Vahe 25

ʻAlamā 8–12

Talateú

ʻI he aʻu hake ʻa ʻAlamā ke malanga ʻi he kolo ko ʻAmonaihaá, kuo ʻosi fuʻu tōtuʻa ʻa e hē ia ʻa e kakai tokolahi ʻi ai mei he moʻoní. Naʻe fakafisingaʻi ʻe he kakai faiangahala ʻi ʻAmonaihaá ʻa ʻAlamā ʻi he taimi pē ko iá pea nau kapusi ia ki tuʻa mei honau koló. Neongo iá, naʻe ʻaʻahi kiate ia ha ʻāngelo, mo fakalotolahiʻi ia, pea ʻoange kiate ia ha fekau mei he ʻEikí ke ne toe foki ki ʻAmonaihā. Hili ha foki “fakavavevave” ʻa ʻAlamā ki he koló, (ʻAlamā 8:18), naʻá ne fetaulaki mo ʻAmuleki, ʻa ia kuo ʻosi teuteuʻi ʻe ʻhe ʻEikí ke hoko ko ha hoa faifekau moʻo ʻAlamā. Naʻe tali ʻe ʻAlamā mo ʻAmuleki ʻa e loto fefeka ʻa e kakaí ʻaki hano akoʻi kiate kinautolu ʻa e ngaahi tokāteline mālohi ʻo fekauʻaki mo e palani ʻo e huhuʻí, Toetuʻú, mo e Fakamāú. ʻI hono aleaʻi ʻe he kau akó ʻa e ngaahi akonaki ko ʻení, te ke lava ʻo tokoniʻi kinautolu ke nau ʻiloʻi ʻoku tau maʻu ʻa e mālohi ke fakafanongo ki he kau tamaioʻeiki ʻa e ʻOtuá pea talangofua ki Heʻene ngaahi fekaú ʻi he taimiʻoku langa ai ʻetau fakamoʻoní ʻi he palani ʻo e fakamoʻuí. ʻOku tau teuteuʻi kitautolu ki he hāʻele mai ʻa e ʻEikí.

Ngaahi Tokāteline mo ha Ngaahi Tefitoʻi Moʻoni

• Kapau ʻoku tau faivelenga mo ngāue tōtōivi, ʻe tuku mai ʻe he ʻEikí ha founga ke fakahoko ʻaki ʻa e meʻa kuó Ne fekau maí (vakai, ʻAlamā 8).

• ʻE toe tuʻu ʻa e kakai kotoa pē mei he maté ʻo nau tuʻu ʻi he ʻao ʻo e ʻEikí ke fakamāuʻi kinautolu (vakai, ʻAlamā 11:41–46; 12:1–18).

• Naʻe tuku mai ʻe he ʻOtuá ʻa e palani ʻo e huhuʻí ke fakahaofi kitautolu mei hotau tuʻunga tō ki laló (vakai, ʻAlamā 12:22–37).

Ngaahi Fokotuʻu ki hono Akoʻí

ʻAlamā 8 Kapau ʻoku tau faivelenga mo ngāue tōtōivi, ʻe tuku mai ʻe he ʻEikí ha founga ke fakahoko ʻaki ʻa e meʻa kuó Ne fekau maí

Tohiʻi ʻa e ʻAlamā 8:8–18 he palakipoé. Vahe ua e kalasí. Vahe ki he vaheua ʻe taha ke nau lau e ngaahi veesi ko ʻení, ʻo kumi ha ngaahi fakamatala kau ki he kakai ʻo ʻAmonaihaá. Vahe ki he vaeua ʻe tahá ke nau lau e ngaahi veesi tatau pē, ka nau kumi e ngaahi fakamatala kau kia ʻAlamaá. Fakamatala ange ko ʻene ʻosi pē ʻenau lau iá, te ke fai ange e ngaahi fehuʻi kau ki he meʻa naʻa nau laú.

