Ko e Foaki ʻa e Fefine Uitoú

Taumuʻá

Ke tokoniʻi ʻa e fānaú taki taha ke totongi totonu ʻenau vahe hongofulú pea mo e ngaahi foaki kehé.

Teuteú

Ako ʻi he faʻa lotu ʻa e Maʻake 12:41–44, 3 Nīfai 24:10, pea mo e Tokāteline mo e Ngaahi Fuakava 119:4. Hili iá peá ke ako ʻa e lēsoní mo ke fili pe ʻe anga fēfē haʻo fiemaʻu ke akoʻi ki he fānaú ʻa e fakamatala ʻa e folofolá. (Vakai, “Teuteuʻi Hoʻo Lēsoní,” vi, pea mo e “Faiako mei he Folofolá, viii.)
Laukonga ʻoku tānaki atu: Luke 21:1–4 pea mo e Tokāteline mo e Ngaahi Fuakava 64:23.
Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Sēniti ʻe hongofulu (pe ko haʻo tā ha fuopotopoto ʻe hongofulu ʻi he palakipoé ke ne fakafofongaʻi ʻa e senití.)
3. ʻŪ pepa pea mo e peni vahevahe ke taki taha ʻa e fānaú.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakaiʻi ʻAki e Tokangá

Fakahā ange ki he kalasí ha sēniti ʻe hongofulu.

ʻEkitivitī ke Takiakaiʻi ʻAki e Tokangá

Ko hai te ne fie maʻu ʻa e fanga kiʻi sēniti ko ʻení?
Te ke loto ke fakafoki mai ha sēniti ʻe taha, kapau te u foaki kotoa atu ʻa e fanga kiʻi sēniti ko ʻení? Ko e hā hono ʻuhingá? Te ke loto ke fakafoki mai ha sēniti ʻe ua pe tolu pe ko hono kotoa ʻo e sēnití?

Fakamatalaʻi kuo fekauʻi kitautolu ʻe he Tamai Hēvaní ke totongi ʻetau vahe hongofulú, ko hono fakafoki ange ʻa e vahe hongofulu ʻe taha ʻo e meʻa kotoa pē te tau maʻú. Naʻá ne toe kole mai ke tau ʻoange mo ha ngaahi foaki kehe, ʻo hangē ko e foaki ʻaukaí pea mo e tokoni ki he paʻanga faifekaú, ke tokoni ki hono langa hake ʻo ʻene ngāué ʻi he māmaní.

Fakamanatu ange naʻe faʻu ʻe he Tamai Hēvaní pea mo Sīsū Kalaisi ʻa e meʻa kotoa pē ʻoku ʻi he māmaní. Naʻe tāpuakiʻi ʻaki kitautolu ʻe he Tamai Hēvaní ʻa hotau ngaahi sinó pea mo e ʻatamaí koeʻuhí ke tau lava ke ngāue pea mo fakakaukau foki. Ko e meʻa kotoa pē te tau maʻu ʻi he ngāué pe maʻu ʻi he māmaní ko e meʻaʻofa meiate ia. ʻOku fie maʻu ʻe he Tamai Hēvaní ke fakahā ʻetau loto houngaʻí, tuí, pea mo e talangofuá ʻaki ʻa e totongi ʻetau vahe hongofulú pea mo e ngaahi foaki kehe ki he Siasí.

