Ko e Fakamaʻa ʻe Sīsū ʻa e Temipalé

Taumuʻá

Ke tokoniʻi ʻa e kiʻi tamasiʻi pe taʻahine kotoa pē ke ne maʻu ha ʻofa mo ha fakaʻapaʻapa ʻoku toe lahi angé ki he Tamai Hēvaní mo Sīsū Kalaisi pea mo e ngaahi feituʻu toputapú.

Teuteú

Ako ʻi he faʻa lotu ʻa e Sione 2:13–16, Mātiu 21:12–14, Luke 19:45–48, pea mo e ʻEkesōtosi 20:7. Hili iá peá ke ako ʻa e lēsoní mo ke fili pe ʻe anga fēfē hoʻo fiemaʻu ke akoʻi kia kinautolu ʻa e ngaahi fakamatala ʻa e folofolá (vakai, “Teuteu Hoʻo Lēsoní,” vi, pea mo e “Faiako mei he Folofolá,” viii).
Laukonga ʻoku Tānaki Atu: Maʻake 11:15–17.
Fili ʻa e ngaahi fehuʻi ke aleaʻí pea mo e ngaahi ʻekitivitī fakatupulaki ko ia ʻe fakakau mai ʻa e fānaú mo tokoni lelei taha ke nau aʻusia ʻa e taumuʻa ʻo e lēsoní.
Nāunau ʻoku fie maʻú:
1. Tohi Tapu pe Fuakava Foʻou ke taki taha ʻa e fānaú.
2. Ko e ngaahi foʻi lea ʻeni:
  
  ʻE lava ke tau fakahā ʻa ʻetau ʻofa pea mo fakaʻapaʻapa ki he Tamai Hēvaní pea mo Sīsuú ʻaki:
  
  ʻEtau loto ʻapasia ʻi he Palaimelí pea mo e sākalamēnití.
  
  ʻEtau ngaahi lea ʻoku fakaʻaongaʻi ʻi heʻetau lotú.
  
  ʻA e anga ʻo e vala ʻoku tau tuí.
  
  ʻA e anga ʻo ʻetau tōʻongá.
  
  ʻA e founga lea ʻoku tau ngāueʻakí.
3. Fakatātā 7–9 Ko e Fakamaʻa ʻe Sīsū ʻa e Temipalé (Ngaahi Fakatātā ʻo e Ongoongoleleí 224; 62163 900).

Fokotuʻu ki he Founga Fai ʻo e Lēsoní

Fakaafeʻi ha taha ke ne fai ʻa e fua lotú.

ʻEkitivitī ke Takiʻakiʻi ʻAki e Tokangá

Tā ha foʻi laine lōloa ki he tafaʻaki ʻe taha ʻo e palakipoé. Tohiʻi ʻi ʻolunga ʻi he lainé ʻa e foʻi lea ko e FAKAʻAPAʻAPA pea tohiʻi ʻi lalo ʻa e TAʻE FAKAʻAPAʻAPÁ. Kole ange ki he fānaú ke ʻai ʻo hangē pe ʻe haʻu hanau kaungāmeʻa ki honau ʻapí. Tala ange te ke tā ʻa e “laine ʻo e fakaʻapaʻapá” ʻi he palakipoé. Lave ki ha ngaahi meʻa ʻoku fai ʻe ho kaungāmeʻá (vakai, ki lalo ai), pea tuku ki he kalasí ke nau fili kapau ʻoku fakahā ʻe honau kaungāmeʻá ʻa e ʻulungaanga fakaʻapaʻapá pe taʻe fakaʻapaʻapá kiate koe pea mo ho fāmilí. Tā ha laine hokohoko lōloa ki lalo, ke ne fakafehauakiʻi ʻa e laine naʻá ke ʻuluaki tā ki he tafaʻaki ʻe taha ʻo e palakipoé, ʻunu ki ʻolunga ʻi he taimi ʻoku fakahā ai ʻa e ʻulungaanga fakaʻapaʻapá pea ʻunuki ki lalo ʻi he fakahā ʻo e ʻulungāanga taʻe fakaʻapaʻapá. Fakaʻaongaʻi ʻa e ngaahi meʻa ʻo hangē ko ʻení:

The Friend:

ʻEkitivitī ke Takiʻakiʻi ʻAki e Tokangá

Talitali fakalongolongo pe ʻi tuʻa kae ʻoua ke fakaafeʻi mai ki loto.
Hū mai ki fale mo e fuʻu vaʻe pelepelá.
Fakamālō atu ʻi hono fakaafeʻi mai iá.
Kaikaila mo kēkē longoʻa ʻi homou ʻapí.
Talitali loto fiemālie hoʻo ongo mātuʻá.
Fakamālohia ʻa meʻa ke ke kai.
Ngaohi lelei ʻa hoʻo koloá.
ʻIkai ke fie fanongo ki hoʻo ongo mātuʻá ʻi he taimi ke na lea atu aí.
Fakaafeʻi mai ke ke ʻalu ange ki hono ʻapí.