ʻI he ʻosi pē laukonga ʻa e kau akó, fai ange e ngaahi fehuʻi ko ʻení ʻo fekauʻaki mo e kakai ʻo ʻAmonaihaá:

• Ko e hā e ola hono “maʻu ʻe Sētane ha mālohi lahi ʻi he loto ʻo e kakai” ʻo ʻAmonaihaá? (Vakai, ʻAlamā 8:9.)

• Naʻe fakamatalaʻi fēfē ʻe he kakai ʻo ʻAmonaihaá ʻa e ngaahi akonaki mo e ngaahi founga ngāue ʻa e Siasí? (Vakai, ʻAlamā 8:11.)

• Ko e hā e meʻa naʻe fai ʻe he kakaiʻo ʻAmonaihaá kia ʻAlamaá (Vakai,ʻAlamā 8:9–13.)

• Ko e hā ne fuʻu ʻulungāanga kovi pehē ai e kakaí kia ʻAlamaá, neongo ko e taulaʻeiki lahi ia ki he Siasí? (Vakai, ʻAlamā 8:11–12.)

Fai e ngaahi fehuʻi ko ʻení ʻo kau kia ʻAlamā:

• Ko e hā e meʻa naʻe fai ʻe ʻAlamā ʻi hono fakafisingaʻi ia ʻi ʻAmonaihaá? (Vakai, ʻAlamā 8:14.)

• Ko e hā e meʻa naʻe hoko ke liliu ai e fakakaukau ʻa ʻAlamaá ʻi he ʻai ke ne mavahe mei ʻAmonaihaá? (Vakai, ʻAlamā 8:14–16.)

• ʻOkú ke pehē naʻe tākiekina fēfē ʻe he pōpoaki ʻa e ʻāngeló ʻa e fakakaukau ʻa ʻAlamā ki heʻene ngāue fakafaifekau ki ʻAmonaihaá? (Vakai, ʻAlamā 8:15–17.)

• Ko e hā ʻoku lava ke tau ako mei he tali ʻa ʻAlamā ki he pōpoaki ʻa e ʻāngeló? Vakai, ʻAlamā 8:18.)

Fakaafeʻi e kau akó ke nau lau ʻa e ʻAlamā 8:19–27. Kole ange ke nau kumi ha fakamoʻoni naʻe fakaava ʻe he ʻEiki ha founga ke malangaʻi ʻe ʻAlamā ʻa e ongoongoleleí ʻi ʻAmonaihā.

• Ko e hā ne kehe ai hono tali ʻe ʻAmuleki ʻa ʻAlamaá mei he founga naʻe tali ʻaki ia ʻe he kakai kehe ʻi ʻAmonaihaá? (Vakai, ʻAlamā 8:20.)

Vahevahe mo e kau akó ʻa e ngaahi lea ko ʻení. ʻOku maʻu foki ʻa e lea ʻa Palesiteni Monisoní ʻi he DVD ʻoku ʻomai fakataha mo ʻení A. Fehuʻi pe ʻoku felāveʻi fēfē ʻa e ngaahi fakamatala ko ʻení mo e meʻa naʻe aʻusia ʻe ʻAlamā ʻi ʻAmonaihaá.

Naʻe akonaki ʻa Palesiteni Tōmasi S. Monisoni, ko e Palesiteni hono 16 ʻo e Siasí ʻo pehē: “Manatuʻi ko e ngāue ko ʻení ʻoku ʻikai ko haʻata ngāue. Ko e ngāue ia ʻa e ʻEikí, pea ʻi he taimiʻoku tau fakahoko ai e fekau ʻa e ʻEikí, … ʻoku ʻi ai ʻetau totonu ke maʻu e ngaahi tokoni ʻa e ʻEikí. Manatuʻi ʻe tokoniʻi [koe] ʻe he ʻEikí ke ke lava ʻo fuesia ʻa e ngaahi kavenga ʻoku ʻoatu kiate koé” (ʻi he Conference Report, Apr. 2005, 61; pe Liahona, Mē 2005, 56).