Fakamatala ʻa e Folofolá

Akoʻi ʻa e talanoa ki he foha ʻo e fefine uitoú (Maʻake 12:41–44). (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” viii.) Fakamatalaʻi ʻoku fekauʻi maʻu mai pē ʻe he Tamai Hēvaní pea mo Sīsū ʻa e kakaí ke totongi ʻenau vahe hongofulú pea ʻoku toe fie maʻu ke totongi mo e ngaahi foaki kehé ke tokoni ki hono fakalato ʻo e ngaahi fiemaʻu ʻa e Siasí.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteuʻi hoʻo lēsoni. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ke mahino ki he fānaú ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa naʻe lī ʻe he kakai koloaʻiá ki he tukuʻanga koloa ʻa e siasí? (Maʻake 12:41.) Ko e hā e meʻa naʻe lī ʻe he fefine uitoú ki he tukuʻanga koloá? (Maʻake 12:42.) Fakamatalaʻi ko e maití ko ha kiʻi paʻanga siʻisiʻi pe ia.) Ko e hā hono ʻuhinga naʻe fakahoifua ange ai kia Sīsū ʻa e foaki ʻa e fifine uitoú pea mei he foaki ʻa e kau tuʻumālié? (Maʻake 12:43–44.)
Ko e hā hono lahi ʻo e vahe hongofulu ʻoku fie maʻú mai ʻe he Tamai Hēvaní ke tau totongí. (T&F 119:4. Fakamatalaʻi ʻoku ʻuhinga ʻa e “tupú” ki ha faʻahinga paʻanga pē ʻoku tau maʻu mei heʻetau ngāué. Fakahinohinoʻi ʻa kinautolu ʻaki hano fakaʻaongaʻi ʻa e ʻū laʻi pepá mo e peni vahevahé ke fikaʻi ʻa e lahi ʻo e paʻanga te ke totongi ki he vahe hongofulú.) Ko e hā hono ʻuhinga ʻo e totongi totonu ʻo e vahe hongofulú?
Ko e hā e lahi ʻo e paʻanga ʻoku kole ʻe he Tamai Hēvaní ke tau totongi ʻi he foaki ʻaukaí? Ko e hā e lahi ʻo e paʻanga ʻokú ne kole ke tau totongi ʻi he paʻanga tokoni faifekaú? Tokoniʻi ʻa e fānaú ke mahino kia kinautolu ʻoku ʻikai ke ngata pē ʻi he lahi ʻo e paʻanga vahe hongofulu ʻoku fekauʻi mai ke tau totongí, ʻoku tau fili pe ko e hā ʻe lahi ʻo e paʻanga ʻoku tau fie totongi ki he foaki ʻaukaí pea mo e tokoni faifekaú ʻo makatuʻunga ia ʻi he meʻa ʻoku tau maʻú pea mo e anga ʻo ʻetau ngaahi fiemaʻú. Naʻe kole mai ʻa e Tamai Hēvaní ke tau matuʻaki fakapotopoto, koeʻuhí ko e lahi ange ʻo ʻetau foakí, ko e lahi ange ia ʻo ʻetau fakahā kuo tau ului ke fai ʻa e ngāue ʻa e Tamai Hēvaní.
ʻOku ʻi ai nai mo ha ngaahi toe founga kehe te tau lava ai ke tokoni ki hono langa e ngāue ʻa e Tamai Hēvaní? (ʻEkesōtosi 25:1–8; T&F 124:26–27.) Fakamatalaʻi naʻe kole ki he kau mēmipá ʻi he kuonga kotoa pē ke nau lī ha paʻanga ke tokoni ki hono langa ʻo e ngaahi temipalé. Ka ʻi he ʻahó ni kuo langa ʻa e ngaahi temipalé ʻi he tapa kotoa pē ʻo e māmaní, pea te tau lava ke maʻu ha ngaahi tāpuaki mahuʻinga ʻaki ʻetau lī ʻa e ngaahi foakí.
Ko e hā hono ʻuhinga ʻoku kole mai ai ʻa e ʻEikí ke totongi ʻetau vahe hongofulú. Ko e hā ha ngaahi tāpuaki ʻoku tau maʻu ʻi he totongi vahe hongofulu totonú? (3 Nīfai 24:10.) Ko e hā hono ʻuhinga ke fakaava ʻa e ngaahi matapā ʻo e langí kia kitautolú? Ko e hā e faʻahinga tāpuaki ʻoku tau maʻu ʻi he taimi ʻoku tau totongi ai mo e ngaahi foaki kehé?

Aleaʻi ʻa e kupuʻi lea ko ʻení meia Palesiteni Sipenisā W. Kimipolo, ko e Palesiteni ia hono hongofulu mā ua ʻo e Siasí:

“Kuo ʻosi talaʻofa mai ʻa e ʻEikí te ne fakaava ʻa e ngaahi matapā ʻo e langí ʻi he taimi te tau talangofua ai ki heʻene ngaahi fekaú, foaki mai ha ngaahi vahenga lelei, tokoniʻi ke tau toe fakapotopoto ange ʻi hono fakaʻaongaʻi ʻetau paʻangá, foaki mai ʻa e moʻui leleí, maʻu ha mahino ʻoku toe lahi angé koeʻuhí ke tau lava ʻo aʻusia ha tuʻunga lelei ange, pea mo tokoniʻi kitautolu koeʻuhí ke tau lava ʻo fai ʻa e ngaahi meʻa ʻoku tau fie maʻú” (The Teachings of Spencer W. Kimball, p. 212).

