Lēsoni 19

Ko e Sipi naʻe Molé, ko e Foʻi Paʻanga naʻe Molé, pea mo e Foha Maumau Koloá

Taumuʻá

Ke tokoniʻi ʻa e fānaú taki taha ke nau maʻu ha holi ke tokoniʻi ʻa e faʻahinga ʻoku māmālohí ke nau toe foki mai ki he Siasi ʻo Sīsū Kalaisí.

Taumuʻá

1. Ako ʻi he faʻa lotu ʻa e Luke 15, Mātiu 18:12–14, pea mo e Tokāteline mo e Ngaahi Fuakava 18:10–11. Hili iá ke ako e lēsoní mo ke fili pē ʻe anga fēfē haʻo fiemau ke akoʻi ki he fānaú ʻa e ngaahi fakamatala ʻa e folofolá. (Vakai, “Teuteuʻi Hoʻo Lēsoní,” vi, pea mo e “Faiako mei he Folofolá,” viii.)

2. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ki ai ʻa e fānaú mo tokoni lelei taha kia kinautolu ke nau aʻusia ʻa e taumuʻa ʻo e lēsoní.

3. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Fakatātā 7-19, Ko e Tauhi Sipi Leleí, pea mo e 7-20, Ko e Foha Maumau Koloá (62155).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Fakahā ki he fānaú ha taimi naʻe mole ai haʻo meʻa mahuʻinga pe ko ha taha ʻokú ke ʻiloʻi pea naʻe toe maʻu mai ia. Fakamatalaʻi ʻa e mahuʻinga ʻo e meʻa ko iá, mo e ongo naʻá ke maʻú ʻi heʻene molé, ko e hā e meʻa naʻá ne fai ke maʻu mai aí, pea ko e hā e ongo naʻá ke maʻú ʻi he taimi naʻe maʻu mai aí. Kapau ʻe faingamālie, ʻomi ʻa e meʻa ko iá ʻo fakaʻaliʻali ki he fānaú. Kole ki he fānaú ke nau tala mai ha faʻahinga meʻa pe naʻe hoko ʻi heʻenau moʻuí ʻi ha tami naʻe mole ai haʻanau meʻa mahuʻinga pea naʻe toe maʻu pe ia.

Fakamatala ʻa e Folofolá

Fakaʻaongaʻi ʻa e fakatātāá ʻi hono taimi totonu, akoʻi ʻa e talanoa fakatātā ʻo e sipi naʻe molé, ko e foʻi paʻanga naʻe molé, pea mo e foha maumau koloá. (Ko e fokotuʻu ki hono founga akoʻi ʻo e folofolá, vakai, “Faiako mei he Folofolá,” viii.) Fakamatalaʻi ki he fānaú ko e ngaahi talanoa fakatātā ko ʻení, ʻo hangē pe ko e talanoa fakatātā ʻo e tangata tūtuuʻí pea mo e uité mo e teá, ʻokú ne akoʻi mai ha tefitoʻi moʻoni mahuʻinga ʻo e ongongoleleí.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteuʻi hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo kinautolu ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

1. Ko e Sipi naʻe Molé pea mo e Foʻi Paʻanga naʻe Molé

   • Ko e hā hono ʻuhinga naʻe fuʻu tokanga ange ai ʻa e tauhi sipí ki he sipi ʻe tahá mei he toenga ʻo e hivangofulu mā hivá pē ko e fefiné ki he foʻi paʻanga ʻe tahá mei he paʻanga ʻe hongofulú? (Luke 15;4, 8.) Fakamatalaʻi koeʻuhí naʻe fuʻu masiva ʻaupito ʻa e kakaí pea ʻoku fuʻu mahuʻinga ʻaupito ai kia kinautolu ʻa e foʻi paʻangá pe ko e sipí. ʻOku pehē pe, ʻa e mahuʻinga ki he Tamai Hēvaní ʻa ʻene fānaú kotoa pē. Ko e hā haʻo fakakaukau ko e toko taha kotoa pē ʻiate kitautolú ʻoku mahuʻinga ki he Tamai Hēvaní?

   • ʻOkú ke pehē ko e hā hono ʻuhinga naʻe mole ʻa e sipí? ʻOkú ke pehē ko e hā hono ʻuhinga naʻe mole ai ʻa e foʻi paʻangá? ʻE anga fēfē haʻo mole pe ko ha taha ʻokú ke ʻiloʻi? Tokoniʻi ʻa e fānaú ke mahino kia kinautolu ʻoku fakatatau ha taha kuo mole ki he kakai ko ē ʻoku ʻikai te nau talangofua ki he ngaahi fekaú pea mo fai ʻa e ngaahi meʻa he ʻikai te nau taau ai ke foki ki he Tamai Hēvaní.

