Ko e Fononga ʻa Paula ki Lomá

Taumuʻá

Ke tokoniʻi ʻa e fānaú taki taha ke nau ako lahi ange ʻo kau ki he meʻa-foaki ʻo e Laumālié, ʻa ia ʻoku haʻu tuʻunga ʻi he Laumālie Māʻoniʻoní.

Teuteú

Ako ʻi he faʻa lotu ʻa e Ngāue 27:1–28:9, 1 Kolinitō 12:1–11, pea mo e Tefito ʻo e Tuí 1:7. Hili iá peá ke fili pe ʻe founga fēfē hoʻo ʻakoʻi ki he fānaú ʻa e fakamatala ʻa e folofolá. (Vakai, “Teuteu Hoʻo Lēsoní,” vi, pea mo “Faiako mei he Folofolá,” viii.)
Laukonga ʻoku tānaki atu: Ngaahi Tefitoʻi Moʻoni ʻo e Ongoongoleleí, vahe 22.
Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Mataʻitofe Maʻuʻingá pe ko ha tatau ʻo e Tefito ʻo e Tuí ke taki taha ʻa e fānaú.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Tala ange ki he fānaú ʻo kau ki ha meʻaʻofa makehe naʻá ke maʻu ʻi ha ʻaho mālōlō pe ʻaho faʻeleʻí. Hili iá, peá ke kole ange ke nau fakahā mai ha niʻihi ʻo e ngaahi meʻaʻofa kuo nau ʻosi maʻú.

ʻEkitivitī ke Takiakiʻi ʻAki e Tokangá

Ko e hā e meʻaʻofa ʻoku tau lava ke maʻu ʻi he taimi ʻoku tau hoko ai ko ha mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻI he Ngaahi ʻAho Ki Muí Ni? (Ko e meʻa-foaki ʻo e Laumālie Māʻoniʻoní.)

Tuku ki he fānaú ke nau fakahā mai ko e hā e meʻa ʻoku nau ʻiloʻi ʻo kau ki he meʻa-foaki ʻa e Laumālie Māʻoniʻoní. Fakamatalaʻi ko hono toe tānaki mai ki hono maʻu ʻo e tataki mo e fakahinohino ʻo e Laumālie Māʻoniʻoní, ʻoku maʻu ʻa e totonu ʻe he mēmipa taki taha ʻi he Siasi ʻo Sīsū Kalaisí ki he ngaahi tāpuaki fakalaumālie kehé. Tuku ke kumi ʻe he fānaú ʻa e Tefito ʻo e Tuí ʻi he Mataʻitofe Mahuʻingá pea mo kumi ki he tefito ʻo e tui ʻokú ne lave ki he ngaahi tāpuaki fakalaumālié. Hiki ʻi he palakipoé ʻa e ngaahi tāpuaki fakalaumālié kae lau ʻe he fānaú ia pe lauloto ʻa e tefito ʻo e tui fitú. Poupouʻi ke nau fanongo ki he fakamatala ʻo e fononga ʻa Paula ki Lomá ke nau ʻilo ai ʻa e niʻihi ʻo e ngaahi meʻaʻofa naʻá ne maʻu pe naʻá ne fakaʻaongaʻi ia ke tokoni ki he niʻihi kehé.

Fakamatala ʻa e Folofolá

Fai ha kiʻi fakamatala nounou ki he lēsoni ʻi he uike kuo ʻosí koeʻuhí ke lava ʻe he fānaú ʻo manatuʻi ʻa e ʻuhinga naʻe hoko ai ʻa Paula ko ha pōpula ʻi heʻene fononga ko ia ki Lomá. Hili iá peá ke akoʻi ki he fānaú ʻa e fakamatala ʻo e fononga ʻa Paula ki Lomá mei he Ngāue 27:1–28:9. (Ko e fokotuʻu ki he ngaahi founga ʻo hono akoʻi ʻa e fakamatala ʻa e folofolá, vakai, “Faiako mei he Folofolá,” viii.) Vakai ki he mape 8 ʻo e Fakahinohino ki he Folofolá.