Fakamamafaʻi ko e tāpuaki mahuʻinga taha ʻoku tau maʻu mei he totongi vahe hongofulú pea mo e ngaahi foaki kehé ko e fakalaumālié. ʻE toe mālohi ange ʻetau tuí ʻi he taimi kotoa pē ʻoku tau fili ai ke talangofua ki he lao ʻo e vahe hongofulú pea maʻu ha loto fie foaki ʻi heʻetau totongi ʻo e foaki ʻaukaí pea mo e paʻanga tokoni faifekaú.

Ngaahi Fehuʻi ke Aleaʻi pea mo Fakaʻaongaʻí

Naʻe anga fēfē hono tāpuakiʻi koe pe ko ha taha ʻokú ke ʻiloʻi ʻe he totongi vahe hongofulú pe ko e ngaahi foaki kehé? Fakahā ki he fānaú ha fakatātā ʻo ha meʻa ne hoko kiate koe pea kole ange ke nau fakahā mai ha faʻahinga meʻa naʻe tāpuekina ai ʻa kinautolu koeʻuhí ko e foaki naʻa nau faí?
Ko e fē taimi ʻoku totonu ke totongi ai ʻetau vahe hongofulú? (ʻE lava ke totongi ʻetau vahehongofulú ʻi ha faʻahinga taimi pe lolotonga ʻa e taʻú, ka ko e lelei tahá ke totongi ʻi he taimi pe ʻoku maʻu ai hoʻo paʻanga hū maí.) Ko hai ʻoku totongi ki ai ʻetau vahe hongofulú pea mo e ngaahi foaki kehé? (Ki he pīsopé pe ko hono ongo tokoní. ʻOku ʻave ʻe he pīsopé ʻa e paʻanga vahe hongofulú ki he ʻuluʻi ʻōfisi ʻo e Siasí, pea ʻoku fakakaukauʻi ʻe he kau taki ʻo e Siasí ʻa e founga lelei taha ʻe fakaʻaongaʻi ki ai ʻa e paʻangá ke fakaleleʻaki ʻa e ngāue ʻa e ʻEikí. ʻOku fakaʻaongaʻi fakalotofonua pē ʻa e Foaki ʻaukaí pea mo e paʻanga tokoni faifekaú; ko e paʻanga hulú ʻoku ʻave ia ki he ʻuluʻi ʻōfisi ʻo e Siasí.
Ko e hā e founga ʻoku fakaʻaongaʻi ki ai ʻa ʻetau paʻanga ʻaukaí? (Vakai, ki he ʻekitivitī fakatupulaki 2.) Ko e hā e founga ʻoku fakaʻaongaʻi ki ai ʻa e foaki ʻaukaí? (ʻOku fakaʻaongaʻi ʻa e Foaki ʻaukaí ke tokoniʻiʻaki ʻa e polokalama uelofea ʻa e Siasí.)
Ko e hā e fakaʻekeʻeke vahe hongofulú? (Ko ha fakataha ʻoku tau fai tuʻo taha mo e pīsopé ʻi he taʻú. ʻOku tau vakai ki he lēkooti ʻetau totongi vahe hongofulú mo e ngaahi foaki kehé pea tali kiate ia kapau ʻoku tau totongi vahe hongofulu totonu. Te tau lava ke tali ʻoku kakato ʻetau vahe hongofulú kapau naʻa tau totongi ʻa e vahe hongofulu ʻe 1 ʻo e paʻanga hū mai ʻoku tau maʻú ki he ʻEikí.)
Ko e hā ʻokú ke fakakaukau ʻoku mahuʻinga ai ke tau totongi ʻetau vahe hongofulú ʻi he loto tauʻatāiná? (Molonai 7:6–8.) Pea kapau ʻoku siʻisiʻi ʻa e paʻanga hū mai ʻoku tau maʻú, ʻoku kei fiemaʻu pe ke totongi ʻetau vahe hongofulú? Ko e hā hono ʻuhingá?

Aleaʻi ʻa e kupuʻi lea ko ʻení naʻe fai ʻe Palesiteni Sipenisā W. Kimipolo: “ ʻOku ʻi ai ha kakai ʻe niʻihi ʻoku nau pehē ʻoku ʻikai lava ke totongi ʻenau vahe hongofulú koeʻuhí ʻoku fuʻu siʻisiʻi ʻa e paʻanga hū mai ʻoku nau maʻú… . ʻOku ʻikai ha taha ia ʻe fuʻu masiva ke totongi ʻene vahe hongofulú” (The Teachings of Spencer W. Kimball, p. 212).

