Hosana n̄an Anij Eutiejtata
Deļo̧n̄ļo̧k eo eļap an Jisōs Kraist ilo Jerusalem im iien ko reļļap ilo wiik eo m̧okta jān waanjon̄ak in katak ko jemaron̄ ļoori ilo mour ko ad rainin.
Rainin, āinwōt an m̧ōj ba, jej kobaļo̧k ippān Rikūrijin ro ipeļaakin laļin n̄an kautiej Jisōs Kraist ilo Palm Sunday in. Ekepaak 2,000 iiō ko Palm Sunday ej kōkaļļāik jinoin wiik eo āliktata in jerbal in karejar eo an Jisōs Kraist ilo mour in. Ekar wiik eo aorōktata ilo bwebwenato in armej.
Eo im ekar ijjinoe kōn kōjjeļā eo kōn Jisōs ainwōt Messaia eo kar kallim̧ur kake ilo dreļo̧n̄ļo̧k eo An eļap ilo Jerusalem im kajjem̧ļo̧k kōn Drebwāāl eo An im Jerkakpeje eo .1 Kōn karōk ekwojarjar, en̄taan eo An ekar kajem̧ļo̧k jerbal in karejar eo An, kōm̧m̧ane bwe jen maron̄ mour ippān Jemedwōj Ilan̄ n̄an indeeo.
Jeje ko rekwojarjar rej jiron̄ kōj bwe wiik eo ekar ijjinoe kōn jarlepju ko rekar jutak ilo kōjem in deļo̧n̄ ko n̄an jikin eo n̄an loe “Jisōs ri kanaan eo jān Nazeret ilo Galili.”2 Rekar “bōk ra ko raan wōjke pam, im ilen ioon E, im lam̧ōj: Hosana: E ṃōṇōṇō Eo ej itok ilo etan Irooj, eo Kiiñ in Israel.”3
Bwebwenato eo ilo baibōļ etto ej kakeememej eō ilo aō kar ped ilo juon kūr an Kabun̄ in ilo Takoradi, Ghana. Ekabwilōn̄lōn̄, ikar ped ijo ilo Palm Sunday eo.
Ikar tōn ajeji Takoradi Ghana Stake n̄an ejaake Mpintsin Ghana Stake. Rainin, elōn̄ļo̧k jān 100,000 membōr ro an Kabun̄ in ilo Ghana.4 (Jej karuwaineneik Ga Mantse, An Utiej Kiin̄ Nii Tackie Teiko Tsuru II an Accra, Ghana, eo epād ippād rainin.) Iioon Armej rein Rekwojarjar, ikar en̄jake iakwe eo aer eļap im wūjlepļo̧k eo aer n̄an Irooj. Ikar kwaļo̧k aō iakwe eļap n̄an er im bwe Būreejtōn eo an Kabun̄ in ej iakwe er. Ij jitļo̧k n̄an naan ko an Rilo̧mo̧o̧r eo kar je jān Jon: “Bwe koṃwin yokwe doon, āinwōt Iar yokwe koṃ.”5 Rej kile “kweilo̧k in ij iakwe eok.”6
Ilo aō kar kalimjōk lōn̄ļo̧k im laļļo̧k aer laajrak im jijet rein jeiū im jatū rejitōnbōro im baam̧le ko aer ilo chapel eo, imaron̄ loe ilo mājeer meram in naan in kam̧ool eo aer im tōmak eo aer ilo Jisōs Kraist. Ikar en̄jake ikdeelel eo aer n̄an bōnbōn āinwōt ro m̧ōttan Kabun̄ in An ipeļaakin laļ in. Im ke kuwaer eo ekar al, rekar al āinwōt enjeļ ro.
Āinwōt ilo Palm Sunday etto, rikaļoor rein an Jisōs Kraist rekar kuk ippān doon n̄an leļo̧k aer kam̧m̧oolol n̄an E āinwōt ro ilo nam̧ōj in kōjem in deļo̧n̄ ko ilo Jerusalem ro kōn, “Hosanna … : E ṃōṇōṇō Eo ej itok ilo etan Irooj.”7
Em̧ool bar rikabun̄ ro jet ilo juon m̧ōn jar epaak rej bar kautiej Palm Sunday. Ilo aō kar ekōnono jān lokatok eo, ikar kileļo̧k ilo wūņto eo bwe rekar etetalļo̧k ilo iaļ eo kōn lan̄lōn̄ kajopelpel raan wōjke palm ko ilo ippāer, eļap āinwōt rein ilo pija in. Ekar juon men ikar loe iban meļo̧kļo̧k e— aolepemim ilo raan ro raar kabun̄jar n̄an Kiin̄ in kiin̄ ro.
Būreejtōn Russell M. Nelson ekar kipel kōj n̄an kōm̧m̧an bwe Palm Sunday, “en lukkuun ekwojarjar ilo ad keememej, ejjab wōt raan wōjke palm ko rekar kōjopelpeli n̄an kautiej deļo̧n̄ļo̧k eo an Jisōs n̄an Jesuralem, ak jān ad keememej lo̧piden Pein.” Innem Būreejtōn Nelson ej kōnono jān Aiseia, eo ekar ba kallim̧ur eo an Rilo̧mo̧o̧r, ‘Ijjāmin meļo̧kļo̧k eok,” kōn naan kein, “Lo, eṃōj Aō je etaṃ ilo lọpiden Peiū.”8
Irooj ejeļā jinointata bwe mour in epen. Kinej ko an rej kakeememej kōj bwe E ekar “wanlaļļo̧k um̧wier … aolep”9 bwe en maron̄ jipan̄ kōj n̄e jej m̧ōjņo̧ im ad waanjon̄o̧k n̄an “pād wōt ilo iaļ eo am̧,”10 iaļ eo An, bwe “Anij enaaj pād [ipped] indeeo im indeeo.”11
Palm Sunday ekar jab juon wōt iien eļap, bar juon peij ilo bwebwenato kōn raan, awa, im jikin. Deļo̧n̄ļo̧k eo eļap an Jisōs Kraist ilo Jerusalem im iien ko reļļap ilo wiik eo m̧okta jān waanjon̄ak in katak ko jemaron̄ ļoori ilo mour ko ad rainin.
Kōtļo̧k bwe jen lale jet iaan katak kein indeeo me rej āj ilo jerbal in karejar eo An kajjem̧ļo̧k ilo Jerusalem.
M̧oktata, kanaan. N̄an waanjon̄ak, rikanaan eo Zekaraia ilo Kallim̧ur Mokta ekar kanaan kōn deļo̧n̄ļo̧k eo eļap an Jisōs Kraist ilo Jerusalem, em̧ool bar kōmeļeļeik be Enaaj kar uwe ilo juon donkey.12 Jisōs ekar kwaļo̧k m̧oktaļo̧k kōn Jerkakpeje eo An ilo An kar kōpopo n̄an deļo̧n̄eļo̧k jikin eo, ilo an ba:
“Lo, jej wanļōn̄ļo̧k n̄an Jerusalem; im naaj ketak Nejin armej n̄an pris ro reļļap, im n̄an skraib ro; im renaaj liaakļo̧k E n̄an pris eo eutiej im n̄an skraib ro, im rej kaje E n̄an mej,
“Im naaj bokļo̧k Kraist n̄an riaellōn̄ ko n̄an kajirere, im n̄an ken̄taan, im n̄an drebāāl e: im raan eo kein kajilu enaaj bar jerkak.”13
Kein karuo, jemjerā eo an Jetōb Kwojarjar. Josep Smith eaar katakin, “Ejjeļo̧k armej emaron̄ jeļā ke Jisōs ej Irooj eo, ak kōn Jetōb Kwojarjar.”14 Rilo̧mo̧o̧r ekar kallim̧ur rijilōk ro An15 ilo Kejota eo Āliktata16 ilo juon upper room,17 “I jāmin likūt koṃ atajinemjen.”18 Reban kar makeļo̧k iaer n̄an ineek m̧aanļo̧k m̧ool ko an gospeļ in ak enaaj bōk ilo likio in menin letok eo an Jetōb Kwojarjar n̄an tōl er. “Aenōm̧m̧an Ij likūt ņa ippemi, Aō aenōm̧m̧an Ij lewōj n̄an kom̧,” E ekar kallim̧ūr; “Ij lewōj n̄an kom̧, jab āinwōt an laļ lewōj.”19 Kōn menin letok eo an Jetōb Kwojarjar ewōr ippād ejja kōjatdikdik eo—bwe kōj “en maron̄ pād [ippād] iien otemjej”20 im “jān kajoor eo an Jetōb Kwojarjar [jej] maron̄ jeļā m̧ool eo an men ko otemjeļo̧k.”21
