Lēsoni 12

Ko e Fale Naʻe Langa ʻi he Maká

Taumuʻá

Ke poupouʻi ʻa e fānaú taki taha ke nau maʻu ha holi ke talangofua ki he ngaahi fekaú koeʻuhí kae lava ke hoko ʻa Sīsū Kalaisi pea mo ʻene ongoongoleleí ko ha fakavaʻe pau taha ia ʻi heʻenau moʻuí.

Teuteú

1. Ako ʻi he faʻa lotu ʻa e Mātiu 7:24–27, Luke 6:47–49, pea mo e Tokāteline mo e Ngaahi Fuakava 11:24. Hili iá peá ke ako ʻa e lēsoní mo ke fili pe ʻe anga fēfē hoʻo fiemaʻu ke akoʻi ki he fānaú ʻa e ngaahi fakamatala ʻa e folofolá (vakai, “Teuteu Hoʻo Lēsoní,” vi, pea mo “Faiako mei he Folofolá,” viii).

2. Laukonga ʻoku tānaki atu: Hilamani 5:12 pea mo e 3 Nīfai 14:24–27.

3. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ʻe fakakau mai ki ai ʻa e fānaú mo tokoni lelei taha ke nau aʻusia ʻa e taumuʻa ʻo e lēsoní.

4. Teuteuʻi ha kiʻi kulupu ʻo e fānaú ke nau hivaʻi ʻa e “Ko e Tangata Potó mo e Tangata Valé” (Tohi Hiva ʻa e Fānaú, p. 281) pe ko haʻo teuteuʻi ke hivaʻi pe lau ʻa e ngaahi leá fakataha mo e fānaú ʻi he lolotonga ʻa e kalasí.

5. Teuteuʻi ha laʻi pepa lahi ke hiki ai ʻa e Tokāteline mo e Ngaahi Fuakava 11:24 pe ko haʻo palani ke hiki pe ia ʻi he palakipoé.

6. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Ko ha ngaahi kaati fute 3” x 5” pea mo ha ʻoneʻone pe ko ha māsima (faʻiteliha pē).

   3. Fakatātā 7–12, Ko e Malanga ʻi he Moʻungá (Ngaahi Fakatātā ʻo e Ongoongoleleí 212; 62166 900).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

Fehuʻi ki he fānaú kapau naʻa nau manatuʻi ke fai ʻenau lotú ʻi he pongipongi mo e efiafi lolotonga ʻa e uike kuo hilí. Fehuʻi ange ke nau fakahā mai ko e hā e ongo naʻa nau maʻu ʻi he taimi naʻa nau fakahoko ai ʻení.

ʻEkitivitī ke Takiakiʻi ʻAki e Tokangá

Kapau naʻá ke ilifia ʻi he matangi naʻe toó, fakamatala ange muʻa ki he meʻa naʻe hokó. Fakamatalaʻi ʻa e ʻuhinga naʻá ke hohaʻa aí pea ko e hā e meʻa naʻá ke fai ke ke hao aí. Fehuʻi ki he fānaú pē naʻe ʻi ai ha taimi ne nau ilifia ai ʻi ha tō ʻa ha matangi, pea fakaafeʻi ʻa kinautolu ko ē te nau loto ki aí ke nau fakamatalaʻi ki he kalasí ʻa e ongo naʻa nau maʻú.

