Lēsoni 31

Ko Hono Lavakiʻi, Taki Pōpula, mo e Fakamaauʻi ʻo Sīsū Kalaisí

Taumuʻá

Ke fakalotolahia e tukupā ʻa e taha kotoa pē ke ne maʻu ha loto-toʻa ʻi heʻene fakamoʻoni kia Sīsū Kalaisí.

Teuteú

1. Ako ʻi he faʻa lotu ʻa e Mātiu 26:14–16, 47–27:31 pea mo e Luke 22:47–23:25. Hili iá peá ke ako pe ʻe anga fēfē hoʻo fiemaʻu ke akoʻi ki he fānaú ʻa e fakamatala ʻa e folofolá. (Vakai, “Teuteu Hoʻo Lēsoní,” vi, mo e “Faiako mei he Folofolá,” viii.)

2. Fili ʻa e ngaahi fehuʻi ke aleaʻí pea mo e ngaahi ʻekitivitī ʻa ia ʻe fakakau mai ki ai ʻa e fānaú pea tokoni lelei taha kia kinautolu ke nau aʻusia ʻa e taumuʻa ʻo e lēsoní.

3. Hiki ʻa e ngaahi lea mo e ngaahi kupuʻi lea ko ʻení ʻi ha ngaahi kaati kehekehe: ʻAlo ʻo e ʻOtuá, Fakamoʻuí, Huhuʻí, fakalangi, haohaoa, maʻu ʻa e mafai kotoa pē, ʻofaʻi, Tupuʻanga, faiako, fai fakamoʻuí, ʻaʻanu kiate ia, lavakiʻi, tukuakiʻi hala, tokaʻi (tā), smote, tauteaʻi, fakakalauni ʻaki ʻa e talatala, tautea mate.

4. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Tepi pe ko ha faʻahinga meʻa ke fakapipiki ʻaki ʻa e ʻū kātí.

   3. Fakatātā 7-31, Ko Hono Lavakiʻi ʻo Sīsuú (Ngaahi Fakatātā ʻo e Ongoongoleleí 228; 62468 900), and 7-32, Ko e Fakafisinga ʻo Pitá (Ngaahi Fakatātā ʻo e Ongoongoleleí 229; 62177 900).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Fakatahaʻi ʻa e ʻū kaati naʻá ke teuteú pea fakafoʻohifoʻi kinautolu ʻi he funga tēpilé pe ko e fālikí. Fakahā ange ʻoku fakamatalaʻi ʻe ha niʻihi ʻo e ngaahi kātí ni ʻa Sīsū pea ko e niʻihi ʻa e meʻa naʻe hoko kiate ia ʻi he ʻamanaki ke ne pekiá. Tuku ke nau haʻu taha taha ʻo fili ha foʻi kaati, pea mo lau, pea tuku ia ʻi ha taha ʻo e ongo tuʻungá. ʻOku totonu ke nau hiki ʻi he ʻuluaki tuʻungá ʻa e ngaahi lea ʻokú ne fakaʻuhingaʻi ʻa Sīsuú, pea ko e tahá ʻa e ngaahi lea ʻokú ne fakahā ʻa e meʻa naʻe hoko kiate ia ʻi he ʻamanaki ke ne pekiá.

Mou toe aleaʻi nounou ʻa e meʻa naʻe hoko ʻi he Ngoue ko Ketisēmaní pea fakahā ange ʻe akoʻi kinautolu ʻi he lēsoni ko ʻení ʻo kau ki he ngaahi meʻa naʻe hoko hili ʻa e lotu ʻa Sīsū ʻi Ketisēmaní.

Fakamatala ʻa e Folofolá

Akoʻi kinautolu ki he fakamatala ʻo e lavakiʻi, taki pōpula, mo e fakamaau ʻi Sīsuú’ (Mātiu 26:14–16, Mātiu 26:47–27:31 mo e Luke 22:47–23:25). (Ko e ngaahi fokotuʻu ki he founga akoʻi ʻo e folofolá, vakai, “Faiako mei he Folofolá,” viii.) Kole ange ke nau fanongo ki he ngaahi lea ʻokú ne fakamatalaʻi ʻa e meʻa naʻe hoko kia Sīsuú. Tokoniʻi ke mahino kia kinautolu naʻe mei lava pē ke fakaʻaongaʻi ʻe Sīsū ʻa hono mālohí ke maluʻiʻaki ia mei he ngaohikovia ko ʻení, ka naʻá ne ʻafioʻi ko e konga pē ia ʻo e ngaahi mamahi kuo pau ke ne kātekiná ke fakakakato ʻa hono misiona ʻi he māmaní mo fakahoko ʻa e Fakaleleí (Mōsaiá 15:5).