Naʻe fai ʻe Palesiteni Kōtoni B. Hingikelī (1910–2008), ko e Palesiteni hono 15 ʻo e Siasí, ʻa e faleʻi ko ʻení: “Ngāue ʻaki ʻa e ivi maʻongoʻonga ʻoku mou maʻú. ʻOku ʻikai te u kole atú ke mou fai ha meʻa ʻoku ʻikai te mou malavá. ʻOku ʻou ʻamanaki pē he ʻikai te mou maʻu ʻa e fakakaukau he ʻikai te mou lava ha meʻá. ʻOku ou ʻamanaki he ʻikai te mou feinga ke fokotuʻu ha ngaahi taumuʻa he ʻikai te mou malava ke aʻusia. ʻOku ou ʻamanaki pē te mou fakahoko ʻa ia te mou ala lavá ʻi he founga lelei taha ʻoku mou ʻiló. Kapau te mou fai ia, te mou mamata ki hono fakahoko ʻo ha ngaahi mana” (Teachings of Gordon B. Hinckley [1997], 696).

• Ko e hā e ngaahi founga ʻe ala tokoniʻi ai koe ʻe he ngaahi fakamatala ko ʻení mo ia ʻi he ʻAlamā 8 ʻi hoʻo fehangahangai mo e ngaahi faingataʻá?

Fakaafeʻi ha kau ako tokosiʻi pē ke nau vahevahe ha ngaahi sīpinga ʻo hono tokoniʻi kinautolu ʻe he ʻEikí ke nau fehangahangai mo e ngaahi faingataʻá. ʻE lava pē ke hoko ko ha konga ʻo e fealeaʻaki ko ʻení haʻo fakamahinoʻi ange ʻoku faʻa fakahoko mai e tokoni ʻa e ʻEikí ʻi ha ngaahi founga iiki mo faingofua, hangē ko e fakahinohino ʻoku fai fakalongolongo mei he Laumālie Māʻoniʻoní pe ha ngāue lelei ha kaungāmeʻa.

Mou lau fakataha ʻa e ʻAlamā 8:30–31 pea kole ki he kau akó ke nau kumi ki he meʻa naʻe fai ʻe he ʻEikí maʻa ʻAlamā ʻi he taimi naʻe foki ai ʻa ʻAlamā ki ʻAmonaihaá.

• Ko e hā ne fai ʻe he ʻEikí ke tokoniʻi ʻa ʻAlamā ke ne vahevahe ʻa e ongoongoleleí mo e kakai ʻo ʻAmonaihaá?

Vahevahe hoʻo fakamoʻoni ʻo kau ki he mālohi ʻo e ʻEikí ke tuku mai ha founga, naʻa mo e taimi ʻe hangē ai ka ʻikai lava ke fakahoko ʻEne ngaahi fekaú. “ ʻOku ʻikai tuku mai ʻe he ʻEikí ha fekau ki he fānau ʻa e tangatá kae ʻikai te ne teuteu ha hala maʻanautolu ke nau lava ai ʻo fai ʻa e meʻa kuó ne fekau kiate kinautolú” (1 Nīfai 3:7 ).

ʻAlamā 9. “Kuo Fēfē Hoʻomou Fakangaloʻi ʻa e Talatukufakaholo ʻa Hoʻomou Ngaahi Tamaí”?

Kole ki he kau akó ke nau lisi ha ngaahi pōtoʻi ngāue pe ngaahi fakakaukau ʻoku ʻikai faʻa fie ako ʻe he toʻu tupú mei heʻenau mātuʻá. (Mahalo ʻe fai atu ʻe he kau akó ha ngaahi tali hangē ko e tauhi ʻapí, langá mo e monomonó, ngaahi founga ke fai ʻaki e akó, pe mūsiká.)

• ʻOkú ke pehē ko e hā ʻoku ʻikai fie ako ai ʻe ha kakai ʻe niʻihi ʻa e ngaahi ʻilo mahuʻinga mei he ngaahi toʻu tangata kimuʻá?

