Հետևել Քրիստոսին
Որպես Քրիստոսի հետևորդներ, մենք ուսուցանում և վկայում ենք Հիսուս Քրիստոսի՝ մեր Կատարյալ Օրինակի մասին: Այսպիսով, եկեք հետևենք Նրան՝ հրաժարվելով հակառակությունից։
Այս տարի միլիոնավոր մարդիկ ոգեշնչվել են ավետարանի ուսումնասիրության ծրագրից, որը հայտնի է Փրկչի «Եկ, հետևիր ինձ» հրավերով: Քրիստոսին հետևելը պատահական կամ անկանոն փորձառություն չէ: Դա շարունակական պարտավորություն է և ապրելակերպ, որը պետք է առաջնորդի մեզ բոլոր ժամանակներում և բոլոր տեղերում: Նրա ուսմունքները և Նրա օրինակը սահմանում են Հիսուս Քրիստոսի յուրաքանչյուր աշակերտի ուղին: Եվ բոլորը հրավիրված են քայլելու այս արահետով, քանի որ Նա հրավիրում է բոլորին գալ Իր մոտ՝ «սև թե սպիտակ, ստրուկ թե ազատ, այր թե կին, … բոլորը նույնն են Աստծո համար»։
I.
Քրիստոսին հետևելու առաջին քայլը հնազանդվելն է նրան, ինչը Նա սահմանեց որպես «օրենքի մեջ ամենամեծ պատվիրանը».
«Սիրիր քո Տեր Աստծուն քո ամբողջ սրտով, քո ամբողջ հոգով, քո ամբողջ մտքով։
Սա է առաջին ու ամենամեծ պատվիրանը։
Երկրորդը նման է սրան. «Սիրիր քո ընկերոջը, ինչպես ինքդ քեզ։
«Այս երկու պատվիրաններից են կախված ամբողջ օրենքն ու մարգարեները»։
Աստծո պատվիրանները ապահովում են առաջնորդող և հաստատուն ուժ մեր կյանքում: Մահկանացու կյանքի մեր փորձառությունը նման է փոքրիկ տղայի և նրա հոր պատմությանը, որոնք օդապարուկ էին թռցնում քամոտ օրը: Երբ օդապարուկը ավելի վեր բարձրացավ, քամիները քաշեցին փոքրիկ տղայի ձեռքին միացած թելը: Մահկանացու քամիների ուժգնությունից անտեղյակ՝ նա առաջարկեց կտրել թելը, որպեսզի օդապարուկը կարողանա ավելի վեր բարձրանալ: Նրա իմաստուն հայրը խորհուրդ տվեց չանել դա, բացատրելով, որ պարանն է, որ օդապարուկը պահում է վերևում մահկանացու քամիների դեմ: Եթե մենք բաց թողնենք թելը, օդապարուկը ավելի բարձր չի թռչի: Այն կքշվի այս քամիներից և անխուսափելիորեն ցած կընկնի։
Այդ կարևոր թելը ներկայացնում է այն ուխտերը, որոնք կապում են մեզ Աստծո՝ մեր Երկնային Հոր և Նրա Որդու՝ Հիսուս Քրիստոսի հետ: Երբ մենք պատվում ենք այդ ուխտերը՝ պահելով Նրանց պատվիրանները և հետևելով Նրանց փրկագնման ծրագրին, Նրանց խոստացած օրհնությունները մեզ հնարավորություն են տալիս սավառնել դեպի սելեստիալ բարձունքներ:
Մորմոնի Գիրքը հաճախ հայտարարում է, որ Քրիստոսն է «լույսն աշխարհի»: Երբ հարություն առած Տերը հայտնվեց նեփիացիներին, բացատրեց այդ ուսմունքը՝ ասելով նրանց. «Ես օրինակ եմ ծառայում ձեզ համար»: «Ահա, ես եմ լույսը, որը դուք պետք է բարձր պահեք, այն, ինչ դուք տեսաք ինձ անելիս»։ Նա մեր կատարյալ օրինակն է: Մենք սովորում ենք, թե ինչ է Նա ասել և արել՝ ուսումնասիրելով սուրբ գրությունները և հետևելով մարգարեական ուսմունքներին, ինչպես նախագահ Ռասսել Մ. Նելսոնը հորդորել է մեզ անել: Հաղորդության արարողության ժամանակ ամեն Հանգստության օր մենք ուխտ ենք կապում «միշտ հիշել նրան և պահել նրա պատվիրանները»:
II.
