មេរៀនទី ១០ ឯកសារគ្រូបង្រៀន ៖ សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍

« មេរៀនទី ១០ ឯកសារគ្រូបង្រៀន ៖ សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ១០ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ១០ ឯកសារគ្រូបង្រៀន

សេចក្តីសញ្ញាថ្មី ហើយអស់កល្បអស់កាលជានិច្ចនៃអាពាហ៍ពិពាហ៍

ការចូលទៅក្នុង និងការគោរពតាម « សេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ » ( គោលលទ្ធិ និង សេចក្ដីសញ្ញា ១៣១:២ ) គឺជាការណ៍ដ៏ចាំបាច់បំផុតសម្រាប់ភាពតម្កើងឡើង ។ នៅក្នុងមេរៀននេះ សិស្សនឹងមានឱកាសពន្យល់ពីសារៈសំខាន់ដ៏អស់កល្បជានិច្ចនៃសេចក្ដីសញ្ញាអាពាហ៍ពិពាហ៍ និងមូលហេតុដែលពួកគេខិតខំដើម្បីមានអាពាហ៍ពិពាហ៍ដ៏អស់កល្បជានិច្ចមួយ ។ ពួកគេក៏នឹងពិចារណាពីអ្វីដែលពួកគេអាចធ្វើបាន ដើម្បីរៀបចំខ្លួនចូលទៅក្នុង ឬគោរពតាមសេចក្ដីសញ្ញាអាពាហ៍ពិពាហ៍របស់ពួកគេផងដែរ ។

យោបល់សម្រាប់ការបង្រៀន

អាពាហ៍ពិពាហ៍ដ៏នៅអស់កល្បជានិច្ចគឺជាភាពជាដៃគូជាមួយនឹងព្រះ ។

សូមពិចារណាចាប់ផ្ដើមមេរៀន ដោយការអញ្ជើញសិស្សពីរបីនាក់ឲ្យចែកចាយអ្វីដែលពួកគេបានរៀន មកពីការសន្ទនារបស់ពួកគេជាមួយនឹងនរណាម្នាក់ ដែលបានផ្សារភ្ជាប់នៅក្នុងព្រះវិហារបរិសុទ្ធ ( សូមមើលការអញ្ជើញនៅក្នុង ផ្នែកទី ១ នៃឯកសាររៀបចំ ) ។ ( កំណត់ចំណាំ ៖ អ្នកអាចសួរសិស្សម្នាក់ ឬពីរនាក់ពីរបីថ្ងៃពីមុនដល់ពេលចូលរៀនថា តើពួកគេអាចរៀបចំខ្លួនដើម្បីចែកចាយអ្វី ដែលពួកគេបានរៀនមកពីការសន្ទនារបស់ពួកគេដែរឬទេ ) ។

អ្នកអាចសួរសិស្សថា តើពួកគេមានសំណួរអំពីសេចក្ដីសញ្ញាអាពាហ៍ពិពាហ៍ ឬពិធីបរិសុទ្ធនៃការផ្សារភ្ជាប់អាពាហ៍ពិពាហ៍ដែរឬទេ ។ ( សូមពិចារណាសម្របមាតិកានៃមេរៀននេះទៅតាមសំណួរដែលសិស្សសួរ ។ សូមប្រាកដថា ចម្លើយទាំងឡាយចំពោះសំណួររបស់សិស្សគោរពទៅតាមភាពពិសិដ្ឋនៃព្រះវិហារបរិសុទ្ធ ) ។