Lau mo e kau akó ʻa e ʻAlamā 9:7–14. ʻI hoʻomou lau iá, fekau e kau akó ke nau kumi ʻa e ngaahi kupuʻi lea pe ngaahi fakakaukau naʻe toutou lea ʻaki ʻe ʻAlamā (hangē ko e “kuo mou fakangaloʻi koā” mo e “ʻikai ʻoku mou manatu”).

• Ko e hā e meʻa kuo ngalo ʻi he kau ʻAmonaihaá? ʻOkú ke pehē ko e hā naʻe tupu ai mei heʻene fakangaloʻi ko ʻení ʻa e hē mei he moʻoní mo e faiangahalá?

• Kuo lelei fēfē kiate koe ʻa hoʻo ʻiloʻi ʻa e ngaahi talatukufakaholo leleí, ngaahi akonaki, mo e ngaahi meʻa naʻe aʻusia ʻe he ngaahi toʻu tangata kimuʻá? Ko e hā ʻe lava ke tau fai ke manatuʻi ai ʻa e ngaahi tāpuaki peheé?

Fakaafeʻi e kau akó ke nau lau fakalongolongo pē ʻa e ʻAlamā 9:19–22 pea ʻai ke ʻiloʻi e ngaahi tāpuaki fakalaumālie pea mo e ngaahi meʻa naʻe hoko ne fiefia ai e kau Nīfaí kimuʻá. Kole ki he kau akó ke vahevahe mai e ngaahi meʻa ne nau maʻú.

Kole ki he kau akó ke nau lau ʻa e Tokāteline mo e Ngaahi Fuakava 82:3 .

• ʻOku felāveʻi fēfē ʻa e veesi ko ʻení mo e kakai ʻo ʻAmonaihaá?

Fakaafeʻi ha tokotaha ako ke ne lau leʻolahi ʻa e ʻAlamā 9:23–24 mo e 10:22–23, 27. Kole ki he toenga ʻo e kau akó ke nau lau mo muimui fakalongolongo pē ʻo kumi ʻa e ngaahi fakatokanga ki he ngaahi faingataʻa ko ia ʻe hoko ki he kakai ʻo ʻAmonaihaá kapau ʻe ʻikai te nau fakatomala.

• Ko e hā e ngaahi fakatokanga naʻe fai ʻe ʻAlamā mo ʻAmuleki ki he kakaí?

• Fakatatau kia ʻAlamā, ko e hā ne kovi ange ai e faiangahala ʻa e kakai ʻo ʻAmonaihaá ʻi he faiangahala ʻa e kau Leimaná?

Mou toe vakai ki he ʻAlamā 9:19–22, ʻa ia ʻoku tala mai ai ʻe ʻAlamā ʻa e niʻihi ʻo e ngaahi tāpuaki mo e ngaahi meʻa naʻe fiefia ai ʻa e kau Nīfaí kimuʻá.

• Ko e hā ʻoku ʻaonga ai ke manatuʻi ʻa e ngaahi meʻa fakalaumālie naʻe aʻusia ʻi he kuohilí?

Vahevahe hoʻo ngaahi ongo fekauʻaki mo e mahuʻinga ke manatuʻi e ngaahi meʻa fakalaumālie naʻa tau aʻusia fakatāutahá pea mo e ngaahi meʻa fakalaumālie ne aʻusia ʻe he kakai ʻi he ngaahi toʻu tangata kimuʻá. Fakaafeʻi e kau akó ke nau hiki fakalelei ʻi heʻenau ngaahi tohinoá e ngaahi meʻa toputapu naʻe hoko ʻi heʻenau moʻuí.