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi hoʻo teuteuʻi hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo e fānaú ʻi he kalasí ʻa e folofolá koeʻuhí ke nau maʻu ai ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

• Ko hai naʻá ne lavakiʻi ʻa Sīsuú? (Mātiu 26:14–16.) Naʻe anga fēfē hono lavakiʻi ia ʻe Siutasí? (Mātiu 26:48.) Ko e hā e meʻa naʻe hoko kia Siutasí? (Mātiu 27:3–5.)

• Ko e hā hono ʻuhinga naʻe taʻofi ai ʻe Sīsū ʻa ʻene kau ʻAposetoló mei heʻenau taukapoʻi iá? (Mātiu 26:51–54; Luke 22:49–51.) Ko e hā e lēsoni ʻokú ke fakakaukau naʻe ako ʻe heʻene kau ākongá ʻi he taimi naʻe fakapipiki ai ʻe Sīsū ʻa e telinga ʻo e tangata naʻe laveá? Ko e hā haʻo fakakaukau ki he ʻuhinga naʻe lele ai ʻa e kau ʻAposetoló kae nofo pē ʻa Sīsuú? (Mātiu 26:56.) Ko e hā haʻo fakakaukau ki ha meʻa naʻá ke mei fai kapau naʻá ke ʻi ai?

• Ko e hā naʻe ʻikai ke tali ai ʻe Sīsū ʻa e fehuʻi ʻa hono kau talatalaakí lolotonga ʻa e fakamāú? (Mātiu 26:62–63; 27:12–14; Luke 23:9.) (Vakai, ʻekitivitī fakatupulaki 3.) Fakamatalaʻi ʻi he taimi naʻe fehuʻi ange ai kia Sīsū ʻo kapau ko e Kalaisí ia, ko e ʻAlo ʻo e ʻOtuá, pe ko e Tuʻi ʻo e kakai Siú, ko e hā ʻene talí. (vakai, Mātiu 26:63–64; 27:11). Fakamatalaʻi ange naʻe ʻikai ke fakaʻikaiʻi ʻe Sīsū ia ʻa hono identity pe feinga ke fakahaofi ia. Naʻe ʻafioʻi ʻe Sīsū ʻe kalusefai ia ke fakakakato ʻa hono misiona ʻi he māmaní.

• Mou toe vakai ki he lisi ʻo e ngaahi lea ʻi he ʻekitivitī ke takiakiʻi ʻaki e tokangá ʻokú ne fakamatalaʻi ʻa e meʻa naʻe fai ʻe he kakaí kia Sīsuú. Ko e hā hoʻo fakakaukau ʻi he taimi naʻá ke lau ai ʻa e ngaahi lea ko ʻení? Ko e hā e ongo ʻokú ke maʻu kau ki he ngaahi meʻa fakalilifu naʻe fai ʻe he kakaí kia Sīsuú? Ne ʻi ai nai ha taimi naʻe anga kovi atu ai ha taha kiate koe koeʻuhí ko hoʻo tui kia Sīsū Kalaisí pe koeʻuhí ko hoʻo ʻalu ki he Siasí? Ko e hā hoʻo meʻa naʻe faí?

• Naʻe tuʻo fiha hono toutou fakaʻikaiʻi ʻe Pita ʻa Sīsuú? (Luke 22:54–60.) Ko e hā hoʻo fakakaukau ki he ʻuhinga naʻe fai ai ʻeni ʻe Pitá? Ko e hā e ongo naʻe maʻu ʻe Pita ʻi heʻene ʻiloʻi ʻa e meʻa kuó ne faí? (Luke 22:61–62.) Tokoniʻi ke mahino kia kinautolu naʻe teʻeki ke maʻu e Pita ia ʻa e meʻa-foaki ʻo e Laumālie Māʻoniʻoní ʻi he taimi ko iá. Ko Pita ko ha tangata lelei ia naʻá ne toki hoko ki mui ai ko e Palesiteni ʻo e siasí pea naʻá ne foaki ʻa ʻene moʻuí ki heʻene fakamoʻoní. ʻE anga fēfē haʻatau loto-toʻa ki heʻetau ngaahi fakamoʻoni kia Sīsū Kalaisí ʻo tatau ai pē ko e hā ha faingataʻa te tau fepaki mo ia? (Vakai, ʻekitivitī fakatupulaki 5.)

