Lēsoni 36

Ko e ʻAho ʻo e Penitekosí

Taumuʻá

Ke tokoniʻi ʻa e fānaú taki taha ke nau ako ke mahino kia kinautolu ʻa e founga ke nau fakatokangaʻi ai ʻa e ngaahi ueʻi ʻa e Laumālie Māʻoniʻoní.

Teuteú

1. Ako ʻi he faʻa lotu ʻa e Ngāue 2:1–24, 32–33, 36–47 mo e Sione 14:25–27. Hili ko iá ako ʻa e lēsoní mo ke fili pe ʻe anga fēfē haʻo fiemaʻu ke akoʻi kia kinautolu ʻa e ngaahi fakamatala ʻa e folofolá. (Vakai, “Teuteu Hoʻo Lēsoní,” vi, mo e “Faiako mei he Folofolá,” viii.)

2. Laukonga ʻoku tānaki atu: Ngaahi Tefitoʻi Moʻoni ʻo e Ongoongoleleí,vahe 7 mo e 21.

3. Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ʻa ia ʻe fakakau mai ai ʻa e fānaú pea mo tokoni lelei taha ke nau aʻusia ʻa e taumuʻa ʻo e lēsoní.

4. Nāunau ʻoku fie maʻú:

   1. Tohi Tapu pe Fuakava Foʻou ke taki taha ʻa e fānaú.

   2. Sioka mo ha palakipoe.

   3. Fakatātā 7–39, ʻAho ʻo e Penitekosí.

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiakiʻi ʻAki e Tokangá

Akoʻi ki he fānaú ko e taimi naʻe nofo ai ʻa Sīsū mo ʻene kau ʻAposetoló naʻá ne akoʻi ha ngaahi meʻa lahi kia kinautolu. Naʻá ne ʻafioʻi he ʻikai te ne nofo maʻu ai pe mo kinautolu, ko ia ai naʻá ne palōmesi ange te ne ʻomi ha meʻaʻofa makehe ke tokoni kia kinautolu.

Lau ʻa e ngaahi fakaʻilonga ko ʻení. Tuku ke nau tuʻu ʻi he taimi ʻoku nau ʻiloʻi ai ko e hā ʻa e meʻaʻofá mo fanafana atu ʻi ho telingá. Pea tuku ke nau kei tuʻu pē, ʻo kapau te nau tala totonu atu ko e Laumālie Māʻoniʻoní.

ʻEkitivitī ke Takiakiʻi ʻAki e Tokangá

• ʻOku ou akoʻi ʻa e moʻoní.

• ʻOku ou ʻoatu ʻa e fakahinohinó.

• ʻOku ou foaki ʻa e fakafiemālié.

• ʻOku ou fakamoʻoni kia Sīsū Kalaisi.

• ʻOku ou talanoa maʻu ai pe ki ho ʻatamaí pe ko e lotó.

• Ko e taha au ʻo e Toluʻi ʻOtuá.

• Ko e laumālie pe au ka ʻoku ʻikai te u maʻu ha sino fakamatelie.

Hiki ʻi he palakipoé ʻa e Laumālie Māʻoniʻoní. Mou lau mo kinautolu ʻa e Sione 14:25–27. Pea mou toe fakamanatu ʻa e lisi ʻo e ngaahi fakaʻilongá ke tokoni ke mahino kia kinautolu ʻa e meʻa ʻoku fai ʻe he Laumālie Māʻoniʻoní maʻatautolú.

Hiki ʻi he palakipoé ʻa e foʻi lea Penitekosí. Fakamatalaʻi ʻoku haʻu ʻa e foʻi lea Penitekosí mei he foʻi lea faka-Kalisi ko e nimangofulu. Ko ha kātoanga ia ʻa e kau Siú ʻoku fai fakataʻu hili ʻa e ʻaho ʻe nimangofulu mei he Kātoanga ʻo e Lakaatú. Naʻe ʻoange ʻe Sīsū ʻa e sākalamēnití ki heʻene kau ʻAposetoló ʻi he ʻOhomohe Fakaʻosí, ʻa ia ʻoku hoko ia ʻi he kātoanga ʻo e Lakaatú. Naʻe maʻu ʻe he kau ʻAposetoló ʻa e meʻa-foaki ʻo e Laumālie Māʻoniʻoní, hili ha ʻaho ʻe nimangofulu mei he ʻOhomohe Fakaʻosí. Hiki ʻi he palakipoé ʻa e Meʻa-Foaki ʻo e Laumālie Māʻoniʻoní.

