Ko e Fakaului ʻo Saulá

Taumuʻá

Ke poupouʻi ʻa e fānaú taki taha ke nau hoko ʻo ului kakato ange kia Sīsū Kalaisi.

Teuteú

Ako ʻi he faʻa lotu ʻa e Ngāue 7:57–60, 8:1–3, 9:1–30, 26:9–23, mo e Mōsaia 5:2. Hili ia peá ke ako ʻa e lēsoní mo ke fili pe ʻe anga fēfē haʻo fiemaʻu ke akoʻi ki he fānaú ʻa e ngaahi fakamatala ʻa e folofolá. (Vakai, “Teuteu Hoʻo Lēsoní,” vi, mo e “Faiako mei he Folofolá,” viii.)
Laukonga ʻoku fokotuʻu atu ke fai: Ngāue 22:3–21.
Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ko ia ʻe fakakau mai ai ʻa e fānaú mo tokoni lelei taha ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Ko e ipu sioʻata ʻoku fonu vai.
3. Fakatātā 7-42, Ko Paula ʻi he Hala ki Tamasikusí.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Fakaʻaliʻali ange ha ipu vai ki he fānaú.

ʻEkitivitī ke Takiakiʻi ʻAki e Tokangá

Ko e hā e meʻa ʻoku hoko ʻi he lili ʻa e vaí? (ʻOku liliu ia ki he maó.)
Ko e hā e meʻa ʻoku hoko ʻi he tuku ʻaisi ʻa e vaí? (ʻOku liliu ia ki he ʻaisí.)

Fakamatalaʻi ange ko e taimi ko ē ʻoku mafuli ai ʻa e vaí ʻo ʻaisí pe maó, ʻoku tau pehē kuo “liliu.” ʻOku kehe leva ia mei he vai totonú.

ʻEkitivitī ke Takiakiʻi ʻAki e Tokangá

ʻOku anga fēfē ʻa e ului ʻa e kakaí ki he ongoongolelei ʻa Sīsū Kalaisí? ʻOku anga fēfē ʻa e liliu ʻa ʻenau moʻuí ʻi he taimi ʻoku nau ului aí?

Tohiʻi ʻi he palakipoé ʻa e foʻi lea fakaului. Fakamatalaʻi ko e lēsoni ko ʻení ʻoku kau ia ki ha mana fakaului ʻo ha tangata ki he ongoongolelei ʻo Sīsū Kalaisí.