ʻE lava pē ke meimei ha peheni hoʻo “laine fakaʻapaʻapá.”

Tuku ke tali ʻe he fānaú kia kinautolu pē ʻa e ngaahi fehuʻi ko ʻení:

ʻEkitivitī ke Takiʻakiʻi ʻAki e Tokangá

ʻI he taimi te ke ʻaʻahi ia ki he ʻapi ho kaungāmeʻá, ʻe anga fēfē hoʻo “laine fakaʻapaʻapá”?
ʻI he taimi te ke haʻu ai ki he Palaimelí, ʻe anga fēfē ha fotunga ʻo hoʻo “laine fakaʻapaʻapá”?
ʻE anga fēfē ʻa e fotunga hoʻo “laine fakaʻapaʻapá” ʻi he taimi te ke nofo ai pe ʻi ho ʻapí?

Ngaahi Fakamatala ʻa e Folofolá

Akoʻi ʻa e fakamatala ʻa e folofolá ki hono fakamaʻa ʻe Sīsū ʻa e temipale ʻi Selusālemá. ʻOku hā e fakamatala ki hono ʻuluaki fakamaʻá ʻi he Sione 2:13–16. Ko e fakamatala hono uá, naʻe ʻosi ha meimei taʻu ʻe tolu hono kalausefa ʻo Sīsuú, ʻoku hā ʻi he Mātiu 21:12–14 pea mo e Luke 19:45–48. (Ko e fokotuʻu ki hono founga akoʻi ʻo e folofolá, (vakai, “Faiako mei he Folofolá “0”. vii.) ʻI hoʻo akoʻi ʻa e ngaahi fakamatala ko ʻení ʻa e folofolá, tuku ke taki taha fehuʻi hifo pe kia kinautolu ʻe he fānaú ko e hā e ongo naʻe maʻu ʻe Sīsū ʻo kau ki he Tamai Hēvaní pea mo e temipalé. Tokoniʻi ke mahino ki he fānaú ko e temipale ko ʻení ko ha feituʻu toputapu ia, ʻoku hangē tofu pē ia ko hotau ngaahi temipalé mo e ngaahi fale lotu ʻo e ʻahó ni, pea ʻoku pehē pe ʻa e finangalo ʻa Sīsū ke tau fakaʻapaʻapa ki he ngaahi feituʻu toputapú ni.

Ngaahi Fehuʻi ke Aleaʻi pea mo Fakaʻaongaʻí

Ako ʻa e ngaahi fehuʻi mo e ngaahi fakamoʻoni folofola ko ʻení ʻi he teuteuʻi hoʻo lēsoní. Peá ke fakaʻaongaʻi ʻa e ngaahi fehuʻi ko ia ʻokú ke ongoʻi ʻe tokoni lelei taha ki he fānaú ke mahino kia kinautolu ʻa e folofolá pea mo fakaʻaongaʻi ʻa e ngaahi tefitoʻi moʻoni ʻo e ongoongoleleí ʻi heʻenau moʻuí. ʻE tokoni haʻo lau mo aleaʻi mo hoʻo fānaú ʻa e folofolá koeʻuhí ke nau maʻu ha ʻilo fakafoʻituitui ʻoku lahi angé.

Ngaahi Fehuʻi ke Aleaʻi pea mo Fakaʻaongaʻí

Ko e hā e meʻa naʻe ʻilo ʻe Sīsū ʻoku fai ʻe he niʻihi ʻo e kakaí ʻi he temipalé? (Sione 2:14.)
Ko e hā hono ʻuhinga naʻe kapusi ai ki tuʻa ʻe Sīsū ʻa e kau fefakatauʻakí pea mo e kau fetongi paʻangá mei he temipalé? Ko e hā e meʻa naʻe folofolaʻaki ʻe Sīsū kiate kinautolú? (Sione 2:16; Mātiu 21:13; Luke 19:45–46.)
Ko e hā e meʻa naʻe fai ʻe Sīsū ʻi he temipalé hili ʻene kapusi kinautolu ki tuʻá? (Mātiu 21:14; Luke 19:47.)
Ko e hā haʻo fakakaukau ki hono mahuʻinga ʻo ʻetau loto ʻapasia ʻi he ngaahi potu toputapú ʻo hangē ko e ngaahi ʻapí, ngaahi temipalé, pea mo e ngaahi fale ʻo e siasí? Ko hai ʻoku tau fakaʻapaʻapa ki aí?