ʻI he taimi ʻe ʻosi ai ʻa hoʻo akoʻi ʻa e fakamatala ʻa e folofolá, fakamatalaʻi ange naʻe hokohoko atu pe ʻa e fononga ia ʻa Paula ki Lomá, ʻa ia naʻá ne fakamoleki ʻa e taʻu ʻe ua ʻi hono malangaʻi ʻa e ongoongolelei ʻo Sīsū Kalaisí neongo pē naʻe kei fakahū pōpula pe ia pea mo tāpuniʻi ʻi he falé.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kainautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo hoʻo fānaú ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa naʻe fakatokanga ange ʻe Paula ki he kakai ʻi he vaká? (Ngāue 27:10.) Naʻe founga fēfē ʻene ʻiloʻí ʻa e meʻá ni? (Naʻe fakahā ange kiate ia ʻe he Laumālie Māʻoniʻoní.) Ko hai naʻe tui ki ai ʻa e senitulioó? (Ngāue 27:11.) Ko hai naʻe moʻoní? (Ngāue 27:14, 20.) Ko e taimi ʻoku fakatokanga mai ai kia kitautolu ʻa e palōfitá, ko e hā e meʻa ʻoku totonu ke tau faí? Ko e hā hono ʻuhingá?
Ko e hā hoʻo fakakaukau ki he ongo naʻe maʻu ʻe he kakai ʻi heʻenau pehē ko ia ʻe tukia ʻa e vaká? Ko e hā e meʻa naʻe tala ange ʻe Paula kia kinautolú? (Ngāue 27:21–22.) Naʻe founga fēfē hono ʻiloʻi ʻe Paula te nau hao pea mo aʻu lelei pē ki Lomá? (Ngāue 27:23–25.)
Ko e hā e meʻa naʻe hoko ki he vaká? (Ngāue 27:40–41.) Ko e hā e meʻa naʻe fie maʻu ʻe he kau sōtiá ke fai ki he kau pōpulá ʻi he taimi naʻe tukia ai ʻa e vaká? Ko e hono ʻuhingá? (Ngāue 27:42.) Ko e hā hono ʻuhinga naʻe taʻofi ai ʻe he senitulioó kinautolu mei hono fai ʻení? (Ngāue 27:43.) Ko e hā hono ʻuhinga naʻe liliu ai ʻa e tōʻonga ʻa e senitulioó kia Paulá? (Ngāue 27:11, 14, 21, 25, 31, 43.)
Ko e hā e meʻa naʻe hoko kia Paula lolotonga ʻene tafu ʻa e afí? (Ngāue 28:3.) Ko e hā hono ʻuhinga naʻe mamata ai ʻa e niʻihi kehé pea mo nau tatali ki ha mate ʻa Paulá? (Ngāue 28:4–6.) Ko e hā nai hono ʻuhinga naʻe fakahaofi ai ʻa Paula mei he ʻūʻu ʻa e ngatá?
Ko e hā e meʻa naʻe fai ʻe Paula kia kinautolu ko ia naʻe puké? (Ngāue 28:8–9.) Ko e hā hono ʻuhinga naʻe malava ai ʻe Paula ke fai ʻení? (Naʻe maʻu ʻe Paula ʻa e meʻa-foaki ʻo e fai fakamoʻuí. Naʻá ne toe maʻu foki ʻa e lakanga fakataulaʻeikí pea ko e ʻAposetolo foki ia pea naʻe ʻosi foaki ange kiate ia ʻa e meʻa-foaki fakalaumālie mahuʻinga ke tokoni kia kinautolu ke lava ʻo fakakakato ʻa e ngāue ʻa e ʻEikí kuo foaki kiate iá. Fakamamafaʻi ange ʻa e mahuʻinga ʻo hono fakaʻaongaʻi ʻo e meʻa-foaki fakalaumālié ke tokoni ki he niʻihi kehé.)
Ko e hā hono ʻuhinga naʻe lava ai ʻa Paula ʻo ʻiloʻi ʻa e ngaahi meʻa ʻe hoko ʻi he kahaʻú pea mo fakamoʻui ʻa e māhakí? (Naʻe ʻosi papitaiso ʻa Paula pea mo fakanofo ko e mēmipa ia ʻo e Siasi ʻo Sīsū Kalaisí, koeʻuhí ʻokú ne maʻu ʻa e totonu ki ha ngaahi tāpuaki fakalaumālie makehe.)

