Vahe 52

ʻEta 11–15

Talateú

ʻI hono hiki fakanounouʻi ʻe Molonai ʻa e ngaahi lekooti fakaʻosi ʻa e kau Sēletí, naʻá ne kiʻi motuhi ai ʻa e fakamatala fakahisitōliá. Kuó ne fakakau ai ha ngaahi fakamatala lahi kau ki hono fakafisingaʻi ʻe he kakai Sēletí ʻa e pōpoaki ʻa honau kau palōfitá ʻo kau ki he tuí. Kuó ne mamata ʻi he faiangahala tatau pē ʻi hono kakaí, ko e kau Nīfaí, lolotonga ʻene malangaʻi ʻa e ongoongoleleí mo ʻene tamaí. ʻI heʻene ʻiloʻi ʻe hoko ʻa e ngaahi meʻa tatau pē ʻi hotau kuonga ní, naʻá ne fakakau ai e ngaahi akonaki ʻa ʻEta ʻo kau ki he tuí pea mo haʻane ngaahi akonaki lahi pē foki ʻaʻana.

ʻI hono lau ʻe he kau akó mo aleaʻi ʻa e ʻEta 11–15, ʻe lava ke nau ako ai ʻa e founga hono fakaʻaongaʻi ʻo e ngaahi akonaki ʻa ʻEta mo Molonaí ʻi heʻenau moʻuí. Te ke lava ʻo tokoni ange ke nau sio ʻoku tokoniʻi kinautolu ʻe he tui kia Kalaisí ke nau moʻui mateaki ki he ʻOtua. ʻOku totonu foki ke mahino ki hoʻo kalasí ʻoku tupu mei he tui kia Kalaisí ʻa e ngaahi maná mo e ngaahi fakahaá pea ʻokú ne tokoniʻi kitautolu ke liliu hotau ngaahi vaivaí ke hoko ko hotau mālohinga.

Ngaahi Tokāteline mo ha Ngaahi Tefitoʻi Moʻoni

ʻOku hoko ʻa e tuí mo e ʻamanaki leleí ko ha taula ki hotau laumālié pea ngaohi kitautolu ke tau fai mālohi pea tuʻu maʻu (vakai, ʻEta 12:1–4).
ʻOku muʻomuʻa ʻa e tui lahí ʻi he ngaahi maná (vakai, ʻEta 12:5–22).
ʻOku liliu ʻe he ʻEikí hotau ngaahi vaivaí ke hoko ko e mālohi ʻi heʻetau fakavaivaiʻi kitautolu pea tui kiate Iá (vakai, ʻEta 12:23–41).
ʻE fokotuʻu ʻa e Selusalema Foʻoú ʻi he ongo ʻAmeliká (vakai, ʻEta 13:2–12).

Ngaahi Fokotuʻu ki hono Akoʻí

ʻEta 11–12. Talateu ki he Kaveinga ʻo e Ngaahi Lēsoní

Tomuʻa vahe ki ha toko taha ako ke ne teuteuʻi ha fakamatala ʻo makatuʻunga ʻi he talateu ki he vahe 52 ʻi he tohi lēsoni ʻa e tokotaha akó mo e fakamatala ki he ʻEta 11 he peesi 430 ʻi he tohi lēsoni ʻa e tokotaha akó. Kole ki he tokotaha akó ke ne fai e fakamatala ko ʻení ʻi he kamataʻanga ʻo e kalasí.

ʻOmi ha sila tengaʻi ʻakau ki he kalasí. ʻEke ki he kau akó pe ʻoku nau manatuʻi pe ko hai e palōfita he Tohi ʻa Molomoná naʻá ne fakaʻaongaʻi ha tengaʻi ʻakau ko ha lēsoni fakatātā ke akoʻi ʻaki ha tefitoʻi moʻoni fakalaumālie. ʻI hono manatuʻi ʻe he kau akó naʻe fakaʻaongaʻi ʻe ʻAlamā ha tengaʻi ʻakau ke akoʻi ʻaki ʻa e folofola ʻa e ʻOtuá mo e tuí (vakai, vahe 30 ʻi he tohi lēsoni ko ʻení), kole ange ke nau fakamanatuʻi angé hono fakaʻuhingaʻi ʻe ʻAlamā ʻa e tuí (vakai, ʻAlamā 32:21 ). Fakaafeʻi e kau akó ke nau kumi ʻa e faleʻi ʻi he ʻEta 12 ʻa ia ʻe lava ʻo tokoniʻi kinautolu ke tupulaki ʻi he tuí.

