Lesona 18 Anomea mo Sauniuniga o le Vasega

O le Avea e Faapei o le Tama Faalelagi ma Iesu Keriso

I Lana auaunaga ia sa Nifae ma sa Lamana, sa fesili le Faaola i Ona soo e toasefululua, “O a ituaiga o tagata e tatau ona outou i ai?” (3 Nifae 27:27). Afai e fesili atu e le Alii le fesili lenei ia te oe, o le a sau tali i ai? E mafai faapefea ona e ausia lou gafatia atoa? A o e sauniuni mo le vasega, mafaufau pe mafai faapefea e aoaoga a le Faaola ona fesoasoani ia te oe e tali ai nei fesili. Filifili se mea fitoitonu e mafai ona e faia ia avea atili ai e pei o Ia.

Vaega 1

E mafai moni lava ona ou atoatoa e pei o le Tama Faalelagi ma Iesu Keriso?

Tatou te faitau i le Feagaiga Fou e uiga i le tuuina atu e Iesu o le Lauga i luga o le Mauga, lea o loo aofia ai aoaoga o le a iu ina fesoasoani ai i Ona soo ia atoatoa (tagai Mataio 5–7). Ina ua uma Lona Toetu, sa faaali atu Iesu i le laueleele o Nuumau ma tuuina atu i ai se lauga faapena (tagai 3 Nifae 12–14).

I le amataga o Lana savali i tagata, sa molimau atu ai Iesu e faapea, o i latou o e o le a “uai atu i upu” a Ona soo filifilia e toasefululua o le a faamanuiaina (3 Nifae 12:1). Sa Ia aoao atu Faaamuia, faamautinoa atu ua Ia faataunuuina le tulafono a Mose, ma tuuina atu le tulafono maualuga atu o le talalelei.

Suesue mo Sauniuniga mo le Vasega

Faitau le 3 Nifae 12:19–20, 46–48, ma vaavaai mo mea e mafai ona tatou avea ai a o tatou o mai ia Keriso ma taumafai e ola i Lana tulafono maualuga atu.

Atonu e lagona e nisi o tagata le le mautonu po o le lofituina i le poloaiga a le Faaola ia atoatoa. Atonu e fesoasoani le iloa e faapea, i tusitusiga paia, o le upu atoatoa e mafai ona faauigaina “atoa, mea atoa, ma atinaeina atoa; matuai amiotonu” ma o “soo moni o Keriso e mafai ona atoatoa e ala i Lona alofa tunoa ma le Togiola” (Guide to the Scriptures, “Perfect,” scriptures.ChurchofJesusChrist.org).

Suesue mo Sauniuniga mo le Vasega

Faitau le Moronae 10:32–33, ma vaai mo le ala e manaomia uma ai e le atoatoa a tatou taumafaiga ma le alofa tunoa o le Alii.

O le tasi o auala e faauiga ai le alofa tunoa o lenei: “O le upu alofa tunoa, ua faaaogaina i tusitusiga paia, e faatatau tonu i le mana gafatia ma le faamalologa faaleagaga ua ofoina mai e ala i le alofa mutimutivale ma le alofa o Iesu Keriso. … Ina ia maua lenei mana gafatia, e ao ona tatou usitai i le talalelei a Iesu Keriso. … Sa folafola mai e le Alii afai tatou te faalotomaualaloina i tatou lava i Ona luma ma faatuatua ia te Ia, o le a fesoasoani Lona alofa tunoa ia i tatou e faatoilalo uma ai o tatou vaivaiga faaletagata (tagai Eteru 12:27)” (“Grace,” Gospel Topics, topics.ChurchofJesusChrist.org).

Na aoao mai Elder Jeffrey R. Holland o le Korama a Aposetolo e Toasefululua:

Pau le tatou faamoemoega mo le atoatoa moni o le taliaina lea e avea ma se meaalofa mai le lagi—e le mafai ona tatou ‘mauaina’. O le mea lea, ua ofo mai ai ia i tatou e le alofa tunoa o Keriso e le gata o le faaolataga mai le faanoanoa ma le agasala ma le oti ae o le faaolataga mai a tatou lava faitioga faifai pea. …

… Afai tatou te tutumau, ona i ai lea o se mea i le faavavau o le a faamaea ai ma faaatoatoa ai lo tatou faaleleiga. …

… Ou te molimau atu i lenei itula ma itula uma, faatasi ai ma ona aao ua ma’ila i fao, o loo Ia faaloaloa mai pea ia i tatou i lea lava alofa tunoa e tasi, ma uumauina ma faamalosiau mai ia i tatou, musu e tuu i tatou e o seia tatou taunuu saogalemu ai i le aiga i le opomau a o tatou Matua e Faavavau. (“Ia Atoatoa Ona Lelei o La Outou Amio—I Le Iuga,” Liahona, Nov. 2017, 41, 42)

Mafaufau Loloto i Sauniuniga mo le Vasega

O le a le uiga ia te oe o le iloa ua faasafua mai e Iesu Keriso Lona alofa tunoa ia te oe ma ua sauniaina se ala mo oe e avea ai e pei o Ia ma Lona Tama?

