Lēsoni 38

Ko Panepasa, ʻAnanaia, pea mo Safaila

Taumuʻá

Ke poupouʻi ʻa e fānaú taki taha ke nau fili ke faitotonu ʻi heʻenau fakakaukaú, leá mo e ngāué.

Teuteú

1. Ako ʻi he faʻa lotu ʻa e Ngāue 4:32–5:10. Hili iá peá ke ako ʻa e lēsoní mo ke fili pe ʻe anga fēfē haʻo fiemaʻu ke akoʻi ki he fānaú ʻa e fakamatala ʻa e folofolá. (Vakai, “Teuteuʻi Hoʻo Lēsoní,” vi. mo e “Faiako mei he Folofolá,” viii.)

2. Laukonga ʻoku tānaki atu: Ngaahi Tefitoʻi Moʻoni ʻo e Ongoongoleleí,vahe 31.

3. Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ʻe fakakau mai ki ai ʻa e fānaú pea tokoni lelei taha ke nau aʻusia ʻa e taumuʻa ʻo e lēsoní.

4. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Fakahā kia kinautolu ʻa e talanoa ko ʻení peá ke fehui ange ke nau fili ko e hā e meʻa naʻa nau mei lava ke faí kapau ko Sali ʻa kinautolu:

“Naʻe fai ha vaʻinga peisipolo ʻa ha kiʻi tamasiʻi mo hono ngaahi kaungāmeʻá ʻo ne fanongo lelei atu pē ki he kaila leʻo-lahi mai ʻa ʻene fineʻeikí, ‘Sali, Sali!’ Naʻá ne lī fakatoʻotoʻo ʻa ʻene paté, kae toʻo hono saketí pea mo hono kiʻi kepí, kae fakavavevae atu ki hono ʻapí.

“Naʻe kaikaila atu ʻa e toenga ʻo e kau vaʻingá ‘ʻOua leva te ke ʻalú; kae ʻoua ke ʻosi ʻa e keimí!’

“ ‘Naʻe tali atu ʻe Sali, kuo pau pē ke u ʻalu ʻi he taimí ni, naʻá ku talaange ki heʻeku fineʻeikí ko e taimi pē ʻe ui mai aí te u ʻalu ange leva.

“ ‘Naʻe pehē ange ʻe he taha, ʻai ke pehē naʻe ʻikai te ke fanongo koe ki heʻene uí.’

Naʻe pehē ange ʻe Sali, “ ‘Ka naʻá ku fanongo foki au ki heʻene uí.’

“ ‘Ka he ʻikai te ne ʻiloʻi ʻe ia naʻá ke fanongo ange.’

“ ‘Te u ʻalu au, he ne u fanongo au ki ai.’

“ ‘Naʻe faifai pe pea pehē ange ʻe ha taha ʻo e fānau tangatá, ‘Tuku ā muʻa ke ne siʻi ʻalu. He ʻikai te tau lava ke liliu ʻa hono lotó. ʻOku nonoʻo pē ia ki he noʻo ʻo e ʻepani ʻene fineʻeikí. ʻOku hangē ia ha kiʻi pēpeé ʻoku lele ʻi he miniti kotoa pē ʻoku ui ai iá’ ” (N. ʻĒletoni Tena, ʻi he Conference Report, Oct. 1977, p. 65; or Ensign, Nov. 1977, pp. 43–44).

ʻEkitivitī ke Takiakiʻi ʻAki e Tokangá

• Ko e hā leva haʻo meʻa te ke fai?

Fakamatalaʻi ange ʻoku tau mamata ʻi he ngaahi meʻa kehekehe ʻi he ʻaho taki taha ʻoku fie maʻu ai ke tau fili ʻi he vahaʻa ʻo e faitotonú mo e ʻikai faitotonú. Fehuʻi ange ke nau fakakaukau ʻo kau ki he ola ʻo e ngaahi fili naʻe fai ʻe Palapasa, ʻAnanaia mo Safailá.

Fakamatala ʻa e Folofolá

Akoʻi kia kinautolu ʻa e ngaahi fakamatala ʻo Palapasa, ʻAnanaia mo Safailá mei he Ngāue 4:32–5:10. (Ko e ngaahi fokotuʻu ki hono akoʻi ʻo e folofolá, vakai, “Faiako mei he Folofolá,” viii.) Fakahā ange ko e taha ʻo e ngaahi founga ke tau hoko ʻo hangē ai ko Sīsuú ko ʻetau ako ke leaʻaki ʻa e moʻoní mo faitotonu ʻi he meʻa kotoa pē ke tau faí.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ke mahino ki he fānaú ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻamou lau fakataha ʻa e folofolá ʻi he kalasí koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

• Ko e hā e meʻa ʻoku kole mai ʻa e kau taki ʻo e Siasí ki he kau mēmipá ke nau faí koeʻuhí kae lava ke maʻu ʻe he toko taha kotoa pē ʻa e meʻa ʻoku nau fie maʻú? (Ngāue 4:34–35.) Ko e hā ha ongo ʻokú ke maʻu ʻo kau ki haʻo fakahā ʻa e meʻa kotoa pē ʻokú ke maʻú.