   • Ko e hā e meʻa naʻe fai ʻe he tauhi sipí ʻi he taimi naʻá ne maʻu ai ʻa e sipí? (Luke 15:5.) Naʻe anga fēfē hono fakahā heʻene tōʻongá ʻa ʻene ʻofa ki he sipí? Ko hai ʻoku fakafofongaʻi ʻe he tauhi sipí? Pea ko hai ʻoku fakafofongaʻi ʻe he sipí?

   • Ko e hā e meʻa naʻe fai ʻe he fefiné ke maʻu ai ʻa e foʻi paʻanga naʻe molé? (Luke 15:8.) Ko e hā e meʻa naʻe fai ʻe Sīsū Kalaisi ke tokoniʻiʻaki ʻa kinautolu kuo molé pea ʻikai te nau fie tauhi ʻa e ngaahi fekaú? (T&F 18:10–11.) ʻE anga fēfē haʻatau tokoniʻi ʻa kinautolu kuo molé?

   • Ko e hā e meʻa naʻe fakatou fai ʻe he kau tauhi sipí pea mo e fefiné ʻi heʻena maʻu ʻa e sipí pea mo e foʻi paʻangá? (Luke 15:6, 9.) Ko e hā ha ongo te ke maʻu kapau naʻá ke tokoniʻi ha taha ke fakatomala pea foki mai kia Sīsū Kalaisi?

   • Ko e hā ʻokú ke fakakaukau ai ʻoku fiefia ʻa e langí pea mo e kau ʻāngeló ʻi he taimi ʻoku fakatomala ai ha taha? (Luke 15:7, 10.)

2. Ko e Foha Maumau Koloá

   • Ko e hā hono ʻuhinga ʻo e foʻi lea maumau koloá? (Ko e talangataʻa pea mo e ngāue fakavalevaleʻaki ʻo ha koloa.)

   • Ko e hā e meʻa naʻe fai ʻe he foha maumau koloá ki heʻene koloá? (Luke 15:12–13.) Ko e hā haʻo fakakaukau ki he ʻuhinga ʻo e “moʻui fakamoveuveú? Ko e hā ʻokú ke fakakaukau ai kuo fili ha niʻihi ʻo e kakaí ke moʻui ʻi he foungá ni? Ko e hā haʻo fakakaukau ki he ongo naʻe maʻu ʻe he tamaí lolotonga ʻa e mavahe ʻa hono fohá? Ko e hā ha ongo te ke maʻu kapau ʻe hangē ha taha ʻi ho fāmilí ko e foha maumau koloá? (Fakaʻehiʻehi mei he fānau ʻi hoʻo kalasí ʻoku ʻi ai ha kau mēmipa ʻi honau fāmilí ʻoku ʻikai te nau tauhi ʻa e ngaahi fekaú.)

   • Ko e hā e meʻa ʻa e foha maumau koloá naʻe fai ke maʻu mei ai haʻane meʻa tokoní ʻi he ʻosi ʻene paʻangá? (Luke 15:14–16.)

   • Ko e hā hono ʻuhinga ʻo e “pea kuo poto ia”? (Luke 15:17.) ʻOku mou pehē ko e hā hono ʻuhinga naʻe hoko ai ʻa e faingataʻaʻia pea mo e mamahi ʻa e foha ko ʻení ke ne tokoniʻi ia ke fakatomalá?

   • Ko e hā haʻo fakakaukau ki hono fiemaʻu ʻe he fohá ke foki ki heʻene tamaí? (Luke 15:17–19.) What kind of master was his father? (Luke 15:17.)

   • Ko e hā e ongo naʻe maʻu ʻe heʻene tamaí ʻi he taimi naʻe foki ange ai ki honau ʻapí? (Luke 15:20.) Ko e hā e meʻa naʻá ne fai maʻá hono fohá? (Luke 15:22–24.)

   • Ko e hā e ongo naʻe maʻu ʻe he foha lahí ʻi heʻene ʻiloʻi kuo foki mai ʻa hono tehiná? (Luke 15:28–30.) Ko e hā hono ʻuhinga ʻoku mahuʻinga ai ke tau kei hokohoko atu pe ʻa hono ʻofaʻi ʻa e kau mēmipa ʻo e fāmilí ʻa ē ʻoku nau talangataʻa ki he ngaahi fekaú?

   • Ko e hā e palōmesi ʻa e tamaí ki he foha lahí? (Luke 15:31.) Ko e hā e faʻifaʻitakiʻanga naʻe tā ʻe he tamaí ki he founga ʻo hono talitali ʻo kinautolu naʻe faiangahala ka kuo nau fakatomalá? (Luke 15:32.) Ko e hā ha ongo te ke maʻu ʻi hoʻo mamata ki ha taha kuo fakatomala pea tafoki mei he halá ki he totonú? Ko e hā e founga ʻoku totonu ke tau fai kia kinautolu ko ē ʻoku ʻikai te nau tauhi ʻa e ngaahi fekaú ka ʻoku nau ongoʻi anga-vaivai moʻoní.

ʻEkitivitī Fakatupulakí

Te ke lava ʻo fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pē lolotonga ʻa e lēsoní pe ko hano fakamanatu, fakamatala fakanounou, pē ʻi hono tukupaá.

