Lēsoni 40

Ko Pita mo Koniliusi

Taumuʻá

Ke tokoniʻi ke mahino ki he fānaú ʻoku ʻofa ʻa e Tamai Hēvaní ʻi heʻene fānaú kotoa pē pea ʻokú ne finangalo ke nau maʻu ʻa e faingamālie ke ako ʻa e ongoongolelei ʻo Sīsū Kalaisí.

Teuteú

1. Ako ʻi he faʻa lotu ʻa e Ngāue 10:1–11:18. Hil iá peá ke ako hoʻo lēsoní peá ke fili pe ʻe anga fēfē haʻo fiemaʻu ke akoʻi kia kinautolu ʻa e fakamatala ʻa e folofolá. (Vakai, Teuteu Hoʻo Lēsoní,” vi, mo e “Faiako mei he Folofolá,” viii.)

2. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú pea tokoni lelei taha ke nau aʻusia ʻa e taumuʻa ʻo e lēsoní.

3. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Fakatātā 7-41, Ko Ia ke ʻAlu ʻa Kimoutolu (Ngaahi Fakatātā ʻo e Ongoongoleleí 235; 62494 900).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī Ke Takiakiʻi ʻAki ʻa e Tokangá

Hikiʻi ʻa e ngaahi hingoa ko ʻení ʻi he palakipoé: Koniliusi, ʻĀngelo, Pita.

Tuku ki ha toko tolu ke nau lau ʻa e fakamatala taki taha ko ʻení ʻo kau ki he toko tolú ni. Kole ange ki he toenga ʻo e fānaú ke hiki honau nimá ʻi he taimi ʻoku nau fakakaukau ai ʻoku nau ʻiloʻi ko hai naʻe fai ki ai ʻa e fakamatalá.

Ko e talafekau au. ʻOku ʻikai ke ngata pē ʻi heʻeku fakahoko ʻa e ngaahi pōpoaki ʻa e ʻOtuá, ka ʻoku ou faiako, tāpuaki, pea fai ʻa ia kotoa pē ʻoku fekauʻi au ke u faí ke langa hake ʻa e puleʻanga ʻo e ʻOtuá. Te ke ako ʻi he ʻahó ʻo kau ki ha pōpaki makehe naʻá ku ʻomai. Ko aú (ko e ʻāngelo).

Naʻá ku hoko ko ha tangata toutai ʻi he Tahi Kālelí ʻi he taimi naʻe ui ai au ʻe Sīsū ke u muimui ʻiate iá. Te ke ako ʻi he ʻahó ni ʻo kau ki ha fakahā naʻá ku maʻu, ʻa ia naʻá ne fakaava ʻa e hala ki he toko taha kotoa pē ke akoʻi ki ai ʻa e ongoongoleleí. Ko (Pita) au.

Ko e senituliō au ʻi he vahefonua Lomá pea naʻá ku puleʻi ʻa e kau tangata ʻe toko 50 ki he 100. Ko e fuofua Senitaile au ke kau ki he Siasí (ko ha taha ʻoku ʻikai ko ha Siu). Te ke ako ʻi he lēsoni ʻo e ʻahó ni ʻo kau ki hoku papitaisó. Ko (Koniliusi) au.

Fakamatala ʻa e Folofolá

Akoʻi ʻa e talanoa ʻo Pita mo Koniluisí mei he Ngāue 10:1–11:18. (Ko e ngaahi fokotuʻu ki he founga ʻo hono akoʻi ʻo e fakamatala ʻa e folofolá, vakai, “Faiako mei he Folofolá,” viii.) Fakahā ʻa e fakatātaá ʻi hono taimi totonu.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Fakaʻaongaʻi ʻa e ngaahi fehuʻi ʻokú ke ongoʻi ʻe tokoni lelei taha ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻamou lau mo aleaʻi ʻa e folofolá ʻi he kalasí ke nau maʻu ai ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

• Ko e hā hono ʻuhinga naʻe taau ai ʻa Koniliusi ke ne maʻu ha fakahā mei he ʻEikí pea mo papitaisó? (Ngāue 10:2.) ʻOku founga fēfē haʻo hoko ko ha mēmipa mateaki ʻi he Siasí?