• Naʻe founga fēfē ʻa e faitotonu ʻa Panepasa ʻi he meʻa naʻá ne faí? (Ngāue 4:36–37.) Ko e hā haʻo fakakaukau ki he ʻuhinga ʻo e faitotonú? (Tala ʻa e moʻoní, ʻo ʻikai ke kaihaʻa pe kākā, ʻoua feinga ke maʻu ha faʻahinga meʻa ʻi ha founga kākā, pea mo e alā meʻa pehē.) Ko e hā ha ongo te ke maʻu ʻi he taimi ʻokú ke faitotonu kakato aí?

• Naʻe founga fēfē ʻa e ʻikai ke faitotonu ʻa ʻAnanaia mo Safailá? (Ngāue 5:1–2.) Ko e hā hono ʻuhinga naʻe loto lelei ai pē ʻa Safaila ia ki he loi ʻa hono husepānití? (Ngāue 5:1–2, 7–8.) Ko e hā nai ha meʻa naʻe mei hoko ʻo kapau naʻe faitotonu ia?

• Ko hai ʻe mamahí ʻi he taimi ʻoku ʻikai ke faitotonu ai ha tahá? Fakamatalaʻi neongo pē kapau he ʻikai te tau mamata leva ki he ola ʻo e ʻikai te tau faitotonú, ʻo hangē ko e meʻa naʻe fai ʻe ʻAnanaia mo Safailá, ʻoku tau kei fakamamahiʻi pe kitautolu. ʻOku tau toe lava foki ke fakamamahiʻi ʻa e niʻihi kehé ʻaki ʻa e ʻikai te tau faitoto1nú.

• Ko e hā ʻa e ngaahi nunuʻa ʻo kapau ʻoku ʻikai te ke faitotonú? Fakahā mai ha fakatātā fakafoʻituitui ʻo kau ki he ngaahi ola pe nunuʻa ʻo e ʻikai ke faitotonú? Tokoni ke mahino kia kinautolu ʻoku ʻikai ke faingofua maʻu pē ʻa e faitotonú, ka ʻoku totonu ke tau faitotonu ʻo tautau ai pē ko e hā ʻa e tuʻunga ʻoku tau ʻi aí. Kole ange ke nau fakahā mai ha meʻa ne hoko tuʻunga ʻi he faitotonú.

• Ko hai te ne lava ke ʻiloʻi ʻa e taimi ʻokú ke tala ai ʻa e moʻoní? ʻOku anga fēfē ʻa e hoko ʻa e faitotonú ke ne ʻomi kitautolu ke tau toe vāofi ange mo e Tamai Hēvaní?

• Ko e hā ha meʻa te ke lava ke fai ke tokoni ki he niʻihi kehé ke nau faitotonú?

• Ko e hā hono ʻuhinga ʻoku mahuʻinga ai ke tau faitotonu ki heʻetau ongo mātuʻá? (Koeʻuhí ke nau lava ʻo falala atu kiate koe.) Ko e hā hono ʻuhinga ʻokú ke fie maʻu ai hoʻo ongo mātuʻá ke na falala kiate koé? ʻOku anga fēfē haʻo lava ke maʻu ʻa e falala ʻa hoʻo ongomātuʻá? Ko e hā hono ʻuhinga ʻoku faʻa fie maʻu ʻi he taimi ʻe niʻihi ʻa e loto-toʻá ki he fakahā ʻo e moʻoní? (Vakai, ʻekitivitī fakatupulaki 6.)

• Ko e hā ha faikehekehe ʻe hoko ʻi he māmaní ʻo kapau ʻe faitotonu ʻa e taha kotoa pē?