Kein kajilu, rikaļo̧o̧raņ. Rikaļooraņ em̧ool ej juon kallim̧ur ejjab likjab, pokake kien ko an indeeo, im iakwe Anij, im m̧oktata im eļaptata. Ejjeļo̧k kalijōkļo̧k. Jarlepju eo rekar leļo̧k aer kam̧m̧oolol kōn raan wōjke palm im nōbar E āinwōt Messaia eo. En̄in kar lukkuun wōn E. Rekar lukkuun leļo̧k aer n̄an E, kabwilōn̄lōn̄ ko An, im katak ko An. Ak menin nōbar eo n̄an elōn̄ armej ekar jab aitok kitien. Jet armej ro m̧oktaļo̧k rekar lam̧ōj, “Hosana,”22 ejjab to rekar oktak im jan̄, “Debwāāl E.”23
Kein kemen, Pinmuur eo an Jisōs Kraist.24 Ilo raan ko An āliktata, m̧okta jān Palm Sunday, E ekar kōm̧m̧ane Pinmuur eo An ekabwilōn̄lōn̄, jān en̄taan eļap ilo Gethsemane n̄an kōm̧m̧an kōjak kake E ilo ekajet, kakkure E ilo ioon debwāāl, im kallūb eo An ilo juon lōb ejjab An. Bōtaab ekar jab bōjrak ijo. Kōn utiej in kūr eo An āinwōt Rilo̧mo̧o̧r eo an aolep ajri ro nejin Jemedwōj Ilan̄, jilu raan tokālik E ekar diwōjļo̧k jān lōb eo, jerkakpeje,25 āinwōt An kar kanaan.
Jej ke wōnm̧aanļo̧k wōt ilo ad kam̧m̧oolol kōn Pinmuur eo an Jisōs Kraist ejenolo̧k? Jej ke en̄jake kajoor in kakwojarjar eo an, kiiō? En̄in ej unin an Jisōs Kraist, Rijeje eo im Rikajjem̧ļo̧k lo̧mo̧o̧r eo ad, kar etal n̄an Jerusalem, n̄an lo̧mo̧o̧ren kōj aolep. Naan kein an Alma rej ke kaim̧we kom̧: “Eļan̄n̄e kom̧ ar en̄jake n̄an al, al in iakwe em̧ool in pinmuur, ikōņaan kajjitōk, kom̧ maron̄ ke en̄jake kiiō?”26 Imaron̄ ba ilo m̧ool, kuwaer eo ilo Takoradi ilo Palm Sunday eo rekar al “al eo kōn iakwe in lo̧mo̧o̧r.”
Wiik eo āliktata in jerbal in karejar eo An ilo mour in, Jisōs Kraist ekar leļo̧k pārabōļ eo kōn virgin ro jon̄oul.27 E ekar katakin kōn jepļaaktok eo An n̄an ro repojak n̄an bōk E, ejjab kōn raan wōjke palm ko ippāer ak bar kōn meram eo an gospel eo ilo er. E ekar kōjerbal pijaan ļaam ko rebbōl im urur, ippān bar jet oil n̄an ankaane kijeek eo, āinwōt juon kōmeļeļe kōn ikdeelel eo ad n̄an mour ilo wāween ko An, im kaorōk m̧ool ko An, im kwaļok meram eo An.
Kwojeļā bwebwenato eo. Virgin ro jon̄oul rej bōk jikin membōr ro ilo Kabun̄ in, im ļāeo pālele ej bōk jikin Jisōs Kraist.
