Vahe 2

1 Nīfai 1–5

Talateú

ʻOku maʻu ʻe he kau palōfitá ʻa e fakahā mei he Tamai Hēvaní maʻa ʻEne fānaú (vakai, ʻĀmosi 3:7 ), pea ʻoku fakatolonga ʻe he ngaahi tohi folofola kuo hikí ʻa ʻenau ngaahi lea fakakikite maʻá e ngaahi toʻu tangata ʻo e kahaʻú. ʻOku fakatātaaʻi ʻe he lekooti ʻi he 1 Nīfaí ha sīpinga ʻoku toutou hoko ʻi he moʻui ʻa e kau palōfita tokolahi: Naʻe lotu ʻa Līhai, maʻu ha fakahā naʻe kau ai ʻene mamata ki he Fakamoʻuí, lea fakatokanga ki hono kakaí, pea naʻe liʻaki ia ʻe ha tokolahi ʻo kinautolu naʻá ne lea fakatokanga ki aí. Naʻe feinga ha kakai tokolahi ke toʻo ʻene moʻuí. (Vakai, 1 Nīfai 1:5–20.) ʻE ʻaonga ki he kau akó ʻenau vakai ki he sīpinga ko ʻení ʻi he moʻui ʻa Līhaí, ʻi he moʻui ʻa e kau pālofita kehe ʻi he kuonga muʻá, pea ʻi he moʻui ʻa e Palōfita ko Siosefa Sāmitá.

ʻOku ʻomai ʻe he ʻuluaki vahe ʻe nima ʻo e 1 Nīfaí ha faingamālie ke toe houngaʻia lahi ange ai ʻa e kau akó ʻi he ngaahi lea ʻa e kau palōfitá pea mo e ngaahi folofola toputapu ʻokú ne fakatolonga mai kinautolú.

Ngaahi Tokāteline mo ha Ngaahi Tefitoʻi Moʻoni

ʻOku ui ʻe he ʻEikí ʻa e kau palōfitá ke lea fakatokanga ki Heʻene fānaú pea fakamoʻoni ki he moʻoní (vakai, 1 Nīfai 1:4–20; 2:2).
ʻOku foaki ʻe he ʻEikí ʻa e ʻaloʻofa ongongofuá kiate kinautolu ʻoku ngāue ʻaki ʻa e tui kiate Iá (vakai, 1 Nīfai 1:14, 20).
ʻOku tuku mai ʻe he ʻEikí ha founga ke tau tauhi ai ʻEne ngaahi fekaú (vakai, 1 Nīfai 2:11–20; 3:7–28; 4:1–38; 5:8).
ʻOku fakatolonga mai ʻe he ngaahi tohi folofolá ʻa e folofola ʻa e ʻEikí (vakai, 1 Nīfai 5).

Ngaahi Fokotuʻu ki hono Akoʻí

1 Nīfai 1:4–20; 2:2. ʻOku Ui ʻe he ʻEikí ʻa e Kau Palōfitá ke Lea Fakatokanga ki Heʻene Fānaú pea Fakamoʻoni ki he Moʻoní

Fakaafeʻi e kau akó ke nau aleaʻi e founga kuo nau fai ʻi ha hoko mai ha ngaahi lea fakatokanga ʻi heʻenau moʻuí. ʻE ʻaonga e ongo fehuʻi ko ʻení kiate koe:

Ko e hā nai ha ngaahi sīpinga ʻo ha ngaahi lea fakatokanga te tau ala maʻu?
Ko e hā ʻoku ʻikai ke tau faʻa tokanga ai he taimi ʻe niʻihi ki he ngaahi fakatokangá, neongo ʻetau ʻiloʻi ʻoku totonu ke tau tokanga ki aí?

Naʻe tauhi totonu ʻe Līhai ki hono uiuiʻi fakapalōfitá ʻo ne lea fakatokanga ki he kakai ʻi Selusalemá ʻo fakatatau ki he ngaahi fakahā kuó ne maʻú. Ke tokoni ki he kau akó ʻi hono fakamanatu ʻo e ngaahi fakatokanga naʻe fai ʻe Līhai ki he kakai Siú, vahevahe tolu e kalasí. ʻOange ki he kulupu takitaha ha taha ʻo e ngaahi potufolofola ko ʻení ke nau lau, pea fakaafeʻi kinautou ke tali e ngaahi fehuʻi ʻi laló.