ʻEta 12:1–4. ʻOku Hoko ʻa e Tuí mo e ʻAmanaki Leleí ko ha Taula ki Hotau Laumālié pea Ngaohi Kitautolu ke Tau Fai Mālohi mo Tuʻu Maʻu

Fakaʻaliʻali ha fakatātā ʻo ha taula (pe tā ha taula he palakipoé). Kole ki he kau akó ke nau fakamatalaʻi ʻa e taumuʻa ʻo ha taula. Fekau ke nau kumi hake ki he ʻEta 12:4.

Ko e ha e meʻa ʻoku talamai ʻe he veesi ko ʻení “ko ha taula ki he laumālie ʻo e tangatá”?
Ko e hā ʻoku tau fie maʻu ai ha taula ki hotau laumālié?

Fakamatala ange ʻoku talamai ʻe he veesi 3–4 ʻa e ngaahi ola ʻo e tuí. Fakaʻaliʻali ʻa e fakatātā ko ʻení he palakipoé, kae ʻoua naʻa fakafonu e ngaahi puha ʻi he tafaʻaki toʻomataʻu ʻo e ngaahi taó. Kole ki he fānaú ke nau fakakakato ʻa e sātí ʻo makatuʻunga ʻi he ngaahi tefitoʻi moʻoni te nau maʻu ʻi he veesi 3–4. ʻOku fakahā atu ʻi lalo e ngaahi talí.

ʻOku tupu mei he tuí ʻa e

Fakatomalá

Fakahoko ʻo e ngaahi meʻa kotoa pē

ʻAmanaki leleí

Ngaahi ngāue Leleí

Fakalāngilangiʻi ʻo e ʻOtuá

ʻEke ki he kau akó pe ʻoku anga fēfē ʻene tupu mei he tuí ʻa e tefitoʻi moʻoni pe ngāue takitaha ʻoku hiki he taimí ni ʻi he tafaʻaki toʻomataʻu ʻo e ngaahi taó. Aleaʻi nounou ʻa e tefito takitaha.

ʻOku ʻoatu fēfē ʻe he tui kia Kalaisí ʻa e ʻamanaki leleí kiate koe pea hoko ko e taula ki ho laumālié?

ʻEta 12:5–22. ʻOku Muʻomuʻa ʻa e Tui Lahí ʻi he Ngaahi Maná

Fakaafeʻi ha toko taha ako ke ne lau ʻa e ʻEta 12:6 .

Tohiʻi he palakipoé Ko e hā ha ʻahiʻahiʻi ʻo e tuí? Fakaafeʻi ha toko taha pe toko ua ʻo e kau akó ke na vahevahe ha ngaahi sīpinga nounou ʻo hono ʻahiʻahiʻi ʻo e tuí kuo hoko kiate kinaua pe ki ha taha ʻokú na ʻiloʻi.

Kole ki he kau akó ke nau fakafanongo ki he ongo lea ko ʻení pea ʻiloʻi e ngaahi tefitoʻi moʻoni ʻoku fekauʻaki mo hono ʻahiʻahiʻi ʻo e tuí. ʻOku toe maʻu foki ʻa e lea ʻa Palesiteni Sēisi E. Fausí ʻi he DVD ʻoku ʻomai fakataha mo ʻení A.

“ʻHe ʻikai lava ke maʻu ʻe ha tangata ʻa e fakamoʻuí taʻe te ne foua hano ʻahiʻahiʻi ʻo e tuí mo e talangofua ki he ngaahi ʻilo taʻengata kuo fokotuʻu talu mei he kamataʻangá ki hono fakamoʻui mo hakeakiʻi ʻo e faʻahinga ʻo e tangatá” (Joseph Fielding Smith, Answers to Gospel Questions, comp. Joseph Fielding Smith Jr., 5 vols. [1957–66], 4:150).