Aleaʻi ʻa hono mahuʻinga ke tau loto ʻapasia ʻi he ngaahi feituʻu kuo ʻosi fakatapui ki he ʻEikí. Tokoniʻi ʻa e fānaú ke mahino kiate kinautolu ʻoku ʻomi ʻe he loto ʻapasiá ʻa e fakaʻapaʻapá pea mo e ʻofá.

Ngaahi Fehuʻi ke Aleaʻi pea mo Fakaʻaongaʻí

Ko hai ʻoku fakahā ki ai ʻe Sīsū ʻa ʻene ʻofá pea mo ʻene fakaʻapaʻapá ʻi he taimi naʻá ne kapusi ai ki tuʻa ʻa e kau fefakatauʻakí? (Sione 2:16.) Ko e hā hono ʻuhinga naʻá ne fai ai ʻení?
ʻOku anga fēfē ʻa ʻetau fakahā ʻa e ʻofa pea mo e fakaʻapaʻapa ki he Tamai Hēvaní ʻi he lotú? ʻi hotau ʻapí? ʻi he akó? ʻi he vaʻingá?

Fakaʻaliʻali tahataha ʻa e ngaahi foʻi leá. Aleaʻi mo e fānaú ʻa e ngaahi founga ke fakahā ai ʻa e ʻofa mo e fakaʻapaʻapa ki he Tamai Hēvaní pea mo Sīsuú. Fakakau atu ki ai ʻa e ngaahi fakakaukau ko ʻení:

Ngaahi Fehuʻi ke Aleaʻi pea mo Fakaʻaongaʻí

ʻOku tau fakaha ʻa ʻetau ʻofa mo e fakaʻapaʻapa kia Sīsū pea mo e ngaahi fuakava naʻa tau fai mo e Tamai Hēvaní, ʻaki ʻetau loto ʻapasia lolotonga ʻa e sākalamēnití.
Ko e taimi ʻoku tau fanongo ai ki he ngaahi lea ʻi he houa lotu sākalamēnití pea mo loto ʻapasia ʻi he Palaimelí, ʻoku tau ako ʻo toe lahi ange ki he Tamai Hēvaní pea mo Sīsū pea pehē foki ki he ngaahi meʻa ʻokú na finangalo ke tau faí.
ʻOku tau fakahā ʻetau fakaʻapaʻapa ki he Tamai Hēvaní, ʻi he taimi ʻoku tau lotu ai ʻi he founga totonú.
ʻOku tau fakahā ʻetau fakaʻapaʻapa ki he Tamai Hēvaní, ʻi he taimi ʻoku tau tui ai ʻa e vala ʻoku tāú.
ʻOku tau fakahā ʻoku tau tui kiate kinaua ʻi he taimi ʻoku tau moʻui ai ʻo fakatatau ki he meʻa ʻoku finangalo mai ʻa e Tamai Hēvaní pea mo Sīsū ke tau faí, pea ʻoku fuʻu mahuʻinga ke tau fai ʻa e meʻa kuó na kole mai ke tau faí.
Ko e taimi ʻoku tau fakaʻaongaʻi ai ʻa e huafa ʻo e ʻEikí ʻi he loto ʻapasia pea ʻikai ke tau takuanoa iá, ʻoku tau fakahā ki he niʻihi kehé ʻa ʻetau fakaʻapaʻapa pea mo e ʻofa kiate iá.

ʻEkitivitī Fakatupulakí

Te ke lava ke fakaʻaongaʻi ha taha pe lahi ange ʻo e ngaahi ʻekitivitií ni ʻi ha faʻahinga taimi pē lolotonga ʻa e lēsoní pe ko ha fakamanatu lēsoni, fakamatala fakanounou, pē ʻi hono tukupaá.

Tuku ki he fānaú ke na lau mo ako maʻu loto ʻa e ʻEkesōtosi 20:7. Fakahoko ange pea mou ʻaleaʻi ʻa e talanoa ko ʻení naʻe fai ʻe Palesiteni Sipenisā W. Kimipolo, hanga ʻo tokoniʻi ʻa e fānaú ke nau fai ha tukupā ke tauhi ʻa e fekau mahuʻingá ni.