Ko e hā e ngaahi founga naʻe faitatau ai e ngaahi meʻa naʻe aʻusia ʻe Līhaí mo ia naʻe aʻusia ʻe he kau palōfita kehé?
Ko e hā e ngaahi faitatau ʻokú ke sio ki ai ʻi he mata-meʻa-hā-mai ʻa Līhaí mo e ngaahi meʻa naʻá ne aʻusia kimui aí pea mo e ngaahi meʻa ko ia naʻe aʻusia ʻe he Palōfita ko Siosefa Sāmitá?
Ko e hā e lea fakatokanga naʻe fai ʻe Līhai ki he kakaí?

Fakaafeʻi e ngaahi kulupú ke nau vahevahe mo e kalasí ʻa e meʻa ne nau lau ʻo kau kia Līhaí pea mo e ngaahi tali naʻa nau maʻu ki he ngaahi fehuʻí.

Ko e hā ha ngaahi fakatokanga kuo fai mai kimuí ni ʻe he Palesiteni ʻo e Siasí?
ʻOku tali fēfē ʻe he kakaí ʻa e fakatokanga ʻa e palōfita ʻo e ʻaho ní ʻi hono fakafehoanaki atu ki hono tali ʻe he kakaí ʻa e pōpoaki ʻa Līhaí?
Ko e hā e meʻa ʻokú ne ʻoatu kiate koe ʻa e falala ke ke muimui ʻi he faleʻi ʻa e palōfitá?

1 Nīfai 1:14, 20. ʻOku Foaki ʻe he ʻEikí ʻa e ʻAloʻofa Ongongofuá Kiate Kinautolu ʻOku Ngāue ʻAki ʻa e Tui Kiate Iá

Fakaafeʻi e kau akó ke nau lau ʻa e 1 Nīfai 1:20 pea fakatokangaʻi e meʻa ʻoku talaʻofa ʻe Nīfai te ne fakahā mai kiate kitautolú (vakai foki, veesi 14). Fokotuʻu ange ki he kau akó ke nau valivali ʻa e kupuʻi lea ko e “ngaahi ʻaloʻofa ongongofua [ʻa e ʻEikí]” ʻi heʻenau ngaahi folofolá. Kole ange leva ke nau huke hake ki he Molonai 10:3 pea fakatokangaʻi e meʻa naʻe enginaki mai ʻe Molonai ke tau manatuʻi mo fakalaulauloto ki aí. (ʻI he vahe ʻuluaki ʻo e Tohi ʻa Molomoná, ʻoku talaʻofa ai ʻa Nīfai te ne fakahā mai kiate kitautolu ʻa e ngaahi ʻaloʻofa ongongofua ʻa e ʻEikí. ʻI he vahe fakaʻosi ʻo e tohí, ʻoku fakahinohino ai ʻe Molonai ʻa e tokotaha ʻokú ne lau e tohí ke ne “manatuʻi hono lahi ʻo e ʻaloʻofa ʻa e ʻEikí.”)

Kole ki he kau akó ke huke hake ki he lea ʻa ʻEletā Tēvita A. Petinā he peesi 14–15 ʻi he tohi lēsoni ʻa e tokotaha akó. (ʻOku toe maʻu foki e lea ko ʻení ʻi he DVD ʻoku ʻoatu fakataha mo ʻení A.) Kapau te ke ngāue ʻaki ʻa e DVD, tomuʻa sio ʻi he foʻi vitioó ke ke mateuteu ke taʻofi ia ʻi he taimi totonu kae fai hoʻomou fealēleaʻakí.) Fakaafeʻi e kau akó ke nau lau (pe fakafanongo) ki he ongo ʻuluaki palakalafi ʻo e leá, ʻo nau kumi ʻa e ngaahi tali ki he fehuʻi ko ʻení:

Ko e hā ʻa e ngaahi ʻaloʻofa ongongofua ʻa e ʻEikí?

ʻE lava pē ke ke hiki he palakipoé ʻa e ngaahi ʻaloʻofa ongongofua naʻe ʻomi fakaholoholo ʻe ʻEletā Petinaá: “ngaahi tapuakí, mālohí, maluʻí, ngaahi ongoʻi paú, tatakí, angaʻofá, fakafiemālié, poupoú, mo e ngaahi meʻafoaki fakalaumālié. Fakatokangaʻi ange ʻoku fuʻu “fakatāutaha mo fakafoʻituitui” e ngaahi ʻaloʻofa ongongofua ko ʻení pea ʻoku tau maʻu kinautolu ʻmei he ʻEiki ko Sisū Kalaisí pea koeʻuhi pē ko e ʻEiki ko Sisū Kalaisí pea ʻoku fou mai pē ia ʻi he ʻEiki ko Sisū Kalaisí.”