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní, pe ko hano vakaiʻi, pe fakamatala fakanounou, pē ʻi hono tukupaá.

1. Tuku ange ke nau taki taha fakahā atu ha taha ʻo e ngaahi ʻulungāanga pe ko e anga ʻo Sīsū ʻoku nau houngaʻia taha aí.

2. Mou toe fakamanatu ʻa e tefito ʻo e tui ʻuluakí mo e tolú. Tokoniʻi ke mahino kia kinautolu ʻoku toe fakamanatu mai ʻe he ngaahi tefito ʻo e tui ko ʻení ʻa e anga faka-ʻOtua ʻo Sīsū Kalaisí pea mo e mahuʻinga ʻa hono misioná.

3. Fakaʻilongaʻi ʻa e ngaahi foʻi lea ko ʻení: Kaiafasi, Pailato, mo Hēlota. ʻOange ʻa e ngaahi fakaʻilongá ki ha toko tolu ʻo e fānaú pea fakamatalaʻi ko kinautolu ʻa e kau takí ʻoku nau taki taha pē hono fatongia ʻi he fonuá. Tuku ki he kau “takí’ ke nau tuʻu ʻi ha ngaahi feituʻu kehekehe ʻi he lokí pea tuku ke ʻaʻahi ʻa e toenga ʻo e kalasí kia kinautolu lolotonga ko iá ʻoku lau ʻe he toko tolú ni ʻa e ngaahi lea ko ʻení. Pe ko hono tuku ʻa e toko tolú ke nau tuʻu ʻi muʻa ʻi he kalasí ʻo lau taki taha ʻene konga:

   Kaiafasi: Ko hoku hingoá ko Kaiafasi. Ko e taulaʻeiki Siu au, ʻa ia ʻoku ʻuhinga ia ko e taki fakalotu ai ʻo e kakai Siú. ʻOku ou fie maʻu ke fakapoongi ʻa Sīsū, ka kuo pau ke u maʻu ha ngofua mei he taki ʻo e kau Lomá, ko ia ai ʻoku ou fekauʻi ia kia Pailato.

   Pailato: Ko hoku hingoá ko Ponitusi Pailato. Ko e kōvana Lomá au, ko hono ʻuhingá ko e taki fakapolitikale au ʻo Siuteá. ʻOku fie maʻu ʻe he kakai Siú ke u tautea mate ʻa Sīsū, ka ʻoku ʻikai te u ʻiloʻi haʻane halaia. ʻOku ou toe fekauʻi atu ia kia Hēlota.

   Hēlota: Ko hoku hingoá ko Hēlota. Ko e Siu au, pea kuo fokotuʻu au ʻe he kakai Lomá ke u hoko ko ha tuʻi ki Kāleli. Naʻe ʻomi ʻe Pailato ʻa Sīsū kiate aú koeʻuhí ne u hoko ko ha tuʻi ʻi he taimi naʻe tupu kei siʻi hake ai ʻa Sīsuú. Naʻá ku fuʻu fie mamata ki he tangata ko ia ʻoku ui ko Sīsuú. Naʻá ku ʻosi fanongo ʻo kau kiate ia pea naʻá ku fie maʻu ke mamata ki haʻane fai mana, ka naʻe ʻikai ke ne fie talanoa kiate au pe tali ʻeku ngaahi fehuʻí. Naʻá ku toe fakafoki ia kia Pailato.

   Pailato: Naʻe ʻikai pe te u ʻilo ha faʻahinga ʻuhinga ke fakahalaʻi ai ʻa e tangatá ni ke mate, ka naʻe vili atu pē ʻa e kakaí ia. Naʻe faifai peá u loto-foʻi ʻi heʻeku feinga ke tala kia kinautolu ʻoku ʻikai ha faʻahinga meʻa te u lava ke tukuakiʻiʻaki ʻa Sīsuú peá u tuku ange ke nau kalusefai ia.