ការអភិវឌ្ឍការបង្រៀន និងការរៀនសូត្ររបស់យើង

ឆ្លើយតបទៅនឹងសំណួររបស់សិស្សដោយមានការគិតគូរ ។ សូមថ្លែងអំណរគុណ នៅពេលសិស្សស្ម័គ្រចិត្តសួរសំណួរនានា ។ សូមចំណាយពេលស្ដាប់ និងព្យាយាមយល់ពីសំណួររបស់ពួកគេដោយស្មោះសរ ហើយសួរសំណួរតាមដានបើចាំបាច់ ។ ពេលខ្លះ វាអាចសមរម្យដើម្បីឆ្លើយនឹងសំណួរនោះចំៗភ្លាម ខណៈពេលផ្សេងទៀត វាអាចប្រសើរជាងដើម្បីជួយសិស្សឲ្យស្វែងរកចម្លើយចំពោះសំណួររបស់ពួកគេផ្ទាល់ ។ អ្នកក៏អាចអញ្ជើញសមាជិកក្នុងថ្នាក់ផ្សេងទៀតឲ្យឆ្លើយនឹងសំណួរផងដែរ ។

សូមអានរួមគ្នាក្នុងសេចក្ដីថ្លែងការណ៍ខាងក្រោមនេះដោយ អែលឌើរ ប៉ាលី ភី ប្រាត្ត ក្នុងកូរ៉ុមនៃពួកសាវកដប់ពីរនាក់ ដែលលោកបានពិពណ៌នាអំពីអារម្មណ៍របស់លោក នៅពេលលោកបានដឹងជាលើកដំបូងថា អាពាហ៍ពិពាហ៍អាចនៅបន្ដរហូតដល់អស់កល្បជានិច្ចបាន ៖

វាចេញពី [ ព្យាការី យ៉ូសែប ស្ម៊ីធ ] ដែលខ្ញុំបានរៀនថា ភរិយាជាទីស្រឡាញ់របស់ខ្ញុំអាចត្រូវបានរក្សាទុកដល់ខ្ញុំសម្រាប់ក្នុងកាលវេលានេះ និងរហូតអស់កល្បជានិច្ច ។ … ខ្ញុំបានរៀនពីលោកថា យើងអាចបណ្ដុះនូវសេចក្ដីស្រឡាញ់ទាំងនេះ ហើយវាលូតលាស់ និងរីកចម្រើនឡើងដូចគ្នារហូតអស់កល្បជានិច្ច ខណៈលទ្ធផលនៃការរួមគ្នាដ៏មិនចេះចប់របស់យើងនឹងបង្កបង្កើតជាកូនជាចៅរាប់មិនអស់ដូចផ្កាយនៅលើស្ថានសួគ៌ ឬខ្សាច់នៅលើឆ្នេរសមុទ្រ ។ … ខ្ញុំបានមានសេចក្តីស្រឡាញ់ពីមុនមក តែមិនដឹងថាមកពីមូលហេតុអ្វីនោះទេ ។ ប៉ុន្ដែឥឡូវនេះ ខ្ញុំស្រឡាញ់—ដោយចិត្តបរិសុទ្ធ—ជាអារម្មណ៍ដ៏ប្រសើរ និងតម្កើងឡើងយ៉ាងខ្លាំង ។ ( Autobiography of Parley P. Pratt, ed. Parley P. Pratt Jr. [ ឆ្នាំ ១៩៣៨ ] ទំព័រ ២៩៧–៩៨ )

តើការដឹងថា អាពាហ៍ពិពាហ៍អាចនៅរហូតអស់កល្បជានិច្ចបាន អាចជះឥទ្ធិពលទៅលើជម្រើស និងអារម្មណ៍របស់យើងទាក់ទងទៅនឹងអាពាហ៍ពិពាហ៍នៅក្នុងជីវិតនេះយ៉ាងដូចម្ដេច ?