Fakamatala ʻa e Folofolá

Akoʻi kia kinautolu ʻa e fakamatala ki he ʻaho ʻo e Penitekosí (Ngāue 2:1–24, 32–33, 36–47). (Ko e fokotuʻu ki he founga akoʻi ʻo e folofolá, vakai, “Faiako mei he Folofolá,” viii.) Fakahā ʻa e fakatātā e ʻAho ʻo e Penitekosí ʻi hono taimi totonu.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteu hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino ʻa e folofolá mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻamou lau mo aleaʻi ʻa e folofolá koeʻuhi ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

• Naʻe anga fēfē ʻa e haʻu ʻa e Laumālie Māʻoniʻoní ki he kau ʻAposetolo ʻa Sīsuú’ ʻi he ʻaho ʻo e Penitekosí? (Ngāue 2:1–4.)

• Ko hai naʻá ne ʻoange ki he kau ʻaposetoló ʻa e poto ke nau lava ʻo lea ʻi he ngaahi ʻēlelo mangamangá pea ʻilo ʻe he kakaí ʻoku nau lea ʻi he ngaahi lea kehekehé? (Ngāue 2:4.) ʻOku anga fēfē ʻa e tokoni ʻa e meʻa-foaki ʻo e Laumālie Māʻoniʻoní ki he ngāue ʻa e kau faifekau ʻa e Siasí ʻi he ʻahó ni? (Ko hono tokoniʻi ʻa e kau faifekaú ke ako ʻa e ngaahi lea ʻoku ʻikai ko ʻenau lea totonú. ʻOku toe tokoni foki ʻa e meʻa-foaki ʻo e ʻēleló ke mahino ʻa e pōpoaki ʻo e ongoongoleleí neongo pē ʻoku ʻikai ke fuʻu poto lelei ʻa e faifekaú ʻi he lea ko iá.)

• Ko e hā e meʻa naʻá ne fakatupunga ʻa e mahuhuhuhu ʻi he loto ʻo e kakaí hili hono fakamoʻoniʻi ʻe Pita ʻa e tutuki mo e toetuʻu ʻo Sīsuú? (Ngāue 2:33, 36–37. Ko e Laumālie Māʻoniʻoní.) Ko e hā hono ʻuhinga e mahuhuhuhu ʻo e lotó? (Ko ʻete ongoʻi fakatomala moʻoni mo e mamahí ʻi hoto lotó.) ʻOku anga fēfē ʻa e tokoni mai ʻa e Laumālie Māʻoniʻoní ke tau ongoʻi mamahi ʻi he ngaahi fehālaaki ʻoku tau faí.

• ʻOku anga fēfē ʻa e tokoni mai ʻa e Laumālié ke tau ʻiloʻi ʻa e meʻa ke faí? Tokoniʻi ke mahino kia kinautolu ʻoku ongoʻi ʻe he kakaí ʻa e tokoni ʻa e Laumālie Māʻoniʻoní ʻi ha ngaahi founga kehekehe, ʻo hangē ko e ongoʻi nongá pe ko ha faʻahainga fakaʻilonga ʻo ha meʻa ʻoku totonu, maʻu ha mahino ʻoku toe lahi angé ki he folofolá mo e ngaahi meʻa kehé, maʻu ʻo ha tali ki ha palōpalema ʻi he folofolá, fanongo ki ha malanga pe ha lēsoni ʻi he lotú ʻe tokoni kiate koe, pea mo e alā meʻa pehē. Kapau te ke ongoʻi ʻoku totonu, mahalo te ke fie fakahā mai ha meʻa naʻe hoko kiate koe ʻi he taimi naʻá ne ongoʻi ai ʻa e Laumālie Māʻoniʻoní ʻi hoʻo moʻuí.

• Ko e hā e meʻa naʻe tala ʻe Pita ki he kakaí ʻoku fie maʻu ke nau fai kae lava ke nau maʻu ʻa e meʻa-foaki ʻo e Laumālie Māʻoniʻoní. (Ngāue 2:38.) Ko e hā e meʻa ʻoku fie maʻu ke tau fai ke tau maʻu ai ʻa e meʻa-foaki ʻo e Laumālie Māʻoniʻoní?