• Ko e hā e pōpoaki ʻa e ʻāngeló kia Koniliusí? (Ngāue 10:3–6.)

• Ko e hā ne mamata ki ai ʻa Pita ʻi he meʻa-hā-maí? (Ngāue 10:11–16.) Ko e hā naʻe puputuʻu aí? (He naʻe ʻosi tuʻutuʻuni ʻe he ʻEikí ki ʻIsileli ke ʻoua naʻa nau kai ha faʻahinga kakanoʻi manu pau, ʻa ia naʻe pehē ʻoku taʻe maʻa [vakai, Levitikō 11].) Naʻe fēfē hono fuofua tali ʻe Pita ʻa e meʻa-hā-maí ni? (Ngāue 10:14.) Ko e hā naʻe liliu ai ʻa ʻene fakakaukaú? (Ngāue 10:15.)

• Ko e hā naʻe fuʻu faingataʻa ai kia Pita ke ne akoʻi ʻa Koniliusi ʻi he ongoongoleleí? (Ngāue 10:28.) Tala ange naʻe aʻu mai ki he taimi ko ʻení kuo ʻosi akoʻi ʻe he kau ʻAposetoló ʻa e ongoongoleleí ki he kakai Siú, pea pehē ai ʻe ha toko lahi ʻi he Siasí ko e kakai Siú pē ʻoku totonu ke akoʻi ki ai ʻa e ongoongoleleí. Ka naʻe ʻikai ko ha Siu ʻa Koniliusi ia. Ko e hā naʻe faifai pea toki ʻiloʻi ai ʻe Pita ʻa e ʻuhinga ʻo ʻene mata-meʻa-hā maí? (Ngāue 10:34–35.) Ko hai ʻoku totonu ke akoʻi ki ai ʻa e ongoongoleleí ʻi he ʻahó ni? (Kakai kotoa pē.)

• ʻOkú ke pehē ko e hā naʻe fakatahatahaʻi ai ʻe Koniliusi hono ngaahi kaungāmeʻá mo hongo kāingá ke nau fanongo kia Pitá? (Ngāue 10:24–27.) Ko e hā ha ngaahi tefitoʻi moʻoni ʻo e ongoongoleleí ʻokú ke fie vahevahe mo ho fāmilí pea mo ho ngaahi kaungāmeʻá?

• Ko e hā naʻe fai ʻe Koniliusi ke maʻu ai ha tali ki heʻene palōpalemá? (Ngāue 10:30.) Ko e hā ha meʻa kuó ke aʻusia mo ho fāmilí tuʻunga ʻi he ʻaukaí mo elotú? Kuo tokoni fēfē atu ʻa e ʻEikí ke ke maʻu ai ha tali ki hoʻo palōpalemá?

• Naʻe ʻilo fēfē ʻe he kakaí ʻoku lea moʻoni ʻa Pita? (Ngāue 10:44–45.) Ko e hā te tau fai ke fakamoʻoniʻi ai ʻe he Laumālie Māʻoniʻoní ʻa e moʻoní kia kitautolu? (Molonai 10:4–5.)

• Ko e hā e fakakaukau ʻa e kau ākongá mo e kau ʻaposetoló ʻi heʻenau fanongo kuo akoʻi ʻe Pita ʻa e kau Senitailé? (Ngāue 11:2–3.) Ko e hā ʻe ʻuhinga ʻa Pita kai he meʻa naʻá ne faí? (Ngāue 11:4, 17.) Ko e hā e tali ʻa e kau ākongá mo e kau ʻAposetoló ki he mata-meʻa-hā-mai ʻa Pitá? (Ngāue 11:18.) Ko e hā ʻoku tau ako mei heni fekauʻaki mo e ʻofa ʻa e Tamai Hēvaní ki heʻene fānaú? (Vakai, ʻekitivitī fakatupulaki 5.)

• ʻE anga fēfē haʻo akoʻi ʻa e ongoongoleleí ki ha niʻihi ʻo e fānau ʻa e Tamai Hēvaní? Tokoniʻi e fānaú ke nau fakakaukau ki ha ngaahi founga te nau lava ai ʻo hoko ko ha kau faifekau ʻi he taimí ni pea mo ha founga te nau lava ai ʻo teuteu ke nau hoko ko ha kau faifekau taimi kakato.