សូមពិនិត្យឡើងវិញនៅក្នុង គោលលទ្ធិ និង សេចក្តីសញ្ញា ១៣១:១–៤ រួមគ្នា ដោយរកមើលសេចក្ដីពិតបន្ថែមទៀត ដែលយ៉ូសែប ស្ម៊ីធ បានបង្រៀនអំពីអាពាហ៍ពិពាហ៍ដ៏អស់កល្បជានិច្ច ។ បន្ទាប់មក អ្នកអាចសួរសិស្សថា តើពួកគេចាប់អារម្មណ៍លើអ្វីខ្លះចេញពីវគ្គបទគម្ពីរនេះ ។ ពួកគេអាចរកឃើញសេចក្ដីពិតដូចតទៅនេះ ៖ អាពាហ៍ពិពាហ៍ដ៏នៅអស់កល្បជានិច្ចគឺជាកិច្ចតម្រូវឲ្យមាន ដើម្បីទទួលបានលំដាប់ដ៏ខ្ពស់បំផុតនៃនគរសេឡេស្ទាល ។ អស់អ្នកដែលចូលទៅក្នុងសេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ អាចមានការរីកចម្រើនដ៏អស់កល្បជានិច្ច ។

ចេញពីអ្វីដែលអ្នកបានរៀននៅក្នុង ផ្នែកទី ១ នៃឯកសាររៀបចំ តើសេចក្ដីសញ្ញាថ្មី ហើយអស់កល្បអស់កាលជានិច្ចខាងអាពាហ៍ពិពាហ៍ជាប់ទាក់ទងទៅនឹងអ័ប្រាហាំ និងសារ៉ាយតាមរបៀបណា ? ( សូមពិចារណាជួយសិស្សឲ្យដឹងថា ព្រះអម្ចាស់បានប្រទានការសន្យាដ៏ប្រាកដប្រជានេះដល់អ័ប្រាហាំ និងសារ៉ាយ រួមមានការសន្យាដែលពួកគេនឹងមានការរីកចម្រើនដ៏អស់កល្បជានិច្ចដែរ [ កូនចៅដ៏ច្រើនរាប់មិនអស់ ] ) ។
តើសេចក្ដីសញ្ញានៃអាពាហ៍ពិពាហ៍នេះអាចជួយយើងឲ្យប្រែក្លាយដូចជាព្រះមាតាបិតាសួគ៌របស់យើងយ៉ាងដូចម្ដេច ?

សូមដាក់បង្ហាញរូបភាពដែលភ្ជាប់មកជាមួយនេះ ដែលតំណាងឲ្យទំនាក់ទំនងនៃសេចក្ដីសញ្ញាអាពាហ៍ពិពាហ៍ ។ សូមឲ្យសិស្សពន្យល់ពីអ្វីដែលអែលឌើរ ដេវីឌ អេ បែដណា បានបង្រៀនអំពីឌីយ៉ាក្រាមនេះ ( សូមមើល ផ្នែកទី ១ នៃឯកសាររៀបចំ ) ។

សេចក្ដីសញ្ញាអាពាហ៍ពិពាហ៍បង្ហាញជារូបត្រីកោណ

សូមបង្ហាញសេចក្ដីថ្លែងការណ៍ដូចតទៅនេះដោយប្រធាន រ័សុល អិម ណិលសុន ៖ « អាពាហ៍ពិពាហ៍ក្នុងព្រះវិហារបរិសុទ្ធគឺមិនមែនតែរវាងស្វាមី និងភរិយាប៉ុណ្ណោះទេ តែវាឱបក្រសោបភាពជាដៃគូជាមួយនឹងព្រះ [ សូមមើល ម៉ាថាយ ១៩:៦ ] » ( « Celestial Marriage » Liahona ខែ វិច្ឆិកា ឆ្នាំ ២០០៨ ទំព័រ ៩៣ ) ។

តើការយល់ពីសេចក្ដីពិតនេះអាចមានឥទ្ធិពលលើជម្រើស ដែលស្វាមី និងភរិយាធ្វើការជ្រើសរើសយ៉ាងដូចម្ដេច ?