ʻEkitivitī Tautaufetongi ke Takiakiʻi ʻAki e Tokangá

Fakapipiki pe kūluuʻi fakataha ha ongo foʻi seti kaati tatau ʻe ua ʻo hangē ha falé ʻoku fute ʻe 3” x 5”. (ʻOku ʻikai ke ʻuhinga ʻeni ia ke fuʻu fakaʻauliliki. ʻE ʻaonga ki he foʻi ʻekitivitī ko ʻení hano fakapipiki fakataha ha foʻi kaati ʻe fā ke ne faʻu ha kiʻi puha.) Tuku ki ha taha ʻo e fānaú ke ne hili ha taha ʻo e meʻa naʻe faʻú ʻi he tēpilé pea ko e tahá ʻi he fokotuʻunga ʻoneʻoné pe masimá ʻi he funga tēpilé. Hili iá lulu ʻa e tēpilé koeʻuhí ke ngaue pe ngangana ki lalo ʻa e kaati naʻe hilifaki aí. Tala ange kia kinautolu ko e fale ko ē ʻoku tuʻu ʻi he ʻoneʻoné ʻe ngaue maʻu pe ia pea mo holo koeʻuhí ʻoku holongofua pe ʻa e ʻoneʻoné ia.

Fakamatala ʻa e Folofolá

Akoʻi ʻa e fakamatala ʻa Sīsū ki heʻene kau ākongá ʻo fekauʻaki mo e founga ʻo hono langa ʻo e falé ʻi he maká kae ʻikai ko e ʻoneʻoné ʻi he Mātiu 7:24–27 pea mo e Luke 6:47–49. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” viii.) Fakamatalaʻi ʻe lava ʻe heʻetau moʻuiʻaki ʻa e ongoongolelei ʻa Sīsū Kalaisí ke tokoni kia kitautolu ke tau matuʻuaki ʻa e ʻahiʻahí pe ngaahi palōpalema ʻi heʻetau moʻuí.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

• Naʻe langa ʻi fē ʻe he tangata potó hono falé? (Mātiu 7:24; Luke 6:47–48.) Ko e hā ʻokú ke fakakaukau ai ʻoku poto ʻa e tangatá?

• Naʻe langa ʻi fē ʻe he tangata valé hono falé? (Mātiu 7:26; Luke 6:49.) Ko e hā hono ʻuhinga hoʻo fakakaukau ʻo pehē ʻoku vale ʻa e tangatá? Ko e hā hoʻo fakakaukau ʻe lava ʻe ha taha ke langa hono falé ʻi ha fakavaʻe ʻoneʻone? Ko e fē ha feituʻu ʻe mei faingofua ange ke keli ai ha fakavaʻé—ʻi he ʻoneʻoné pe ko ha kelekele ʻoku fefeká?

• Ko e hā hono ʻuhinga ʻo e haʻu kiate ia “ ʻo fanongo ki he ngaahi lea ʻa Sīsuú’ mo fai ki aí”?

• Ko e hā hoʻo fakakaukau ki hono fakatatau ʻe Sīsū ha taha ʻoku fanongo ki heʻene ngaahi akonakí pea talangofua kia kinautolú ki he tangata ko ia naʻe langa hono falé ʻi he maká?

• Ko e hā hoʻo fakakaukau ki hono fakatatau ʻe Sīsū ha taha ʻoku fanongo ki heʻene ngaahi akonakí pea ʻikai te ne talangofua kia kinautolú ki ha tangata ʻoku langa hono falé ʻi he ʻoneʻoné?

Tuku ange ki ha kiʻi kulupu ʻo e fānaú ke nau hivaʻi ʻa e “Ko e Tangata Potó mo e Tangata Valé” (Tohi Hiva ʻa e Fānaú, p. 281) pe ko hona hivaʻi pe lau ʻa e ngaahi leá ki he kalasí.

Hanga ʻo lau ʻa e folofola ʻa Sīsū ʻoku ha ʻi he Tokāteline mo e Ngaahi Fuakavá 11:24, ko e fakahā naʻe ʻoange ʻo fakafou mai ʻia Siosefa Sāmita ki hono taʻokete ko Hailamé. Fakaʻaliʻali ha laʻi pepa lahi ʻoku hiki ai ʻa e folofola ko ʻení pe ko haʻo hiki ʻi he palakipoé.

