ʻOku Fakamoʻoni ʻa Paula kia Sīsū Kalaisi

Taumuʻá

Ke tokoniʻi ʻa e kiʻi tamasiʻi kotoa pē ke ne loto-toʻa ʻi hono fakamoʻoniʻi ʻo Sīsū Kalaisí.

Teuteú

Ako ʻi he faʻa lotu ʻa e Acts 13:2–4; 14; and 16:16–34. Hili iá peá ke ako hoʻo lēsoní mo ke fili pe ʻe anga fēfē haʻo fiemaʻu ke akoʻi kia kinautolu ʻa e fakamatala ʻo e folofolá. Vakai, “Teuteu Hoʻo Lēsoní,” vi, mo e Faiako mei he Folofolá,” viii.)
Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ko ia ʻe fakakau mai ai ʻa e fānaú mo tokoni lelei taha ke nau aʻusia a e taumuʻa ʻo e lēsoní.
Teuteu ha tatau ʻo e kiʻi pāsolo ʻoku maʻu ʻi he konga ki mui ʻo e lēsoní. Tohiʻi fakalōloa mata lalahi ʻa e foʻi lea LOTOTOʻÁ ki muʻa peá ke toki kosikosi ʻa e fanga kiʻi kongá.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Ko ha laʻi pepa mo e peni vahevahe ki he ki he toko taha kotoa.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Vahevahe ʻa e kongokonga pāsoló ki he fãnaú. Aleaʻi ʻa e ʻuhinga ʻo e foʻi lea taki taha ʻi he kiʻi kongokonga pāsoló mo feinga ke kakato ʻa e pāsoló. Tuku ange ki he fãnaú ke nau fulihi hake ʻa e kongakonga pāsoló pea feinga ke toe fakafoki ʻa e pāsoló ke maʻu mei ai mo ha toe foʻi lea ʻe taha. Hikiʻi ʻi he palakipoé ʻa e LOTO-TOʻÁ.

ʻEkitivitī ke Takiakiʻi ʻAki e Tokangá

Ko e hā hono ʻuhinga ʻo e loto-toʻá? Fakamatalaʻi ange ko e ngaahi foʻi lea ko ia ʻi he kongokonga pāsoló ʻe tokoni atu ia ke ne fakamatalaʻi ko e hā hono ʻuhinga ke tau loto-toʻa aí. Pea lava ke fakamatalaʻi ko e hā hono ʻuhinga ʻoku fie maʻu ai ke tau loto-toʻá?
Ko e hā e ngaahi foʻi lea ʻokú ke manatuʻi ki he pāsoló? Hiki ʻa e ngaahi foʻi lea pe ko hano fakaʻaliʻali ʻa e kongokonga pāsoló ʻi lalo ʻi he foʻi lea ko e LOTO-TOʻÁ.

Fakamatala ʻa e Folofolá

Fai ha kiʻi fakamanatu nounou ʻo e ului ʻa Saula ki he ongoongoleleí, pea mo fakahā ange ki he fānaú naʻe liliu ʻa e hingoa ko ʻo Saulá ko Paulá. Naʻe taʻofi ʻe Saula ʻa ʻene fakatangaʻi ʻa e kau muimui ʻo Sīsuú pea hoko ko ha ʻAposetolo loto-toʻa pea mo ha faifekau ʻa Sīsū Kalaisi.

Akoʻi ki he fānaú ʻa e fakamatala ʻo e ngāue fakafaifekau ʻa Paula mo Panepasá ʻa ia ʻoku hā ʻi he Ngāue 13:2–4; 14 pea mo e fakamatala ki he tuku pōpula ʻo Paula mo Sailosi ʻoku hā ʻi he Ngāue 16:16–34. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” viii.) Kole ange ke nau fanongo ki he ngaahi founga ʻo hono fai ʻo e fakamoʻoni loto-toʻa ʻa Paula, Panepasa mo Sailosi kia Sīsū Kalaisi pea mo ʻene ongoongoleleí.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo hoʻo fānaú ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa naʻe ui ʻe he ʻEikí ʻa Paula mo Panepasa ke na faí? (Ngāue 13:2–4.)
Hili ko ia hono fakamoʻui ʻe Paula mo Panepasa ʻa e tangata pipikí ʻi Lisitá, naʻe fakakaukau ʻa e kakaí ko hai ʻa kinaua? (Ngāue 14:11–12.) (Fakamatalaʻi ange ko Supita mo Mekulioó ko e ongo ʻotau loi ia naʻe lotu ki ai ʻa e kakaí. Naʻe ʻikai te nau ʻilo ʻo kau ki he Tamai Hēvaní pea mo Sīsū Kalaisi.) Ko e hā e meʻa naʻe feinga ʻa Paula mo Panepasa ke akoʻi ki he kakaí ʻo kau kia Sīsū Kalaisí? (Ngāue 14:14–17.)
Naʻe anga fēfē hono talitali ʻe he kau Sīu ʻo ʻAniteoke mo ʻIkoniume ʻa Paulá? Ko e hā haʻo fakakaukau naʻe kei hokohoko atu pē hono malangaʻi ʻe Paula ʻa e ongoongoleleí hili ko iá naʻa nau ngaohi kovia iá?
Ko e hā hono ʻuhinga naʻe loto mamahi ai ha niʻihi ʻo e kau tangata ʻi Masatōniá hono fakamoʻui ʻe Paula mo Sailosi ʻa e fefine naʻá na kapusi ʻa e laumālie ʻulí meiate iá? (Ngāue 16:19.) Ko e hā e meʻa naʻe fai ʻe he kau tangatá ni kia Paula mo Sailosí? (Ngāue 16:20–23.)
Ko e hā e meʻa naʻe fai ʻe Paula mo Sailosi lolotonga ʻa ʻena ʻi he fale fakapōpulá? (Ngāue 16:25.) Ko e hā hono ʻuhinga ʻokú ke fakakaukau naʻá na lotu pea mo hiva fakafetaʻi ai ki he ʻOtuá? Ko e hā haʻo fakakaukau ki he meʻa naʻe hoko ki he toenga ʻo e kau pōpulá ʻi he meʻa naʻá na faí?
Ko e hā ʻokú ke fakakaukau naʻe nofo ai pē ʻa Paula mo Sailosi ʻi he fale fakapōpulá hili ko iá kuo hanga ʻe he mofuiké ʻo fakaava ʻa e matapā ʻo e fale fakapōpulá? (Ngāue 16:27–31.) Naʻe anga fēfē hono tāpuekina ʻe heʻena tōʻongá ʻa e tauhi ʻo e fale fakapōpulá pea mo hono fāmilí? (Ngāue 16:32–34.) Ko e hā ʻa e faʻahinga faingamālie ko ia ʻoku tau maʻu ke fakamoʻoniʻi pea mo akoʻiʻaki ʻa e niʻihi kehé ʻo kau kia Sīsū Kalaisí?
Tuku ke lau ʻe he fānaú ʻa e Ngāue 14:3 mo e 16:18, 25, 31. ʻOku anga fēfē hono fakahā mai ʻe he ngaahi fakamoʻoni folofola ko ʻení naʻe loto-toʻa pē ʻa Paula ʻi heʻene fakamoʻoniʻi ʻa Sīsū Kalaisi ʻo tatau ai pē ko e fē e feituʻu ʻokú ne ʻalu ki aí. ʻE anga fēfē ʻetau ʻai ke ʻilo ʻe he kakai kehé ʻoku tau maʻu ha ngaahi fakamoʻoni mālohi kia Sīsū Kalaisi?
Ko e hā ha niʻihi ʻo e ngaahi faingataʻa te tau lava ke fepaki mo ia ʻi heʻetau feinga ke tau loto-toʻa ʻi hono fakamoʻoniʻi ʻo Sīsuú?

Fakatukupaaʻi ʻa e fānaú ke nau fakakaukau ki ha ngaahi meʻa faingofua pē te nau lava ke fai ʻi he uiké ni ke fakahāʻaki ki he niʻihi kehé ʻoku nau maʻu ha ngaahi fakamoʻoni mālohi kia Sīsū Kalaisi. Tuku ange ke nau hikiʻi hifo ha foʻi fakakaukau pē ʻe taha pea tuku ʻa e laʻi pepá ʻi ha feituʻu te nau lava ʻo mamata maʻu pe ki aí. ʻE lava pē ke ke toe tuku ange ke nau hikiʻi ʻa e ngaahi foʻi lea mei he kiʻi pāsoló ʻi heʻenau pepá.

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ngaahi ʻekitivitií ni he lolotonga ʻo e lēsoní, pe ko hano vakaiʻi, pe fakamatala fakanounou, pē ʻi hono tukupaá.

Teuteuʻi ʻa e ngaahi foʻi lea ko ʻení pe ko haʻo hiki kinautolu ʻi he papakipoé:
- Fai haʻo fakamoʻoni kia Sīsū Kalaisi
- Akoʻi ʻo kau ki he “ ʻOtua moʻuí”
- “Naʻe lotu mo hiva fakafetaʻu ki he ʻOtuá”
- Naʻe nofo ʻi he fale fakapōpulá pea mo fakahaofi ʻa e tangata tauhí
- Akoʻi ʻa e tauhí ke “tui ki he ʻEiki ko Sīsū Kalaisí”
Hiki ʻa e ngaahi fakamoʻoni folofola ko ʻení ʻi ha ngaahi laʻi pepa kehekehe: Ngāue 14:3, Ngāue 14:15, Ngāue 16:25, Ngāue 16:28, Ngāue 16:25, Ngāue 16:28, Ngāue 16:31.

Fakaʻaliʻali ʻa e ngaahi foʻi leá pea mo tufotufa ʻa e ngaahi fakamoʻoní ki he fānaú. Tuku ange ke nau lau tahataha ʻa e ngaahi fakamoʻoní, pea mo fili ko e fē ʻa e foʻi lea ʻe ʻalu fakataha mo e fakamoʻoní. Fakamatalaʻi ange ko Paulá ko ha fakamoʻoni loto-toʻa ia ʻo Sīsū Kalaisi ʻo tatau ai pē ko e fē feituʻu ʻoku ʻi aí pea ko e hā ʻokú ne faí.
Toe lau ʻa e ngaahi lea ʻo e kongokonga pāsoló pea mo tuku ki he fānaú ke nau aleaʻi ʻa e founga te na lava ke fakamoʻoniʻi loto-toʻa ai ʻa Sīsū Kalaisi ʻi he ngaahi feituʻu ko ʻení. Mahalo te ke fie maʻu ke maʻu ʻa e ngaahi meʻa ʻoku meimei tatau mo ʻení, ʻa ia ʻoku hiki ʻi he ngaahi laʻi pepá. Hili iá peá ke tuku ange ke fili ʻe he kiʻi tamasiʻi pe taʻahine kotoa pē ha laʻi pepa ʻe taha pea mo fakahā mai ʻa e founga ʻa ia te ke lava ke fili ke ne lavaʻi ai ʻa e tukupaá:
- Naʻe fakamataliliʻi koe ʻe ho kaungāmeʻá koeʻuhí ko e ʻikai te ke ʻalu ʻo kaukau tahi ʻi he ʻaho Sāpaté.
- Naʻe fakaafeʻi koe ki ha heleʻuhila ʻoku ʻikai ke feʻunga mo e ngaahi tuʻunga ʻo e Siasí.
- Naʻe kamata ke fai ʻe ha niʻihi ʻo ho ngaahi kaungāmeʻá ha ngaahi fakakata mo ha ngaahi talanoa taʻe feʻunga.
- Naʻe toʻo mei ha fale koloa ʻe hao kaungāmeʻa ha foʻi mama ʻo faʻo ʻi hono kató peá ne fakalotoa koe ke ke fai ʻa e meʻa tatau.
- Naʻe faʻu ʻe ha taha ʻi hoʻo kalasí ha fakamatala loi ʻo kau ki he ngaahi tokāteline ʻo e Siasí.
- Naʻe ʻahiʻahiʻi koe ke ke sio ki ha laʻi pepa kehe lolotonga ʻa e siví.
Tuku ke fakatūlamaʻi ʻe he fānaú ʻa e talanoa ko ia ʻo Paula mo Sailosí ʻi he fale fakapōpulá. Hili iá ʻai ke hangē pē ʻoku nau fakaʻekeʻeke ʻa Paula, Sailosi, kau tangata ʻi he fale fakapōpulá, tangata tauhi ʻo e fale fakapōpulá, pea mo hono fāmilí. Fehuʻi kia Paula mo Sailosi koe hā hono ʻuhinga naʻe fakahū ai kinaua ki he fale fakapōpulá pea ko e hā e meʻa naʻe hoko kiate kinaua aí. Fehuʻi ki he kau tangata kehe ʻi he fale fakapōpulá ko e hā e ongo naʻa nau maʻu ʻi he taimi naʻe lotu pea mo hiva ai ʻa Paula mo Sailosí pea hanga ʻe he mofuiké ʻo fakaava ʻa e matapā ʻo e fale fakapōpulá.
Hivaʻi pe lau ʻa e ngaahi lea “Te u Loto-toʻa” (Tohi Hiva ʻa e Fānaú, p. 162), “Holi ke Faitotonu” (Tohi Hiva ʻa e Fānaú, p. 158), or “Tuʻu ʻi he Totonú” (Tohi Hiva ʻa e Fānaú p. 159).

Fakaʻosí

Fakamoʻoní

Fai ʻa hoʻo fakamoʻoni kia Sīsū Kalaisí. Pea kapau ʻoku feʻunga, fakahā ange naʻe ʻi ai ha taimi ʻe taha naʻe tāpuekina ai koe ʻe he Tamai Hēvaní koeʻuhí ko haʻo fakamoʻoni loto-toʻa kia Sīsū Kalaisi.

Laukonga ʻoku Fokotuʻu Atu ke Fai mei ʻApi

Fokotuʻu ange ke nau ako ʻa e Ngāue 16:16–34 ʻi ʻapi ke hoko ia ko hano toe fakamanatu ʻa e lēsoni ko ʻení.

Fakaafeʻi ha taha ke ne fai ʻa e lotu tukú.