Fakaafeʻi e kau akó ke nau lau (pe fakafanongo) ki he palakalafi hono tolu ʻi he lea ʻa ʻEletā Petinaá. Kole ange ke nau lisi e ngaahi sīpinga kehe ʻo e ngaahi ʻaloʻofa ongongofua ʻe lava ke tānaki atu ki ʻolungá.

Fakakaukauʻi hano fai ha ʻekitivitī ʻe taha pe lahi ange ʻo e ngaahi ʻekitivitī ko ʻení ke tokoni ki he kau akó ke nau ʻiloʻi e ngaahi ʻaloʻofa ongongofua ʻa e ʻEikí ʻoku hā ʻi he Tohi ʻa Molomoná:

Kapau ʻoku ʻiloʻi ʻe he kau akó ʻa e fakamatala ʻi he 1 Nīfai 1–5, kole ange ke nau fokotuʻu mai ha ngaahi meʻa ne hoko ʻi he ngaahi vahe ko iá ʻoku fakahā mai ai e ngaahi ʻaloʻofa ongongofua ʻa e ʻEikí—ʻa e ngaahi tāpuaki ʻoku “fakatāutaha mo fakafoʻituituí.” Hiki e ngaahi potufolofolá he palakipoé ʻi he taimi ʻoku nau talaatu aí.
Kapau ʻoku ʻikai ʻiloʻi lelei ʻe he kau akó ʻa e fakamatalá pea ʻoange ha ngaahi miniti siʻi ke nau lau fakavaveʻi ai pē ʻa e 1 Nīfai 1–5, ʻo kumi e ngaahi sīpinga ʻo e ngaahi ʻaloʻofa ongongofua ʻa e ʻEikí. ʻE ala kau he ngaahi sīpingá ʻa e 1 Nīfai 2:16, ʻa ē ʻoku fakamatala ai ʻa Nīfai ki hono fakamolū ʻe he ʻEikí ʻa hono lotó ko e tali ki heʻene lotú, mo e 1 Nīfai 3:8, ʻa ē ʻoku fiefia ai ʻa Līhai ʻi heʻene ʻiloʻi fakapapau kuo faitāpuekina ʻe he ʻEikí ʻa hono fohá. ʻI heʻenau fokotuʻu atu ha ngaahi kupuʻi folofolá, hiki e fakamoʻoni fakafolofolá ʻi he palakipoé. Hili iá pea fakaafeʻi kinautolu ke nau lau leʻolahi e ngaahi kupuʻi folofolá pea vahevahe ʻenau ngaahi fakakaukau fekauʻaki mo iá.
Kole ki he kau akó ke nau fakakaukau ki ha ngaahi kupuʻi folofola ʻi he Tohi ʻa Molomoná ʻoku nau fakahā ʻa e ngaahi ʻaloʻofa ongongofua ʻa e ʻEikí. ʻI heʻenau fokotuʻu atu pē ha kupuʻi folofolá, tohiʻi e fakamoʻoni fakafolofolá ʻi he palakipoé. Hili iá pea fakaafeʻi kinautolu ke nau lau leʻolahi e ngaahi kupuʻi folofolá pea vahevahe ʻenau ngaahi fakakaukau fekauʻaki mo iá.
Fakamahinoʻi ange ʻoku faʻa fakafou mai ʻa e ngaahi ʻaloʻofa ongongofua ʻa e ʻEikí ʻi he fakahaofí ʻo hangē ko hono akoʻi mai ʻi he veesi 20.Vahevahe ʻa e kalasí ki ha kulupu ʻe tolu. Vahe ki he kulupu ʻuluakí ʻa e 1 Nīfai 1–7, ki he kulupu hono uá ʻa e 1 Nīfai 8–14, pea ki he kulupu hono tolú ʻa e 1 Nīfai 15–22. Kole ange ke nau sio ki he ʻuluʻi fakamatala ʻo e ngaahi vahé ki he ngaahi taimi naʻe fakahoko ai ʻa e ngāue fakahaofí. Hiki he palakipoé ʻa e ngaahi meʻa naʻa nau maʻú. Mahalo ʻe ʻohovale e kau akó ʻi heʻenau sio ʻoku fakamatalaʻi ʻi he meimei vahe kotoa pē ʻi he ʻuluaki Nīfaí ʻa hono fakahaofi ʻo ha tokotaha pe ha falukunga kakai. Ko e tefitoʻi kaveinga ia ʻi he Tohi ʻa Molomoná ʻa e ngāue fakahaofí.