Vaega 2

O a ni mea e mafai ona ou faia ina ia avea atili ai e faapei o Iesu Keriso?

Ao faaauau ona aoao e Iesu ia sa Nifae, sa Ia faasoa atu ni mataupu faavae loloto e faatatau i le ala e ola ai e tusa ai ma le tulafono maualuga atu o Lana talalelei. Na saunoa Peresitene Harold B. Lee:

Na afio mai Keriso e le gata i le lalolagi ia faia se togiola mo agasala a tagata ae ia faia foi se faataitaiga i luma o le lalolagi e uiga i le tulaga o le atoatoa i le tulafono a le Atua ma o le usiusitai i le Tama. I lana Lauga i luga o le Mauga na tuu mai ai e le Matai ia i tatou se faaaliga o lana lava amio, lea e atoatoa, … ma o le faia faapea ua aumai ai ia i tatou se ata auiliili mo o tatou lava olaga. (Decisions for Successful Living [1973], 55–56)

Suesue mo Sauniuniga mo le Vasega

O le taumafai e ola i nei aoaoga o le a fesoasoani ia i tatou taitoatasi ia iu ai ina atoatoa e pei o le Faaola. Toe iloilo mo se taimi puupuu le lisi lenei o autu na tautalagia i le 3 Nifae 12–14, ma faailoa se vaega se tasi pe lua e te fia taulai i ai.

A uma ona filifili lau autu, ia suesue ma le toto’a ma mafaufau loloto i mau nei e faatatau i ai. Ina ia faaloloto lou malamalama i autu, mafaufau e sue mau faasino mo fuaiupu o loo e suesueina.

• Uiga Auaumama FaaKeriso (o Faaamuia) (3 Nifae 12:3–12)

• Ita (3 Nifae 12:21–24)

• Mama i Feusuaiga (3 Nifae 12:27–28)

• Faamaoni ma le Amiosa’o (3 Nifae 12:33–37)

• Alofa i Fili (3 Nifae 12:38–44)

• Auauna atu mo Mafuaaga Sa’o (3 Nifae 13:1–4)

• Tatalo ma le Anapogi (3 Nifae 13:5–18)

• Oa i le Lagi (3 Nifae 13:19–24)

• Faamasino Atu (3 Nifae 14:1–5)

Tusifaamaumau Ou Lagona Uunaia

Faailoa se mataupu faavae se tasi pe sili atu na aoao mai i fuaitau na e faitauina e mafai ona fesoasoani e te avea atili ai e pei o le Faaola. Tusifaamaumau ou manatu ao e mafaufau i fesili nei:

• E ono mafai faapefea e le ola i le mataupu faavae o loo i le mau fuaitau ona fesoasoani ia te a’u ia avea atili ai faapei o Iesu Keriso?

• Na faapefea ona faataitai mai e Iesu Keriso lea mataupu faavae?

• Na faamanuiaina faapefea lou olaga po o olaga o isi i lenei aoaoga faavae?

• O le a se mea e mafai ona ou faia e faaaoga lelei ai lenei mataupu faavae i lo’u olaga?

Manao Pea i Nisi Mea? (Tuu i le faitalia)

O fea e mafai ona ou aoao atili ai e uiga i le lauga a le Faaola ia sa Nifae?

Mo nisi faamatalaga i le 3 Nifae 12–14, tagai mataupu 41 o le Book of Mormon Student Manual (Church Educational System manual, 2009), 302–11, po o le mataupu 3 o le New Testament Student Manual (Church Educational System manual, 2018), lea o loo talanoaina ai le Lauga i luga o le Mauga (tagai Mataio 5–7).

O le a se mea e tatau ona ou faia pe a ou tauivi ma le manatu o le ia atoatoa i lenei olaga?

I lana saunoaga “Ia Atoatoa Ona Lelei o La Outou Amio—I Le Iuga” (Liahona, Nov. 2017, 40–42), Ua tuuina mai ai e Elder Holland se fautuaga taua mo i latou o e ua lotovaivai ona ua latou manatu o le a le mafai lava ona atoatoa.

I le vitio “Gather to Be Perfected but Not Perfect” (29:39), ua tuuina mai ai e Sister Gaylamarie Rosenberg, o se faiaoga faaopoopo i le Iunivesite a Polilka Iaga ni fautuaga mo le faatoilaloina o le le taliaina o se isi lava tulaga e le atoatoa ma le le talitonu o le tagata ia te ia lava. O lenei saunoaga na tuuina atu i le aso 1 o Me, 2020, i le Konafesi a Tamaitai i le Iunivesite a Polika Iaga.

O fea e mafai ona ou aoao atili ai e uiga i aoaoga a le Ekalesia e faatatau i o tatou gafatia faalelagi?

O le tala o Autu o le Talalelei “Becoming Like God” (ChurchofJesusChrist.org), o loo tuuina mai ai se talanoaga loloto e uiga i aoaoga o le Ekalesia e faapea, o tagata taitoatasi o se atalii/afafine o le Atua ma ua i ai le gafatia faalelagi e avea ai e pei o Ia.