ប្រសិនបើសិស្សម្នាក់ ឬច្រើននាក់នៅក្នុងថ្នាក់របស់អ្នកបានផ្សារភ្ជាប់នៅក្នុងព្រះវិហារបរិសុទ្ធ សូមពិចារណាសួរពួកគេថា តើពួកគេស្ម័គ្រចិត្តចែកចាយជាមួយសិស្សក្នុងថ្នាក់ អំពីអារម្មណ៍របស់ពួកគេស្ដីពីការបានផ្សារភ្ជាប់នៅក្នុងព្រះវិហារបរិសុទ្ធ ព្រមទាំងអត្ថន័យនៃសេចក្ដីសញ្ញានោះចំពោះពួកគេដែរឬទេ ។ ( អ្នកអាចសួរសិស្សទាំងនេះពីមុនមកថ្នាក់រៀន ដើម្បីឲ្យពួកគេមានពេលវេលារៀបចំចម្លើយរបស់ពួកគេ ) ។

សូមបង្ហាញ និងអានសេចក្ដីថ្លែងការណ៍ខាងក្រោមដោយប្រធាន ថូម៉ាស អេស ម៉នសុន រួមគ្នា ៖

ខ្ញុំសូមដាស់តឿនបងប្អូនឲ្យបន្ដមានទស្សនវិស័យដ៏អស់កល្បជានិច្ច ។ សូមធ្វើឲ្យប្រាកដថា អាពាហ៍ពិពាហ៍នៅថ្ងៃអនាគតរបស់បងប្អូនគឺជាអាពាហ៍ពិពាហ៍ក្នុងព្រះវិហារបរិសុទ្ធ ។ វាពុំមានព្រឹត្តិការណ៍ណាផ្អែមល្ហែមជាងនេះ គ្មានពេលណាពិសិដ្ឋជាងនេះ ដូចថ្ងៃដ៏ពិសេសនៃអាពាហ៍ពិពាហ៍របស់បងប្អូននោះឡើយ ។ នៅពេលនោះ និងនៅទីនោះ បងប្អូនមើលឃើញអំណរនៃនគរសេឡេស្ទាល ។ សូមប្រុងប្រយ័ត្ន ហើយសូមកុំឲ្យការល្បួងលួចយកពរជ័យនេះពីបងប្អូនបានឡើយ ។ ( « Whom Shall I Marry? » New Era ខែ តុលា ឆ្នាំ ២០០៤ ទំព័រ ៦ )

ហេតុអ្វីបានជាគោលលទ្ធិអំពីអាពាហ៍ពិពាហ៍ដ៏នៅអស់កល្បជានិច្ច អាចនាំឲ្យមានអារម្មណ៍ដ៏ជ្រាលជ្រៅនៃសេចក្ដីអំណរ និងសេចក្ដីស្រឡាញ់ ?

សូមពិចារណាសូមឲ្យសិស្សណាដែលស្ម័គ្រចិត្ត ឡើងប្រាប់ពីមូលហេតុ និងរបៀបដែលពួកគេខិតខំដើម្បីមានអាពាហ៍ពិពាហ៍ដ៏អស់កល្បជានិច្ចមួយ ។

អាពាហ៍ពិពាហ៍អាចនៅអស់កល្បជានិច្ចបាន សម្រាប់អស់អ្នកដែលស្មោះត្រង់ទៅនឹងសេចក្ដីសញ្ញារបស់ពួកគេ ។

សូមបែងចែកសិស្សជាក្រុមតូចៗ ។ សូមឲ្យច្បាប់ចម្លងនៃសំណៅចែកដែលភ្ជាប់មកនេះដល់ក្រុមម្នាក់ៗ ។ សូមណែនាំក្រុមទាំងឡាយឲ្យអានសាច់រឿងនេះ ហើយពិភាក្សាអំពីសំណួរជាមួយគ្នា ។

