“Lesona 23 Anomea mo le Sauniuniga o le Vasega: Usiusitai i Poloaiga a le Atua,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 23 Anomea mo Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 23 Anomea mo le Sauniuniga o le Vasega
Usiusitai i Poloaiga a le Atua
I le iunite lenei o le a e maua ai se avanoa e mafaufau ai i auala e mafai ona faateleina ai lou faalagolago i le Atua. O se elemene taua e uiga i le faalagolago i le Atua o le aoao lea ia usitai ma le lotomalie i Ana poloaiga. O le a le faatauaina ua e tuuina i le mulimuli i poloaiga a le Atua? E i ai se poloaiga e faapitoa le luitauina o lou tausia? Ao e suesue i le Tusi a Mamona e sauniuni ai mo le vasega, mafaufau loloto i le faamoemoega o poloaiga a le Atua ma faamanuiaga e mafai ona e maua ao e taumafai e faataitai i faataitaiga a le Faaola o le usiusitai.
Vaega 1
O le a se mea e mafai ona ou aoaoina e uiga i le usiusitai mai ia Iesu Keriso?
Mai le Feagaiga Fou ua tatou aoao ai e faapea, sa alu atu Iesu Keriso ia Ioane le Papatiso ina ia papatisoina ina ia mafai ona la “faataunuu le amiotonu uma” (Mataio 3:13–17). E pei ona tusifaamaumauina i le Tusi a Mamona, sa faamalamalama mai e Nifae le pogai na papatisoina ai Iesu Keriso, o lē sa leai se agasala (tagai 2 Nifae 31:6–7).
Suesue mo Sauniuniga mo le Vasega
Faitau le 2 Nifae 31:6–7, 10, ma vaai mo uiga o Iesu Keriso na faatauaina e Nifae.
Ina ua faaali atu Iesu Keriso i sa Nifae i le laueleele o Nuumau, sa ia faamamafaina atu le taua o le usitaia o poloaiga a Lona Tamā. Na saunoa mai Elder Jeffrey R. Holland o le Korama a Aposetolo e Toasefululua:
Mai savali uma e mafai ona oo mai mai tusitaai o le faavavau, o le a le folafolaga na aumai [e le Faaola]? Sa faalogologo ma le faamaoni sa Nifae ao fetalai o ia: “O Au o le malamalama ma le ola o le lalolagi; ma ua ou inu i lena ipu oona lea na tuuina mai e le Tamā ia te au, ma ua ou faamamaluina le Tamā i lou aveina i ou luga o agasala a le lalolagi, o se mea na ou tuu atu ai i le finagalo o le Tamā i mea uma mai le amataga” [3 Nifae 11:11]. Onosefulu-ono upu. O le ute o lana misiona faalelalolagi. O le usiusitai ma le tuuto i le finagalo o le Tama, e tusa lava po o le a le oona o le ipu po o le tiga o le tau. (Keriso ma le Feagaiga Fou [1997], 251)
I le faaiuiuga o Lana auaunaga i sa Nifae, sa folafola atu ai e le Alii, “na ou sau i le lalolagi e fai le finagalo o lou Tama, aua na auina mai a’u e lou Tama” (3 Nifae 27:13).
Mafaufau Loloto i Sauniuniga mo le Vasega
O le a se mea e mafai ona e aoaoina e uiga i le usiusitai mai le faataitaiga a Iesu Keriso?
Vaega 2
O a ni auala e mafai ai ona faamanuiaina ai a’u e ala i le tausia o poloaiga a le Atua?
E le’i leva ona tuua e Liae ma lona aiga ia Ierusalema e o atu i le vao, ae amata ona muimui Lamana ma Lemuelu e faasaga i lo la tamā. O le tiga ai i le maaa o o laua loto, sa faapea ona tatalo ai Nifae mo ona uso. I le tali i lana olega, na aoao ai e le Alii ia Nifae i se upumoni taua e uiga i le usiusitai. (Tagai 1 Nifae 2:11–12, 18–21.)
Suesue mo Sauniuniga mo le Vasega
Faitau le 1 Nifae 2:20–21, ma vaavaai mo le mea na aoaoina e Nifae e uiga i le usiusitai.
O le saunoa ai i le folafolaga o loo i lenei mau, na aoao mai ai Epikopo Gérald Caussé, o le Epikopo Pulefaamalumalu:
O lenei folafolaga e taulai atu i le tala ma aoaoga o le Tusi a Mamona. E faaalia mai i ni mau eseese e 18, ma i le fitu o ona tusi e 15. E ui o le faamanuiaga o le manuia o loo ta’ua i nei mau e faaautu lava i se tulaga faaleagaga, ae e aofia ai foi le gafatia o le nuu a le Atua ia fiafia i le alualu i luma tau tamaoaiga ma ia ola tutoatasi faaletino. (“Ole Faavae Faaleagaga mo le Ola Tutoatasi o le Ekalesia i Mea Tautupe,” Ensign, Aokuso 2018, 46)
Ina ua taufaaiuiu le soifua o le Tupu o Peniamina, sa ia faapotopotoina faatasi lona nuu e momoli atu i ai le lauga faaiu mulimuli. O se vaega o lana lauga, sa ia aoao atu ai e faapea, o i tatou uma o “auauna le aoga” ma o le a tatou aitalafu pea i le Atua (Mosaea 2:20–21). I le uiga o le tatou nofo aitalafu, na aoao mai ai le Tupu o Peniamina i le pogai e manaomia ai i tatou e le Atua ia tausi i Ana poloaiga.
Suesue mo Sauniuniga mo le Vasega
Faitau le Mosaea 2:22, 41, ma mafaufau pe mafai faapefea e le usitaia o poloaiga a le Atua ona faataga i tatou e iloa le agalelei o le Atua.