Kimuʻa pea mou hoko atu ki he ʻAlamā 11, ʻe lava ke ke fokotuʻu ange ko ha hoa ngāue fakafaifekau feʻunga moʻoni ʻa ʻAmuleki moʻo ʻAlamā. ʻOku ʻomai ʻi he ʻAlamā 10:4–12 ha niʻihi ʻo e ngaahi meʻa naʻá ne aʻusia ʻo teuteuʻi ai ia ke na ngāue mo ʻAlamaá. Fakamahinoʻi ange foki naʻe ʻi ai e vahaʻataimi naʻe māmālohi ai pē ʻa ʻAmuleki ʻi he Siasí kimuʻa peá ne toki hoko ko ha faifekau mālohí. ʻE maʻu heni ha ʻamanaki lelei ʻe he kau talavou mo e kau finemui ne nau loto veiveiua pe te nau lava koā ʻo ngāue fakafaifekau taimi kakató.

ʻAlamā 11:41–46; 12:1–18. ʻE Toe Tuʻu e Kakai Kotoa Pē mei he Maté ʻo Nau Tuʻu ʻi he ʻAo ʻo e ʻEikí ke Fakamāuʻi Kinautolu

ʻOku toe ʻoatu ʻe he vahe ko ʻení ha faingamālie ke ke fakamoʻoni ai ʻoku ikunaʻi ʻe he Fakalelei ʻa e Fakamoʻuí ʻa e ngaahi nunuʻa ʻo e Hingá.

Kimuʻa pea kamata e kalasí, teuteuʻi e sivi ko ʻení ʻi he milemila ki ha mīsini fakaʻata lahi pe ha laʻipepa tufa maʻá e kau akó. ʻAi ke tohiʻi ʻe he kau akó ʻa e M ki he moʻoní pe L ki he loi, ki he fakamatala takitaha. Kole ki he kau akó ke nau fai e siví ʻo ʻikai fakaʻaongaʻi ki ai ʻenau ngaahi folofolá.

1. Te tau manatuʻi ʻetau halaiá ʻi he taimi ʻoku fakamāuʻi ai kitautolú. (Vakai, ʻAlamā 11:43; vakai foki, 2 Nīfai 9:14; ʻAlamā 5:18.)

2. Ko kinautolu ne motu hanau nima pe vaʻe ʻi heʻenau ʻi he moʻui fakamatelié, ʻe toe fakafoki honau ngaahi kongá ʻi he taimi ʻoku nau toe toetuʻu aí. (Vakai, ʻAlamā 11:43–44.)

3. Neongo ʻe toʻo atu ʻa e ngaahi mele pe ngaahi fehālaaki lalahi ʻoku hoko ki hotau sinó ʻi he taimi te tau toetuʻu aí, ka ʻe kei ʻilonga pē ʻa e ngaahi patepate mo e fanga kiʻi mele iiki. (Vakai, ʻAlamā 11:43–44; vakai foki, ʻAlamā 40:23.)

4. He ʻikai toe mate fakatuʻasino ha taha kuo toetuʻu. (Vakai, ʻAlamā 11:45.

5. ʻI he Fakamāu Fakaʻosí, ʻe fakamāuʻi pē kitautolu ʻo fakatatau ki heʻetau ngaahi ngāué. He ʻikai toe lau ha meʻa kehe ia. (Vakai, ʻAlamā 11:41, 44; 12:14; vakai foki, T&F 137:9.)

6. Ko kinautolu ʻoku fakafefeka honau lotó ki he moʻoní, ʻe iku pē ʻo ʻikai te nau ʻilo ha meʻa ʻo kau ki he ngaahi meʻa lilo ʻa e ʻOtuá. (Vakai, ʻAlamā 12:9–12.)

7. ʻE hoko ʻa e Fakamāu Fakaʻosí ko ha meʻa fakafiefia ki he kakai kotoa pē. (Vakai, ʻAlamā 12:13–14, 17.)