Ngaahi Fehuʻi ke Aleaʻi pea mo Fakaʻaongaʻí

Ko e hā ʻoku mahuʻinga ai ke totongi mo e ngaahi foaki kehé? ʻE anga fēfē haʻatau fakaʻaongaʻi e foaki ʻa e fefine uitoú ko ha fakatātā ia hono fai ʻo e foakí ki he Siasí? Tokoniʻi ʻa e fānaú ke mahino kia kinautolu mahalo pē naʻa kole mai ʻi he kahaʻú ke tau foaki ange ʻa e meʻa kotoa pē ʻoku tau maʻú? Ka ʻi he ʻahó ni ʻoku kole mai ke tau ʻoange pe ʻa ia ʻoku totonu ke tau foakí pea kei maʻu pe mo ʻetau ngaahi fiemaʻú.

ʻEkitivitī Fakatupulakí

Te ke lava ke fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pē lolotonga ʻa e lēsoní, pe ko hano fakamanatu, fakamatala fakanounou, pē ʻi hono tukupaá.

Fakaʻaongaʻi ha paʻanga loi (ʻe lava ke ke ngaohi pe ia ʻe koe), ʻai ke hangē ko ha foʻi fāmilí pea ke mou fokotuʻu ha patiseti ʻo e lahi e paʻanga te ke ʻoange kia kinautolú. Tuku ke nau patisetiʻi ʻa e meʻatokoní, nofoʻangá, ngaahi nāunau falé, valá, pea mo e ngaahi meʻa vaʻingá. Hili iá tala ange ke tānaki ʻa e vahe hongofulú pea mo e ngaahi foaki kehé ki heʻenau patisetí ʻaki hano fakamuʻomuʻa kinautolu ʻi he lisí. Fakamatalaʻi ʻoku totonu maʻu pe ke ʻuluaki totongi ʻetau vahe hongofulú koeʻuhí ko e ʻinasi ia ʻo e ʻEikí.
ʻAlu takai ʻi he lokí peá ke fehuʻi ki he fānaú taki taha ke ne fakahā mai ha faʻahinga meʻa pau ʻoku fakaʻaongaʻi ki ai ʻa e paʻanga vahe hongofulú. ʻOange ha ngaahi fokotuʻu mei he lisi ko ʻení kapau ʻe fie maʻu:

Langa ʻo e ngaahi fale lotú, ngaahi temipalé, ngaahi akoʻanga seminelí pea mo e ʻinisititiutí, senitā akoʻanga ʻo e kau faifekaú, pea mo e ngaahi senita ʻo e hisitōlia fakafāmilí.

Totongi ʻo e ngaahi ʻekitivitī fakauōtí pea mo fakasiteikí pea pehē foki ki he ngaahi tohi lēsoní pea mo e ngaahi nāunaú.

Totongi ki he momomono ʻo e ngaahi fale lotú pea mo e ngaahi meʻa ʻoku fakaʻaongaʻi ki aí.

Totongi ʻo e fefolauʻaki mo e ngaahi fakamole kehe ʻa e Kau Taki Māʻolungá.

Fakatau mai ʻo e ngaahi komipiuta ke fakaʻaongaʻi ʻi he temipalé pea mo e ngāue ki he hisitōlia fakafāmilí.

Tokoni ki hono pulusi ʻo e ngaahi makasiní.

Totongi ki hono fakamafola fakasatelaite ʻa e ngaahi meʻa ʻa e Siasí

Totongi ki hono liliu pea mo hono pulusi ʻo e ngaahi folofolá.
ʻOange ke taki taha ʻa e fānaú ha kiʻi laʻi pepa pea mo ha peni vahevahe pea ke nau ʻalu ki he matapā sioʻatá pē ko ha feituʻu pe ʻi he falé te nau lava ʻo sio ai ki tuʻá. Tuku ke nau taki taha tohi fakalongolongo pe ʻi he lahi taha te nau lavá ʻa e ngaahi meʻa ʻoku nau sio ki ai ʻi he kiʻi miniti siʻisiʻi ko ʻení. Fakamatalaʻi kuo ʻosi foaki mai ʻe he Tamai Hēvaní ʻa e meʻa kotoa pē ʻoku tau maʻú, pea ko e founga pe ʻe taha te tau lava ke fakahāʻaki ʻetau loto houngaʻia mo ʻetau ʻofa ki he Tamai Hēvaní ko e totongi ʻetau vahe hongofulú pea mo e ngaahi foaki kehé.
Fakahā ange ʻa e talanoa ko ʻení naʻe fai ʻe Palesiteni ʻEselā Tafi Penisoni, pea aleaʻi ʻa e tui ʻoku fie maʻu ke totongi ʻa e vahe hongofulú pea mo e ngaahi tāpuaki ʻoku maʻu mei he talangofua ki he fekaú:

