មេរៀនទី ១៧ ឯកសារគ្រូបង្រៀន ៖ ភាពជាដៃគូស្មើភាពគ្នានៅក្នុងអាពាហ៍ពិពាហ៍

« មេរៀនទី ១៧ ឯកសារគ្រូបង្រៀន ៖ ភាពជាដៃគូស្មើភាពគ្នានៅក្នុងអាពាហ៍ពិពាហ៍ » ឯកសារគ្រូបង្រៀន ក្រុមគ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ១៧ ឯកសារគ្រូបង្រៀន » ឯកសារគ្រូបង្រៀន ក្រុមគ្រួសារដ៏អស់កល្បជានិច្ច

មេរៀនទី ១៧ ឯកសារគ្រូបង្រៀន

ភាពជាដៃគូស្មើភាពគ្នានៅក្នុងអាពាហ៍ពិពាហ៍

តាំងពីសម័យលោកអ័ដាម និងនាងអេវ៉ាមក ព្រះអម្ចាស់មានព្រះរាជបំណងឲ្យស្វាមី និងភរិយាធ្វើជាដៃគូស្មើភាពគ្នានៅក្នុងចំណងអាពាហ៍ពិពាហ៍ ។ ព្យាការីដែលនៅរស់បានបញ្ជាក់សាជាថ្មីពីគោលការណ៍នេះនៅសម័យរបស់យើង ។ នៅក្នុងមេរៀននេះ សិស្សនឹងមានឱកាសពន្យល់ពីការបង្រៀនដំណឹងល្អអំពីភាពជាដៃគូស្មើភាពគ្នានៅក្នុងអាពាហ៍ពិពាហ៍ និងការធ្វើជាអធិបតីនៅក្នុងក្រុមគ្រួសារ ។ សិស្សក៏នឹងត្រូវបានអញ្ជើញឲ្យកំណត់ពីអ្វីដែលពួកគេអាចធ្វើបាននាពេលឥឡូវនេះ ដើម្បីមានភាពជាដៃគូស្មើភាពគ្នានៅក្នុងអាពាហ៍ពិពាហ៍ផងដែរ ។

យោបល់សម្រាប់ការបង្រៀន

ស្វាមី និងភរិយាមានន័យថាជាដៃគូស្មើភាពគ្នានៅក្នុងចំណងអាពាហ៍ពិពាហ៍ ។

សូមពិចារណាចាប់ផ្តើមមេរៀនដោយការបង្ហាញ ឬចែកចាយសំណៅចម្លងនៃសេចក្ដីថ្លែងការណ៍ដូចខាងក្រោមដោយប្រធាន ជីន ប៊ី ប៊ីងហាំ ដែលជាប្រធានសមាគមសង្គ្រោះទូទៅ ។ សូមឲ្យសិស្សក្នុងថ្នាក់អានសេចក្តីថ្លែងការណ៍នេះ ដោយរកមើលពីរបៀបដែលមារសត្រូវខិតខំបំផ្លាញអាពាហ៍ពិពាហ៍ និងក្រុមគ្រួសារ ។

លូស៊ីហ្វើរ ដឹងថា បើវាអាចបំផ្លាញសាមគ្គីភាពរវាងបុរស និងស្ដ្រីបាន បើវាអាចបំភាន់យើងទាក់ទងនឹងគុណតម្លៃដ៏ទេវភាព និងការទទួលខុសត្រូវក្នុងសេចក្ដីសញ្ញារបស់យើងបាន នោះវានឹងមានជោគជ័យក្នុងការបំផ្លាញក្រុមគ្រួសារ ដែលជាផ្នែកដ៏សំខាន់នៃភាពអស់កល្បជានិច្ច ។

សាតាំងញុះញង់ឲ្យមានការប្រៀបធៀប ដែលជាឧបករណ៍មួយដើម្បីបង្កើតឲ្យមានអារម្មណ៍ខ្ពស់ជាង ឬអន់ជាង ដោយលាក់សេចក្ដីពិតដ៏អស់កល្បមួយថា ភាពខុសគ្នាពីធម្មជាតិរបស់បុរស និងស្ដ្រីគឺត្រូវបានប្រទានមកពីព្រះ ហើយមានតម្លៃស្មើគ្នា ។ … គោលដៅរបស់វាគឺដើម្បីបង្កើនការប្រជែងយកអំណាច ជាជាងការអបអរនឹងការរួមចំណែកដ៏ពិសេសមួយរបស់បុរស និងស្ដ្រីក្នុងការបំពេញឲ្យគ្នាទៅវិញទៅមក ហើយរួមចំណែកដល់សាមគ្គីភាព ។ ( « United in Accomplishing God’s Work » Liahona ខែ ឧសភា ឆ្នាំ ២០២០ ទំព័រ ៦០–៦១ )

តើឧបសគ្គអ្វីខ្លះដែលអាចកើតឡើងចំពោះអាពាហ៍ពិពាហ៍មួយបាន ប្រសិនបើស្វាមី ឬភរិយាមានអារម្មណ៍ថាអន់ជាង ឬពូកែជាងគ្នានោះ ?