“ ʻI ha ʻaho ʻe taha ʻi fale mahaki, naʻe teke mai au ʻi ha sāliote teketeke ʻe ha mātapule ʻo ne tūkia ai, pea naʻe haʻu mei hono ngutú ʻi heʻene ʻitá ha ngaahi fuʻu lea taʻe feʻunga [kapekape] ko ha ngaahi hingoa kehekehe ʻo e huafa ʻo e Fakamoʻuí. Neongo pē ʻoku teʻeki ke u fuʻu ake lelei, naʻá ku kiʻi momou pea ne u toe kole ange: ‘Fakamolemole ! Fakamolemole! Ko e huafa ʻena ia ʻo hoku ʻEikí ʻa ia ʻokú ke takuanoá.’ Naʻá ne fuʻu longomate, peá ne lea leʻo siʻi mai: “Fakamolemoleʻi au.’ Kuo ngalo ʻiate au e fekau ʻa e ʻEikí ki he kotoa ʻo hono kakaí, ‘ʻOua naʻá ke takuanoa ʻa e huafa ʻo Sihová ko ho ʻOtuá; koeʻuhí ʻe ikai lau ʻe Sihova koe taʻe halaia ia, ʻa ia ʻokú ne takuanoa hono huafá’ (ʻEkesōtosi 20:7)” (Ko e lea ʻa Sipenisā W. Kimipolo ʻo fekauʻaki mo e Lea Kapekapé,” Ensign, Fēpueli 1981, pp. 3).
Kumi mai ha niʻihi e fakatātā ʻo e ngaahi temipalé pea mo e ngaahi fale lotu ʻo e siasí. Hiki ʻa e hingoa ʻo e ngaahi temipalé pea mo e ngaahi fale lotu ʻo e siasí ʻi ha ngaahi laʻi pepa kehekehe, pea kole ki he fānaú ke nau fakahoa ʻa e ngaahi hingoá pea mo e fakatātaá. Tuku ange ke nau toe fakatauhoa hono tuʻo ua ʻa e ngaahi hingoá pea mo e ngaahi fakatātaá lolotonga ko iá fakamatalaʻi ʻa e founga ʻoku tokoni ai ʻa e ngaahi fale lotu ʻo e Siasí ke fakahoko e ngāue ʻa e ʻEikí ʻi he māmaní.
Fakamatalaʻi ʻa e ongo naʻá ke maʻú ʻi he taimi naʻá ke hū ai ʻi he temipalé, pe ko haʻo fakaafeʻi ha taha ʻi ho uōtí pe koló ke ne fakamatalaʻi ʻa e ongo ʻokú ne maʻu ʻo kau ki he temipalé. Tokoniʻi ʻa e fānaú ke nau fakatokangaʻi ʻa e toputapu ʻo e temipalé pea mo kinautolu ʻoku hū ki aí ke nau ongoʻi vāofi ange mo e ʻEikí. Aleaʻi ko e hā e meʻa ʻe fai ʻe he fānaú ʻi heʻenau moʻuí ke nau hoko ʻo taau ke hū ki he temipalé.
ʻOange ke nau taki taha ha laʻi pepa pea mo ha peni vahevahe. Tuku ke nau tohiʻi mai ha founga pau ʻe lava ke nau fakahā ai ʻa e ʻofá, tauhi, mo fakaʻapaʻapá ki he Tamai Hēvaní pea mo Sīsū Kalaisí lolotonga ʻa e uike ka hoko maí. Kole ange ke tauhi ʻa e lisí ʻi ha feituʻu te nau lava ke sio maʻu pē ki aí.
Toe tā ha foʻi “laine ʻo e fakaʻapaʻapá” ʻi he palakipoé pea tuku ange ki he fānaú ha fakatātā ʻo e ngaahi tōʻonga ʻokú ne fakahaaʻi ʻa e fakaʻapaʻapá pe taʻe fakaʻapaʻapa ʻi he ngaahi fale ʻo e Siasí.

Tukupā

Mou toe vakaiʻi ʻa e “laine ʻo e fakaʻapaʻapá” pea tala ange ki he fānaú ʻoku nau fie maʻu ke maʻu ʻa e “laine ʻo e fakaʻapaʻapá ki honau vā mo e Tamai Hēvaní pea mo Sīsū Kalaisí. Fakatukupaaʻi ke nau tauhi ʻa e laine ʻo e fakaʻapaʻapá ʻaki ʻenau fakahā ʻa e ʻofa mo e fakaʻapaʻapa ki he Tamai Hēvaní mo Sīsū ʻi he ngaahi meʻa kotoa pē te nau faí.

Fakaʻosí

Fakamoʻoní

Te ke lava ke fakahā ʻa e loto ʻapasia ʻokú ke maʻu ki he Tamai Hēvaní pea mo Sīsū Kalaisí mo e holi ke fakahā hoʻo ʻofá, fakaʻapaʻapá, mo e tokaʻi ʻo kinauá ʻaki ʻa e tōʻonga moʻui ʻokú ke maʻú.

Laukonga ʻoku Fokotuʻu Atu ke Fai mei ʻApi

Fokotuʻu ange ke ako ʻe he fānaú ʻa e Mātiu 21:12–14 ʻi ʻapi ke hoko ia ko hano toe fakamanatu ʻa e lēsoni ko ʻení.

Fakaafeʻi ha taha ʻo e fānaú ke ne fai ʻa e lotu tukú.