Naʻe Teuteu ʻe Sione Papitaiso ʻa e Halá moʻo Sīsū Kalaisi

Taumuʻá

Ke tokoniʻi ke mahino ki he fānaú naʻe tomuʻa fakanofo kinautolu ke nau fakahoko ha konga mahuʻinga ʻo e ngāue ʻa e Tamai Hēvaní ʻi he māmaní.

Teuteú

Ako ʻi he faʻa lotu ʻa e Luke 1:5–25, 57–80; Mātiu 3:1–6; pea mo e Tokāteline mo e Ngaahi Fuakava 84:27–28. Hili iá peá ke ako ʻa e lēsoní mo ke fili pe ʻe anga fēfē haʻo fiemaʻu ke akoʻi ki he fānaú ʻa e ngaahi fakamatala ʻa e folofolá (vakai, “Teuteu Hoʻo Lēsoní,” vi, mo e “Akoʻi ʻo e Ngaahi Fakamatala ʻa e Folofolá,” viii).
Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ko ia ʻe fakakau mai ai ʻa e fānaú pea mo tokoni lelei taha ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú
2. Ko ha laʻi pepa lahi ʻoku hiki ai ʻa e ngaahi lea ko e Ko e laumālie au naʻe fili ke taki taha ʻa e fānaú.
3. Fakatātā 7–2, Ko e Malanga ʻa Sione ʻi he Toafa (Ngaahi Fakatātā ʻo e Ongoongoleleí 207; 62132 900).

Fokotuʻu ki he Founga Fai ʻo e Lēsoní

Kole ki ha taha ki muʻa ke kamata ʻa e kalasí ke ne tufa ʻa e ʻū laʻi pepa naʻá ke teuteú ʻi he ʻosi pe ʻa e fua lotú, ʻai ke ʻoua naʻa toe ʻilo ki ai ha taha.

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Tuku ange ki ha kiʻi tamasiʻi pe taʻahaine ke ne tufa ʻa e ʻū laʻi pepá ki he kalasí. Fakamatalaʻi ki muʻa pea kamata ʻa e kalasí naʻá ke fili ʻa e toko tahá ni ke ne fai ʻa e ngāue tokoni ko ʻení. ʻOku hangē tofu pē ʻa e To muʻa Fakanofó ko ʻení. (Hiki ʻi he palakipoé ʻa e foʻi lea ko e Tomuʻa Fakanofo.) Naʻe tomuʻa fakanofo ʻa kitautolu ʻe he Tamai Hēvaní ʻi he maama fakalaumālié ʻi heʻene fili kitautolu ke tau fakahoko ha ngāue makehe maʻana ʻi he māmaní. ʻOku ʻikai ke ʻuhinga hono tomuʻa fakanofo ʻa kitautolú kuo pau ke tau fai ʻa e ngāué; ʻoku tau kei maʻu pe ʻa e tauʻatāina ke filí, ka ko e faingamālié ʻoku ʻa kitautolu ia ʻo kapau te tau fili ke fai ʻa e ngāué. Fakamatalaʻi ʻe ako ʻe he fānaú ʻi he lēsoni ko ʻeni ʻo fekauʻaki mo Sione Papitaiso, naʻe tomuʻa fakanofo ia pe naʻe fili ke ne fuesia ha ngāue māʻongoʻonga ʻi he māmaní. Tuku ke lau leʻo lahi ʻe he fānaú ʻa e ngaahi lea ʻi heʻenau taki taha laʻi pepa. Tala ange kia kinautolu ʻoku fakamatalaʻi ʻe he ngaahi folofola te nau ako ki aí ko e laumālie naʻe fili ʻa Sione Papitaiso, naʻe fili ia ʻi he maama fakalaumālié ke ne teuteuʻi ʻa e hala ʻo Sīsū Kalaisí.