Մորմոնի Գրքում Տերը մեզ տվել է այն հիմունքները, որոնք Նա անվանել է «Քրիստոսի վարդապետություն»: Դրանք են՝ հավատքն առ Տեր Հիսուս Քրիստոսը, ապաշխարությունը, մկրտությունը, Սուրբ Հոգու պարգև ստանալը, մինչև վերջ համբերելը և ինչպես մի փոքր երեխա դառնալը, ինչը նշանակում է վստահել Տիրոջը և ենթարկվել բոլոր բաներին, որ Նա պահանջում է մեզանից։
Տիրոջ պատվիրանները երկու տեսակ են՝ մշտական, ինչպես Քրիստոսի վարդապետությունը, և ժամանակավոր: Ժամանակավոր են այն պատվիրանները, որոնք անհրաժեշտ են Տիրոջ Եկեղեցու կամ հավատարիմների կարիքների համար ժամանակավոր հանգամանքներում, բայց պետք է մի կողմ դրվեն, երբ կարիքն անցնի: Ժամանակավոր պատվիրանների օրինակ են Տիրոջ հրահանգները Եկեղեցու վաղ ղեկավարությանը` սրբերին Նյու Յորքից Օհայո, Միսսուրի և Իլինոյս տեղափոխելը և վերջապես ռահվիրաների արտագաղթը դեպի Միջլեռնային Արևմուտք առաջնորդելը: Թեև այս պատվիրանները ժամանակավոր էին, բայց մինչ դրանք ուժի մեջ էին, պետք է կատարվեին։
Որոշ մշտական պատվիրանների լայնորեն կատարման համար զգալի ժամանակ է պահանջվել։ Օրինակ, նախագահ Լորենզո Սնոուի հայտնի քարոզը տասանորդի օրենքի մասին շեշտեց մի պատվիրան, որը տրվել էր ավելի վաղ, բայց դեռևս չէր կատարվում Եկեղեցու բոլոր անդամների կողմից: Այն կրկին շեշտադրման կարիք ուներ այն հանգամանքներում, որոնց բախվել էին Եկեղեցին և նրա անդամները: Կրկին շեշտադրումներ կատարելու անհրաժեշտություն է նաև առաջացել՝ Վերջին Օրերի Սրբերի կամ Եկեղեցու առջև ծառացած ներկա հանգամանքների պատճառով: Դրանք ներառում են մեկ սերունդ առաջ նախագահ Գորդոն Բ. Հինքլիի կողմից հրապարակված ընտանիքի մասին հայտարարությունը և նախագահ Ռասսել Մ. Նելսոնի վերջին կոչը, որ Եկեղեցին ճանաչվի հայտնությամբ տրված իր անունով՝ Հիսուս Քրիստոսի Վերջին Օրերի Սրբերի Եկեղեցի:
III.
Մեր Փրկչի մեկ այլ ուսմունք, կարծես, պահանջում է կրկին շեշտադրում մեր օրերի հանգամանքներում:
Սա շատ կոշտ և վիրավորական խոսքերի ժամանակ է հանրային հաղորդակցության մեջ և երբեմն նույնիսկ մեր ընտանիքներում: Հանրային քաղաքականության հարցերի շուրջ սուր տարաձայնությունները հաճախ հասարակական և անձնական հարաբերություններում հանգեցնում են թշնամանքի, նույնիսկ ատելության։ Թշնամության այս մթնոլորտը երբեմն նույնիսկ կաթվածահար է անում կարևորագույն հարցերի վերաբերյալ օրենսդրություն ընդունելու կարողությունները, որտեղ քաղաքացիների մեծամասնությունը տեսնում է հանրային շահերից ելնելով որոշ գործողությունների հրատապ անհրաժեշտություն:
Ի՞նչ պետք է ուսուցանեն և անեն Քրիստոսի հետևորդները թունոտ հաղորդակցությունների այս ժամանակաշրջանում: Որո՞նք էին Նրա ուսմունքներն ու օրինակները:
Հատկանշական է, որ Հիսուսի ուսուցանած առաջին սկզբունքներից մեկը, երբ Նա հայտնվեց նեփիացիներին, հակառակությունից խուսափելն էր: Թեև Նա ուսուցանեց դա կրոնական վարդապետության շուրջ վեճերի համատեքստում, նրա բերած պատճառները հստակորեն վերաբերում են քաղաքականության, հանրային քաղաքականության և ընտանեկան հարաբերությունների հաղորդակցություններին և հարաբերություններին: Հիսուսն ուսուցանել է.
«Նա, որ ունի հակառակության ոգին, ինձանից չէ, այլ դևից է, որը հակառակության հայրն է, և նա դրդում է մարդկանց սրտերը՝ բարկությամբ վիճելու մեկը մյուսի հետ:
Ահա, սա իմ վարդապետությունը չէ՝ բարկության դրդել մարդկանց սրտերը մեկմեկու դեմ. այլ այս է իմ վարդապետությունը, որ այդպիսի բաները պիտի վերացվեն»:
Նեփիացիների մեջ Իր հետագա ծառայության ընթացքում Հիսուսն ուսուցանեց այլ պատվիրաններ, որոնք սերտորեն կապված էին հակառակության դեմ Իր արգելքի հետ: Աստվածաշնչից մենք գիտենք, որ Նա նախկինում ուսուցանել էր դրանցից յուրաքանչյուրը Իր մեծ Լեռան քարոզում, սովորաբար հենց նույն լեզվով, որը հետագայում օգտագործեց նեփիացիների մեջ: Ես կմեջբերեմ աստվածաշնչյան ծանոթ լեզվով.
