Ti Maikatlo a Pangngarig
Ti Nayaw-awan nga Anak
Addaan iti dua nga annak ti maysa a lalaki. Inkari ti lalaki nga itedna ti kuartana kadakuada inton pumusay isuna. Saan a kayat ti inaudi nga anak a lalaki ti aguray. Kiniddawna iti amana ti pannakabagina a kuarta. Inted ti amana kenkuana daytoy.
Innala ti anak a lalaki ti kuarta ket pimmanaw iti pagtaengan. Napan isuna iti sabali a daga. Inulit-ulit ti anak a lalaki ti nagbasol. Ginastosna amin ti kuarta.
Iti kamaudianan awanen ti kuarta ti anak a lalaki a panggatang iti taraon. Kasta unay ti bisinna. Nagkiddaw iti tulong iti maysa a lalaki. Tinagdanan ti lalaki isuna a mangpakan kadagiti baboyna.
Mabisin unay ti anak a lalaki ta kayatna a kanen ti kanen dagiti baboy. Ammona a naim-imas ti taraon a kanen dagiti adipen iti balay ti amana ngem iti kanenna.
Inkeddengna ti agbabawi ket kiniddawna nga agbalin nga adipen iti balay ti amana. Idi nagawid ti anakna a lalaki, nakita ti amana a sumangpeten isuna.
Nagtaray ti ama a mangsabat iti anakna a lalaki. Inarakupna ket inagkanna isuna.
Imbaga ti anak a lalaki iti amana a nagbasol isuna. Nariknana a saan isuna a maikari a maawagan iti anak ti amana.
Imbaga ti ama iti maysa nga adipen a mangyeg kadagiti kapatgan a pagan-anay ket ikawes dagitoy iti anak a lalaki. Inkabil ti adipen dagiti sapatos iti saka ti anak a lalaki ken maysa a singsing iti ramayna.
Imbaga ti ama iti adipen a mangisagana iti maysa a parambak. Kayatna nga agrambak ti tunggal maysa. Nagbabawin ti anak a lalaki ket nagsublin iti pagtaengan.
Nagtartrabaho ti inauna a lalaki iti talon. Idi agawid, nangngegna dagiti toktokar ken salsala. Imbaga kenkuana ti adipen a nagawiden ti inaudi a kabsatna a lalaki. Kayat ti ama nga agrambak ti tunggal maysa.
Nakagura ti inauna nga anak a lalaki ket saan a sumrek iti balay. Rimmuar ti ama tapno kasao ti anakna.
Nagyaman ti ama gapu ta kanayon a nakadennana ti inauna nga anakna a lalaki. Kukuananto ti amin a banag nga adda iti ama. Kinuna pay ti ama a daytoy ti umisu a panagrambak. Naragsakan gapu ta nagbabawi ken nagawiden ti inaudi nga anakna a lalaki.
Insarita ni Jesus kadagiti Fariseo ti tallo a pangngarig gapu ta kayatna a maammuanda no kasano ti kadakkel ti ayat ti Nailangitan nga Ama iti tunggal maysa. Ay-ayatenna dagiti tao nga agtungpal Kenkuana. Ay-ayatenna pay dagiti managbasol, ngem saan a mabalin a bendisionan ida ti Nailangitan nga Ama agingga a saanda nga agbabawi. Kayatna nga agbabawi dagiti managbasol ken agsublida Kenkuana. Ken kayatna a tulongantayo ida a mangaramid iti dayta ken agbalin a naragsak no agsublida.