(Ngaahi talí: 1-M; 2-M; 3-L; 4-M; 5-L; 6-M; 7-L)

Hili hono fakakakato ʻe he kau akó ʻa e siví, ʻai ke nau ngāue fakatāutaha pē pe tautau toko ua ʻo lau e ngaahi fakamoʻoni fakafolofolá pea fakatonutonu ʻenau ngaahi talí. Hili iá pea fai ange e ongo fehuʻi ko ʻení:

• ʻOku tokoniʻi fēfē kitautolu ʻe he mahino ko ia ʻo e Toetuʻú mo e Fakamāu Fakaʻosí ke toe mahino lelei ange ʻa e Fakalelei ʻa Sīsū Kalaisí?

• Ko e hā e ngaahi founga ʻe lava ʻe he mahino totonu ʻoku tau maʻu ki he ngaahi tokāteline ko ʻení ʻo tākiekina ʻetau moʻui fakaʻahó?

ʻAi ke lau ʻe he kau akó e ongo lea ʻa ʻEletā Tāleni H. ʻOakesi he peesi 213–14 mo e 102 ʻi he tohi lēsoni ʻa e tokotaha akó lolotonga ʻenau aleaʻi e ongo fehuʻi ko ʻení. ʻOku maʻu foki e ongo leá ni he DVD ʻoku ʻomai fakataha mo ʻení B C.

Fakaafeʻi e kau akó ke nau fakalaulauloto fakalongolongo pē ki he fehuʻí ni:

• ʻOku ʻi ai ha faʻahinga meʻa ʻi hoʻo moʻuí ʻoku fie maʻu ke liliu ke ʻoua naʻá ke manavahē ki he Fakamāu Fakaʻosí?

Naʻinaʻi ki he kau akó ke nau loto fakatōkilalo ʻo lotu, pea kole ki he ʻEikí ke fakamolemoleʻi ʻenau ngaahi angahalá, mo fekumi ki Heʻene tokoní ke ikunaʻi ʻenau ngaahi angahalá. Tokoniʻi kinautolu ke mahino ko e taimi pē ʻeni ke teuteu ai ki he Toetuʻú mo e Fakamāu Fakaʻosí (vakai, ʻAlamā 34:32–34 ).

ʻAlamā 12:22–37. Naʻe Tuku Mai ʻe he ʻOtuá ʻa e Palani ʻo e Huhuʻí ke Fakahaofi Kitautolu mei Hotau Tuʻunga Tō ki Laló

Fakakaukau ke ke tomuʻa fetuʻutaki ki ha toko taha pe toko ua ʻo e kau akó ʻo fakaafeʻi kinaua ke na teuteu ke fai ʻena fakamoʻoni ki he palani ʻo e fakamoʻuí mo e melino ʻokú ne ʻomi ki heʻena moʻuí.

Kimuʻa pea fai e kalasí, hanga ʻo teuteuʻi ha laʻipepa tufa kuo hiki ai e ngaahi fehuʻi mo e ngaahi fakamoʻoni fakafolofola ko ʻení:

1. Ko e hā ha niʻihi ʻo e ngaahi ola ʻo hono kai ʻe ʻĀtama mo ʻIvi ʻa e fua naʻe tapuí? (Vakai, ʻAlamā 12:22, 24.)

2. Ko e hā e meʻa naʻe fokotuʻu ʻe he ʻOtuá ke ne fakaleleiʻi ʻa e ngaahi nunuʻa ʻo e Hingá? (Vakai, ʻAlamā 12:25.)

3. Naʻe founga fēfē hono akoʻi e palani ʻo e huhuʻí ki he kakaí? (Vakai, ʻAlamā 12:28–30.)

4. Ko e hā e meʻa naʻe foaki ʻe he ʻOtuá ki he kakaí kae lava ke nau fakaʻaongaʻi ʻenau tauʻatāina ke filí ʻi ha founga naʻe fenāpasi mo ʻEne palani ʻo e huhuʻí? (Vakai, ʻAlamā 12:31–32.)

5. ʻOku tau maʻu fēfē ʻa e ngaahi tāpuaki ʻo e Fakalelei ʻa e Fakamoʻuí? (Vakai, ʻAlamā 12:33–37.)