• Ko e toko fiha ʻiate kimoutolu kuó ne ʻosi maʻu ʻa e meʻa-foaki ʻo e Laumālie Māʻoniʻoní? Tokoniʻi ke mahino kia kinautolu ʻoku lava pē ke tau maʻu ʻa e ueʻi ʻo e Laumālie Māʻoniʻoní ki muʻa ʻi he papitaisó; ka neongo iá, ʻoku tau maʻu ʻa e meʻa-foaki ʻo e Laumālie Māʻoniʻoní hili ʻa e papitaisó ʻi he taimi ʻoku fakamaʻu ai ʻa kitautolu ko e kau mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻI he Ngaahi ʻAho Ki Muí Ni. Pea kapau te tau angatonu, ʻe hoko ʻa e meʻa-foaki ʻo e Laumālie Māʻoniʻoní ke ne fakangofuaʻi ʻa kitautolu ke tau maʻu ʻa e Laumālie Māʻoniʻoní ke hoko ko hotau takaua (vakai, T&F 121:45–46).

• Pea hili ko ia hono papitaiso ʻa e laumālie ʻe 3,000, ko e hā ha niʻihi ʻo e ngaahi meʻa naʻa nau fai koeʻuhí ke kei hokohoko atu pe hono tataki kinautolu ʻe he Laumālie Māʻoniʻoní? (Ngāue 2:42–47.) (ʻE lava pē ke ke tuku ke nau kumi ʻa e ngaahi talí ʻi he folofolá pea hiki kinautolu ʻi he palakipoé.)

• Ko e hā e meʻa ʻoku fie maʻu ke tau fai ke tau maʻu ai ʻa e Laumālie Māʻoniʻoní? (Fakatomala, papitaiso, maʻu ʻa e meʻa-foaki ʻo e Laumālie Māʻoniʻoní, moʻui māʻoniʻoni, lotu ki he tataki ʻa e Laumālie Māʻoniʻoní, ke ke tuʻu maʻu mo fakafanongo, pea muimui ki he ngaahi ueʻi ʻoku mou maʻú.)

Fakahā ange kia kinautolu ʻa e kupuʻi lea ko ʻení:

“Pea lotu maʻu ai pe ki he Tamai Hēvaní ke tāpuakiʻiʻaki koe ʻa Hono Laumālié.… Ko e Laumālie Māʻoniʻoní ko ha … meʻa-foaki mei he Tamai Hēvaní.… ʻOkú ne fanafana maʻu atu pe kiate koe ʻi ha kiʻi leʻo siʻisiʻi ke ke fai ʻa e meʻa totonú. Pea ko e taimi ʻokú ke fai lelei aí, ʻokú ke ongoʻi lelei, pea ko e Laumālie Māʻoniʻoní ia ʻokú ne lea atu kiate koé. Ko ha takaua fakaofo moʻoni ʻa e Laumālie Māʻoniʻoní. ʻOkú ne ʻi ai maʻu ai pē ke tokoni kiate koe. (ʻEselā Tafu Penisoni, ʻi he Conferene Report, Apr. 1989, p. 103; pe Ensign, May 1989, p. 82).

Fakaafeʻi ha taha ʻiate kinautolu ke ne fakahā mai ha meʻa naʻe hoko kiate ia tuʻunga ʻi he ueʻi ʻa e Laumālie Māʻoniʻoní pe ko ha mēmipa ʻi honau fāmilí. Poupouʻi ʻa kinautolu ke nau fakafanongo ki he ngaahi ueʻi ʻa e Laumālie Māʻoniʻoní pea feinga ke muimui ki he ngaahi ueʻi ko iá. (Vakai, ʻekitivitī fakatupulaki 6.)

ʻEkitivitī Fakatupulaki

Te ke lava ke fakaʻaongaʻi ha taha pe lahi ange ʻo e ʻekitivií ni ʻi he lolotonga ʻo e lēsoní pe ko hano vakaiʻi, pe fakamatala fakanounou, pē ʻi hono tukupaá.

1. Fakahā ange ʻa e talanoa ko ʻení ʻo kau kia Palesiteni Hāloti B. Lī, ko e Palesitei ia hono hongofulu mā taha ʻo e Siasí:

   “Mahalo pē naʻá ku meimei taʻu valu, pe toe siʻisiʻi ange ai, ʻi he taimi naʻe ʻave ai au ʻe heʻeku tangataʻeikí ki ha faama ne kiʻi mamaʻo ʻa e ʻalu ki aí. Pea lolotonga ʻene ngāué naʻá ku feinga ke fakafemoʻuekinaʻi au ʻaki ha ngaahi meʻa ʻe lava ke fai ʻe ha kiʻi tamasiʻi ʻi hoku toʻú. Naʻá ku vaʻinga ʻou aʻu ki he helaʻiá ʻi he ʻafu mo efua ko ʻení. Ka ʻi he tafaʻaki ʻe taha ʻo e ʻaá naʻe ʻi ai ha fale tukuʻanga meʻa ngāue motuʻa naʻe holo, naʻá ne ʻave ʻa ʻeku tokangá. Naʻá ku fakakaukau ki he fale tukuʻanga meʻa ngāue maumau ko ʻení ʻo hangē ko ha fuʻu kāsoló ʻa ia naʻá ku fie maʻu ke u ʻalu ʻo mamata ai, ko ia ai naʻá ku lue atu leva ki he aá ʻou kamata ke u kaka ke u ʻalu ai ki he fale tukuʻanga meʻa ngāué. Naʻe haʻu kiate au ha leʻo ʻo ne fanafana mai ʻa e meʻa mahuʻinga ko ʻení. ʻE ‘Hāloti, ʻoua te ke ʻalu ki aí.’ Naʻá ku vakavakai holo pē ko hai ʻokú ne ui hoku hingoá. He naʻe ʻi he tafaʻaki ʻe taha ʻo e ngoué ʻa ʻeku tangataʻeikí. Naʻe ʻikai foki te ne ʻiloʻi mai ʻa e meʻa naʻá ku faí. Naʻe ʻikai te u sio ki ha taha. Naʻá ku ʻiloʻi ʻoku ʻi ai ha taha ʻoku ʻikai te u lava ke mamata ki ai ʻokú ne fakatokanga mai ke ʻoua te u ʻalu ki he feituʻu ko iá. Naʻá ku ako ʻi heʻeku kei siʻí ko kinautolu ko ia ʻi he tafaʻaki ʻe tahá ʻoku ʻikai te tau lava ke mamata ki aí ʻoku nau lava pē ke talanoa mai kia kitautolu” (ʻi he Conference Report, Mexico Area Conference 1972, pp. 48–49).

2. Hiki ʻa e ngaahi fakamoʻoni ko ʻení ʻi ha ʻū laʻi pepa kehekehe. (Ko ha toe fakamoʻoni ʻoku tānaki atu kau ki he Laumālie Māʻoniʻoní, vakai, Fakahinohino ki he Folofolá.) Te ke lava ke ʻo tuku ke nau toho ʻa e ʻū laʻi pepá mei ha faʻoʻanga meʻa. Tuku ange ki he kiʻi tamasiʻí pe taʻahiné ke sio ki he foʻi fakamoʻoni ʻa ē ʻoku hā ʻi he laʻi pepá mo fakahā mai ko e hā e lau ʻa e vēsí ʻo kau ki he Laumālie Māʻoniʻoní.

   Sione 14:26 (ʻOku ui ʻa e Laumālie Māʻoniʻoní ko e Fakafiemālié; te ne akoʻi mo tokoniʻi ʻa kitautolu ke tau manatuʻi ʻa e meʻa kotoa pē.)

   Sione 15:26 (Ko e Laumālie Māʻoniʻoní ko e Laumālie ia ʻo e moʻoní; pea ʻe hoko ko e fakamoʻoni ʻo Kalaisi.)

   Sione 16:13 (ʻE tataki kitautolu ʻe he Laumālie Māʻoniʻoní ki he moʻoni kotoa pē mo fakahā mai ʻa e ngaahi meʻa ʻi he kahaʻú.)

   Ngāue 4:31 (ʻOku tokoniʻi kitautolu ʻe he Laumālie Māʻoniʻoní ke tau lea mālohi ʻaki e folofola ʻa e ʻOtuá.)

   Ngāue 5:32 (ʻOku foaki ʻe he ʻOtuá ʻa e Laumālie Māʻoniʻoní kia kinautolu ʻoku talangofua kiate iá.)