សូមរំឭកឡើងវិញក្នុង ម៉ូសេ ៣:១៨, ២១–២៣ ជាមួយសិស្ស ហើយសូមសួរ ៖

តើយើងអាចរៀនអ្វីខ្លះ ចេញពីរបៀបដែលព្រះអម្ចាស់បានបង្កើតនាងអេវ៉ាក្នុងសាច់ឈាម ដូចដែលមាននៅក្នុងដំណើររឿងនេះ ? ( តាមតម្រូវការ សូមណែនាំសិស្សឲ្យទៅរកការពន្យល់របស់ថ្នាក់ដឹកនាំសាសនាចក្រអំពីវគ្គបទគម្ពីរនេះនៅក្នុង ផ្នែកទី ១ នៃឯកសាររៀបចំ ។ សូមជួយសិស្សឲ្យរកឃើញសេចក្តីពិតមួយដូចតទៅនេះ ៖ ព្រះវរបិតាសួគ៌មានព្រះរាជបំណងថា ស្វាមី និងភរិយាត្រូវជួយគ្នាទៅវិញទៅមកក្នុងនាមជាដៃគូស្មើភាពគ្នានៅក្នុងចំណងអាពាហ៍ពិពាហ៍ ) ។

ដើម្បីជួយសិស្សឲ្យយល់ពីសេចក្ដីពិតនេះបន្ថែមទៀត សូមពិចារណាបង្ហាញនូវវត្ថុមួយចំនួនដែលអាចសម្រេចបានអ្វីមួយនៅពេលធ្វើការជាគូ ។ វត្ថុទាំងនេះអាចរួមមាន កន្ត្រៃមួយដែលមានមុខកាត់ពីរ សម និងកាំបិត ឧបករណ៍ភ្លេងដែលទាមទារធាតុផ្សំពីរដើម្បីលេង ( ដូចជាវីយូឡុង ) ស្បែកជើង ឬស្រោមដៃមួយគូ ប្រដាប់ញ៉ុកត្រចៀកពេលគេង ឬកាសស្ដាប់ជាដើម ។ សូមអញ្ជើញសិស្សឲ្យស្រមៃអ្វីដែលនឹងកើតឡើង ប្រសិនបើពួកគេប្រើប្រាស់របស់តែម្ខាងនៃគូនេះដើម្បីសម្រេចការងាររបស់ពួកគេនោះ ។

តើរបស់ទាំងនេះដូចជា ស្វាមី និងភរិយាធ្វើការជាមួយគ្នាយ៉ាងដូចម្តេច ?
តើពរជ័យអ្វីខ្លះដែលអាចប្រទានដល់អាពាហ៍ពិពាហ៍ ប្រសិនបើស្វាមី ឬភរិយាមើលឃើញ និងជួយគ្នាទៅវិញទៅមកក្នុងនាមជាដៃគូស្មើភាពគ្នា ?

ការអភិវឌ្ឍការបង្រៀន និងការរៀនសូត្ររបស់យើង

សូមទទួលយកចម្លើយរបស់សិស្សនៅក្នុងរបៀបវិជ្ជមានមួយ ។ នៅពេលសិស្សឆ្លើយ នោះគ្រូគួរតែទទួលស្គាល់តាមរបៀបមួយដ៏វិជ្ជមាន ។ ការណ៍នេះអាចជាការនិយាយថា « សូមអរគុណ » យ៉ាងសាមញ្ញៗ ឬយោបល់មួយអំពីចម្លើយនោះ ។ ការធ្វើដូច្នេះនឹងជួយសិស្សឲ្យទទួលអារម្មណ៍ថាមានគេស្ដាប់ ហើយមានតម្លៃ ។ ការឆ្លើយតបដ៏វិជ្ជមាននេះអាចជួយសិស្សឲ្យកាន់តែមានទំនុកចិត្តក្នុងការចែកចាយចម្លើយ ការយល់ដឹង និងបទពិសោធន៍នៅពេលខាងមុខ ។