“Naʻáku fanongo atu ʻi ha ʻaho ʻe taha ʻi heʻeku kei taʻu hongofulu tupú, ki ha talanoa ʻa ʻeku ongomātuʻá ʻo kau ki heʻena fakamatala fakapaʻangá ʻi he teuteu ki he fakaʻekeʻeke fakataʻu ʻo ʻena vahe hongofulú ʻa ia ʻe fai ʻi he ʻaho hoko maí. Naʻe [moʻua] ʻa e tangataʻeikí ʻaki ha paʻanga ʻe uofulu mā nima ki he pangikeé, ʻa ia kuo pau ke totongi ia ʻi he lolotonga ʻo e uiké. ʻI hono fikaʻi atu ʻo ʻene vahe hongofulú, ʻokú ne moʻuaʻaki mo ha toe paʻanga ʻe uofulu mā nima kehe. Naʻá ne toe maʻu foki mo ha meʻa ke hikiʻaki ʻa e mohukú (hay derrick) [ko ha faʻahinga meʻa ia ʻoku fakaʻaongaʻi ke hikiʻaki ʻa e mohukú] ʻa ia naʻá ne ʻosi faʻu. Naʻá ne… . feinga foki ke fakatau atu ia, ka naʻe ʻikai ola lelei.

“Ko e hā e meʻa te na faí—ko e [totongi] ʻo e moʻua ki he pangikeé, kae toki totongi ʻa ʻena vahe hongofulú, pe ko hano totongi ʻo ʻena vahe hongofulú pea mo ha fakaʻamu te na lava ke [totongi ki he pangikeé] ʻi ha ngaahi ʻaho siʻi pe mei ai? Hili ʻo ʻena aleaʻi ʻa e meʻa kuo hokó, pea naʻá ku fakapapauʻi naʻá na fai ha lotu fakataha ki muʻa ke na maʻu ha mālōloó, naʻe loto ʻa e tangataʻeikí ʻi he ʻaho hoko maí ke na totongi ʻa e paʻanga ʻe uofulu mā nimá ki he fakaʻekeʻeke vahehongo fulú, ʻa ia ʻe lava ke ne hoko ko ha taha totongi vahe hongofulu kakato. ʻI heʻene heka mai ke foki ki ʻapi ʻi heʻene hōsí, naʻe taʻofi ia ʻe ha taha ʻo hono kaungāʻapí peá ne fehuʻi ange, ‘Siaosi, ʻoku ou ʻiloʻi ʻoku ʻi ai hoʻo meʻa hiki musie (derrick) ʻoku tuʻuaki fakatau. ʻE fiha kapau te ke fie maʻu ke fakatau atu?’

“Tuaiekemo ʻa e pehē ange ʻa e tangataʻeikí, ‘paʻanga ʻe uofulu mā nima.’ Naʻe tali mai leva hono kaungāʻapí, ʻOku teʻeki ai te u sio ai au, ka ko ʻeku ʻiloʻi hoʻo founga ngāué, ʻoku feʻunga pe hono mahuʻingá mo e paʻanga ʻe uofulu mā nimá. Kātaki toe tatali siʻi angé ka u hū ki fale ʻo toe vakaiʻi. ʻOku ou fie maʻu ia ʻe au.’ Ko ha lēsoni ʻeni he ʻikai pē ke toe ngalo ia ʻiate au” (The Teachings of Ezra Taft Benson, pp. 471–72).
Fai ʻa e talanoa ko ʻení:

“ ʻI he taimi naʻá ku meimei taʻu nima pe ono aí, naʻá ku tangutu fakataha ʻi he tēpile kaiʻangá mo homau fuʻu fāmili tokolahí pea mo fakafanaongo ki he niʻihi kehé ʻi heʻenau fepotalanoaʻaki kau ki he vahe hongofulú. Naʻa nau talamai ko e vahe hongofulu ʻe taha ʻo e meʻa kotoa pē ʻoku tau maʻú ʻoku totongi ia ki he ʻEikí ʻe kinautolu ʻoku ʻofa kiate iá.

“Hili ʻa e kai efiafí naʻá ku toʻo mai ʻa e kiʻi paʻanga naʻá ku tātānakí peá u fikaʻi ko e hā hoku moʻua ki he ʻEikí ʻi he vahe hongofulú. Hili iá naʻá ku ʻalu ki he loki pe ʻe taha ʻi he falé ʻoku lava ʻo lokaʻí—ko e fale kaukaú—ʻou tūʻulutui ʻi he veʻe topu kaukaú. Naʻá ku fakafoʻohakeʻi pe hoku laʻi nimá peá u hilifaki ai ʻa e kiʻi kiʻi sēniti ʻe tolu pe fā naʻá ku maʻú, peá u kole ki he ʻEikí ke ne tali muʻa ia— naʻáku fakapapauʻi kuó ne tali ʻeku kolé. Naʻá ku fealēleaʻaki mo e ʻEikí ʻi ha ngaahi taimi, ka naʻe kei tuku pe ʻa e sēnití ʻi hoku nimá. Naʻe ʻikai ke ʻi ai ha kiʻi tamasiʻi siʻisiʻi naʻe ongoʻi liʻekina ʻo lahi ange ʻiate au. Naʻe tali ʻe he ʻEikí ʻa e vahe hongofulu ʻeku ongo mātuʻá pea pehē ki hoku fanga taʻoketé. Ko e hā ʻoku ʻikai ai te ne tali aú? ʻI heʻeku tuʻu haké, naʻá ku ongoʻi taʻe taau ʻaupito pea ʻikai te u lava ke fakahā ki ha taha ʻa e meʻa kuo hokó. Ko e ʻEikí pe ʻokú ne ʻafioʻí.

“Hili ha ngaahi ʻaho siʻi naʻe pehē ʻe he faiako ʻi he Palaimelí ʻokú ne fiefia ke talanoa ʻo kau ki ha faʻahinga meʻa ʻoku ʻikai ke kau ʻi he lēsoní. Naʻá ku ʻohovale ʻaupito ʻi heʻene akoʻi kimautolu ki he founga ʻo e totongi vahe hongofulú. Ko e meʻa naʻá ku akó ʻoku mahulu ange ia ʻi he founga ʻo e totongi vahe hongofulú. Naʻá ku ako ʻoku fanongo pea mo tali ʻe he ʻEikí ʻetau ngaahi lotú, ʻokú ne ʻofa ʻiate au, pea ʻoku ou mahuʻinga kiate ia “ (Ariel Ricks, “Coins for the Lord,” Ensign, Dec. 1990, p. 47).
Hivaʻi pe lau ʻa e ngaahi lea ʻo e “Kuo Lahi Hoku Ngaahi Tāpuakí” (Hymns, no. 126).

Fakaʻosí

Fakamoʻoní pea mo e tukupaá

Fai haʻo fakamoʻoni ʻo kau ki he mahuʻinga ʻo e totongi vahe hongofulú. Fakahā ʻa e ongo ʻokú ke maʻú ʻo fekauʻaki mo e faingamālie ʻoku tau maʻu ʻi he totongi ʻetau vahe hongofulú ko ha founga ia ke fakahāʻaki ʻetau loto houngaʻi ki he Tamai Hēvaní pea mo Sīsū Kalaisí. Fakahā ange, pe ko haʻo fakaafeʻi mai ha taha ʻo e kau mēmipa ʻo e kalasí ke ne fakahā mai ha faʻahinga meʻa naʻe hoko kiate ia ʻo hoko ʻa hoʻo totongi vahe hongofulú ko ha meʻa ke ne fakatupulaki ʻa hoʻo tui ki he Tamai Hēvaní pea mo Sīsū Kalaisí.

ʻOange ke nau taki taha ha laʻi tali totongi ʻo e foakí pea mo ha sila pea fakatukupaaʻi ke totongi kakato ʻenau vahe hongofulú ʻi ha faʻahinga taimi pe ʻe maʻu ai haʻanau paʻanga hū mai.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Maʻake 12:41–44 mei ʻapi ke hoko ia ko hano toe fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.