Ko Paulá ko e Faifekau

Taumuʻá

Ke poupouʻi ʻa e kiʻi tamasiʻi pe taʻahine kotoa pē ʻi he taimí ni ke ne hoko ko ha faifekau pea mo vahevahe ʻa e ongoongoleleí mo e niʻihi kehé.

Teuteú

Ako ʻi he faʻa lotu ʻa e Ngāue 22:17–30; 23:10–24, 31–33; pea mo e 26:1–2, 22–29. Hili iá peá ke ako hoʻo lēsoní pea ke fili pe ʻe anga fēfē haʻo fiemaʻu ke akoʻi ki he fānaú ʻa e fakamatala ʻa e folofolá. (Vakai, “Teuteu Hoʻo Lēsoní,” vi, pea mo e “Faiako mei he Folofolá,” viii.)
Laukonga ʻoku tānaki atu: Ngāue 19–26 (ko e kakato ʻo e fakamatalá.)
Fili ʻa e ngaahi fehuʻi ke aleaʻí mo e ngaahi ʻekitivitī fakatupulaki ko ia ʻe fakakau mai ai ʻa e fānaú mo tokoni lelei taha ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Ko e siate naʻe fakamatalaʻi ʻi he ʻekitivitī ke takiakiʻi ʻaki e tokangá (pe ko haʻo tā ia ʻi he palakipoé)

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Fehuʻi ange ko e hā e meʻa ʻoku nau manatuʻi ʻo kau Paula mei he ngaahi lēsoni naʻe toko ʻosí. (Fakamanatu kia kinautolu naʻe liliu hono hingoá meia Saula.) Fakamanatu ki he fānaú naʻe ui ʻa Paula ʻe he ʻEikí ke ne hoko ko ha faifekau pea mo ha fakamoʻoni makehe kia Sīsū Kalaisi (vakai, Ngāue 13:2; 20:24). Naʻá ne fakamoleki ʻa e toenga ʻo ʻene moʻuí ʻi he ngāue fakafaifekaú.

Kapau ʻokú ke maʻu ha tatau ʻo e Fakahinohino ʻo e Folofolá, tuku ki he fānaú ke nau huke ki he mape 6 mo e 7 pea fakaʻaongaʻi honau tuhú ke fakatotoloʻaki ʻa e ngaahi feituʻu naʻe fononga holo ai ʻa Paula ʻi heʻene ngāue fakafaifekaú. (Tokoniʻi ke nau puʻaki ʻa e hingoa ʻo e ngaahi feituʻú.) Fakamatalaʻi ko ha niʻihi tokosiʻi pē ʻo e Kakai Siu ʻi Selusālemá pea pehē ki honau kaungāfonuá naʻa nau ʻosi fanongo ʻo kau kia Sīsū Kalaisi ʻi he taimi ko ia naʻe ului ai ʻa Paulá. Ko e foʻi fononga ʻe fā ʻa Paula ʻi heʻene ngāue fakafaifekaú naʻá ne aʻu ia ki he kakai Siú pea pehē ki he kau Senitailé. Naʻe ʻikai foki ke ʻilo ʻa e kakai Senitaile ko ʻení ki he Tamai Hēvaní pea mo Sīsū Kalaisi. Naʻa nau hū kinautolu ia ki he ngaahi ʻotua loi mo e ngaahi ʻaitoli. Naʻe malangaʻi ʻe Paula ʻa e ongoongoleleí ʻi he feituʻu kotoa pē naʻá ne ʻalu aí.

Tā ha fakatātā pe siate ʻoku meimei tau mo e ngaahi meʻa ko ʻení ʻi he palakipoé:

ʻĪmisi

stairs

ʻEkitivitī ke Takiakiʻi ʻAki e Tokangá

Naʻe founga fēfē ʻa e teuteu ʻa Paula ke ne hoko ko e faifekaú?

Hiki ʻa e ngaahi tali ʻa e fānaú ʻi he sitepu ʻoku kamata meia Paula ki he Faifekaú. Manatuʻi ke fakakau atu ki ai ʻa e ngaahi fakakaukau ʻo hangē ko e fakatomalá, tui kia Sīsū Kalaisí, naʻe papitaiso, maʻu mo e meʻa-foaki ʻo e Laumālie Māʻoniʻoní, ako ʻa e ongoongoleleí, pea moʻuiʻaki ʻa e ongoongoleleí.

Fakamatala ʻa e Folofolá

Akoʻi ki he fānaú ʻa e fakamatala ki he meʻa naʻe hoko kia Paula hili ʻa ʻene ngāue fakafaifekau hono tolú. (Ko e fokotuʻu ki he founga akoʻi ʻo e folofolá, vakai, “Faiako mei he Folofolá,” viii.) Fakamatalaʻi ange ko e ʻaʻahi fakaʻosi ʻeni ʻa Paula ki Selusālemá, pea lolotonga ʻa ʻene ʻi aí naʻe feinga ʻa e kakai Siu naʻe ʻikai te nau tui kia Sīsuú ke tāmateʻi ia. Pea koeʻuhí ko e tangataʻi fonua Loma ia, naʻá ne foki ai ki he kau taki ʻo e Kakai Loma ʻi Selusālema pea mo Sesaliá ke nau maluʻi ia. Naʻa nau maluʻi ia ʻaki haʻane hoko ko ha pōpula Loma pea nau ʻave atu ia ki Loma ke fai hono fakamāuʻí. (ʻE akoʻi ʻi he lēsoni 45 ʻa e fakamatala ʻo e fononga ʻa Paula ki Lomá.) Fakamatalaʻi ko e faingamālie kotoa pē naʻe maʻu ʻe Paula lolotonga ʻa hono fakamāuʻí naʻá ne fakamoʻoniʻi ai ʻa Sīsū Kalaisi.