សូមរំឭកសិស្សថា ពួកគេបានអាននៅក្នុងឯកសាររៀបចំថា ព្រះអម្ចាស់បានប្រគល់នូវទំនួលខុសត្រូវដ៏ពិសេសជាច្រើនឲ្យទៅស្វាមី និងភរិយានៅក្នុងគ្រួសារដែលមាន « តម្លៃ និងសារៈសំខាន់ស្នើគ្នា » ( ឃ្វីនថិន អិល ឃុក « Great Love for Our Father’s Children » Liahona ខែ ឧសភា ឆ្នាំ ២០១៩ ទំព័រ ៧៩ ) ។ ស្រដៀងគ្នានេះដែរ ព្យាការីទាំងឡាយបានបង្រៀនថា « នៅក្នុងការទទួលខុសត្រូវដ៏ពិសិដ្ឋទាំងនេះ ឪពុក និងម្តាយមានកាតព្វកិច្ចដើម្បីជួយគ្នាទៅវិញទៅមកជាដៃគូស្មើគ្នា » ( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។

អ្នកអាចនឹងប្រាប់ថា ទំនួលខុសត្រូវទាំងនេះមួយចំនួននឹងត្រូវពិភាក្សានៅក្នុងមេរៀនក្រោយៗ ។ ប៉ុន្តែដើម្បីចាប់ផ្តើមការពិភាក្សាពីឧទាហរណ៍មួយ សូមបង្ហាញនូវសេចក្តីពិតដូចតទៅនេះ ៖ « តាមការរៀបចំដ៏ទេវភាពនេះ ឪពុកត្រូវបានចាត់ឲ្យធ្វើជាអ្នកដឹកនាំនៅក្នុងគ្រួសាររបស់ខ្លួនដោយសេចក្ដីស្រឡាញ់ និងសេចក្ដីសុចរិត ហើយមានភារកិច្ចក្នុងការផ្គត់ផ្គង់សេចក្ដីត្រូវការក្នុងជីវិត ព្រមទាំងការពារក្រុមគ្រួសារខ្លួនផង » ( « ក្រុមគ្រួសារ ៖ ការប្រកាសដល់ពិភពលោក » ) ។

តើអ្នកនឹងពន្យល់ពីអត្ថន័យនៃការធ្វើជាអ្នកដឹកនាំដោយសេចក្ដីស្រឡាញ់ និងសេចក្ដីសុចរិតយ៉ាងដូចម្ដេច ? តើអ្នកគិតថា យើងអាចរៀនអ្វីខ្លះអំពីការធ្វើជាអ្នកដឹកនាំចេញពីគំរូរបស់ព្រះអង្គសង្គ្រោះ ? ( ប្រសិនបើចាំបាច់ សូមរំឭកឡើងវិញជាមួយសិស្សនូវ សេចក្តីថ្លែងការណ៍មកពី ក្បួនខ្នាតទូទៅ និង សេចក្តីថ្លែងការណ៍របស់ប្រធាន អ៊ែសរ៉ា ថាហ្វ ប៊ែនសឹន នៅក្នុងផ្នែកទី ២ នៃឯកសាររៀបចំ ) ។

សូមរំឭកសិស្សថា គោលលទ្ធិ និង សេចក្តីសញ្ញា ១២១:៤១–៤៣ កំណត់គុណលក្ខណៈដូចជាព្រះគ្រីស្ទមួយចំនួន ដែលអាចទាក់ទងនឹងការធ្វើជាអ្នកដឹកនាំដោយសុចរិតនៅក្នុងគ្រួសារ ។ សូមស្នើសុំឲ្យសិស្សរំឭកឡើងវិញនូវវគ្គបទគម្ពីរនេះ និងអ្វីដែលពួកគេបានឆ្លើយដើម្បីធ្វើ សកម្មភាព « កត់ត្រាគំនិតរបស់អ្នក » នៅក្នុងផ្នែកទី ២ នៃឯកសាររៀបចំ ។ សូមអញ្ជើញសិស្សពីរបីនាក់ឲ្យចែកចាយអ្វី ដែលពួកគេបានសរសេរជាមួយសិស្សនៅក្នុងថ្នាក់ ។ បន្ទាប់មក សូមពិចារណាសួរសំណួរដូចតទៅនេះ ៖

តើអ្នកបានឃើញ ឬបានឮអ្វីខ្លះអំពីគំរូនៃភាពជាដៃគូស្មើភាពគ្នា និងការដឹកនាំដ៏សុចរិតនៅក្នុងគ្រួសារ ?