Tokoni ke mahino ki he fānaú kuo ʻosi foaki ange ki he kau mēmipa kotoa pē ʻo e Siasí ʻa e meʻa-foaki ʻo e Laumālie Māʻoniʻoní. Tuku ke nau lau ʻa e 1 Kolinitō 12:7–11. Mou aleaʻi ʻa e ngaahi meʻa-foaki ko ʻení, pea fakamamafaʻi kuo ʻosi foaki ange ki he mēmipa kotoa pē ʻo e Siasí ha meʻa-foaki ʻa ia ʻe lava ke tāpuaki ai ʻa e niʻihi kehé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa-foaki naʻe fakaʻaongaʻi ʻe Paula ʻi heʻene fononga ki Lomá? Ko e hā hono ʻuhinga naʻe foaki mai ai ʻe he Tamai Hēvaní kia kitautolu ʻa e ngaahi meʻa-foaki fakalaumālié? (1 Kolinitō 12:7; T&F 46: 9, 12, 26.)
ʻOku anga fēfē haʻatau lava ke ʻiloʻi ʻa e ngaahi meʻa-foaki ʻa e Laumālié kuo foaki mai kia kitautolú? (ʻE lava pē ke tau lotu mo aukai ke tau ʻiloʻi ai ko e hā ʻa e ngaahi meʻa-foaki makehe ko iá. ʻE toe lava ke tau maʻu foki ia mei hotau ngaahi tāpuaki fakapeteliaké. Ko e taimi te tau talangofua ai ki he ngaahi fekaú pea tokoni ki he niʻihi kehé ʻi heʻetau moʻuí kotoa, ʻe lava leva ke tau fakatokangaʻi ʻa ngaahi meʻa-foaki kuo foaki mai kia kitautolú.)

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ʻekitivitií ni ʻi he lolotonga ʻo e lēsoní pe ko hano vakaiʻi, pe fakamatala fakanounou, pē ʻi hono tukupaá.