Fakatatau ki he 1 Nīfai 1:20, ko hai ʻokú ne maʻu ʻa e ngaahi ʻaloʻofa ongongofua ʻa e ʻEikí? (“Kakai kotoa pē kuó ne filí.”)
Ko e hā e meʻa ʻoku pehē ʻe Nīfai ʻokú ne fakafeʻungaʻi e kakaí kae fili kinautolú?

Fakaafeʻi ha tokotaha ako ke ne lau e lea ko ʻení, ʻa ia ʻoku fakamatalaʻi ai ʻe ʻEletā Petinā hono teuteuʻi kitautolu ʻe he tuí kae lava ke fili kitautolu ke tau maʻu e ngaahi ʻaloʻofa ongongofua ʻa e ʻEikí. Tokoni ki he kau akó ke nau fakatokangaʻi e kaunga ʻa e founga ʻoku tau fakaʻaongaʻi ʻaki ʻetau tauʻatāina ke filí, pe mālohi ke filí, ki heʻetau mateuteu ke maʻu e ngaahi tāpuaki ko ʻení. (ʻE lava ke ke hiki e lea ko ʻení ʻi he palakipoé kimuʻa pea fai e kalasí.)

“Ko hotau lotó mo ʻetau fakaʻamu vivilí mo ʻetau talangofuá ʻokú ne fakapapauʻi mai pe ʻoku tau kau koā he kakai fili ʻa e ʻOtuá. …

“… Ko e ngaahi tefitoʻi taumuʻa ʻo e meʻaʻofa ʻo e tauʻatāina ke filí ke tau lava ʻo feʻofaʻaki pea fili ki he ʻOtuá. Ko ia ʻoku tau hoko ai ko e kakai fili ʻa e ʻOtuá pea tau fakaafeʻi mai ʻEne ngaahi ʻaloʻofa ongongofuá lolotonga ʻoku tau fakaʻaongaʻi ʻa ʻetau tauʻatāina ke filí ke fili ki he ʻOtuá” (ʻi he Conference Report, ʻEpeleli 2005, 107; pe Liahona, Mē 2005, 101; naʻe mataʻitohi fakahihifi ʻi he tatau totonú).

ʻOkú ke fakakaukau ʻoku ʻuhinga ki he hā ʻa e pehē “ke fili ki he ʻOtuá”?
Ko e hā ha ngaahi founga kuó ke fakaʻaongaʻi ai hoʻo tauʻatāina ke filí ke ʻofa ki he niʻihi kehé pea fili ki he ʻOtuá?
ʻOkú ke pehē ʻoku fekauʻaki fēfē ʻetau feʻofaʻakí mo ʻetau tauʻatāina ke filí?
Ko e fē ha taimi kuó ke fakatokangaʻi ai ʻa e ngaahi ʻaloʻofa ongongofua pe ngāue fakahaofi ʻa e ʻEikí ʻi hoʻo moʻuí pe ʻi he moʻui ʻa ha taha ʻokú ke ʻiloʻi? (ʻE lava pē ke ke fakatauhoa e kau akó ke nau talanoa ʻo kau ki he ngaahi aʻusia ko ʻení. Hili ʻenau maʻu ha taimi feʻunga ke nau fevahevaheʻaki aí, kole ange ki hanau niʻihi ke nau fakamatala ki ha faʻahinga meʻa ne nau ako meiate kinautolu naʻa nau hoá.)

1 Nīfai 2:11–20; 3:7–28; 4:1–38; 5:8. ʻOku Tuku Mai ʻe he ʻEikí ha Founga ke Tau Tauhi ai ʻEne Ngaahi Fekaú

Fakaafeʻi e kau akó ke nau lau ʻa e 1 Nīfai 3:1–5.

Ko e hā e fekau ʻoku fai kia Līhai mo hono ngaahi fohá ʻi he ngaahi veesi ko ʻení?
ʻOkú ke fakakaukau ko e hā hono ʻuhinga naʻe pehē ai ʻe Leimana mo Lēmiuela “ko e meʻa faingataʻa” ʻa e fekau ko ʻení”?

