“Lesona 24 Anomea mo le Sauniuniga o le Vasega: O Le Mana Laveai o le Alii,” Anomea a le Faiaoga o Aoaoga ma Aoaoga Faavae o le Tusi a Mamona (2021)
“Lesona 24 Anomea mo Sauniuniga o le Vasega,” Anomea a le Faiaoga o Aoaoga ma Aoaoga Faavae o le Tusi a Mamona
Lesona 24 Anomea mo le Sauniuniga o le Vasega
O Le Mana Laveai o le Alii
Pe a feagai ma se tofotofoga, pe na e fesili ea faapea, “Aisea ua tupu ai lenei mea ia te a’u?” po o le “Aisea e le aveesea ai e le Alii lenei tofotofoga mai ia te a’u?” Mai le Tusi a Mamona ua tatou aoao ai ni lesona taua e uiga i le puna o o tatou tofotofoga ma le ala e mafai ona faamanuiaina ai i tatou pe a tatou liliu atu i le Faaola mo se fesoasoani. Ao e suesue e sauniuni mo le vasega, mafaufau pe faapefea ona e faalolotoina lou faalagolago i le alofa e le iu, mana, ma le atamai o Iesu Keriso a o Ia lagolagoina oe pe laveai oe mai tofotofoga e feagai ma oe.
Vaega 1
Aisea ou te oo ai i tofotofoga, e tusa lava pe o o’u faia le mea sa’o?
Ua faaali mai e le Tusi a Mamona o tofotofoga e eseese o latou punavai. O nisi tofotofoga e oo mai mai le agasala. Mo se faataitaiga, sa tigaina Seseroma i le fiva mumū ma le ma’i na mafua ona o le ta’usalaina o lona mafaufau i ana lava agasala (tagai Alema 15:3). Sa onosai e sa Nifae ma sa Lamana le tele o tausaga o taua ona o filifiliga amioleaga a Amalekia (tagai Alema 46:9–10). Ae ui i lea, e le o tofotofoga uma o ni taunuuga o le amioleaga. Sa puapuagatia aiga o Liae ma Isamaeli i le tele o puapuaga ia sa o se vaega masani o malaga e ui atu i le vaomatua (tagai 1 Nifae 16:9–17:4).
Na aoao mai Elder Robert D. Hales o le Korama a Aposetolo e Toasefululua le vaega lenei e uiga i tofotofoga:
I le faleaoga o le olaga nei, o le faiaoga e masani ona tiga ma puapuaga, peitai o le aano lava o lesona o le faaatoatoaina ma faamanuia ma faamalolosia i tatou, ae le o le faatamaia o i tatou. (“O le Faatuatua [a o feagai ma puapuaga ma faigata] E aumaia ai le Filemu ma le Olioli,” Liahona, Me 2003, 17).
O le saunoaga a Elder Hales ua faapupula mai i le aafiaga o Alema ma lona nuu. Sa latou talitonu i lapataiga a le perofeta o Apinati. Ina ua uma ona liliu mai i le Alii ma papatisoina e Alema, sa faapea ona tutuliese tagata i le vao e le autau a le Tupu amioleaga o Noa. Ina ua mavae se malaga e valu aso, na latou taunuu atu i se nuu fou lea na latou faaigoaina o Helama. O iina na latou ola ai i le talalelei ma “uluola ma manuia tele” (Mosaea 23:20). Ae peitai, sa iu ina faasalaveia lo latou filemu e se autau a sa Lamana lea na mauaina ma faapologa i latou. (Tagai Mosaea 17–18; 23.)
Suesue mo Sauniuniga mo le Vasega
Faitau le Mosaea 23:21–24, ma vaavaai mo mafuaaga na faataga ai foi e le Alii ia tagata amiotonu ia oo i tofotofoga.
Mafaufau Loloto i Sauniuniga mo le Vasega
O a ni auala e mafai ai e le taumafai ia malamalama i le vaaiga e faavavau a le Alii i tofotofoga ona fesoasoani e toe faatulaga ai le ala tatou te vaai ai i o tatou lava tofotofoga?
Vaega 2
Aisea e taua ai lo’u faalagolago i le taimi a le Alii i o’u tofotofoga?
Ina ua ua’i atu Alema ma lona nuu i le valaau a Apinati ia salamo ma sosola atu i le vao, sa teena lava e le Tupu o Noa ma isi tagata uma o lona nuu le perofeta ma sa le’i salamo. Ona o a latou agasala, sa faapea ona faatoilalo ai i latou e sa Lamana ma tuu ai i le nofo pologa. I le taimi o le nofoaiga a le Tupu o Limae, le atalii o Noa, sa ao ai e sa Lamana ni lafoga mamafa mai tagata ma matuai sauaina i latou. E faatolu ona toilalo le nuu o Limae i le taumafaiga e laveai i latou lava mai le nofo pologa, ma e toatele ni tagata na maliliu ai i nei taumafaiga. (Tagai Mosaea 12:2; 19:1–21:12.) Mulimuli ane, na latou liliu atu ai loa i le Alii mo se fesoasoani.
Suesue mo Sauniuniga mo le Vasega
Faitau le Mosaea 21:13–16, ma vaavaai mo le ala na faamanuiaina ai e le Alii le nuu o Limae a o latou sailia Lana fesoasoani.