Hiki ʻa e ngaahi meʻa-foaki taki taha ʻoku lave ki ai ʻi he 1 Kolinitō 12:7–10 ʻi ha ʻū laʻi pepa kehekehe. Faʻo kinautolu ʻi ha puha pea kofukofuʻi ʻo hangē ha meʻaʻofá pea tuku ki he fānaú ke nau taki taha toʻo haʻanau laʻi pepa mo fakahā mai ko e hā ʻa e meʻa-foaki ko iá. Mou aleaʻi nounou ʻa e ngaahi meʻa-foakí taki taha.
Vahevahe ʻa e kalasí ki ha fanga kiʻi kulupu iiki. ʻOange ki he kulupu taki taha ha taha ʻo e ngaahi meʻa ko ʻení pē ko ha ngaahi fakamoʻoni kehe ʻoku feʻungá. Tuku ange ke nau fili pē ko e fē ʻa e meʻa-foaki ʻo e Laumālié naʻe fakaʻaliʻalí mo vahevahe ʻenau ngaahi fakakaukaú mo e kalasí.
- Ngāue 3:1–8 (Naʻe fakamoʻui ʻe Pita mo Sione ha tangata naʻe pipikí). Ko e meʻa-foaki ʻo e fai fakamoʻuí.
- Ngāue 14:8–10 (Ne fakamoʻui ʻe Paula ʻa e tangata pipiki.) Ko e meʻa-foaki ʻo e fai fakamoʻuí.
- Maʻake 5:25–34 (Ko ha fefine ne ala ki he kapa e kofu ʻo Sīsuú). Ko e meʻa-foaki ʻo e fai fakamoʻuí.
- Luke 2:25–26, 34–38 (Ko hono kikiteʻi ʻe Simione mo ʻAna ʻa Sīsuú) Ko e meʻa-foaki ʻo e fai fakamoʻuí. Lolotonga hono fakamatalaʻi ʻa e meʻa-foaki ʻo e kikité, fakamatalaʻi ko e lahi taha ʻo e ngaahi meʻa naʻe hokó ʻoku fekauʻaki ia mo e ʻaloʻí, ngāué, pekiá, mo e toetuʻu ʻa Sīsū Kalaisí ʻa ia naʻe tomuʻa fakahā ʻe kinautolu naʻa nau maʻu ʻa e meʻa-foaki ʻo e kikité.
- Ngāue 9:1–20 (Ko hono fakaului ko ia ʻo Paula ki he ongoongolelei ʻa Sīsū Kalaisí). Ko e meʻa-foaki ʻo hono ʻiloʻi ko Sīsū Kalaisí ko e ʻAlo ia ʻo e ʻOtuá.
- Ngāue 2:4–18 (Ko hono maʻu ʻe he kau ākongá ʻa e Laumālie Māʻoniʻoní ʻi he ʻaho ʻo e Penitekosí). Ko e meʻa-foaki ʻo e ʻēleló mo e kikité.
- ʻOku anga fēfē ʻene hoko ko ha tāpuaki ki heʻetau moʻuí ʻa e ngaahi meʻa-foaki takitaha ko ʻení?
Mahalo te ke fie maʻu ke fakamatalaʻi ʻoku feinga ʻa Sētane ke ne faʻifaʻitaki ʻa e ngaahi meʻa-foaki ʻo e Laumālié. ʻO hangē ko ʻení, ko e kau fiemana ʻi he ʻao ʻo Feló naʻa nau lava ke fakatatau ʻa e niʻihi ʻo e ngaahi mana naʻe fai ʻe Mōsese mo ʻĒloné (ʻEkesōtosi 7:10–13). Fakamatalaʻi kuo pau ke tau moʻui māʻoniʻoni pea mo maʻu ʻa e Laumāliaé koeʻuhí ke ʻoua naʻa kākaaʻi ʻa kitautolu. Fakamanatuʻi ki he fānaú ko e ngaahi meʻa-foaki fakalaumālié ʻoku foaki mai ia tuʻunga ʻi he meʻa-foaki ʻo e Laumālie Māʻoniʻoní ke tāpuekinaʻaki ʻa ʻetau moʻuí (vakai, Ngaahi Tefitoʻi Moʻoni ʻo e Ongoongoleleí, vahe 22).
Tokoni ki he fānaú ke nau ako maʻu loto ʻa e tefito ʻo e tui hono fitú.
Tala ange ha taha ʻo e ngaahi talanoa ko ʻení:

Ko e meʻa-foaki ʻa Sēiní

“ ʻI ha pongipongi ʻe taha naʻe ʻalu ai ʻa Sēini Kolova, Kui Tangata ko Tená, pea mo hono mokopuna fefine mei honau ʻapitanga paioniá ʻa ia ne ofi Council Bluffs, ʻAiouá, ko ʻenau toli fuaʻi fuamelie vaó. Naʻe helaʻia vave ʻa e kui tangatá peá ne foki leva ia ki he salioté ʻo mālōlō, ka naʻe lahi ʻaupito ʻa hono maʻu ʻe he ongo tamaki fefiné ʻa e fuaʻi pelu huhua lanumatá pea naʻá na nofo ʻo toli ke fonu ʻa ʻena kané.

“Fakafokifā pe kuo haʻu ʻa e efú ʻo ne maumaʻu ʻa e fakaʻofoʻofa ʻo e ʻea mokomoko ʻo e pongipongí. Naʻe fuʻu manavahē ʻaupito ʻa e ongo tamaiki fefiné ʻi heʻena mamata atu ki ha kulupu ʻo e kau ʻInitiá ʻoku nau lele atu ki he salioté, ʻo vete ʻa e vala ʻo ʻena kuí. Naʻa nau ʻave hono uafí mo ʻene helé pea nau feinga foki ke tuli mo e fanga hōsí.