1. Tuku ki he fānaú ke nau fakakaukauʻi ha ngaahi founga te nau lava ke tokoni ki ha taha ʻoku ʻikai ke fuʻu mālohi ʻi he Siasí. ʻE lava pē ke kau ʻi he ngaahi talí ʻa e anga fakakaumeʻá, hoko ko ha faʻifaʻitakiʻanga lelei, fakaafeʻi kinautolu ki he ngaahi ʻekitivitī ʻa e Siasí, ngāue fakataha, (pea mo e alā meʻa pehē.)

2. Fai ʻa e foʻi talanoa ko ʻení:

   Naʻe taʻu hongofulu ʻa Siosiua Tenisi ʻi heʻene ʻalu mo ʻene tangataʻeikí pea mo ha niʻihi kehe ke fakatotoloʻi ha keliʻanga maina naʻe liʻekina moʻoni. Naʻá ne fuʻu matuʻaki tokanga ʻaupito ʻi he keliʻanga mainá ka naʻe faifai ʻo ne mavahe mei he niʻihi kehe ʻo e fānau tangatá peá ne hē ʻi he fuʻu fakapoʻulí ʻo ʻikai haʻane meʻakai pe ha meʻa ke inu. Ko e taimi ko ia naʻe fakatokangaʻi hake ʻe he toengá ʻoku molé, naʻa nau kamata leva hono kumí. Hili pe mei ai ha ngaahi taimi siʻi naʻe laui teau ʻa e kakaí naʻe haʻu ki hono kumi ʻo Siōsiuá. Naʻe ʻaukai pea mo lotu ʻa e toko laui afe ke ne hao moʻui. Naʻe feʻunga mo e ʻaho ʻe nima hono kumí, ka naʻe ʻikai pē te nau maʻu ia. Naʻe fanongo ai ha tangata mataotao ʻokú ne ʻilo ki he mainá pea naʻá ne pole ke tokoni. Naʻá ne ʻiloʻi lelei ʻa e mainá ko ia ai naʻá ne maʻu ʻa Sōsiua ʻi ha feituʻu naʻe ʻikai pē ke ʻilo ki ai ʻa e niʻihi kehé. Naʻe ʻikai ke ʻi ai ha meʻa te ne mafakamatalaʻi ʻa e fiefia naʻá ne maʻú, ʻi he taimi naʻá ne maʻu ai ʻa Sōsiuá. Naʻe tangi ʻi he fiefia ʻa e toko laui afe mo kinautolu kotoa pē naʻe ʻi he keliʻanga mainá pea mo fiefia ʻi heʻenau ʻiloʻi ʻoku hao moʻui pē ʻa Sōsiuá (vakai, “Making Friends: Joshua Dennis—A Treasure of Faith,” Friend, Nov. 1990. pp. 20–2).

   Aleaʻi ʻa e faikehekehe ʻi vahaʻa ʻo e mole fakaemāmaní pea mo e mole fakalaumālié. Fakamatalaʻi kuo pau ke tau matuʻaki ngāue mālohi ʻo tatau tofu pē mo hono fakahaofi ʻa kinautolu ʻoku mole fakalaumālié pea pehē ki he mole fakaemāmaní.

3. Mou fakahoko ʻa e foʻi vaʻinga ko e Kumi pea mo ʻIló. Kole ki ha taha ʻo e fānaú ke ne fakakaukau angé ki ha feituʻu ʻe lava ke mole ai peá ne hiki mai ia ʻi ha laʻi pepa pe ko haʻane fanafana ange pe ki he faiakó. Tuku ki he toenga ʻo e fānaú ke nau tali “io” pe “ ʻikai” ʻo fili pē ko e fē ʻa e feituʻu ʻoku ʻi ai ʻa e taha ʻo e fānaú (ʻOku ʻi ha feituʻu tokolahi? ʻOku ʻi he moʻungá? ʻOku pulia ʻi lalo?).Tokoniʻi ke mahino kia kinautolu ʻoku fie maʻu ha taimi lahi pea mo ha ivi mālohi ke tau feinga ai ke kumi ha taha kuo mole, ʻo tautautefito ki ha taha ʻoku mole fakalaumālie.

4. Tokoniʻi ʻa e fānaú ke nau ako maʻu loto ʻa e Tokāteline mo e Ngaahi Fuakava 18:10.

Fakaʻosí

Fakamoʻoní

Fakahā ange ki he fānaú ʻa hoʻo tuí ʻoku ʻofa ʻa e Tamai Hēvaní ki heʻene fānaú fakatāutaha pea ʻoku tau fuʻu mahuʻinga kotoa kiate ia. Fakamamafaʻi ʻoku finangalo ʻa e Tamai Hēvaní pea mo Sīsū Kalalisi ke tau tokoni kia kinautolu ʻoku molé ke nau foki mai kia kinautolu.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Luke 15:11–32 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.