ស្វាមី និងភរិយាត្រូវប្រឹក្សាជាមួយគ្នានៅក្នុងការធ្វើការសម្រេចចិត្តសម្រាប់ក្រុមគ្រួសាររបស់ពួកគេ ។

សាច់រឿងខាងក្រោមនេះគឺត្រូវបានតាក់តែងឡើងដើម្បីជួយសិស្សឲ្យវិភាគការយល់ដឹងរបស់ពួកគេអំពីភាពជាដៃគូស្មើភាពគ្នានៅក្នុងអាពាហ៍ពិពាហ៍ និងការដឹកនាំនៅក្នុងគ្រួសារ ។ ( សូមពិចារណាពីរបៀបដែលអ្នកអាចសម្របស្ថានភាពនេះឲ្យសមស្រប ដើម្បីឆ្លុះបញ្ចាំងពីវប្បធម៌របស់អ្នកឲ្យកាន់តែខ្លាំង ឬដើម្បីបំពេញតាមតម្រូវការជាក់លាក់ណាមួយដែលសិស្សរបស់អ្នកអាចមាន ) ។

សូមពិនិត្យមើលសាច់រឿងខាងក្រោម ហើយពិភាក្សាសំណួរនៅចុងបញ្ចប់នៃឯកសារចែកជូននេះ ដោយធ្វើការជាមួយសិស្សក្នុងថ្នាក់ទាំងមូល ឬជាក្រុមតូចៗ ។

ដំណើររឿងរបស់នីខូឡាស និង អ៊ែលីណា

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១៧

នីខូឡាស និង អ៊ែលីណា បានរស់នៅក្នុងជីវិតអាពាហ៍ពិពាហ៍យ៉ាងសប្បាយរីករាយអស់រយៈពេល ១០ ឆ្នាំ ហើយមានកូនបីនាក់ ។ ពួកគេទាំងពីរនាក់ចង់ឲ្យគ្រួសាររបស់ពួកគេស្ថាបនាឡើងនៅលើគ្រឹះនៃព្រះយេស៊ូវគ្រីស្ទ និងដំណឹងល្អរបស់ទ្រង់ ហើយពួកគេម្នាក់ៗខិតខំបំពេញនូវទំនួលខុសត្រូវគ្រួសាររបស់ពួកគេដែលបានតែងតាំងឡើងដោយព្រះ ។

ក៏ដូចជាគូស្វាមីភរិយាដទៃទៀតដែរ នីខូឡាស និងអ៊ែលីណា មានការខ្វែងគំនិតគ្នា ។ ជាធម្មតា ការខ្វែងគំនិតរបស់ពួកគេគឺអំពីលុយ ។ នីខូឡាស ធ្វើការពេញម៉ោងនៅខាងក្រៅផ្ទះ ។ អ៊ែលីណា មើលថែកូនៗរបស់ពួកគេ និងផ្ទះសម្បែងពេញម៉ោង ដែលជាការងារបន្ថែមពីលើការងារតូចៗម្តងម្កាល ។ នីខូឡាស គិតថាតួនាទីរបស់គាត់ក្នុងការធ្វើជាអ្នកដឹកនាំនៅក្នុងផ្ទះ ក៏ដូចជាអ្នកដែលរកប្រាក់បានច្រើនជាង មានន័យថាគាត់គួរតែជាអ្នកសម្រេចចិត្តចុងក្រោយអំពីរបៀបដែលពួកគេចំណាយលុយ ។ អ៊ែលីណា មានអារម្មណ៍ថានាងគួរមានអំណាចច្រើនជាងនេះនៅក្នុងការសម្រេចចិត្តដែលទាក់ទងនឹងកូនៗ ដោយសារនាងនៅជាមួយពួកគេច្រើនជាង នីខូឡាស ។ កាលពីអតីតនៅពេលខ្លះ នាងបានចំណាយប្រាក់តាមចិត្តរបស់នាងដោយពុំប្រាប់ដល់ នីខូឡាស ឡើយ ។