ʻE lava pē ke ke fakakau ʻi he konga ʻo e fealēleaʻaki ko ʻení haʻo talaange naʻe maile ʻe 180 mei Selusalema ki he Tahi Kulokulá. Kuo “fononga [ʻa Līhai mo hono fāmilí] ʻi ha ʻaho ʻe tolu” ʻo mavahe atu mei he feituʻú ni (vakai, 1 Nīfai 2:5–6). Ko ha fononga ʻeni naʻe ʻikai siʻi hifo ʻi he ʻaho ʻe 12 ki he 14 he fononga ʻe taha mei Selusalema ki honau ʻapi fakataimi ʻi he teleʻa ko Lēmiuelá. (Vakai ki he mape ʻi he peesi 471 ʻi he tohi lēsoni ʻa e tokotaha akó).

Kole ki ha tokotaha ako ke ne lau mei he tohí pe lau maʻuloto ʻa e 1 Nīfai 3:7 . (Kapau te ke fie maʻu pea ʻe lava pē ke ke fakatauhoa e kau akó ke nau fetokoniʻaki ʻi hono ako maʻuloto ʻo e vēsí ʻo kapau kuo teʻeki ai ke nau maʻuloto ia.)

ʻOkú ke pehē naʻe ʻiloʻi fēfē ʻe Nīfai ʻe teuteu ʻe he ʻOtuá ha foungá?

Kapau ʻokú ke ongoʻi ʻe ʻaonga ke vakai ʻa e kau akó ki hono faikehekehe ʻo e ʻulungāanga ʻo Nifai mo Samú pea mo e ʻulungāanga ʻo Leimana mo Lēmiuelá, fakaafeʻi ha vaeua ʻo e kalasí ke nau ako fakalongolongo pē ʻa e 1 Nīfai 2:11–14. Fakaafeʻi kinautolu ke nau kumi ha ngaahi fakaʻilonga ʻo e ʻuhinga naʻe talangataʻa ai ʻa Leimana mo Lēmiuela ki he fekau ʻa e ʻEikí. Fakaafeʻi e toenga ʻo e kalasí ke nau lau ʻa e veesi 16–20 pea fakapapauʻi hono ʻuhinga naʻe mateuteu ange ai ʻa Nīfai mo Samu ke talangofua ki he ʻEikí. Kole ki he kau akó ke nau vahevahe mai ʻenau lau ʻanautolú.

Fakamanatu nounou mo e kau akó ʻa e ongo ʻuluaki feinga ko ia ke maʻu mai e ʻū lauʻi peleti palasá (vakai, 1 Nīfai 3:10–21 mo e 1 Nīfai 3:22–28). Tokoni ki he kau akó ke nau fakafehoanaki ʻa e ngaahi tali naʻe fai ʻe Leimana mo Lēmiuelá ki he ngaahi ola ʻo e ngaahi tali naʻe fai ʻe Nīfai mo Samú.

ʻE lava ke ke fakamahinoʻi ange ko e ʻuhinga ʻe taha naʻe tui ai ʻa Nīfai ʻe malava ʻe he ʻOtuá ʻo tuku mai ha halá ko ʻene tui ki he ngaahi talanoa ʻi he folofolá. Lau mo e kau akó ʻa e 1 Nīfai 4:2.

ʻOku hoko fēfē ʻa e talanoa ʻoku hā he veesi ko ʻení ko ha sīpinga ʻo e tefitoʻi moʻoni ʻi he 1 Nīfai 3:7?
Naʻe fekauʻaki fēfē ʻa e talanoa ko ʻení mo e ngaahi tūkunga naʻe fehangahangai mo e fāmili ʻo Līhaí?

Vahe ki he kau akó ke nau toe fakamanatu ʻa e 1 Nīfai 3:28–4:38 pea kumi e ngaahi sīpinga ʻo e founga naʻe tokoniʻi ai ʻe he ʻOtuá ʻa Nīfai ke fakakakato ʻa e ngaahi meʻa kuó Ne fekaú, ʻo aʻu pē ki he ngaahi taimi naʻe hangē ai he ʻikai lava e ngaahi ngāue ko iá. Tuku ke nau vahevahe ha ngaahi sīpinga mei he ngaahi meʻa naʻa nau maʻú. (ʻE lava ke kau he ngaahi sīpingá ʻa e 1 Nīfai 3:29; 4:6–7, 10–11, 20, 31.)

Ko e hā ha ngaahi meʻa kuó ke aʻusia kuo nau fakahā atu hono moʻoni ʻo e 1 Nīfai 3:7? Kuo tākiekina fēfē nai ʻe he ngaahi aʻusiá ni ʻa hoʻo tui ki he ʻEikí?