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ngaahi ʻekitivitií ni ʻi he lolotonga ʻo e lēsoní pe ko hano vakaiʻi, pe fakamatala fakanounou, pe ʻi hono tukupaá.

1. ʻAi ke lau fakakulupu ʻe he fānaú ʻa e Ngāue 10:36–43 pea ʻai mo ha lisi ʻo e ngaahi meʻa naʻe akoʻi ʻe Pita kia Koniliusi mo hono fāmilí pea mo hono ngaahi kaungāmeʻá. ʻAi ke lau tahataha ʻe he ngaahi kulupú ʻenau lisí ka ke hiki kinautolu ʻi he palakipoé pe ʻi ha fuʻu laʻi pepa lau lahi. Tānaki atu mo ha ngaahi meʻa he ʻikai ʻilo ʻe he fānaú:

   • Ko Sīsū Kalaisí ko e ʻEiki ia ʻo e meʻa kotoa pē (veesi 36).

   • Naʻe papitaiso ʻa Sīsū Kalaisi (veesis 37).

   • Naʻe fakanofoʻaki ʻa Sīsū Kalaisi ʻa e Laumālie Māʻoniʻoní mo ha mālohi (veesi 38).

   • Naʻe fai lelei ʻa Sīsū Kalaisi (veesi 38).

   • Naʻe fai fakamoʻui ʻa Sīsū Kalaisi (veesi 38).

   • Naʻe fakapoongi ʻa Sīsū Kalaisi (veesi 39).

   • Naʻe toetuʻu ʻa Sīsū Kalaisi ʻi hono ʻaho tolú (veesi 40).

   • Naʻe fekauʻi ʻe Sīsū Kalaisi ʻa Pita ke ne fakamoʻoniʻi ko Sīsuú naʻe fakanofo ia ʻe he ʻOtuá (veesi 42).

   • Naʻe fakamoʻoni kotoa ʻa e kau palōfitá kia Sīsū Kalaisi (veesi 43). Ko kinautolu ʻoku tui kia Sīsū Kalaisi mo papitaisó ʻe maʻu ha fakamolemole ʻo ʻenau angahalá (veesi 43).

2. Fakaafeʻi ha faifekau kuo ʻosi, ʻo ka loto ki ai ʻa e palesiteni ʻo e Palaimelí, ke haʻu ʻo fakamatala ʻi he kalasí ha ngaahi meʻa te ne fakahaaʻi hono mahuʻinga ʻo hono akoʻi kotoa e fānau ʻa e Tamai Hēvaní.

3. Aleaʻi ʻa e kupuʻi lea ko ʻeni ne toʻo mei he lea ʻa ʻEletā Hauati W. Hanitaá:

   ʻOku fuʻu mahuʻinga ki he Tamai Hēvaní ʻa e fānau iikí. ʻOku ʻofa mo tokanga kia kinautolu ʻo tatau ai pē ko e fē feituʻu ʻoku nau ʻi aí pe ko e hā ʻoku nau tuí pe ko honau fōtungá. ʻOkú ne ʻofa ʻi he fānau Fisi ʻulu ʻuliʻuli mingimingí, pea pēhe ki he fānau Haʻamoa anga fakakaumēʻa pea mo vala lanu mata ʻāʻaá. Pea pehē foki ki he fānau tangata mo fefine papalangí ʻa ia ʻoku nau teunga taha ki he akó. ʻOkú ne ʻofa foki ki he fānau ʻi Siapaní. Pea pehē ki he fānau kili fakapopoʻuli ʻi Saute ʻAfiliká mo e kau Leimaná. ʻOku ʻofa ʻa ʻetau Tamaí ʻi heʻene fānaú ʻi he feituʻu kotoa pē. ʻOku tūʻulutui ʻa e mātuʻa ʻofá ʻo lotu fakataha mo ʻenau fānaú ʻi he hokosia ʻa e taimi ke nau mohe aí. ʻO tatau ai pē ko ha fuʻu mohenga māʻolunga, pe molū ʻo hangē ko e ngaahi fulufuluʻi manu ʻo ʻAlepeá pe ko haʻate mohe pē ʻi lalo ʻi ha kiʻi papa. Ka ʻoku fanongo pea tali ʻa kitautolu kotoa ʻe he Tamai Hēvaní. (Vakai, Friend, Oct. 1971, p. 10.)