“Naʻe maʻu atu ʻe he taha ʻo e kau ʻInitiá ʻa e kiʻi taʻahine siʻisiʻí, ʻa ē naʻe kamata ke tangi ʻi heʻene ilifiá; naʻe feinga atu ʻa e toko taha ke ne ʻave fakamālohiʻi ʻa Sēini. ʻI heʻene fute takai ke ne haó, naʻá ne fai leva ha kiʻi lotu nounou mo fakamāfana ke maʻu ha tokoni.

“Naʻe aʻusia ai ʻe Sēini ha faʻahinga meʻa ko ha mālohi naʻe mahulu ange ia ʻi ha toe meʻa naʻe lava ke ne ʻilo. Fakafokifā pe kuo kamata ke ne lea ʻi ha faʻahinga leʻo naʻá ne hanga ʻo ngaohi ʻa e kau ʻInitiá ke taʻofi hono fakamālohiá pea mo taʻofi ka nau fanongo ange kiate ia. Naʻa nau fuʻu ofo, ʻi heʻenau fanongo ki he kiʻi taʻahine siʻisiʻi ko ʻení ʻoku lea ange ʻi heʻenau leá, ʻo ne kole ke nau manatuʻi muʻa ʻa e Fuʻu Laumālie Lahí, ʻa ia ʻoku ʻikai te ne fie maʻu ke nau fakamamahiʻi honau ngaahi kaungāmeʻa hinehiná. Naʻe fuʻu ongo ʻaupito ʻo ʻikai ke toe lea ʻa ʻena kuí mo e kiʻi taʻahine siʻisiʻí. Naʻe ʻikai te nau lava ke ʻilo ha foʻi lea ʻe taha ʻi he lea ko ʻení, ka neongo iá ʻoku faingofua pe kia Sēini pea mo e mālohi ʻo hangē kuó ne ʻiloʻi ʻa e ngaahi meʻá ni kotoa ʻi heʻene moʻuí. Naʻe kalokalo ʻa e ngaahi ʻulu ʻo e kau ʻInitiá pea mo fakafoki ange ʻa e uasí, helé mo e vala naʻa nau ʻavé. Hili iá naʻa nau lulululu mo kinautolu kotoa pea nau ʻalu fakalongolongo leva” (naʻe toe fai ʻa e talanoá ʻe Lucile C. Reading, “Shining Moments,” Children’s Friend, July 1941, p. 41).
- Ko e hā e meʻa-foaki fakalaumālie naʻe maʻu ʻe Sēini Kolová? (Ko e meʻa-foaki ʻo e ʻēleló.) Ko e hā naʻá ne lava ai ke lea ki he kau ʻInitiá ʻi heʻenau leá? (Naʻá ne lotu ʻo kole ki he Tamai Hēvaní ha tokoni; ko ia naʻá ne maʻu ʻa e meʻa-foakí).
Ko e fai fakamoʻui ʻa Sioné

“Naʻe taʻu hongofulu mā taha ʻa Sīone Lutulofi [ko ha mēmipa ʻo e Siasí] naʻá ne nofo ʻi Lotatemi, Hōlani. Naʻe ʻi ai ha taimi ʻe taha naʻá ne fiefia ai ʻi he ʻalu ki he akó mo lotú, vaʻinga mo hono ngaahi kaungāmeʻá, pea fai mo e ngaahi meʻa kotoa pē ʻe lava ʻe ha kiʻi tamasiʻi ke fiefia aí. Kā, naʻe fakafokifā pe, kuo hoko mai ha māhaki fakamamahi ʻo ʻikai te ne toe lava ke sio. Naʻe ʻikai te ne toe lava ke ʻalu ki he akó pe lautohi. Naʻe ʻikai foki te ne toe lava ʻo sio lelei ke vaʻinga mo hono ngaahi kaungāmeʻá. Ko e ʻaho kotoa pē naʻe fonu ʻi he fakapoʻuli mo e mamafi.