Ngaahi Fehuʻi ke Aleaʻi pea mo Fakaʻaongaʻí

• Ko e hā ʻoku totonu ai ke langa hotau ngaahi falé, pe ko hono fakalea ʻe tahá, ʻa ʻetau ngaahi moʻuí, ʻi he maka ʻo Sīsū Kalaisí pea mo ʻene ongoongoleleí? (Hilamani 5:12.)

Tokoniʻi ke mahino kia kinautolu ko Sīsū Kalaisi pē mo ʻene ngaahi akonakí ʻa hotau fakavaʻe ʻoku pau tahá. Pea kapau te tau toe langa ʻetau ngaahi moʻuí ʻi ha toe faʻahinga meʻa pē, ʻe tatau pe ia mo ha langa ʻo ha fale ʻi he ʻoneʻoné.

Ngaahi Fehuʻi ke Aleaʻi pea mo Fakaʻaongaʻí

• Ko e hā ha meʻa ʻoku hanga ʻe he niʻihi ʻo e kakaí ʻo langa ai ʻenau moʻuí ʻa ia ʻoku fakatatau ki he ʻoneʻoné?

Aleaʻi ʻa e ngaahi meʻa ko ʻení ʻo hangē ko e paʻangá, ongoongó, manakoa, talavou fakaesinó, mo e alā meʻa pehē. Fakamatalaʻi ko e ngaahi meʻá ni kotoa ko e fakavaʻe ia ʻo e ʻoneʻoné ke hoko ko ha tefitoʻi taumuʻa ʻo e moʻuí.

Ngaahi Fehuʻi ke Aleaʻi pea mo Fakaʻaongaʻí

• ʻOku mahuʻinga nai ki heʻetau moʻuí ke tau ngāue ke maʻu ha paʻanga, kau ʻi ha vaʻinga sīpoti pea fai ha fakamālohisino, maʻu foki mo ha ngaahi kaungāmeʻa pea fai ha ngaahi meʻa lelei kia kinautolu? Ko e hā hono ʻuhingá?

Fakamatalaʻi ʻoku tau fie maʻu ʻa e paʻangá ke fakatau mai ʻaki ha meʻakai, mo ha vala, pea mo e alā meʻa pehē. ʻOku hoko foki ʻa e ngaahi kaungāmeʻá pea mo e ngāué ko ha toe ongo foʻi meʻa mahuʻinga ia ʻi heʻetau moʻuí. Pea kapau ʻe hoko ʻa e ngaahi meʻá ni ʻo fuʻu mahuʻinga ange ia ʻi heʻetau muimui ʻi he Fakamoʻuí pea moʻuiʻaki ʻa e ongoongoleleí, ʻe lava pē ke mole meiate kitautolu ʻa e ngaahi tāpuaki ʻo e moʻui taʻengatá.

Ngaahi Fehuʻi ke Aleaʻi pea mo Fakaʻaongaʻí

• Ko e hā hono ʻuhinga naʻe tuku mai ai ʻa kitautolu ʻe he Tamai Hēvaní ki he māmaní?

• Ko e hā ha niʻihi ʻo e ngaahi founga pau te tau lava ke langa ai ʻetau moʻuí ʻia Sīsū Kalaisi pea mo ʻene ngaahi akonakí?

ʻEkitivitī Fakatupulakí

Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi he lolotonga ʻo e lēsoní, pe ko hano vakaiʻi, pe fakamatala fakanounou, pē ʻi hono tukupaá.

1. ʻOange ke taki taha ʻa e fānaú ha laʻi pepa ʻoku hiki ai ʻa e ngaahi foʻi lea ko Ko Sīsuú ko hoku fakavaʻe pau tahá pe ia koeʻuhí hiki fakalōloa ʻi ʻolunga. Kole ki he fānaú ke nau hiki ʻi he lahi taha te nau ala lavá ʻi he laʻi pepá ʻe lava ke ne fakaʻosi mai ʻa e foʻi sētesí. Hili ko iá peá ke kole ange ke nau fakahā atu ʻa ʻenau ngaahi talí. Kapau naʻe teʻeki ai ke nau fakakaukau ki he ngaahi meʻá ni, fakapapauʻi ke ke lava kia kinautolu:

   ʻOkú ne ʻofa ʻiate au.

   Naʻá ne akoʻi au ki he founga totonu ʻo e moʻuí.

   Naʻá ne tā ha sīpinga kiate au.

   Naʻá ne foaki ʻa ʻene moʻuí maʻaku. Naʻá ne mamahi ko ʻeku ngaahi angahalá.

   Koeʻuhí pe ko ia te u toe lava ai ʻo toetuʻu.

   Naʻá ne fakafaingofuaʻi ke u toe lava ke foki ki he Tamai Hēvaní.

2. Tuku ange ki ha taha ʻo e fānaú ke ne fakaʻosi mai ʻa e sētesí. “Te u fokotuʻu ʻa ʻeku moʻuí ʻi he Fakamoʻuí ʻaki “. ʻE lava pē ke kau ʻi he ngaahi talí ʻa e efiafi fakafāmili ʻi ʻapí, fai ha tokoni ʻi ʻapi, totongi vahe hongofulu, lotu, talangofua ki he Lea ʻo e Potó, fakahā ʻa e moʻoní, fakahā ʻo ha ʻulungāanga lelei ki he niʻihi kehé, lau ʻo e ngaahi folofolá, anga fakaʻapaʻapa, pea mo e alā meʻa pehē. Hanga ʻo ʻoange ki he fānaú taki taha ha faingamālie, ke fai atu ai ʻenau ngaahi fokotuʻú ki he meʻa ʻoku fie maʻú. ʻE lava pē ke ke hokohoko atu kae lava ke nau fakakaukau ki ha ngaahi fekau te nau ala ʻiló. Fakamahino ange ko e founga pe ʻe taha te tau lava ai ke maʻu ʻa e moʻui taʻengatá ko e talangofua ki he ngaahi lao ʻo e ongoongoleleí. ʻE lava pē ke ke hiki ʻi ha ngaahi laʻi pepa kehekehe ʻa e meʻa naʻe fakahā atu ʻe he fānaú pe ko haʻo fakapipiki ia ki ha ngaahi foʻi maka ke nau ō mo ia ki honau taki taha ʻapi.

3. Tuku ki he fānaú ke nau kumi ʻa e ngaahi folofola ko ʻení ke vakai pe ko e hā e lau ʻa Sīsū ʻo fekauʻaki mo e talangofuá. Fakamanatuʻi ange kia kinautolu ʻoku makatuʻunga ʻeni ʻi heʻetau talangofua ki he ngaahi fekau ʻa Sīsuú pea te tau lava ai ke fokotuʻu ʻetau moʻui ʻi ha fakavaʻe ʻoku paú.

   Mātiu 7:21 (fakahonihino ki he fakamatala e)

   Luke 11:28

   Sione 15:10

4. Mou toe fakamanatu ʻa e tefito ʻo e tui hono tolú mo e fānaú.

5. Tokoniʻi ke nau ako maʻu loto ʻa e Tokāteline mo e Ngaahi Fuakava 11:24 mei ha siaté pe ko e palakipoé.

Fakaʻosí

Fakamoʻoní

Fakahā ʻa e ʻofa ʻokú ke maʻu ki he Fakamoʻuí peá ke fakamoʻoniʻi ko e fekau kotoa pē kuó ne ʻomaí te ne tokoniʻi kitautolu ke tau maʻu ʻa e fiefiá pea ko e talangataʻá ʻokú ne tataki ʻa kitautolu ki he mamahí. Mahalo pē te ke fie fakahā mai ha meʻa naʻe hoko kiate koe ʻi he hoko ʻa hoʻo moʻuiʻaki ʻa e ongoongoleleí ko ha tāpuaki ia kiate koe.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Mātiu 7:24–27 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.