1 Nīfai 5. ʻOku Fakatolonga Mai ʻe he Ngaahi Folofolá ʻa e Folofola ʻa e ʻEikí

ʻAi ke sio e kau akó ki he 1 Nīfai 5:10–16 pea hiki he palakipoé ʻa e ngaahi meʻa naʻe ʻi he ngaahi peleti palasá.

Fakatatau ki he 1 Nīfai 5:17, ko e hā e meʻa naʻe hoko kia Līhai tupu mei heʻene ako e ngaahi folofola ko ʻení?
ʻOkú ke pehē ko e hā nai hono ʻuhinga ʻe ʻomi ai ʻa e ngaahi tāpuaki ʻoku fakamatala ki ai ʻi he veesi 10–16 ʻe hono ako ʻo e ngaahi meʻa ʻi he ʻū lauʻi peleti palasá ʻa ia ʻoku lau ki ai ʻi he veesi 17?
Naʻe fakahaaʻi fēfē ʻe Līhai mo Nīfai ʻa ʻena mahuʻingaʻia ʻi he folofolá?
Ko e hā ha meʻa ʻe lava ke tau fai ke fakahā ʻaki ʻoku tau mahuʻingaʻia ʻi he folofolá?

Fakamatala ange ʻi he hili ha taʻu ʻe 300 tupu ʻo e mavahe ʻa Līhai mo hono fāmilí mei Selusalemá, naʻe ʻilo ʻe hono hakó ha falukunga kakai ne hola mo ʻenau ngaahi kuí mei Selusalema. Naʻe ʻikai ʻave ʻe he kakai ko ʻení, ʻa ia naʻa nau nofo ʻi he taimí ni ʻi ha kolo naʻe ui ko Seilahemala, mo kinautolu ha ngaahi folofola kuo tohi. Fakaafeʻi e kau akó ke nau lau ʻa e ʻAmenai 1:14–17.

Ko e hā e meʻa naʻe hoko ki he tui mo e lea ʻa e kakai ko ʻení koeʻuhí ko e ʻikai haʻanau lekooti ʻo e folofolá? ʻOkú ke pehē ko e hā naʻe uesia ai kinautolu ʻi he ʻikai ko ʻeni ke nau maʻu e ngaahi folofolá?
Ko e hā nai ʻenau ongoʻi ʻi heʻenau ʻiloʻi naʻe maʻu ʻe Mōsaia mo hono kakaí ha lekooti ʻo e folofolá?

Fakamatala ange naʻe fakatahaʻi e kakai ʻo Seilahemalá mo e kau Nīfaí ʻo puleʻi kinautolu ʻe Mōsaia. Hili e pekia ʻa Mōsaiá, naʻe hoko hono foha ko Penisimaní ko e tuʻi ki he kakaí.

Fakaafeʻi e kau akó ke nau lau ʻa e Mōsaia 1:1–5. ʻOku kau ʻi he ngaahi vēsí ni ʻa e ngaahi lea ʻa e Tuʻi ko Penisimaní ki hono ngaahi fohá.

Ko e hā e lelei naʻe maʻu ʻe he Tuʻi ko Penisimaní mo hono kakaí koeʻuhí ko hono fakatolonga mai ʻo e ngaahi lauʻi peleti palasá?
Ko e hā ʻe lava ke tau fai ke fakatolonga ai e ngaahi folofolá maʻatautolu pea mo hotau fāmilí?

Fakaafeʻi e kau akó ke nau vahevahe ʻenau ongó ʻi he taimi ʻoku nau ako fakamātoato ai e Tohi ʻa Molomoná. ʻE lava foki ke ke fakaafeʻi kinautolu ke nau fai ha kiʻi tohi nounou ki ha mēmipa ʻo e fāmilí pe ki ha foha pe ʻofefine ʻi he kahaʻú ʻo fakamatalaʻi ange ki ai hono mahuʻinga ʻo e Tohi ʻa Molomoná ʻi heʻenau moʻuí. Fokotuʻu ange ke nau fakamatalaʻi ʻi he tohí ʻa e ongo ʻoku nau maʻu ʻi heʻenau ako iá.

Poupouʻi e kau akó ke nau ako fakaʻaho e Tohi ʻa Molomoná pea nau lau pe toe lau kakato e Tohi ʻa Molomoná ko e konga ʻo e kalasí ni.