Ngaahi Fakamatala ʻa e Folofolá

Akoʻi ʻa e talanoa hono fanauʻi ʻo Sione Papitaisó, tupu kei tamasiʻí, pea mo ʻene ngāué ʻo hangē ko ʻene hā ʻi he konga ʻo e “Teuteú.” Fakaʻaliʻali ʻi he taimi totonu ʻa e fakatātā ʻo Sione ʻi heʻene Malanga ʻi he Toafá. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” “0”. vii.) Tokoniʻi ʻa e fānaú ke mahino kia kinautolu naʻe tomuʻa fakanofo ʻa Sione Papitaiso ke ne teuteuʻi ʻa e kakaí ke nau fanongo kia Sīsū Kalaisi.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ʻa ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa ʻoku tau ʻilo ʻo fekauʻaki mo e ongo mātuʻa ʻa Sione Papitaisó? (Luke 1:5–7.)
Ko e hā hono ʻuhinga naʻe noa ʻo ʻikai ke toe lava ai ʻa Sakalia ʻo leá? (Luke 1:18–20.)
Ko e hā hono ʻuhinga naʻe fakahingoa ai ʻe Sakalia mo ʻElisapeti ʻa hona fohá ko Sioné? (Luke 1:13.)
Ko e hā e meʻa ʻoku tau ʻiloʻi ʻo fekauʻaki mo e kei tamasiʻi ʻa Sioné? (Luke 1:80; T&F 84:27–28.)
Ko e hā e meʻa naʻe tomuʻa fakanofo ʻa Sione Papitaiso ke ne faí? (Luke 1:15–17, 76–77.)
Naʻe founga fēfē hono fakakakato ʻe Sione Papitaiso ʻa ʻene ngāué ki hono teuteuʻi ʻa e hala ʻo Sīsū Kalaisí? (Mātiu 3:1–6.)

Fakamatalaʻi naʻe feʻunga pe ʻa Sione Papitaiso ko ha laumālie ia naʻe fili ke tokoni ki hono langa ʻo e puleʻanga ʻo e Tamai Hēvaní ʻaki ʻene teuteuʻi ʻa e hala ʻo Sīsū Kalaisí, ko e ngaahi laumālie kuo fili ʻa kitautolu ke tau tokoni ki hono langa hake ʻo e puleʻanga ʻo e Tamai Hēvaní ʻaki ʻetau tokoni ki he kakai kehé ke nau ʻilo ʻo toe lahi ange kau kia Sīsū Kalaisi.

Lau ʻa e kupuʻi lea ko ʻení meia Palesiteni ʻEselā Tafi Penisoni: “Ko e ngaahi laumālie kuo fili ʻa kimoutolu, ko e tokolahi ʻo kimoutolú naʻe fakatatali ʻi ha meimei taʻu ʻe 6,000 ke mou toki haʻu ʻi he ngaahi ʻahó ni, ʻi he taimi ʻoku hulutuʻa ai ʻa e ngaahi ʻahiʻahí, pea mo e ngaahi faingataʻá” (ʻi he Conference Report, Oct. 1977, p. 43; or Ensign, Nov. 1977, p. 30).

Ngaahi Fehuʻi ke Aleaʻi pea mo Fakaʻaongaʻí

Ko e hā ha ongo ʻokú ke maʻu ʻi hoʻo ʻiloʻi ʻoku ʻafioʻi fakatāutaha koe ʻe he Tamai Hēvaní pea ʻokú ne fili koe ke ke haʻu ki he māmaní ʻi he ngaahi ʻahó ni?
Ko e hā ha ngaahi meʻa naʻe tomuʻa fakanofo ʻa kitautolu ke tau fai ke tokoni ki hono langa ʻo e puleʻanga ʻo e Tamai Hēvaní? (ʻAlu ʻo ngāue fakafaifekau, hoko ko e kau faʻifaʻitakiʻanga lelei ʻaki ʻetau tauhi ʻetau ngaahi fuakavá, maʻu ʻa e lakanga fakataulaʻeikí, ohi ha ngaahi fāmili māʻoniʻoni, fakakakato hotau ngaahi uiuiʻi ʻi he Siasí.)
ʻE anga fēfē haʻo ʻiloʻi ʻa e meʻa ʻoku finangalo mai ʻa e Tamai Hēvaní ke tau fai ʻi he māmaní? (Lotu ʻo fekauʻaki mo ʻetau ngaahi filí, pea fakafanongo ki he Laumālié.) Fakamatalaʻi ʻoku toe ʻomai foki ʻe he Tamai Hēvaní ha faingamālie ke tau maʻu ai hotau ngaahi tāpuaki fakapēteliaké mei he pēteliake fakasiteikí ʻi he taimi te tau motuʻa feʻunga aí. ʻOku faʻa fakahā maʻu ai pē ʻe he tāpuaki fakapēteliaké ʻa e ngaahi uiuiʻi te tau lava ke maʻú pe ko e hā e meʻa ʻoku finangalo ʻa e Tamai Hēvaní ke fakahoko ki heʻetau ngaahi moʻuí. ʻE anga fēfē haʻo teuteuʻi koe ke ke fai ʻa e meʻa ʻoku finangalo ʻa e Tamai Hēvaní ke ke faí.