“Kuo pau ke tau foua ʻa e afi fakamaʻa ʻa e tufungá, pea ʻe vaia atu ai ʻa e noa mo e taʻemahuʻingá mei heʻetau moʻuí ʻo hangē ha vevé, pea fakamālohia, tuʻu maʻu, mo fefeka ʻetau tuí. Hangē ʻoku hoko maʻu pē ha faingataʻa, mamahi, pea mo ha uesia he lotó ʻi he taha kotoa, pea kau ai mo kinautolu ʻoku feinga fakamātoato ke faitotonu mo faivelengá. Ka ko ha konga pē ʻeni hotau fakahaohaoaʻi ke tau feangainga mo e ʻOtuá” (James E. Faust, ʻi he Conference Report, Apr. 1997, 85; pe Tūhulu, Siulai 1997, 63).

Fakamatala ange ʻoku faʻa hoko mai ʻa hono ʻahiʻahiʻi ʻo ʻetau tuí he taimi ʻe niʻihi ʻi ha ngaahi faingataʻa ʻoku hoko; neongo ia, ʻoku ʻikai ko e founga pē ʻeni ʻoku ʻahiʻahiʻi ai ʻetau tuí. Kole ki ha toko taha ako ke ne lau e lea ʻa Lisiate G. Sikoti he peesi 431 ʻi he tohi lēsoni ʻa e tokotaha akó. ʻOku toe maʻu foki ʻa e lea ko ʻení ʻi ha DVD ʻoku ʻomai fakataha mo ʻení B.

Naʻe fakamatalaʻi fēfē ʻe ʻEletā Sikoti hano ʻahiʻahiʻi ʻo e tuí?

ʻOku lau ʻa e ʻEta 12:6–22 ki he ngaahi fakamatala ʻi he folofolá ki he ngaahi tāpuaki naʻe maʻu ʻe he kakaí ʻi heʻenau kātakiʻi hono ʻahiʻahiʻi ʻo ʻenau tuí. Tā e saati ko ʻení he palakipoé:

Ko hai ʻoku lau ki aí?	Naʻe anga fēfē ʻenau ngāue ʻaki e tuí?	Ko e hā e ngaahi tāpuaki ne nau maʻú?

Vahevahe e kalasí ke nau tautau toko ua pe ki ha fanga kiʻi kulupu iiki. Fakahinohinoʻi e hoa pe kulupu takitaha ke nau hiki ha tatau ʻo e sātí ʻi ha laʻipepa. Kole ange ke nau lau ʻa e ʻEta 12:6–22, pea hiki e tali ki he ngaahi fehuʻí he sātí.

Hili hono ʻoange ha taimi feʻunga ke fakakakato ai ʻe he kau akó ʻa e ʻekitivitií, tuku ke nau fakakaukau ki he tāpuaki ko ia ʻoku lau ki ai ʻi he veesi 19.

ʻE hoko fēfē ʻa e tāpuaki ko ʻení ko hano fakataipe ʻo e meʻa ʻe aʻusia ʻe he kakai tui faivelenga kotoa ʻi he ngataʻangá?
Ko e hā e ngaahi founga ʻe teuteuʻi ai kitautolu ʻe he ngaahi tāpuaki ʻoku tafe mai mei he tuí ke tau hū ki he ʻao ʻo e ʻEikí?

Fakamatala ange naʻe vahevahe mai ʻe he ʻAposetolo ko Pitá ha ngaahi fakakaukau mahuʻinga ʻo kau ki he ngaahi ʻahiʻahiʻi ʻo ʻetau tuí. Fakaafeʻi e kau akó ke nau talamai e ngaahi ʻilo ko ʻení lolotonga hono lau ʻe ha toko taha ako ʻa e 1 Pita 4:12–13.

Naʻe pehē ʻe Pita ʻoku totonu ke ʻoua naʻa tau fakakaukau ʻoku ngali kehe ʻa e taimi ʻe hoko mai ai ʻa e ngaahi ʻahiʻahí. ʻE tokoni fēfē nai ʻa e tefitoʻi moʻoni ko ʻení ke tau kātakiʻi ʻa e ngaahi ʻahiʻahí? (Te ke lava ʻo fakamahinoʻi ʻe lelei ange ʻa ʻetau kātakiʻi e ngaahi ʻahiʻahí ʻi he taimi ʻoku tau ʻiloʻi ai ko e konga pē ia ʻo e moʻuí.)