អាពាហ៍ពិពាហ៍ដ៏នៅអស់កល្បជានិច្ច

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១០

អ្នកជាមិត្តភក្ដិជាមួយស្វាមីភរិយាមួយគូនៅក្នុងវួដរបស់អ្នក ដែលមិនបានចូលរួមក្នុងការប្រជុំសាសនាចក្រ ។ អំឡុងការសន្ទនាជាមួយនឹងពួកគេ ស្វាមីម្នាក់បានពោលថា « កុំបារម្ភពីពួកយើងដែលមិនទៅព្រះវិហារនៅពេលនេះឡើយ ។ យើងបានផ្សារភ្ជាប់នៅក្នុងព្រះវិហារបរិសុទ្ធរួចហើយ អញ្ចឹងយើងមិនអីនោះទេ ។ យើងនឹងរស់នៅជាមួយគ្នាជារៀងរហូត » ។

សូមគិតអំពីអ្វីដែលអ្នកបានរៀននៅក្នុង ផ្នែកទី ២ នៃឯកសាររៀបចំ តើគូស្វាមីភរិយានេះមិនបានយល់អ្វីខ្លះ អំពីអ្វីដែលតម្រូវឲ្យធ្វើនៅក្នុងអាពាហ៍ពិពាហ៍របស់ពួកគេ ដើម្បីឲ្យអាពាហ៍ពិពាហ៍នោះនៅអស់កល្បបាន ? ( អ្នកអាចរំឭកផ្នែកទី ២ ដោយសង្ខេបៗបាន ) ។
តើគុណសម្បត្តិ ឬជម្រើសអ្វីខ្លះដែលធ្វើឲ្យបុគ្គលម្នាក់ « នៅជាប់ក្នុងសេចក្ដីសញ្ញា [ នោះ ] » ? ( គោលលទ្ធិ និង សេចក្តីសញ្ញា ១៣២:១៩ ) ។
តើយើងអាចកាន់តែក្លាយដូចជាព្រះអង្គសង្គ្រោះ នៅក្នុងការកាន់តាមសេចក្ដីសញ្ញាដ៏ពិសិដ្ឋ និងការសន្យាទាំងឡាយ ដែលយើងបានចុះជាមួយព្រះដោយរបៀបណា ?

បន្ទាប់ពីទុកពេលគ្រប់គ្រាន់ហើយនោះ សូមឲ្យសិស្សពីរបីនាក់ចែកចាយអំពីអ្វីដែលពួកគេបានរៀននៅក្នុងការពិភាក្សាជាក្រុមរបស់ពួកគេ ។ នៅពេលសិស្សចែកចាយមតិយោបល់របស់ពួកគេ អ្នកអាចចង់សរសេរសេចក្ដីពិតមួយចំនួន ដែលពួកគេបានលើកឡើងដាក់នៅលើក្ដារខៀន ។ សេចក្ដីពិតទាំងនេះអាចរួមមានគំនិតស្រដៀងគ្នាដូចតទៅនេះ ៖ អាពាហ៍ពិពាហ៍របស់យើងអាចនៅអស់កល្បជានិច្ចបាន តែក្នុងករណីដែលពួកគេធ្វើឡើងដោយសិទ្ធិអំណាចរបស់ព្រះ និងក្នុងករណីដែលយើងបានជាប់នៅក្នុងសេចក្ដីសញ្ញាអាពាហ៍ពិពាហ៍នោះប៉ុណ្ណោះ ។ ព្រះវិញ្ញាណបរិសុទ្ធ ( ព្រះវិញ្ញាណបរិសុទ្ធនៃសេចក្ដីសន្យា ) នឹងថ្លែងទីបន្ទាល់ដល់ព្រះវរបិតាអំពីភាពស្មោះត្រង់របស់យើងចំពោះសេចក្ដីសញ្ញាអាពាហ៍ពិពាហ៍របស់យើង ។ ព្រះអង្គសង្គ្រោះគឺជាគំរូដ៏ល្អឥតខ្ចោះនៃការកាន់តាមសេចក្តីសន្យា និងសេចក្ដីសញ្ញានោះ ។