ʻEkitivitī Fakatupulakí

Te ke lava ke fakaʻaongaʻi ha taha pe lahi ange ʻo e ngaahi ʻekitivitií ni ʻi he lolotonga ʻo e lēsoní, pe ko hano vakaiʻi, fakamatala fakanounou, pē ʻi hono tukupaá.

Teuteuʻi ha laʻi pepa lahi ʻoku hiki ai ʻa e ngaahi meʻa ko ʻení (ʻo ʻikai ke kau ai ʻa e ngaahi talí) ke taki taha ʻa e fānaú, pe ko haʻo hiki ʻa e kupuʻi leá ʻi he palakipoé:

Ko Sione Papitaiso:
1. Naʻe nofo ʻi he .
2. Naʻá ne lahi ʻaki e māhina ʻe ʻia Sīsū.
3. Naʻá ne tui ʻa e vala naʻe ngaohiʻaki ʻa e pea mo e .
4. Naʻá ne kai ʻa e pea mo e .
5. Naʻá ne teuteuʻi ʻa e hala ʻo .
Ngaahi Talí: a. toafá; e. ono; f. fulufuluʻi kāmeli, leta; h. heʻe, meʻa huʻa melie ʻo e vaó; i. Sīsū Kalaisi.

Tuku ke nau lau ʻa e Luke 1:26–27, 35–36, 76 pea mo e Mātiu 3:1, 4 ke fakafonuʻaki ʻa e ngaahi lainé. (Kapau ʻoku ʻikai ke ʻiloʻi ʻe he fānaú ko e hā ʻa e heʻé, fakamatalaʻi ange ko e ngaahi ʻinisekite lalahi ia ʻoku nau lava ʻo puna.) Tokoniʻi kinautolu ke nau fakatokangaʻi neongo pē naʻe moʻui ʻa Sione Papitaiso ʻi ha moʻui faingofua, pea moʻui angatonu ʻi he toafá, naʻá ne fakakakato ʻa ʻene ngāué pea mo teuteuʻi ʻa e hala ʻo Sīsū Kalaisí.
Tuku ke lau ʻe he fānaú ʻa e ngaahi folofola ko ʻení ke nau lava ʻo toe ʻiloʻi ai mo kinautolu ko ia naʻe tomuʻa fakanofo ke fakahoko ʻa ʻenau ngaahi ngāue ʻi he māmaní:

Selemaia 1:5—Selemaia

1 Nīfai 11:18—Mele, ʻa e fāʻe ʻa Sīsuú (ko ha fakahā naʻe foaki ange kia Nīfai)

ʻEta 3:14—Sīsū

Tokāteline mo e Ngaahi Fuakava 138:53, 55—Siosefa Sāmita pea mo ha niʻihi kehe

ʻĒpalahame 3:23—ʻĒpalahame

Fakaʻosí

Fakamoʻoní

Fakamoʻoni ʻa hono tomuʻa fili ʻo Sione Papitaiso ke ne teuteuʻi ʻa e hala ʻo Sīsū Kalaisí peá ne toe hoko foki ko e fakamoʻoni kiate ia, naʻe tomuʻa fakanofo kitautolu ke tau fakahoko ʻa e ngaahi ngāue ʻi he māmaní. Fakamatalaʻi ange ʻa e ongo ʻokú ke maʻu ʻo fekauʻaki mo hono mahuʻinga ʻo ʻetau moʻuiʻaki ʻa e ongoongoleleí pea hoko ʻo taau ke fai ha faʻahinga meʻa pe ʻe tomuʻa fakanofo kitautolu ʻe he Tamai Hēvaní ke tau faí.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Luke 1:5–23, 57–80 pea mo e Mātiu 3:1-6 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.