I le taimi na faalotomaualaloina ai e le nuu o Limae i latou lava ma faatalitali i le Alii, na tau atu ai tagata na auina atu e le Tupu o Mosaea e sue tagata ma maua ai le nuu o Limae. Sa feutagai tagata na auina atu e sue tagata ma le Tupu o Limae faatasi ma le nuu i le auala e sosola ese ai mai le nofo pologa. I le po tuupoina na latou aveina atu ai le uaina faasili ia sa Lamana, o e na onana ma momoe ai. Ona sosola lea o le nuu o Limae i le vao ma taunuu saogalemu atu ai i Saraemila. (Tagai Mosaea 21:23–22:14.)
E pei ona faapupula mai i lenei tala, na i ai i le Alii Ana lava faamoemoega ma le taimi mo le laveaiina o le nuu o Limae.
Sa aoao mai Peresitene Dallin H. Oaks o le Au Peresitene Sili:
O le uluai mataupu faavae o le talalelei o le faatuatua lea i le Alii o Iesu Keriso. O le faatuatua o lona uiga o le faalagolago—faalagolago i le finagalo o le Atua, faalagolago i Lana auala o le faia o mea, ma faalagolago i Lana taimi faatulagaina. E le tatau ona tatou taumafai e uunai atu a tatou taimi i luga atu o Lana. Sa saunoa mai Elder Neal A. Maxwell o le Korama a Aposetolo e Toasefululua:
“‘O le faafitauli o i tatou o le lava o le faatuatuaina o le Atua e faalagolago ai foi i Lana taimi. Afai e mafai ona tatou talitonu moni ua ia te Ia lo tatou soifua manuia, o le a tatou le tagi atu e tatala mai Ana fuafuaga nai lo le mea ua sili Lona silafia?” [Even As I Am (1982), 93.] (“Timing,” Ensign, Oke. 2003, 12)
Tusifaamaumau Ou Lagona Uunaia
I le faaaoga ai o mea ua e aoaoina mai le aafiaga o le nuu o Limae, tusifaamaumau ni mataupu faavae o le ala e lagolago pe laveai ai e le Alii i latou o e liliu atu ia te Ia i o latou tofotofoga. Ia saunia e faasoa atu nei mataupu faavae i le vasega.
Vaega 3
E mafai faapefea ona ou maua le malosi mai le Alii a o ou onosaia o’u tofotofoga?
Na tuliloa atu e se au tau a sa Lamana le nuu o Limae ae na iu ina se. Sa iu ina latou maua faitaulaga amioleaga a Noa, o e na au faatasi ma le autau a sa Lamana. Ao feoai i le vao, sa latou maua ai le nuu amiotonu o Alema ma faapologaina i latou. O Amulona o lē sa avea ma se tasi o faitaulaga amioleaga a Noa, sa tofia e le tupu o sa Lamana e pule i le nuu o Alema. Sa tuu e Amulona ni tagata e vaaia galuega i le nuu ma faamata’u atu e fasioti soo se tasi e maua o tatalo. (Tagai Mosaea 22:15–16; 23:25–24:1; 24:8–11.)
Suesue mo Sauniuniga mo le Vasega
Faitau le Mosaea 24:10–16, ma vaai mo le auala na fesoasoani ai le Alii i le nuu o Alema i le taimi o o latou puapuaga. Atonu e te faaalu se minute e mafaufau loloto ai i le ala ua Ia faamafanafanaina ma faamalosiauina ai oe i le totonugalemu o ou tofotofoga ma puapuaga.
Sa faaali e le nuu o Alema le faatuatua ma le onosai, ma na iu ina laveaiina i latou e le Alii. Sa Ia “faia … ia oo mai se moe gase i luga o sa Lamanā” (Mosaea 24:19), lea na mafai ai ona sosola atu Alema ma lona nuu i le laueleele o Saraemila. (Tagai Mosaea 24:17–25.)
Na aoao mai Elder David A. Bednar o le Korama a Aposetolo e Toasefululua e uiga i le aafiaga lenei:
E lei vave ona aveesea ia avega ma faigata mai le nuu. Peitai na faamalosia Alema ma ona soo, ma o le faateleina o lo latou malosi na faamamaina ai avega. …
O avega tulagaese i o tatou olaga taitoatasi ua fesoasoani lea ia i tatou e faalagolago atu ai i le amiotonu, alofa mutimutivale, ma le alofa tunoa o le Mesia Paia (tagai2 Nifae 2:8). Ou te molimau atu ma folafola atu o le a fesoasoani mai le Faaola ia i tatou e tauave a tatou avega ma le faigofie (tagaiMosaea 24:15). A o tatou amoina faatasi ma Ia e ala i feagaiga paia ma maua [Lona] mana gafatia … i o tatou olaga, o le a faateleina ona tatou saili atu ia malamalama ma ola e tusa ma Lona finagalo. O le a tatou tatalo foi mo le malosi e aoao ai mai, suiga, pe talia o tatou tulaga nai lo le tatalo faifaipea ina ia suia e le Atua o tatou tulaga e tusa ma o tatou loto. (“Tauave ma le Faigofie a Latou Avega,” Liahona, Me 2014, 89, 90)
Tusifaamaumau Ou Lagona Uunaia
Manatunatu i auala eseese ua faateleina ai e le Tama Faalelagi ma Iesu Keriso lou gafatia e tauave ai au avega. Mafaufau e faailoa atu i le tatalo lou agaga faafetai mo la Laua fesoasoani.