Lau e lea ko ʻeni ʻa Palesiteni Poiti K. Peeka, ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá:

“Ka ʻikai ha ʻilo ki he palani ʻo e ongoongoleleí, ʻe hangē ʻoku fakanatula pē ʻa e maumaufonó ia, taʻehalaia, pea naʻa mo hano fakatonuhiaʻi. ʻOku ʻikai mo ha maluʻi lahi ange mei he filí ka ko ʻetau ʻiloʻi ʻa e moʻoní—ke tau ʻiloʻi ʻa e palaní” (Our Father’s Plan [1984], 27).

• ʻE maluʻi fēfē kitautolu mei he filí ʻe heʻetau ʻiloʻi e palani ʻa e Tamai Hēvaní?

Fakamatala ange ʻoku ʻi he ʻAlamā 12 ha ngaahi fakamatala fakaikiiki mahuʻinga ʻoku kau ki he palani ʻa ʻetau Tamai Hēvaní maʻa ʻEne fānaú. Naʻe ʻafioʻi ʻe he Tamai Hēvani te tau maumaufono, ko ia naʻá Ne ʻomai ha founga ke huhuʻi ai kitautolu pea tau foki ʻo nofo fakataha mo Ia ʻo taʻengata. Tokoni ki he kau akó ke nau ʻiloʻi ko ʻene mahino lelei ange kiate kinautolu e palani ʻa e Tamai Hēvaní, ko ʻenau fiefiá ange ia.

Tufotufa atu e ngaahi tatau ʻo e laʻipepa tufá. Vahe ki he taha ako kotoa pē ke ne kumi e ngaahi tali ki ha fehuʻi ʻe taha pe ua ʻi he laʻipepa tufá pea teuteu ke vahevahe ʻenau ngaahi fakakaukaú mo e kalasí.

Hili hono tali ʻe he kau akó e ngaahi fehuʻí, tokoni ange ke nau aleaʻi e ongo tefito ko ʻení koeʻuhí ke nau lava ʻo vahevahe ʻa e meʻa kuo nau akó pea moʻui ʻaki kakato ange ʻa e tokāteliné.

Tefito 1: Naʻe akoʻi ʻe ʻAlamā mo ʻAmuleki ʻa e ngaahi moʻoni lahi ʻo kau ki he palani ʻo e huhuʻí.

Kole ki he kau akó ke nau toe fakamanatu e ngaahi potufolofola ne nau ako ki ai ʻi he ʻaho ní pea talamai ha niʻihi ʻo e ngaahi moʻoni naʻe akonaki ʻaki ʻe ʻAlamā mo ʻAmulekí. ʻE lava pē ke ke hiki e ngaahi tali ʻa e kau akó he palakipoé.

Fakaafeʻi e kau akó ke nau fili ha taha ʻo e ngaahi moʻoni ʻoku hiki atú pea fakamatalaʻi e founga ʻe tokoni ai hono ʻiloʻi ʻo e foʻi moʻoni ko iá ke maluʻi kinautolu mei he filí.

Tefito 2: Naʻe pehē ʻe ʻAlamā naʻe tuku ʻe he ʻOtuá ha ngaahi fekau ki Heʻene fānaú “hili ʻene fakahā kiate kinautolu ʻa e palani ʻo e huhuʻí” (ʻAlamā 12:32; ko e toki tānaki atu hono fakamamafaʻí).

• ʻOkú ke pehē ko e hā ne mahuʻinga ai ke ʻiloʻi ʻe he kakaí ʻa e palaní kimuʻa pea nau toki maʻu e ngaahi fekaú?

Kapau naʻá ke ʻosi kole ki ha toko taha pe toko ua ʻo e kau akó ke na teuteu mai ke vahevahe ʻena fakamoʻoní ki he palani ʻo e huhuʻí, fakaafeʻi kinaua ke fai ia he taimí ni. Fai foki hoʻo fakamoʻoní ʻo ka feʻunga ke fakahoko, pea fakaafeʻi mo e kau ako kehé ke fai mo ʻenau fakamoʻoní.