Virgin ro jon̄o̧ul rekar bōk ļaam̧ ko aer im “ilọk bwe ren wōnṃae ḷeo pālele.”28 Ļalem rekar māletlet, pojak kōn oiļ ko ilo ļaam̧ ko aer im jet n̄an kōjerbali tokālik, im ļalem rekar bwebwe, ļaam̧ ko aer rekar marok im ejjeļo̧k oiļ kar kakkoņ. Ke kūr eo ekar itok, “Lo, ḷeo pālele! Koṃwin itōn wōnṃae,”29 im ro ļaļem “remālōtlōt [rekar] bōk m̧ool eo, im [rekar] bōk Jetōb Kwojarjar bwe en aer kein tōl”30 rekar pojak n̄an “aer kiin̄ im aer rileļo̧k kakien,”31 bwe “An aiboojoj enaaj ped ioer.”32 Ro jet ļalem rekar jeparujruj im kajjeon̄ kappok oiļ. Bōtaab erum̧wij. Iien eo ekar wōnm̧aanļo̧k wōt jān er. Ke rekar kōļaļļaļ im akweļap n̄an deļo̧n̄, Irooj ekar uwaak, “I jaje kom̧.”33
Ekōjkan ad nej kar en̄jake eļan̄n̄e Ekar ba n̄an kōj, “I jaje kom̧!”
Kōj, āinwōt virgin ro jon̄oul, ewōr ad ļaam̧ ko, ak ewōr ke ad oiļ? Ij mijak ewōr jet rej baj etal wōt kōn jidik ot oiļ, eļap aer boub ippān kapo ko an laļin n̄an kajim̧we aer kōppopo. Oiļ ej itok jān tōmak im mour kōn kanaan ko im naan ko an rikanaan ro remour, Būreejtōn Nelson, rikakkpilōklōk ro an, im Rijilōk ro Jon̄oulruo. Oiļ ej kobrak jetōb ko ad n̄e jej ron̄ im en̄jake Jetōb Kwojarjar im mour kōn tōl eo ekwojarjar. Oiļ ej lutōktok ilo būruwōd n̄e kāālet ko ad rej kwaļo̧k ad iakwe Irooj im jej iakwe ta eo E ej iakwe. Oiļ ej itok jān ukweļo̧k im kappukot kōmour ilo Pinmuur eo an Jisōs Kraist.
Eļan̄n̄e jet iaami rej kappukot n̄an kanne ta eo jet rej ņae etan “juon bōkaj in kōttōpar,” en̄in: kanne bōkaj eo am̧ kōn oiļ ilo jekjek in denin mour in Jisōs Kraist,34 eo ej bōk jikin mour eo An im katak ko An. N̄an kameeje, kadedeļo̧k etal n̄an juon jikin ettoļo̧k ak juon iien eļap eban kōm̧m̧an bwe jetōb eo am̧ en bōk likio in kōmour im m̧ōņōņō; mour kake katak eo Jisōs Kraist āinwōt kar katakin bwe enaaj. Ikar ba waanjon̄ak ko ekkeinļo̧k; kaorōk kanaan im katak in kanaan ko, jerbale im̧we ko kōn Jetōb Kwojarjar, erom̧ juon rikaļoor em̧ool, im kappukot kajoor in kōmour eo an Pinmuur eo an Irooj. Bōkaj in kōttōpar eo enaaj bōk eok n̄an juon jikin kwokōņaan etal n̄ane—jepļaak n̄an ippān Jem̧ōm̧ ilo Lan̄.
Palm Sunday eo ilo Takoradi ekar juon en̄jake eo eļap an aorōk n̄an n̄a kōnke ij ioone ippān rijar ro retiljek jeiū im jatū. Āindein ilo elōn̄ laļ ko reļlap im aelōn̄ ko reddik ilo peļaakin laļin. Būruō im aō jetōb, āinwōt ko ami, rej kōņaan lam̧ōj, “Hosana n̄an Anij Eutiejtata.”35
Men̄e jejjab jutak ilo jikin deļo̧n̄ļo̧k ko ilo Jerusalem ranin kōn raan wōjke palm ko ilo peid, iien eo enaaj itok, āinwōt kar kanaan kake ilo Revelesōn, “jarlepju eḷap, eo ejjeḷọk armej ej maroñ in bwinier, jān aolep kain armej, bwij, aelōñ, im kajin, [naaj] jutak iṃaan tūroon eo im iṃaan mejān Lamb, im eṃōj aer kōṇak nuknuk ko re mouj, im raan wōjke palm ko ilo peir.”36
Ij likūt ippemi kōjeram̧m̧an eo aō āinwōt juon Rijilōk an Jisōs Kraist bwe kwonaaj niknik ilo am̧ kate eok mour jim̧we im ped ilubwilijin ro, kōn raan wōjke palm ko ippāeir, naaj nebar Nejin Anij, Ripinmuur eļap eo ad aolep. Ilo etan Jisōs Kraist, Amen.