Fakamatala ʻa e Folofolá

Akoʻi ki he fānaú ʻa e fakamatala ki hono fakaului ʻo Saula ki he Siasi ʻo Sīsū Kalaisí ʻoku ʻi he Ngāue 9:1–20. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” vi.) Tokoni ke mahino ki he fānaú ko e Saula ko ʻení ʻoku ʻikai ko e fuofua tuʻi ia ʻo ʻIsilelí ka ko e tangata ia naʻá ne hoko ko e faifekau tuʻukimuʻa ko Paulá.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo hoʻo fānaú ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Naʻe founga fēfē hono fakatangaʻi ʻe Saula ʻa e kau mēmipa ʻo e Siasí? (Ngāue 7:57–60; 8:1–3; 9:1–2.) Naʻe mei anga fēfē ʻa e ongo naʻe maʻu ʻe he kau mēmipa ʻo e Siasí ʻo kau kiate iá? Ko e hā ha ongo te ke maʻu ʻo kapau ʻe fakatangaʻi koe ʻe ha taha ko e siasi ʻokú ke kau ki aí? Ko e hā ha tali ʻoku totonu ke tau fai ʻi he taimi ʻe fai mai ai ʻe ha taha ha meʻa pehení? Poupouʻi ʻa e fānaú ke nau fakahā mai ha ngaahi meʻa naʻe hoko kia kinautolu ʻi he taimi naʻe fakaoli ʻaki ai kinautolu pe fai ange ha anga kovi koeʻuhí ko ko e siasi ʻoku nau kau ki aí.
Ko e hā e meʻa naʻe hoko ʻi he hala ki Tamasikusí ʻa ia naʻe tokoni kia Saula ke ne ʻiloʻi ʻoku fie maʻu ke fakatomala mei heʻene ngaahi angahalá? (Ngāue 9:3–6.) Ko hai naʻe fefolofolai mo Saula ʻi he visione ko ʻení? Ko e hā e founga ʻoku tokoni mai ai ʻa e Tamai Hēvaní pea mo Sīsū Kalaisi ke tau ʻiloʻi ʻa e taimi ʻoku fie maʻu ai ke tau fakatomalá? (Ngaahi ongo mei he Laumālie Māʻoniʻoní mo e fakahinohino mei heʻetau ngaahi mātuʻá, kau palōfitá, pea mo e folofolá.)
Ko e hā hono ʻuhinga “ ʻa hoʻo ʻaka ki he meʻa māsilá”? (Ngāue 9:5.) (Ko e huhú ko ha tao māsila ia naʻe fakaʻaongaʻi ʻe he kakaí ke hokaʻaki ʻa e fanga manú ke nau lava ʻo ngaue. Ko e lahi ange ʻa e ʻaka mai ʻa e fanga manú, ko e lahi ange ia hono fakamamahiʻi kinautolu ʻe he taó. Naʻe folofola ʻa Sīsū Kalaisi kia Saula ʻoku hanga ʻe heʻene tōʻongá ʻo fakamamahiʻi lahi ange ia ʻi ha toe taha kehe. Ko e lahi ange ʻa ʻetau fakafepaki ki he moʻoní, ko e toe lahi ange ia ʻo ʻetau fakamamahiʻi ʻa kitautolú.) ʻE anga fēfē ha mamahi ʻa ha taha ʻi heʻene feinga ke fakafepakiʻi ʻa e moʻoní? ʻOmi ha fakatātā feʻunga ʻi ha meʻa naʻe hoko kiate koe, ʻo ka ʻoku fiemaʻu.
Ko e hā e meʻa naʻe fai ʻe Saula ke fakatomala pea mo tafoki ai kia Sīsū Kalaisí? Ko e hā ʻe meʻa ʻoku fie maʻu ke tau fai ke tau fakatomala ai mei heʻetau ngaahi angahalá? Mou aleaʻi ʻa e ngaahi poini ko ʻení (mahalo te ke fie maʻu ke hiki kinautolu ʻi he palakipoé):
- Naʻá ne ʻiloʻi ʻene ngaahi angahalá. (Ngāue 9:6.)
- Naʻá ne ʻaukai mo lotu ki he fakamolemolé. (Ngāue 9:9, 11.)
- Naʻá ne papitaiso. (Ngāue 9:18.)
- Naʻá ne feinga ke fakatonutonu ʻa ʻene ngaahi fehālaakí. (Ngāue 9:20.)
- Naʻá ne liliu ʻo ʻikai te ne toe fakatangaʻí ʻa e kakaí.
Fakamatalaʻi naʻe kākaaʻi ʻa Saula ka naʻe ʻikai ke faiangahala ia ʻi hono lotó.
Ko e hā ʻoku mahuʻinga ai ke tau fakatomala ʻi he taimi ʻoku tau fai ai ha fehālaakí? Ko e hā e ongo ʻoku tau maʻu ʻi heʻetau fakatomalá?
Ko e hā e meʻa naʻe folofola ʻa e ʻEikí kia ʻAnanaia ke ne faí? Ko e hā hono ʻuhingá? (Ngāue 9:10–12.) (Fakamatalaʻi ange ko e ʻAnanaia kehe ʻeni ia mei he toko taha ko ia naʻe noa koe ʻikai ke faitotonú.) Ko e hā naʻe ilifia ai ʻa ʻAnanaia ke fai ki he meʻa naʻe kole ange ʻe he ʻEikí? (Ngāue 9;13–14.)
Ko e hā naʻe ui ai ʻe he ʻEikí ʻa Saula ko e “meʻangāue kuo filí”? (Ngāue 9:15–16.) Ko e hā e ngaahi meʻa mahuʻinga naʻe finangalo ʻa e Tamai Hēvaní ke fai ʻe Saulá? (Ngāue 26:16, 18.) Ko e hā ha ngaahi meʻa mahuʻinga ʻoku finangalo ʻa e Tamai Hēvaní ke ke faí? ʻE anga fēfē haʻo ako ki he ngaahi meʻa ko ʻení?
Naʻe anga fēfē ʻa e kui ʻa Saulá? (Ngāue 9:8; 22:11.) Ko e hā e meʻa naʻe hoko ʻi hono tāpuakiʻi ʻe ʻAnanaia ʻa Saulá? (Ngāue 9:17–18.)
Hili hono fakaului ʻo Saulá, ko e hā hono ʻuhinga naʻe ʻikai ai ke tui ʻa e kakaí pe ko e kau ākongá kiate ia ʻi heʻene malangá? (Ngāue 9:21, 26.) Ko e hā hono ʻuhinga naʻe pau ai ke ʻalu ʻa Saula mei he fonuá? (Ngāue 9:23, 29–30.)
Ko e hā e meʻa ʻe fai ʻe he Tamai Hēvaní ʻi he taimi te tau fakatomala ai mei heʻetau ngaahi angahalá? (T&F 58:42.) ʻE anga fēfē haʻatau tokoni kia kinautolu ko ia ʻoku feinga ke fakatomala mo muimui ʻia Sīsuú?
Ko e hā e fakamoʻoni ʻa Saula kia Sīsū Kalaisí? (Ngāue 9:20; 26:22–23.) ʻOku anga fēfē ʻa ʻetau ʻiloʻi ʻi he taimi ʻoku tau ului moʻoni ai ki he ongoongolelei ʻo Sīsū Kalaisí? (Mōsaia 5:2.)

Aleaʻi ʻa e kupuʻi lea ko ʻení meia Palesiteni ʻEselā Tafi Penisoni, ko e Palesiteni ia hono hongofulu mā tolu ʻo e Siasí: “ ʻOku makatuʻunga ʻa ʻetau kātekina ʻa e ngaahi faingataʻa ʻi he māmaní, tuʻunga ʻi heʻetau tui kia Sīsū Kalaisi pea mo e [ngāue] ʻa e Laumālié ʻiate kitautolú, ʻo hangē tofu pe ia kuo foʻou ʻa kitautolú … Kuó ke siʻaki ʻa e faiangahalá ʻi hoʻo moʻuí … pea hoko ʻo maʻa foki. ʻOku ʻikai ke ke [holi] ke foki ki hoʻo ngaahi founga motuʻá. Kuó ke hoko ko ha toko taha foʻou” (The Teachings of Ezra Taft Benson, p. 470). (Te ke lava pē ke ke fakaʻaongaʻi ʻa e ʻekitivitī fakatupulaki 1 ke ke fakatupuaaʻi ʻaki ʻa e fānaú ke nau ako ʻo fekauʻaki mo e meʻa naʻe fakamatalaʻi mai ʻe Palesiteni Penisoní.)

ʻEkitivitī Fakatupulakí

Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní pe ko hano vakaiʻi pe fakamatala fakanounou, pē ʻi hano tukupaá.

Fehuʻi ange ke nau tala atu ha ngaahi meʻa ʻe fie maʻu ke fakatomala mai ai ʻa e fānau ʻi homou toʻú, ʻo hangē ko e loí, fakakāingá, loto ʻitá, fakaʻaongaʻi ʻa e lea koví, pea mo ʻikai talangofua ki heʻenau mātuʻá. Hiki kinautolu ʻi he palakipoé ʻi he taimi te mou lava ai ki aí. Fakahā ange ki he fānaú te ke ʻoange ha kiʻi sivi kia kinautolu. Tuku ke taki taha fehuʻi hifo ʻe he fānaú, “ ʻOku totonu nai ke u fakatomala mei heni?” ʻAi ke tali fakalongolongo pe ʻe he fānaú kia kinautolu ʻa e foʻi fehuʻi taki taha. Mou aleaʻi ʻa e ngaahi sitepu naʻe fakaʻaongaʻi ʻe Saula ke ne fakatomala aí.
Hiki ʻi ha ʻū laʻi pepa kehekehe ʻa e mataʻitohi kotoa pē ʻo e kupuʻi lea “Fakatomala mo tafoki ki he ʻOtuá” (Ngāue 26:20) Tuku fakahokohoko ʻa e ʻū laʻi pepá ʻi he funga tepilé. Kole ange ki he fānaú ke nau taki taha mateʻi mai ha mataʻitohi. Ko e taimi pe ʻe mateʻi atu ai ha mataʻitohi ʻoku kau ki he kupuʻi leá, fakafoʻohakeʻi hake ia. Fakamatalaʻi ange ko e taimi te tau fakatomala aí, mo tafoki ki he ʻEikí kuo tau ului moʻoni.
Aleaʻi mo aleaʻi ʻa e tefito ʻo e tui hono faá.
Ka loto ki ai ʻa e kau Palesitenisī ʻo e Palaimelí, fakafeʻi ha taha ʻosi ngāue fakafaifekau ke haʻu ki he kalasí pea mo fakamatala ki ha meʻa naʻe hoko ʻi he taimi naʻe liliu ai ha tamasiʻi pe taʻahine ke tui kia Kalaisi, fakatomala, pea mo papitaiso. Tuku ki he taha ko iá ke ne fakahā mai ʻa e ongo ʻo e fiefia ʻokú ne maʻu mei he moʻuiʻaki ʻa e ngaahi akonaki ʻo e ongoongoleleí.
Kole ange ki ha taha ke ne tā ha fakatātā ʻo ha hala mangamanga ʻi he palakipoé. Tuku ki ha taha kehe ke ne hiki mai ʻa e hingoa ʻo e kolo te ne fie maʻu ke ʻeva ki ai ʻi he tumuʻaki ʻo ha hala ʻe taha.
- Ko e hā ha meʻa te ke faí ʻo kapau naʻe hala ʻa hoʻo afé pea toki ʻilo ʻokú ke ʻi ha feituʻu hala koe?
- Te ke lava nai ke ke aʻu ki he koló mei he feituʻu ʻokú ke nofo aí?
- Ko e hā e meʻa ʻoku totonu ke ke fai ʻi he taimí ni ke ke aʻu ai ki he kolo naʻá ke fie maʻu ke ke ʻalu ki aí?
- ʻOku anga fēfē e hoko ʻa e fakatomalá ʻo hangē ko haʻate foki ki he hala totonú?
Hivaʻi pe lau ʻa e “Fakatomalá” (Tohi Hiva ʻa e Fānaú, p. 98) pe “ ʻI he Taimi ʻe Papitaiso ai Aú” (Tohi Hiva ʻa e fānaú, p. 103).

Fakaʻosí

Fakamoʻoní

Fai ʻa hoʻo fakamoʻoní ʻa e mahuʻinga ʻo e fakatomalá ʻi heʻetau ngaahi moʻuí pea mo hono mahuʻinga ʻo ʻetau ului moʻoni ki he ongoongolelei ʻa Sīsū Kalaisí. Fakahā maia ʻa hoʻo ʻofa ki he ongoongoleleí.

Laukonga ʻoku Fokotuʻu Atu ke Fai mei ʻApi

Fokotuʻu ange ke nau ako ʻa e Ngāue 9:1–20 ʻi ʻapi ke hoko ia ko hano toe fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.