Vahevahe hoʻo fakamoʻoní ʻo kau ki hono tauhi ʻe he ʻEikí ʻEne ngaahi talaʻofá mo fakapaleʻi kitautolu ʻi he taimi ʻoku tau kātakiʻi ai hono ʻahiʻahiʻi ʻo ʻetau tuí.

ʻEta 12:23–41. ʻOku Liliu ʻe he ʻEikí Hotau Ngaahi Vaivaí ke Hoko Ko e Mālohi ʻi Heʻetau Fakavaivaiʻi Kitautolu pea Tui Kiate Iá

Fakaafeʻi ha toko taha ako ke haʻu ki he tafaʻaki ki muʻa ʻo e kalasí pea fai ha pamu fakamālohisino ʻe 10.

Ko e hā e meʻa ʻe hokó kapau ʻe hokohoko atu hono fai maʻu pē ʻeni ʻe [hingoa ʻo e taha akó]?
Ko e hā ʻoku mālohi ange ai ʻa e ngaahi uouá ʻi hono fakamālohisinoʻí?
Ko e hā ha ngaahi meʻa fakalaumālie ʻoku fakatatau ki he fakamālohisinó?

Fakamatala ange ʻoku tokoniʻi kitautolu ʻe he ʻEta 12 ke mahino e founga ʻe lava ke ikunaʻi ai ʻa e vaivai ʻo e tangatá ʻi he mālohi ʻo e ʻEikí. Fakaafeʻi e kau akó ke nau fekumi ʻi he ʻEta 12:23–25, ki he vaivai naʻe ʻiloʻi ʻe Molonai ʻi he lekooti naʻá ne fakatahatahaʻí. Kole ki he kau akó ke nau vahevahe ʻa e meʻa ʻoku nau maʻú.

Kole ki ha toko taha ako ke ne lau ʻa e ʻEta 12:27 . ʻOku ʻi he vēsí ni ʻa e talaʻofa ʻa e ʻEikí ʻoku feʻunga ʻEne ʻaloʻofá ke tokoniʻi kitautolu ke tau ikunaʻi hotau vaivaí (ʻe lava ke ke vakai ki he fakamatala ʻi he ʻEta 12:27 he peesi 433–34 ʻi he tohi lēsoni ʻa e tokotaha akó). ʻAi ke lau fakalongolongo ʻe he kau akó ʻa e ʻEta 12:26–28, pea kumi ʻa e ngaahi ʻulungāanga kuo pau ke tau maʻu kae lava ke feʻunga ʻa e ʻaloʻofa ʻa e ʻEikí ke “liliu ʻa e ngaahi meʻa vaivaí ko e mālohi kiate [kitautolu].” Fokotuʻu ange ki he kau akó ke nau fakaʻilongaʻi e ngaahi ʻulungāanga ko ʻení ʻi heʻenau folofolá. ʻE ala kau ʻi heʻenau lisí ʻa e loto fakatōkilaló, angavaivaí, tuí, ʻamanaki leleí, mo e ʻofa faka-Kalaisí.

ʻOku tokoniʻi fēfē kitautolu ʻe he ngaahi ʻulungāanga ko ʻení ke fakatupulaki ʻa e ivi fakalaumālié?
ʻOku felāveʻi fēfē ʻa e ngaahi ʻulungāanga ko ʻení mo e haʻu kia Kalaisí?
ʻE lava fēfē ke fetongi ʻe he ivi fakalaumālie ʻoku maʻu ʻi he ʻaloʻofa ʻa Kalaisí ʻa e vaivai fakamatelié?

Fakamahinoʻi ange naʻe “fakafiemālieʻi” ʻa Molonai hili ʻene fanongo ki he ngaahi folofola ʻa e ʻEikí ʻi he veesi 26–28, (ʻEta 12:29) peá ne fakahā ʻene fakamoʻoni ki he ʻEikí. Fakaafeʻi e kau akó ke lau ʻa e ʻEta 12:29–36, pea kumi hake ʻa e fakamoʻoni ʻa Molonaí. Poupouʻi kinautolu ke nau kumi ʻa e ngaahi fakamatala ʻoku kamata ʻaki ʻa e “ ʻOku ou ʻiloʻi” pe “ ʻOku ou manatuʻi.”