«Սիրեք ձեր թշնամիներին, օրհնեք ձեզ անիծողներին, բարիք արեք ձեզ ատողներին և աղոթեք ձեզ չարչարողների ու հալածողների համար»։
Սա Քրիստոսի ամենահայտնի պատվիրաններից է՝ ամենահեղափոխականը և ամենադժվարը հետևելու համար: Այնուամենայնիվ, դա Նրա հրավերի ամենահիմնական մասն է, որ բոլորը հետևեն Իրեն: Ինչպես ուսուցանել է նախագահ Դեյվիդ Օ. Մակքեյը, «Աստծո հանդեպ սեր դրսևորելու ավելի լավ միջոց չկա, քան մերձավորների հանդեպ անշահախնդիր սեր ցուցաբերելը»:
Ահա ևս մեկ հիմնարար ուսմունք Նրա կողմից, ով մեր կատարյալ օրինակն է․ «Երանի խաղաղարարներին, որովհետև նրանք Աստծու որդիներ կկոչվեն»։
Խաղաղարարնե՛ր: Ինչպես կփոխվեին անձնական հարաբերությունները, եթե Քրիստոսի հետևորդները հրաժարվեին կոպիտ և վիրավորական խոսքերից իրենց բոլոր հաղորդակցություններում:
Անցյալ տարի գերագույն համաժողովում նախագահ Ռասսել Մ. Նելսոնը մեզ հղեց այս մարտահրավերները.
«Հիսուս Քրիստոսի ճշմարիտ հետևորդին բացահայտելու ամենահեշտ ձևերից մեկն այն է, թե որքան կարեկից է մարդը ուրիշների հանդեպ։ …
Հիսուս Քրիստոսի ճշմարիտ աշակերտները խաղաղարարներ են: …
Փրկչին պատվելու լավագույն եղանակներից մեկը խաղաղարար դառնալն է»:
Եզրափակելով իր ուսմունքները նա ասել է. «Հակառակությունն ընտրություն է: Խաղաղարարությունն ընտրություն է: Դուք ունեք ձեր ազատ կամքը՝ ընտրելու հակառակություն կամ հաշտություն: Ես հորդորում եմ ձեզ ընտրել խաղաղարար լինել՝ այժմ և միշտ»։
Հնարավոր հակառակորդները պետք է սկսեն իրենց քննարկումները՝ գտնելով ընդհանուր հիմքեր, որոնց շուրջ բոլորը համաձայն են:
Որպեսզի հետևենք մեր Կատարյալ Օրինակին և Նրա մարգարեին, մենք պետք է գործադրենք այն, ինչը հայտնի է որպես Ոսկե կանոն. «Այն ամենը, ինչ կամենում եք, որ մարդիկ ձեզ անեն, այդպես և դուք արեք նրանց, որովհետև սա են օրենքը և մարգարեները»։ Մենք պետք է սիրենք և բարիք անենք բոլորին: Մենք պետք է խուսափենք հակառակությունից և խաղաղարար լինենք մեր բոլոր շփումներում: Սա չի նշանակում հրաժարվել ձեր սկզբունքներից և առաջնահերթություններից, այլ ավելի շուտ դադարեցնել կոշտ հարձակումները ուրիշների վրա՝ իրենց սկզբունքների և առաջնահերթությունների պատճառով: Դա այն է, ինչ արեց մեր Կատարյալ Օրինակը Իր ծառայության մեջ: Դա այն օրինակն է, որը Նա թողեց մեզ համար, երբ Նա հրավիրեց մեզ հետևել Իրեն:
Չորս տարի առաջ այս համաժողովում նախագահ Նելսոնը մեզ մարգարեական մարտահրավեր տվեց մեր օրերի համար.
«Դուք պատրա՞ստ եք թույլ տալ, որ Աստված տնօրինի ձեր կյանքում։ Պատրա՞ստ եք թույլ տալ, որ Աստված ամենամեծ ազդեցությունն ունենա ձեր կյանքում: Թույլ կտա՞ք, որ Նրա խոսքերը, Նրա պատվիրաններն ու ուխտերը ազդեն ձեր ամենօրյա քայլերի վրա: Թույլ կտա՞ք, որ Նրա ձայնը գերակշռի մյուս ձայներին»:
Որպես Քրիստոսի հետևորդներ, մենք ուսուցանում և վկայում ենք Հիսուս Քրիստոսի՝ մեր Կատարյալ Օրինակի մասին: Այսպիսով, եկեք հետևենք Նրան՝ հրաժարվելով հակառակությունից։ Երբ մենք իրականացնում ենք մեր նախընտրած քաղաքականությունը հանրային գործողություններում, եկեք որակավորվենք Նրա օրհնությունների համար՝ օգտագործելով խաղաղարարների լեզուն և մեթոդները: Մեր ընտանիքներում և այլ անձնական հարաբերություններում եկեք խուսափենք այն ամենից, ինչը ներառում է դաժանություն և ատելություն։ Եկեք ձգտենք լինել սուրբ, ինչպես մեր Փրկիչը, որի սուրբ անունով ես վկայում եմ և հրավիրում Նրա օրհնությունը՝ օգնելու մեզ լինել Սրբեր: Հիսուս Քրիստոսի անունով, ամեն: