Ko e kei Tamasiʻi ʻa Sīsū Kalaisí

Taumuʻá

Ke tokoniʻi ʻa e fānaú ke nau ako ʻo fekauʻaki mo e kei tamasiʻi ʻa Sīsuú’ pea mahino kia kinautolu naʻe ʻomai ʻe he ʻOtuá ha kau fakamoʻoni ke nau fakamoʻoniʻi ko hono ʻAló ʻa Sīsū Kalaisi.

Teuteú

Ako ʻi he faʻa lotu ʻa e Luke 2:21–52, Mātiu 2, Selection from the Joseph Smith Translation of the Bible Mātiu 3:24–26, pea mo e Tokāteline mo Ngaahi fuakavá 93:11–14. Hili iá peá ke ako ʻa e lēsoní mo ke fili pē ʻe anga fēfē haʻo fiemaʻu ke akoʻi ʻa e fānaú ki he ngaahi fakamatala ʻa e folofolá (vakai, “Teuteuʻi Hoʻo Lēsoní,” vi, pea mo e “Faiako mei he Folofolá,” viii).
Fili ʻa e ngaahi fehuʻi ke aleaʻí mo e ngaahi ʻekitivitī fakatupulakí ko ia ʻe fakakau mai ai ʻa e fānaú mo tokoni lelei taha ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Ko ha taumuʻa mahuʻinga, ʻo hangē ko ha tukufakaholo fakafāmili, ko ha kiʻi meʻa siʻisiʻi feʻunga pe ke fūfuuʻi ʻi he lokiakó.
3. Fakatātā 7–6, Ko e tamasiʻi ko Sīsuú ʻi he Temipalé (Ko e Ngaahi Fakatātā ʻo e Ongoongoleleí 205; 62500 900).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Ko e taimi ko ē ʻe kamata hū atu ai ʻa e fānaú ki he kalasí, fakahā ange kia kinautolu ʻa e meʻa ʻe ua pe tolu ʻa ia naʻá ke ʻomai; peá ke fūfuʻi leva ia ki muʻa ke aʻu mai ʻa e toenga ʻo e kalasí. Fehuʻi ki ha taha ʻo e fānau naʻe mamata ki he meʻa naʻá ke fakaʻaliʻali angé ke ne fakamatalaʻi ange ia ʻo ʻoua naʻá ne tala mai hono hingoá. Fehuʻi ki he niʻihi kehe ʻo e fānaú naʻe mamata ki he meʻa naʻá ke ʻomí ke nau fakamatalaʻi mai ia. Tokoni ke mahino ki he fānaú te nau lava ke toe fakapapauʻi ha faʻahinga meʻa pē ʻo kapau te nau fanongo mei ha tokolahi ʻi ha toko taha pe. Fakahā ange leva ʻa e meʻa ko iá ki he kalasí.

Fakamatalaʻi ko e fānau ko ia naʻa nau fuofua mamata ki he meʻa ko ʻení ʻoku nau hoko ko ha kau fakamoʻoni koeʻuhí naʻa nau ʻilo ʻo kau ki he meʻá ni mo fakamatalaʻi ʻa e fōtunga ʻo e meʻa ko iá. Ko e fakamoʻoní ko ha taha ʻokú ne maʻu ha ʻilo fakatāutaha ki ha faʻahinga meʻa pea lava ke ne vahevahe ʻa e ʻilo ko iá ki he niʻihi kehé. ʻE lava pē ke toe hoko ʻa e taha fakamoʻoní ke ne ʻomi ha fakamoʻoni; ʻo hangē ko ʻení, ʻoku fakamoʻoniʻi ʻe he Tohi ʻa Molomoná ko Sīsuú ko e Kalaisí ia. Fakamatalaʻi ʻi he kei tamasiʻi ʻa Sīsuú, naʻe ʻomai ʻe he Tamai Hēvaní ha kau fakamoʻoni toko lahi ke fakamoʻoniʻi ko Sīsuú ko hono ʻAló ia.

Ngaahi Fakamatala ʻa e Folofolá

Akoʻi e ngaahi fakamatala ʻa e folofolá ki he kei tamasiʻi ʻa Sīsuú, ʻo hangē ko hono fakamatalaʻi atu ʻi he konga ʻo e “Teuteú.” (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” viil.)

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā hono ʻuhinga naʻe ʻave ai ʻe Mele mo Siosefa ʻa e tamasiʻi ko Sīsuú ki he temipalé? (Luke 2:21–24.)
Naʻe anga fēfē hono ʻiloʻi ʻe Simione ko Sīsuú ko e ʻAlo ia ʻo e ʻOtuá? (Luke 2:25–30.)
Naʻe anga fēfē hono fakamoʻoniʻi ʻe ʻAna ko Sīsuú ko e ʻAlo ia ʻo e ʻOtuá? ʻOku fēfē hoʻo fakakaukau ʻi heʻene ʻilo ko hai iá? (Luke 2:36–38.)
Naʻe anga fēfē hono ʻiloʻi ʻe he kau tangata potó ko Sīsuú ko e ʻAlo ia ʻo e ʻOtuá? Ko e hā hono ʻuhinga naʻa nau foaki ange kiate ia ʻa e meʻaʻofá? (Mātiu 2:2, 11.)
ʻE anga fēfē haʻo hoko ko ha fakamoʻoni ʻo Sīsū Kalaisi?
Ko e hā hono ʻuhinga naʻe fekau ai ʻe he Tamai Hēvaní kia Siosefa ke ne ʻave hono fāmilí ki ʻIsipité? (Mātiu 2:13–14.) Ko e hā e meʻa naʻe fai ʻe Hēlota ʻi heʻene feinga ke ʻoua naʻa hoko ʻa Sīsū ko e tuʻí? (Mātiu 2:16.) Naʻe founga fēfē hono ʻilo ʻe Siosefa kuo feʻunga ke nau foki mai mei ʻIsipité? (Mātiu 2:19–20.) Ko e fē feituʻu naʻe ʻalu e fāmilí ke nofo aí? (Mātiu 2:21–23.)
Ko e hā haʻo fakakaukau ki he meʻa naʻe fai ʻe Sīsū ʻi heʻene kei tamasiʻí ke ne maʻu ʻa e potó pea mo e ʻiló? (Joseph Smith Translation of the Bible Mātiu 3:24–26, Luke 2:40, 52; T&F 93:11–14.) Ko e hā e ngaahi meʻa ʻoku mahuʻinga kiate koe ke ke ako ʻi hoʻo tupu haké? Ko e hā e ngaahi taumuʻa kuó ke ʻosi fokotuʻú?
Fakaʻaliʻali ʻa e fakatātā ʻo e Tamasiʻi ko Sīsuú ʻi he Temipalé. Ko e hā hono ʻuhinga naʻe ofo ai ʻa e kau tangata ʻi he temipalé ʻia Sīsuú? (Luke 2:46–47. “Pea naʻa nau fanongo kiate ia, pea nau fakahoko foki mo ha ngaahi fehuʻi.” Ko e Selections from the Joseph Smith Translation of the Bible.) Ko e hā e lahi ʻo e meʻa ʻokú ne fakahā mai kia kitautolu naʻe ako ʻe Sīsū ʻi heʻene kei tamasiʻí? Ko e hā ha meʻa te ke fai ke ke ako ʻo toe lahi ange fekauʻaki mo e ongoongoleleí? Naʻe founga fēfē ʻa hono fakaʻapaʻapaʻi pea mo e talangofua ʻa Sīsū ki heʻene Tamaí ʻi he temipalé?
Ko e hā e meʻa naʻe fai ʻe Sīsū ke ne fakaʻapaʻapaʻi mo talangofua ai kia Siosefa pea mo Melé? (Luke 2:51–52.) Fakamatalaʻi naʻe akoʻi ʻe Siosefa pea mo Mele ʻa Sīsū lolotonga ʻo ʻene kei tamasiʻí ʻo hangē tofu pē ko hono akoʻi ʻe heʻetau ngaahi mātuʻá kitautolu ʻi heʻetau kei tamasiʻí. ʻE anga fēfē haʻo fakaʻapaʻapaʻi hoʻo mātuá?

Ngaahi ʻEkitivitī Fakatupulakí

Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi he lolotonga ʻo e lēsoní, pe ko hano vakaiʻi, pe fakamatala fakanounou, pē ʻi hono tukupaá.

Tuku ange ke nau fakahā atu ʻi he lahi taha te nau ala lavá ʻa e kakai mei he lēsoni ʻo e ngaahi uike kuo hilí naʻa nau fakamoʻoniʻi ko Sīsū Kalaisí ko e ʻAlo ia ʻo e ʻOtuá. Ke tokoniʻi ke nau manatuʻi ʻa e kau fakamoʻoní, tuku ke nau kumi ʻa e ngaahi fakamoʻoni ko ʻení: Luke 1:30–32 (Kepaleli) Luke 1:41–43 9 (ʻElisapeti), Sione 1:29–34 (Sione Papitaiso) pea mo Luke 2:8–17 (ko e kau angeloó pea mo e kau tauhi-sipí).
Aleaʻi ha ngaahi taumuʻa ʻe lava ʻe he fānaú ʻo fokotuʻu ke tokoni ke nau ako lahi ange ai ʻo fekauʻaki mo e ongoongoleleí, ʻo hangē ko e lau ʻo e folofolá ʻi he ʻaho kotoa pē, lotú, kau ʻi he efiafi fakafāmilí, pea mo e alā meʻa pehē. Kole ke nau hiki ʻi ha laʻi pepa ha taumuʻa ʻe ua ʻe lava ke tokoni ke nau ako lahi ange ai ki he ongoongoleleí ʻi he taʻú ni. Poupouʻi ke nau tauhi ʻa e laʻi pepá ʻi ha feituʻu te nau lava ke sio maʻu pē ki aí.
ʻAi ke nau taki taha ha tatau ʻo e mape ʻoku maʻu ʻi mui ʻi he lēsoni ko ʻení. Tuku ke nau kumi pea mo fakaʻilongaʻi ʻa e feituʻu naʻe nofo ai ʻa Sīsuú: Selusālema, Petēlihema, ʻIsipite, pea mo Nāsaleti. (Mape #2 pea mo e #4 ʻi he Fakahinohino ki he Folofolá ʻe lava ke tokoni kiate koe ʻi he ʻekitivitī ko ʻení.)
Tokoni ke nau ako maʻu loto ʻa e tefito ʻo e tui ʻuluakí.
Hiki ʻi he palakipoé ʻa e ngaahi fakamoʻoni folofola ki he ngaahi taimi naʻe fakamoʻoniʻi ai ʻe he Tamai Hēvaní ko Sīsuú ko hono ʻAló ia (Mātiu 3:16–17; 17:5; 3 Nīfai 11:6–8; Hisitōlia ʻo—Siosefa Sāmitá 1:17). Tuku ke nau kumi ʻa e ngaahi fakamoʻoní, mo aleaʻi ko e hā e meʻa naʻe hokó ʻi he foʻi fakamoʻoni taki taha.
Tokoniʻi ke nau ako maʻu loto ʻa e Luke 2:52.
Hivaʻi pe lau ʻa e lea ʻo e “Ko Sīsū naʻe Tamasiʻi” (Tohi Hiva ʻa e Fānaú, p. 55) pe “The Nativity Song,” p. 00

Fakaʻosí

Fakamoʻoní

Fakahā ange kia kinautolu ʻa e ongo ʻokú ke maʻu fekauʻaki mo Sīsū Kalaisí, pea mo hono mahuʻinga kiate koe ʻa ʻene hoko ko e ʻAlo ʻo e ʻOtuá. ʻAi ke mahino kia kinautolu kapau te tau muimui ki he ngaahi sīpinga ʻa Sīsuú ʻe lava te tau hoko ʻo hangē ko iá.

ʻE lava ke fakaʻaongaʻi ʻa e ʻekitivitī fakatupulaki 2 ke hoko ko ha meʻa ke takiakiʻi ʻaki e tokangá ʻi he lēsoní.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Luke 2:40–52 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.