Lau ʻa e kupuʻi lea ko ʻení meia Palesiteni ʻEselā Tafu Penisoni, ko e Palesiteni ia hono hongofulu mā tolu ʻo e Siasí:

“Faitotonu. Pea ʻoua ʻe loi pe kaihaʻa. ʻOua ʻe kākā …

“Siʻi fānau, naʻe ʻomi ʻa kimoutolu ʻe he Tamai Hēvaní ki he māmaní ʻi he kuongá ni koeʻuhí ko kimoutolu ʻa e niʻihi ʻo ʻEne fānau loto-toʻa tahá. Naʻá ne ʻafioʻi ʻoku lahi ange ʻa e faiangahalá ʻi he māmaní he ngaahi ʻahó ni, pea naʻá Ne ʻafioʻi te ke hoko foki ʻo loto-toʻa pea mo talangofua” (ʻi he Conference Report, Apr. 1989, p. 103; or Ensign, May 1989, pp. 82–83).

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní pē ko hano vakaiʻi, pe fakamatala fakanounou, pē ʻi hono tukupaá.

1. Mou toe fakamanatu ʻa e tefito ʻo e tui hono hongofulu mā tolú pea tokoniʻi ke mahino kia kinautolu pea mo ako maʻu loto foki ia.

2. Hikiʻi ʻi he palakipoé ʻa e ʻapí, ʻakoʻangá, pea mo e kaungāʻapí. Tuku ange ke nau fakakaukau ʻo kau ki ha ngaahi founga te nau lava ʻo faitotonu ai ʻi heʻenau fehangahangai mo ha ngaahi meʻa ʻe hoko ʻi he feituʻu taki taha. Mou aleaʻi ʻa e ngaahi fakakaukau ʻa e fānaú.

3. Hikiʻi ʻi he palakipoé ʻa e foʻi lea ko e Faitotonú mo e ʻIkai Faitotonú. Fakahā ange ʻa e kupuʻi lea ko ʻení ʻa ʻEletā Māvini J. ʻEsitoní: “‘Ko e loí ko ha faʻahinga fetuʻutaki ia ʻoku ʻomai ʻe ha taha ko hono taumuʻá pe ko e kākā.’ … ʻE lava pē ke fakahoko ʻa e loí ʻi ha faʻahinga fetuʻutaki ʻo ʻikai ko ha ngaahi foʻi lea pē ha meʻa ʻoku lea mai ʻaki ʻe ha taha. Ko e taimi ʻe niʻihi ʻe lava pē ke kākaaʻi kitautolu ʻe he ngaahi meʻa ʻoku tau fakakaukauʻí” (in Conference Report, Apr. 1982, p. 10; or Ensign, May 1982, p. 9). Aleaʻi ʻa e ngaahi kupuʻi lea ko ʻení pea tuku ki he fānaú ke nau fili pe ko e fē ha taha ʻi he ongo tefitó te ne lava ʻo fakamatalaʻi lelei ʻa e ko e hā hono ʻuhingá:

   • Tala ʻa e moʻoní

   • Fai ʻa hoʻo ngāue pe ʻaʻaú

   • Taki halaʻi ʻa e niʻihi kehé ʻaki ʻa e ʻikai te ke tala kakato ʻa e moʻoní

   • Fakahā ʻi he taimi naʻá ke fai ai ha fehālaaki

   • Fakakāinga

   • Loi

   • Kaihaʻa

   • Fakahā konga pe ʻa e moʻoní

   • Fakafoki ʻo ha meʻa naʻá ke ʻave pe ko ha ngaahi koloa mole

   • Tauhi ʻo e ngaahi fuakavá

4. Tuku ke nau taki taha ngaohi ha kiʻi fakaʻilonga, ʻo hangē nai ko e fotunga ʻo e paá, ʻa ia ʻoku pehē “ ʻOku ou taumuʻa ʻaki ʻa e moʻoní mo e faitotonú. Kole ange ke nau fokotuʻu ʻa e taumuʻa ke tala ʻa e moʻoní pea faitotonu ʻi he meʻa kotoa pē te nau faí. Tuku ke nau fakamoʻoni honau ngaahi hingoá ʻi he konga ki lalo ʻo ʻenau ngaahi fakaʻilongá.

5. Tā ʻi he palakipoé pe ʻi ha kiʻi laʻi pepa ha kiʻi tuʻunga pea fakahingoa ia Ko e Tuʻunga ʻo e Faitotonú. Ngaohi ha kiʻi fakatātā faingofua pē ʻaki ʻa e laʻi pepá pe ko haʻo tā ha kiʻi fakatātā ʻi lalo ʻi he tuʻungá. Pea fakaʻaongaʻi ʻa e ngaahi meʻa ʻo hangē ko ʻení, tuku ke nau fakahā atu ʻa e ngaahi fili kotoa pē te nau ala fai ʻi he meʻa taki taha. Hili iá kole ange ke nau fakakaukau pe ko e fē ʻa e fili ʻoku lelei tahá. Tuku ki ha taha ke ne ʻunuakiʻi ʻa e fakatātaá (pe ko hano tā ha foʻi laine mei he fakatātaá) ki ʻolunga ʻi ha foʻi sitepu ʻe taha ʻi he tuʻungá ʻo kapau ko e fili lelei tahá ʻa e faitotonú. Fakamahino ange ʻoku hoko maʻu ai pe ʻa e faitotonú ko e fili ia ʻoku lelei tahá. Fakaʻaongaʻi ha ngaahi meʻa feʻunga ke nau aʻu ai ki he taupotu taha ʻo e tuʻungá.

   1. Ko haʻo maʻu ha kiʻi meʻa vaʻinga naʻe mole ʻa ho kaungāmeʻá.

   2. Ko haʻo maʻu ha kiʻi peesi ʻoku ʻi ai ha paʻanga. f.ʻOku hili ʻi he funga tēpilé ha kato lole pea ʻoku ʻikai foki ke ʻi ai ha taha ia ʻi he lokí.

   3. ʻOku ʻai ke ke ʻalu ki ha ʻekitivitī ka ko e pangó kuo pau ke totongi ka ke toki hū. ʻOku hā ha fakamatala ʻi he matapā hūʻangá ʻo pehē, “ ʻOku ʻikai totongi ʻa e fānau ʻi lalo he taʻu valú.

   4. Ne fakafoki atu ʻe he faifakataú hoʻo veté ʻo fuʻu lahi.

   5. Ne kole atu ho kaungāmeʻá ke ne hiki hoʻo tali ʻi he siví.

   6. Ne fakahā atu ʻe ha taha ha talanoa taʻe ʻofa ʻo kau ki ha taha kehe.

   7. Naʻá ke palōmesi ki hoʻo ongo mātuʻá te ke aʻu atu ai ki ʻapi ʻi ha taimi pau, ka ʻoku fie maʻu ho kaungāmeʻá ke ke nofo ke toe lōloa ange.

6. Faʻu ha niʻihi ʻo e ngaahi meʻa naʻe hokó, pe meimei tatau pē mo e ngaahi meʻa ko ʻení, ke hanga ʻe he fānaú ʻo fakatulamaʻi. ʻOku totonu ke hangē pē ʻa e ngaahi meʻa ʻokú ke fokotuʻú ko e ngaahi meʻa ko ia ʻoku lava ke fili ʻe he fānaú mei he faitotonú pe ʻikai faitotonú.

   1. ʻOku fie maʻu hoʻo fineʻeikí ke ke tokangaʻi ho kiʻi tuongaʻané. Ka ʻokú ke toe fie lau tohi foki koe. Pea ʻokú ke ʻiloʻi kapau te ke fakahā ange ʻoku ʻi ai hoʻo ngāue ke fai, he ʻikai te ne tuku atu ke ke tokangaʻi ia.

   2. Ne ke ngāue kovi ʻo mafahi ʻa e tisi ʻoku saiʻia taha ai hoʻo fineʻeikí lolotonga iá ʻoku ʻikai ke ʻi heni.

   3. Naʻá ke palōmesi te ke tokoni ki hoʻo tangataʻeikí ke fai ha kiʻi ngāue he Tokonakí, ka naʻe palani ho ngaahi kaungāmeʻá ha foʻi ʻekitivitī ʻa ia ʻokú ke fie maʻu ke ke ʻalu ki ai.

7. Mou toe fakamanatu ʻa e tefito ʻo e tui hono faá.

8. Hivaʻi pe lau ʻa e fakalea ʻo e “Faitotonú” (Tohi Hiva ʻa e Fānaú, p. 149), pe ko e “Tuʻu Maʻu ʻi he Totonú” (Tohi Hiva ʻa e Fānaú, p. 159).

Fakaʻosí

Fakamoʻoní

Fakahā ange ʻa hoʻo fakamoʻoní ki he mahuʻinga ʻo e faitotonú. Fakamatalaʻi ange ko e taimi ko ē ʻoku tau faitotonu ai ʻi he ngaahi meʻa kotoa pē ʻoku tau faí, ʻoku ʻomi ʻe he Laumālie Māʻoniʻoní ʻa e ongo ʻo e fiemālié kia kitautolu.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Ngāue 4:32–5:10 ʻi ʻapi ke hoko ko hano toe fakamanatu ʻa e lēsoni ko ʻení.

Fakaafeʻi ha taha ke ne fai ʻa e lotu tukú.