   Ko e taimi pe ʻe foki atu ai ʻa e fānau ko ʻení ʻe tolú ki honau nofoʻangá, aleaʻi naʻe anga fēfē hono fetaki holo ke fakamaauʻi ʻe he tangatá ni ʻa Sīsuú.

4. Hiki ʻi ha ʻū laʻi pepa ha niʻihi ʻo e ngaahi meʻa naʻe hokó, ʻo hangē ko ʻení, ne mei fuʻu faingataʻa ki he fānaú ke nau aʻusia ia (fakaʻaongaʻi ha faʻahinga meʻa ʻe lava ke ʻaonga ki hoʻo kalasí):

   Ko ha taha ʻoku manuki atu kiate koe hoʻo ʻalu ki he lotú.

   Ko ha taha ʻokú ne feinga ke ke ʻahiʻahiʻi ha niʻihi ʻo e ngaahi faitoʻo kona tapú pe ifi ha foʻi tapaka.

   Ko haʻo mamata ki hao kaungāako ʻokú ne fai ha anga taʻe feʻunga ki ha kiʻi tamasiʻi pe taʻahine kehe.

   Ko ha kole atu ʻe hao kaungāmeʻa ʻoku ʻikai siasi ke ke fakamatalaʻi ange ʻa e tui fakalotu ʻokú ke maʻú.

   Ko hano fakalotoa koe ʻe hao kaungāako ke ke loi ke ʻoua naʻa tauteaʻi ia.

   Tuku ke haʻu tahataha ʻa e fānaú ʻo toho ha foʻi kaati pea lau mai ia. Pea mou aleaʻi tahataha ʻa e meʻa naʻe hokó pea mo fili ko e hā e meʻa ʻoku totonu ke faí. Fakamamafaʻi ange ʻoku faingataʻa ʻi he taimi ʻe niʻihi ke tau loto-toʻa ʻi heʻetau fakamoʻoni kia Sīsū Kalaisí, ka ʻe tāpuekina lahi ʻaupito kitautolu ʻo kapau te tau fai ia.

5. ʻOange ha foʻi kaati ʻe taha pe ua ki he kiʻi tamasiʻi pe taʻahine taki taha ʻa ē ʻoku fakamatala ai ʻo kau kia Sīsuú (ʻe toe lava pē ke ke fakaʻaongaʻi mo ha ngaahi foʻi lea kehe pe kupuʻi lea te ne fakamatalaʻi ʻa Sīsuú). Kole ange ke nau fakahā atu ko e hā e meʻa naʻa nau fakakaukau ki aí he taimi ko ē naʻa nau lau ai ʻa e ngaahi lea ʻoku hiki ʻi he kātí. Fehuʻi ange ke nau fakapapau ʻiate kinautolu pe ʻoku nau ʻiloʻi pau ko Sīsuú ko e ʻAlo ia ʻo e ʻOtuá, ko e Fakamoʻuí, mo Huhuʻí, pea mo e alā meʻa pehē. Fakaafeʻi ke nau fakamatalaʻi pe ʻoku anga fēfē ʻa e hoko ʻa e ʻilo mo e fakamoʻoni kia Sīsū Kalaisí ke ne tāpuekina kinautolú.

6. Tuku ke hivaʻi ʻe he kalasí pe ko hano fakaafeʻi mai ha taha ke haʻu ʻo hivaʻi ʻi he kalasí “He Died That We Might Live Again” (Tohi Hiva ʻa e Fānaú, p. 65).

Fakaʻosí

Fakamoʻoní

Fai hoʻo fakamoʻoní ki he anga faka-ʻOtua ʻo Sīsū Kalaisí, pea fakahā ange kia kinautolu ʻa e mahuʻinga ʻo e fakamoʻoni ko ʻení kiate koé. Fakahā ʻa e loto houngaʻi ʻokú ke maʻu ʻi he fili tauʻatāina ʻa Sīsū’ ke ne mamahi mo pekia koeʻuhí ke lava ke tau toetuʻu pea maʻu ʻa e moʻui taʻengatá.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Mātiu 26:47–54 mei ʻapi ke hoko ia ko hano toe fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.