O le saunoa ai i le faamoemoega o poloaiga a le Atua, na aoao mai ai Peresitene Jean B. Bingham, o le Peresitene Aoao o le Aualofa:
Aisea e tuuina mai ai e le Atua ia i tatou poloaiga? Ina ia taofiofi ai i tatou, i le gauai atu pei o se pologa ia te Ia? Pe ina ia aveese ai soo se avanoa mo le fiafia moni i lenei lalolagi? Leai, o le faafeagai ua moni ia: Ua tuuina mai e le Atua ia i tatou poloaiga ona e alofa o Ia ia i tatou. E finagalo o Ia ia aua nei o tatou oo i le lototiga, pagatia ma le faanoanoa. Ua Ia silafia na pau le ala e fiafia moni ai i lenei olaga ma maua ai le olioli e le mataofiofia i le lalolagi a sau, o le mulimuli lea i le faataitaiga a Iesu Keriso o le usiusitai i tulafono a le Atua. (“Obedience Brings Blessings” [saunoaga na tuuina atu i le faauuga a le Iunivesite o Polika Iaga–Hawaii, 21 Ape., 2018], speeches.byuh.edu)
Talanoa i Sauniuniga mo le Vasega
Faatasi ai ma se uo po o se tagata o le aiga, talanoa pe ua faapefea ona faamanuiaina o oulua olaga ona o le usiusitai i poloaiga a le Atua.
Vaega 3
O le a se mea e mafai ona ou aoaoina e uiga i le usiusitai mai le autau talavou?
Na aoao mai Elder David A. Bednar o le Korama a Aposetolo e Toasefululua, “O le usiusitai ma le faamaoni i poloaiga a le Atua e taua mo le mauaina o le Agaga Paia.” Ona ia faasino atu lea i le autau talavou e fai ma faataitaiga o le usiusitai ma fapea mai, e “tatau ona [tatou] taumafai ia avea e faapei o i [latou]” (“Ia Maua le Agaga Paia,” Liahona, Nov. 2010, 96, 97).
O le autau totoa o fanau a sa Lamana o e na liliu mai i le Alii ina ua uma ona aoaoina i latou e atalii o Mosaea. O nei sa Lamana sa ta’ua o le nuu o Amona po o Aneti-Nifae-Liae. Ina ua latou liliu mai, sa folafola atu e Aneti-Nifae-Liae i le Atua o le a latou le toe faaaogaina lava a latou auupega o le taua. (Tagai Alema 23:4–7, 16–17.) Mulimuli ane, o o latou atalii talavou, o e sa le’i osia lenei feagaiga, na filiili e auai i le autau a sa Nifae ma puipui lo latou atunuu. Sa mananao le autau talavou e fai Helamana ma o latou taitai. Sa latou tau i ni taua e faasaga ia sa Lamana. E ui ina sa tele o latou manua, ae o le mea e ofo ai, sa leai se tasi o i latou na maliu i le taua. (Tagai Alema 53:10–19; 57:22–25; 58:39.)
Suesue mo Sauniuniga mo le Vasega
Faitau le Alema 57:21, 27; 58:40. O le vaai i tua atu o le anotusi o se fetauiga faalefitafita, vaai po o le a se mea e mafai ona e aoaoina e uiga i le usiusitai mai faataitaiga a le autau talavou.
O le saunoa atu i matua e uiga i le aoao atu o le taua o le usiusitai i a latou fanau, na tuuina mai ai e Peresitene Russell M. Nelson le fautuaga lenei:
Aoao atu e uiga i le faatuatua e tausi ai poloaiga uma a le Atua, ma ia iloa ua tuuina mai e faamanuia ai Lana fanau ma aumai ai ia i latou le olioli [tagai 2 Nifae 2:25]. Lapatai atu ia i latou o le a latou fetaui i ni tagata o le a latou filifili po o le fea poloaiga latou te tausia ae le ano i isi poloaiga latou te filifili e soli. Ou te ta’ua lenei mea o le ‘ai filifili i poloaiga e usitai i ai. O lenei faiga o le ilo ma filifili o le a le manuia. O le a oo atu ai i le faanoanoa. Ina ia saunia e fetaia’i ma le Atua, o lea e tausi ai e se tagata Ana poloaiga uma . E manaomia ai le faatuatua e usiusitai ai, ma o le tausia o Ana poloaiga o le a faamalosia ai lena faatuatua. (“Faasaga Atu ma le Faatuatua i le Lumanai,” Liahona, Me 2011, 34)
O nisi taimi tatou te lagona ai le lofituina a o tatou taumafai e tausi uma poloaiga a le Atua i le sa’o atoatoa. Ina ia fesoasoani ia tatou malamalama i le ala e mafai ai e le Faaola ona faatele lo tatou gafatia ia usiusitai, na aoao mai ai Elder Bednar:
Uso e ma tuafafine, e matuai taua tele mo i tatou uma ona manatua o le agaigai i tulaga maualuluga atu ma sili atu le malosi faaleagaga o le usiusitai, e le o na’o se tulaga e matele i le naunautai o le tagata lava ia, malosi tele faalemafaufau, ma le malosi faateleina o le loto, ae, e ausia e ala i le mana gafatia o le Togiola a le Alii o Iesu Keriso. (“In a State of Happiness (Mormon 7:7)” [Brigham Young University–Idaho devotional, Ian. 6, 2004], byui.edu)
Mafaufau Loloto i Sauniuniga mo le Vasega
E faatatau i mea ua e aoaoina e uiga i le usiusitai i lenei lesona, o le a se fautuaga o le a e avatu i se tasi o loo tauivi ma le tausiga o poloaiga?