Ko e hā e ngaahi moʻoni naʻe fakamoʻoni ki ai ʻa Molonaí?
Kuo tākiekina fēfē nai hoʻo moʻuí ʻe hoʻo fakamoʻoni ki he ngaahi moʻoni ko ʻení?

Lau mo e kalasí ʻa e ʻEta 12:37.

Fakatatau ki he veesi ko ʻení, ko e hā ʻa e tāpuaki ʻe maʻu ʻe Molonai koeʻuhí he kuó ne mamata ki hono ngaahi vaivaí?
Fakaukau angé ki hao vaivai. ʻE tokoniʻi fēfē nai koe ʻe hoʻo falala ki he ʻEikí ke liliu e vaivai ko ʻení ko ha maʻuʻanga mālohi fakalaumālie? (Tuku ke fakalaulauloto fakalongolongo ʻa e kau akó ki he fehuʻí ni, pea ʻoua naʻa nau ongoʻi kuo pau ke nau vahevahe mai ʻenau ngaahi talí.)

Fakaafeʻi ha toko taha ako ke ne lau ʻa e ʻEta 12:38–41.

ʻOku anga fēfē ʻene takiekina koe ke ʻiloʻi naʻe haʻu fakahangatonu e ngaahi akonakí ni mei he ʻEikí?
Ko e hā e ngaahi ʻuhinga naʻe ʻomi ʻe Molonai ke tau “fekumi ki he Sīsū ko iá”?

Fakaafeʻi e kau akó ke vahevahe mai ʻa e founga naʻa nau maʻu ai ʻa e mālohí ʻi heʻenau haʻu ki he Fakamoʻuí.

ʻEta 13:2–12. ʻE Fokotuʻu ʻa e Selusalema Foʻoú ʻi he Ongo ʻAmeliká

Tā he palakipoé ha kiʻi fakatātā faingofua pē ʻo hangē ko ia ʻi laló, kae ʻoua ʻe tohiʻi e ongo foʻi lea ko e Foʻou mo e Motuʻá.

Selusalema Foʻoú

Selusalema Motuʻá

Fakamatala ange ʻoku fakafofongaʻi ʻe he fakatātā ko ʻení ʻa māmani. Fehuʻi ki he kau akó pe kuo nau ʻosi fanongo ʻi ha ongo Selusalema. Kapau ʻoku ʻio, ʻeke ange pe ʻe tuʻu ʻi fē ʻa e ongo koló ni. Fakamatalaʻi ange ʻoku fakahā ʻi he ʻEta 13:2–12 ko e tangata kikite ʻa ʻEta. ʻOku toe fakamatalaʻi ʻe Molonai ʻi he ngaahi veesi ko ʻení ʻa e ngaahi kikite ʻa ʻEta ʻo kau ki he Selusalema Foʻoú mo e Selusalema motuʻá. Tānaki atu ʻa e ongo foʻi lea ko e Foʻou mo e Motuʻa ki he fakatātaá.

Fekauʻi e vaheua ʻe taha ʻo e kalasí ke nau lau ʻa e ʻEta 13:2–12, pea kumi ʻa e ngaahi kikite ʻa ʻEta ʻo kau ki he Selusalema motuʻá. Fekauʻi e vaheua ʻe tahá ke nau lau ʻa e ngaahi veesi tatau pē, pea kumi e ngaahi kikite ʻa ʻEta ʻo kau ki he Selusalema Foʻoú. Kole ki he kulupu takitaha ke ʻai ha taha ke ne hiki ʻa e ngaahi fakamatala ki he meʻa ʻoku nau akó. Hili hono ʻoange ha taimi feʻunga ki he kalasí, fakaafeʻi e sikalaipe takitaha ke ne hiki he palakipoé ʻa e ngaahi kikité ʻi lalo he “Selusalema Motuʻá” pe “Selusalema Foʻoú” he palakipoé.