នាពេលថ្មីៗនេះ នីខូឡាស និង អ៊ែលីណា បានពិភាក្សាអំពីការប្រើប្រាស់លុយដែលពួកគេបានសន្សំទុកខ្លះនោះ ។ នីខូឡាស ចង់យកលុយនោះទៅទិញឡានដែលធ្វើឲ្យគាត់ងាយស្រួលទៅធ្វើការ និងសម្រាប់ក្រុមគ្រួសារពួកគេទៅណាទៅណី ។ អ៊ែលីណា ចង់ប្រើលុយនោះនាំកូនទៅលេងសាច់ញាតិ និងបទពិសោធន៍សប្បាយៗជាមួយគ្នាពីមុនកូនៗកាន់តែធំ ។

នីខូឡាស និងអ៊ែលីណា បានថ្លឹងថ្លែងពីការខ្វែងគំនិតនេះ ប៉ុន្តែត្រូវតែធ្វើការសម្រេចចិត្ត ។

តើអ្នកគិតថា អ្វីជាការប្រឈមដ៏ធំបំផុតដែលនីខូឡាស និងអ៊ែលីណាកំពុងជួបប្រទះ ក្នុងការសម្រេចចិត្តថាតើត្រូវចំណាយលុយលើអ្វី ?
តើអ្នកគិតថា ពួកគេត្រូវយល់យ៉ាងណាខ្លះអំពីភាពជាដៃគូស្មើភាពគ្នា និងការធ្វើជាអ្នកដឹកនាំទាក់ទងនឹងការសម្រេចចិត្តសម្រាប់គ្រួសាររបស់ពួកគេ ? ( សូមមើល ផ្នែកទី ៣ នៃឯកសាររៀបចំ ) ។
ប្រសិនបើអ្នកជា នីខូឡាស ឬ អ៊ែលីណា តើអ្នកនឹងដោះស្រាយជាមួយស្វាមី ឬភរិយារបស់អ្នកយ៉ាងដូចម្តេច ដើម្បីប្រឹក្សាគ្នាអំពីការសម្រេចចិត្តនេះតាមរបៀបដូចជាព្រះគ្រីស្ទ ?

ក្រោយពីសិស្សបានមានពេលគ្រប់គ្រាន់ដើម្បីពិភាក្សាពីសាច់រឿងនេះហើយ នោះអ្នកអាចសួរ ៖

តើការប្រឹក្សាជាមួយគ្នាដោយសេចក្ដីសុចរិតអាចផ្ដល់ពរជ័យដល់គូស្វាមីភរិយា និងកូនៗរបស់ពួកគេយ៉ាងដូចម្ដេច ?

ដើម្បីបញ្ចប់ សូមបង្ហាញសំណួរខាងក្រោម ហើយផ្តល់ពេលវេលាគ្រប់គ្រាន់ឲ្យសិស្សសញ្ជឹងគិតដោយស្ងៀមស្ងាត់ និងកត់ត្រាចំណាប់អារម្មណ៍ណាមួយដែលពួកគេអាចទទួលបាន ។

តើឥរិយាបថ គុណលក្ខណៈ ឬការអនុវត្តដូចជាព្រះគ្រីស្ទអ្វីខ្លះ ដែលខ្ញុំអាចអភិវឌ្ឍ ឬពង្រឹងដើម្បីជួយខ្ញុំឲ្យបណ្តុះនូវភាពជាដៃគូស្មើភាពគ្នានៅក្នុងចំណងអាពាហ៍ពិពាហ៍របស់ខ្ញុំ ? តើអ្នកស្វែងរកជំនួយរបស់ព្រះអម្ចាស់នៅក្នុងកិច្ចខិតខំរបស់អ្នកយ៉ាងដូចម្តេច ?

សម្រាប់ពេលក្រោយ

សូមទទួលស្គាល់ជាមួយនឹងសិស្សថា ជាញឹកញាប់ការព្រួយបារម្ភចម្បងរបស់គូស្វាមីភរិយា ខណៈដែលពួកគេពិចារណាពីការរៀបការ និងកូនៗគឺជារបៀបដែលពួកគេនឹងអាចផ្គត់ផ្គង់តម្រូវការហិរញ្ញវត្ថុរបស់ពួកគេ ។ សូមលើកទឹកចិត្តសិស្សឲ្យសិក្សាប្រកបដោយការអធិស្ឋាននៅក្នុង ឯកសាររៀបចំ នៅមេរៀនក្រោយ ហើយស្តាប់តាមការបំផុសគំនិតដែលអាចជួយពួកគេឲ្យធ្វើការសម្រេចចិត្តលើផ្នែកហិរញ្ញវត្ថុដោយឈ្លាសវៃ ហើយកាន់តែធ្វើជាមនុស្សខ្លួនទីពឹងខ្លួន ។