtōn Russell M. Nelson ej rikanaan eo emour an Anij ilo aolepān laļ in. Ekar ba, “Ij lewaj n̄an eok aō kam̧ool bwe jekdo̧o̧n ta jekjek eo an laļ in im wāween ko am̧, kwomaron̄ jelm̧ae jekļaj kōn lo̧udin̄din̄ im lan̄lōn̄.”6
Ij kwaļo̧k aō iakwe kom̧. Ami tōmak eļap im iakwe rej tōparļo̧k armej ro im kōm̧m̧an bwe Irooj en ukōt bōro ko im bōk juon ikdeelel n̄an leļo̧k n̄an ro jet menin letok eo an aenōm̧m̧an me ej eļļā ļok jān māletlet otemjej.
Ij jar bwe kom̧ maron̄ lo aenōm̧m̧an, jipan̄ elōn̄ ro jet n̄an pukōte, im jaketo jaketak. Enaaj wōr taujin iiiō ko raiboojoj an aenōm̧m̧an n̄e Irooj ej bar itok. Ij lukkuun in kam̧ool ilo lan̄lōn̄ im ilo etan Jisōs Kraist, amen.