ʻE maʻu kakato ʻi he palakipoé ʻa e ngaahi meʻa ko ʻení:

Selusalema Motuʻá

ʻE fakaʻauha (vakai, veesi 5).
ʻE toe langa hake ia ko ha kolo māʻoniʻoni ʻo e ʻEikí (vakai, veesi 5).
ʻE langa ia ko ha fale ʻo ʻIsileli (vakai, veesi 5).
ʻE fufulu [hono kakaí] ke maʻa ʻi he Fakalelei ʻa Sīsū Kalaisí (vakai, veesi 11).
ʻE tānaki fakataha ʻa e ngaahi hako ʻo kinautolu naʻe ʻuluaki nofoʻi ʻa Selusalema ʻa ia naʻe fakamoveteveteʻí (vakai, veesi 11).
ʻE maʻu ʻe hono kakaí ʻa hono fakahoko ʻo e fuakava ʻa ia naʻe fai ʻe he ʻOtuá mo ʻĒpalahamé (vakai, veesi 11).

Selusalema Foʻoú

ʻE langa ʻi he ongo ʻAmeliká (vakai, veesi 2–3, 6, 8).
ʻE ʻalu hifo ia mei he langi (vakai, veesi 3).
ʻE hoko ia ko e potu toputapu māʻoniʻoni ʻo e ʻEikí (vakai, veesi 3).
ʻE langa ia moʻó e toenga ʻo e hako ʻo Siosefá (vakai, veesi 6).
ʻE tatau ia mo e Selusalema ʻi muʻá (vakai, veesi 8).
ʻE fufulu ke maʻa ʻa hono kakaí ʻi he Fakalelei ʻa Sīsū Kalaisí (vakai, veesi 10).

ʻE lava pē ke ke fakamahinoʻi ange ʻoku ʻuhinga ʻa e foʻi lea ko e ko ha ʻi he ʻEta 13:5 ʻi he fika 3 he “Selusalema Motuʻá” ki he “ke fakaʻaongaʻi pe ʻaonga ki he.” Ki he fika 2 ʻi he “Selusalema Foʻoú,” te ke lava ʻo fakamahinoʻi ange ʻe fakahoko ʻa e konga ʻo e kikité ʻi he ʻEta 13:3 ʻi he taimi ʻe toe fakafoki mai ai ʻa e kolo ʻo ʻĪnoké ki māmani ʻo fakatahaʻi mo e Selusalema Foʻoú (vakai foki, Mōsese 7:13–21, 62–64).

Fehuʻi ki he kau akó pe ko e fē ʻi he ngaahi tāpuaki ʻo e Selusalema Foʻoú ʻoku lava ke tau maʻu he taimi ní, ʻi ha feituʻu pē ʻoku tau nofo ai. Tokoniʻi e kau akó ke nau sio ko e lahi ange ko ia ʻetau fakatukupaaʻi kitautolu ke tau moʻui angamāʻoniʻoní, ko e lahi ange ai pē ia ʻa e melino mo e fiefia ʻoku tau maʻú. Vahevahe mo kinautolu ʻa e Tokāteline mo e Ngaahi Fuakava 59:23.

Fakaafeʻi e kau akó ke fakatukupaaʻi kinautolu ke nau moʻui māʻoniʻoni ʻi he ʻaho takitaha. Vahevahe hoʻo fakamoʻoní ki he ngaahi tāpuaki ʻoku maʻu ʻi he moʻui ní pea ʻi he moʻui ka hoko maí ko e tupu mei he moʻui angamāʻoniʻoní.

ʻEta 14–15. Ko e Ngataʻanga ʻo e Puleʻanga ʻo e Kau Sēletí

Kole ange pe ʻe lava ʻe ha taha ʻo e kau akó ʻo fakamatala fakanounouʻi ʻa hono fakaʻauha ʻo e kau Sēletí ʻo hangē ko hono tohi ʻi he ʻEta 14–15. Kapau he ʻikai lava ʻe ha tokotaha ako ke fai ia, fakamatalaʻi nounou pē ʻe koe ʻa e ongo vahé ni pe kole ki ha toko taha ako ke ne lau ʻa e ʻuluʻi fakamatala ki he ongo vahé.

Hiki e ngaahi fakamoʻoni fakafolofola ko ʻení he palakipoé, pea fakaafeʻi e kau akó ke lau kinautolu ke ʻiloʻi ʻa e meʻa naʻe tupu ai hono fakaʻauha ʻo e kau Sēletí.

Naʻe anga fēfē hono maʻu ʻe Sētane ʻa e loto ʻo e kakaí ni?
Ko e hā e ngaahi lēsoni ʻoku lava ke tau ako mei hono fakaʻauha ʻo e kau Sēletí?