   Kāletia 5:22 (ʻOku haʻu mei he Laumālié ʻa e ʻOfá, fiefiá, melinó, faʻa kātakí, anga-vaivaí, anga-leleí, mo e tuí.)

3. ʻAi ha foʻi tatau ʻo e kupuʻi lea ko ʻení ke taki taha ʻa e fānaú.

   “ ʻI he hili pe hano papitaiso ʻo ha taha ʻoku foaki ange kiate ia ʻa e meʻa-foaki ʻo e Laumālie Māʻoniʻoní pea fakamaʻu leva ia ke ne hoko ko e mēmipa ʻo e Siasi ʻo Sīsū Kalaisi ʻo e Kau Māʻonʻoni ʻi he Ngaahi ʻAho Ki Muí Ni. ʻOku totonu ke maʻu ʻe he tangata, mo e fefine pea pehē ki he fānau iiki kotoa pē ha fakahā mo ha fakahinohino fakafoʻituitui ke ne tataki kinautolu ʻi he toenga ʻo ʻenau moʻuí!” (Direction to guide them in their lives—personal revelation!” (Poiti K. Peeka, “Personal Revelation—Available to All,” Friend, June 1990, inside front cover).

4. ʻAi ke nau taki taha ha tatau ʻo e kupuʻi lea ko ʻení:

   ʻE lava ke tokoni ʻa e meʻa-foaki ʻo e Laumālie Māʻoniʻoní ke akoʻi au, tataki, fakafiemālieʻi, maluʻi, fakatokanga mai ʻi he faingataʻá, pea mo fakamoʻoni ʻa e moʻoní, kapau te u moʻui māʻoniʻoni.

5. Fehuʻi ange ke nau fakahā mai ʻa e ngaahi hingoa ʻo e Laumālie Māʻoniʻoní ʻi he lahi taha te nau lava ʻo fakakaukauki aí. Pea mou lave ki he ngaahi hingoa ko ʻení kapau ne teʻeki ke nau fakahā atu: Ongoʻi ʻo e Laumālie Māʻoniʻoní, ko e Laumālie ʻo e ʻOtuá, ko e Laumālaie ʻo e ʻEikí, Fakafiemālié, mo e Laumālié. (Vakai, “Laumālie Māʻoniʻoní” ko e Fakahinohino ki he Folofolá.)

6. Hivaʻi pe lau ʻa e ngaahi lea ki he “Ko e Laumālie Māʻoniʻoní” (Tohi Hiva ʻa e Fānaú, p. 105) or “The Still, Small Voice” (Tohi Hiva ʻa e Fānaú, p. 106).

   Mahalo te ke fie maʻu ke hiki ʻi he palakipoé ʻa e ngaahi fakakaukau ʻo e “The Still, Small Voice”. Fakamamafaʻi ko e taimi ko ē kuo papitaiso ai ke tau hoko ko e kau mēmipa ʻi he Siasi ʻo Sīsū Kalaisi ʻo e Kau Māʻoniʻoni ʻo e Ngaahi ʻAho Ki Muí Ni, ʻoku tau maʻu kotoa ʻa e tokoni ko ʻení ʻi heʻetau moʻuí. Tokoni ke mahino kia kinautolu ʻi he taimi ʻoku nau moʻui māʻoniʻoni aí mo fakafanongo ki he ngaahi ueʻi ʻa e Laumālie Māʻoniʻoní, te nau lava pē ke maʻu ʻa e fakahinohinó, fakatokangá, mo e fakafiemālié.

Fakaʻosí

Fakamoʻoní

Fai hoʻo fakamoʻoní ʻoku ʻofa ʻa Sīsū ʻiate kitautolu taki taha, pea kuó ne fakafaingamālieʻi kitautolu ke tau maʻu ʻa e meʻa-foaki ʻo e Laumālie Māʻoniʻoní ke ne hoko ko hotau takaua, faiako, fakafiemālie, pea mo ha tokoni foki.

Laukonga ʻoku Fokotuʻu Atu ke Fai mei ʻApi

Fokotuʻu ke nau ako ʻa e Ngāue 2:1–8, 36–41 ʻi ʻapi ke hoko ia ko ha fakamanatu ʻo e lēsoni ko ʻení.

Fakaafeʻi ha taha ke ne fai ʻa e lotu tukú.