សូមថ្លែងទីបន្ទាល់ថា សេចក្ដីសង្ឃឹមគឺមានសម្រាប់មនុស្សគ្រប់រូប ដើម្បីមានអាពាហ៍ពិពាហ៍ដ៏អស់កល្បជានិច្ច ។ ព្រះអង្គសង្គ្រោះបានធ្វើឲ្យវាអាចកើតឡើងបានសម្រាប់ពួកយើងទាំងអស់គ្នា ដើម្បីប្រែចិត្ត ទទួលបានការអភ័យទោស ហើយចុះ និងរក្សាសេចក្តីសញ្ញាដ៏ពិសិដ្ឋជាមួយទ្រង់ ។ សូមរំឭកសិស្សថា ទោះបីជាអស់អ្នកដែលមិនមានឱកាសរៀបការនៅក្នុងជីវិតនេះ ក៏អាចបានផ្សារភ្ជាប់ទៅនឹងដៃគូម្នាក់សម្រាប់ភាពអស់កល្បបានដែរ ប្រសិនបើពួកគេស្មោះត្រង់នោះ ។

អ្នកអាចដាក់បង្ហាញសំណួរខាងក្រោម ហើយសូមអញ្ជើញឲ្យសិស្សជ្រើសរើសសំណួរមួយ ហើយកត់ត្រាចំណាប់អារម្មណ៍របស់ពួកគេអំពីវា ៖

តើខ្ញុំតាំងចិត្តដើម្បីនឹងរៀបអាពាហ៍ពិពាហ៍នៅក្នុងព្រះវិហារបរិសុទ្ធខ្លាំងប៉ុណ្ណា ? តើខ្ញុំអាចធ្វើការជ្រើសរើសអ្វីខ្លះនាពេលនេះ ដើម្បីគាំទ្រដល់ការតាំងចិត្តនោះ ?
តើខ្ញុំអាចធ្វើតាមគំរូរបស់ព្រះអង្គសង្គ្រោះបានកាន់តែប្រសើរ នៅក្នុងការរក្សាសេចក្ដីសញ្ញារបស់ខ្ញុំដោយរបៀបណា ? តើខ្ញុំនឹងទទួលបានព្រះចេស្ដារបស់ទ្រង់ ដើម្បីជួយខ្ញុំឲ្យចុះ និងរក្សាសេចក្ដីសញ្ញារបស់ខ្ញុំតាមរបៀបណា ?

សូមបញ្ចប់ដោយថ្លែងទីបន្ទាល់របស់អ្នកអំពីសេចក្ដីពិត ដែលបានពិភាក្សានៅក្នុងមេរៀននេះ ហើយសូមលើកទឹកចិត្តសិស្សឲ្យអនុវត្តតាមអ្វីដែលពួកគេមានអារម្មណ៍ ឬបានរៀនសូត្រ ។

សម្រាប់ពេលក្រោយ

សូមលើកទឹកចិត្តឲ្យសិស្សសិក្សា ក្នុងឯកសាររៀបចំសម្រាប់មេរៀនលើកក្រោយ ។ អ្នកអាចផ្ដល់សំណួរដូចខាងក្រោមនេះ ដើម្បីឲ្យសិស្សសញ្ជឹងគិត នៅពេលពួកគេសិក្សា ៖

តើព្រះអម្ចាស់កំពុងជួយខ្ញុំនៅក្នុងកិច្ចខិតខំរបស់ខ្ញុំ ដើម្បីស្វែងរកដៃគូដ៏អស់កល្បជានិច្ចម្នាក់ ( ឬសម្រាប់អស់អ្នកដែលរៀបការរួចហើយ ដើម្បីស្ថាបនាទំនាក់ទំនងដ៏អស់កល្បមួយ ) ដោយរបៀបណា ?
តើគុណសម្បត្តិដូចជាព្រះគ្រីស្ទដែលមាននៅក្នុងស្វាមី ឬភរិយា និងនៅក្នុងខ្លួនរបស់ខ្ញុំអ្វីខ្លះ ដែលមានអត្ថន័យខ្លាំងបំផុតចំពោះខ្ញុំ ?