“Naʻe aʻu mai ki he Kāingalotu ʻo Hōlaní ʻe ʻaʻahi ange ʻa Palesiteni Siosefa F. Sāmita [ko e Palesiteni ia hono fitu ʻo e Siasí]. Naʻe nofo ʻa Sione ʻo fakakaukau ʻi ha taimi lahi ki he meʻá ni, pea hili iá naʻá ne pehē ange ki heʻene fineʻeikí, “Oku maʻu ʻe he palōfitá ha mafai ʻoku toe mahulu ange ʻi ha toe taha ʻi he māmaní. Pea ʻo kapau te ke ʻave au ki he fakatahá koeʻuhí ke ne lava ke mamata ki hoku matá, ʻoku ou tui ʻe fakamoʻui au.’

“Ko e taimi ne fakaʻosi ai ʻa e fakatahaʻangá ʻi he Sāpate hoko maí, naʻe ʻalu ʻa Palesiteni Sāmita ki he konga ki mui ʻo e kiʻi fale lotu siʻisiʻi ko ʻení ke feʻiloaki mo e kakaí mo lulululu mo kinautolu taki taha. Naʻe tokoni ʻa Sisitā Lutulofi kia Sione, he naʻe lalava pe ʻa hono matá, ke nau ʻalu atu mo e niʻihi kehé ke nau talanoa pea mo honau takimuʻa ʻofaʻangá.

“Naʻe taki atu leva ʻe Palesiteni Sāmita ʻa e kiʻi tamasiʻi kuí pea mo ha fuʻu tokanga moʻoni ʻo ne toʻo ʻa e ngaahi palasitaá mo ne sio ki he mata ʻo Sioné. Naʻe tāpuakiʻi ʻe he palōfitá ʻa Sione pea naʻá ne palōmesi ange ʻe ʻā ʻa hono matá ʻo ne lava ke sio.

“ ʻI heʻene aʻu atu ki ʻapí, naʻe toʻo ʻe he fineʻeikí ʻa e ngaahi palasitaá ʻo hangē ko e fakahinohino ʻa e toketaá ke fufulu ʻa hono matá. Ko e taimi naʻá ne toʻo aí, naʻe kaila ʻa Sione mo ʻene fiefiá, “Oiaué, Mama, kuo sai hoku matá. ʻOku ou lava lelei pe ʻo sio ʻi he taimí ni—pea toe lōloa atu foki. Pea ʻoku ʻikai te u toe ongoʻi haʻane langa!’” (“President Smith Took Him by the Hand,” Friend, Aug. 1973, p. 36).
- Ko e hā e meʻa-foaki fakalaumālie naʻe maʻu ʻe Sione Lutulofí? (Ko e tui ki he fakamoʻuí.) Ko e hā e meʻa naʻá ne fakafaingofuaʻi ʻa Sione ke fakamoʻui iá? (Naʻá ne maʻu ʻa e meʻa-foaki ʻo e fai fakamoʻuí pea mo maʻu ʻa e tui ʻi he meʻa-foaki ʻo e palōfitá te ne fakamoʻui ia.)

Fakaʻosí

Fakamoʻoní

Fakamoʻoniʻi ʻoku tau maʻu kotoa ʻa e meʻa-foaki ʻo e Laumālié ʻa ia kuo foaki mai ʻe he Tamai Hēvaní kia kitautolú. Fakahā ange ʻa e lotohoungaʻi ʻokú ke maʻu ʻi he ngaahi meʻa-foakí. Kapau ʻoku feʻunga, fakahā ange ha meʻa naʻe hoko kiate koe (pe ko haʻo fakaafeʻi mai ha taha ke ne fakahā mai ha meʻa naʻe hoko kiate ia) ʻo kau ki hono fakaʻaongaʻi ʻo ha meʻa-foaki naʻe foaki atu kiate koe. Tokoniʻi ke nau ongoʻi ʻa e faingamālie ʻoku nau maʻu ke fai leleí ʻaki hono ʻiloʻi mo fakaʻoangaʻi ʻa e ngaahi meʻa-foaki ʻo e Laumālié naʻe foaki ange kia kinautolú.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Ngāue 28:1–11 ʻi ʻapi ke hoko ia ko hano toe fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.