4. Tokoni ke mahino kia kinautolu neongo pē ʻoku ʻikai tatau ʻa e ngaahi tala tukufakaholo mo e ngaahi ngāue ʻa e tukui fonuá, ka ʻoku tau tatau pē he ʻoku ʻofa ʻa e Tamai Hēvaní ʻiate kitautolu pea ʻokú ne finangalo ke tau foki hake kotoa kiate ia.

   Mou fai ha foʻi vaʻinga fakatauhoa ʻaki ʻa e ngaahi meʻa ko ʻení pe ko ha faʻahinga meʻa ʻoku meimei tatau mo ia ke fakamaheniʻaki ʻa e fānaú ki he niʻihi ʻo e ngaahi meʻa ʻoku fai pe mamata ai ʻi he ngaahi fonua kehé.

   Fakahoa pe ko e fē feituʻu ʻoku hangehangē te ke ʻalu ʻo ngāue ki aí ʻo kapau te ke ʻalu:

   Vakai ki he vala ʻoku tui ʻe he kakaí

   Ngaahi Kahoa	Sikotilani
   Ngaahi sū lapa	Hauaiʻi
   Piva mutu	Siapani
   Kīmono	Hōlani

   Meʻa kai ʻoku nau kaí

   Meʻakai ngaohi mei he pulú ʻEniselata	ʻIunaiteti Siteití
   (Enchiladas) Meʻakai mahimahi	Noauē
   (Sauerbraten) Pai ʻāpele	Falanisē
   Ko ha keke manifinifi (Crepes)	Siamane
   Ika (Pickled herring)	Mekisīkou

   Vakai

   Ngaahi Moʻungá	ʻItali
   Fuʻu Uasi(Big Ben)	ʻAositēlelia
   Taua ʻo Pisá (Leaning Tower of Pisa)	Kānata
   Kangakaluú	ʻIngilani

5. Fakamatalaʻi ange naʻe hoko ʻi he 1978 ha meʻa naʻe meimei tautau pē mo e meʻa-hā-mai ʻa Pitá ʻi he taimi naʻe maʻu ai ʻe Palesiteni Sipenisā W. Kimipolo ha fakahā mei he ʻEikí ko e kakai tangata mo e fānau tangata taau kotoa pē te nau lava ke maʻu ʻa e lakanga fakataulaʻeikí pea ʻe maʻu ʻe honau ngaahi fāmilí ʻa e ngaahi tāpuaki ʻo e temipalé (vakai, Fanongonongo Fakamafaiʻi—2 ʻoku hā ʻi he Tokāteline mo e Ngaahi Fuakavá).

6. Hivaʻi pe lau ʻa e ngaahi lea ʻo e “Fānau ʻo e Māmaní Kotoa” (Tohi Hiva ʻa e Fānaú, p. 16) or “Te mau ʻOmi ki he Māmaní ʻa ʻEne Moʻoní” (Tohi Hiva ʻa e Fānaú, p. 172).

Fakaʻosí

Fakamoʻoní

Fai ʻa hoʻo fakamoʻoní ʻoku ʻofa ʻa e ʻOtuá ʻi heʻene fānaú kotoa pē pea ʻokú ne fie maʻu ke akoʻi kia kitautolu ʻa e ongoongoleleí, pea papitaiso, pea mo tauhi ʻa ʻetau ngaahi fuakavá koeʻuhí ke tau lava ʻo nofo pea mo ia. Fakahā ʻa hoʻo loto houngaʻia ʻi he ʻilo ʻokú ke maʻu ki he ongoongoleleí pea mo ho papitaisó.

Laukonga ʻoku Fokotuʻu Atu ke Fai mei ʻApi

Fokotuʻu ke nau lau ʻa e Ngāue 10:36–43 mo e Ngāue 11:15–18 ʻi ʻapi ke hoko ko hano toe fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú