« មេរៀនទី ២០ ឯកសារគ្រូបង្រៀន ៖ ការទទួលខុសត្រូវដ៏ពិសិដ្ឋរបស់ឪពុក » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ២០ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ២០ ឯកសារគ្រូបង្រៀន
ការទទួលខុសត្រូវដ៏ពិសិដ្ឋរបស់ឪពុក
ព្រះវរបិតាសួគ៌បានចាត់តាំងបុត្រាទាំងឡាយរបស់ទ្រង់ឲ្យមានការទទួលខុសត្រូវដ៏ពិសិដ្ឋ ដើម្បីការពារក្រុមគ្រួសាររបស់ពួកគេ ។ នៅក្នុងមេរៀននេះ សិស្សនឹងពន្យល់អំពីរបៀបដែលបុរសអាចបំពេញការទទួលខុសត្រូវនេះបាន ។ ពួកគេនឹងពិភាក្សាពីរបៀបដែលព្រះវរបិតាសួគ៌ និងព្រះយេស៊ូវគ្រីស្ទធ្វើជាគំរូដ៏ល្អឥតខ្ចោះនៃតួនាទីជាឪពុក ក្នុងការការពារក្រុមគ្រួសាររបស់ពួកគេ ។ សិស្សក៏នឹងពិចារណា និងរៀបចំផែនការអំពីរបៀបដែលពួកគេអាចពឹងផ្អែកលើជំនួយពីស្ថានសួគ៌បានផងដែរ នៅពេលពួកគេចែកចាយទំនួលខុសត្រូវដ៏ពិសិដ្ឋនេះជាមួយនឹងគូស្វាមីភរិយារបស់ពួកគេ ។
កំណត់ចំណាំ ៖ ទំនួលខុសត្រូវរបស់បុរសក្នុងការធ្វើជាអធិបតី និងផ្គត់ផ្គង់ដល់ក្រុមគ្រួសាររបស់ពួកគេត្រូវបានពិភាក្សានៅក្នុងមេរៀនមុន ។
យោបល់សម្រាប់ការបង្រៀន
ព្រះគឺជាគំរូដ៏ល្អឥតខ្ចោះនៃភាពជាឪពុក ។
ជាផ្នែកមួយនៃការប្រជុំធម្មនិដ្ឋាននៅក្នុងមេរៀននេះ សូមពិចារណាច្រៀងទំនុកតម្កើងបទ « ឱ ! ព្រះបិតា » ( ទំនុកតម្កើង ល.រ. ១៨១ ) ឬទំនុកតម្កើងមួយទៀត ដែលទាក់ទងនឹងព្រះវរបិតាសួគ៌របស់យើង ។
អ្នកអាចចាប់ផ្ដើមមេរៀននេះ ដោយការបង្ហាញរូបភាពឪពុកជាមួយគ្រួសាររបស់គាត់ ហើយសូមសួរបុរសៗនៅក្នុងថ្នាក់នូវសំណួរខាងក្រោមនេះ ៖
-
តើអ្នកមានគំនិត អារម្មណ៍ ឬការព្រួយបារម្ភអ្វីខ្លះអំពីការធ្វើជាឪពុក ?
បន្ទាប់មក សូមសួរសិស្សក្នុងថ្នាក់ ៖
-
តើអ្នកគិតថា ការធ្វើជាឪពុកដ៏សុចរិតនៅសម័យរបស់យើងត្រូវជួបនឹងឧបសគ្គដ៏ធំបំផុតអ្វីខ្លះ ? ( សូមពិចារណាអញ្ជើញសិស្សឲ្យរំឭក សេចក្ដីថ្លែងការណ៍របស់ប្រធាន លីនដា ខេ ប៊ើតុន នៅក្នុងផ្នែកទី ១ នៃឯកសាររៀបចំឡើងវិញ ) ។
-
តើមានភាពខុសគ្នាយ៉ាងណាខ្លះ រវាងរបៀបដែលមនុស្សមួយចំនួនមើលទៅភាពជាឪពុក និងរបៀបដែលព្រះទតទៅភាពជាឪពុក ?
សូមរំឭកសិស្សថា នៅពេលសិក្សាឯកសាររៀបចំ នោះពួកគេបានរៀនថា ព្រះវរបិតាសួគ៌គឺជាគំរូដ៏ល្អឥតខ្ចោះនៃភាពជាឪពុកដ៏សុចរិត ( សូមមើល សេចក្ដីថ្លែងការណ៍របស់អែលឌើរ ឌី ថត គ្រីស្តូហ្វឺសិន នៅក្នុងផ្នែកទី ១ នៃឯកសាររៀបចំ ) ។
ការអភិវឌ្ឍការបង្រៀន និងការរៀនសូត្ររបស់យើង
គូសបញ្ជាក់ពីគំរូរបស់ព្រះវរបិតាសួគ៌ និងព្រះយេស៊ូវគ្រីស្ទ ។ ព្រះអង្គសង្រ្គោះបានបង្គាប់ពួកសិស្សរបស់ទ្រង់ឲ្យធ្វើដូចជាទ្រង់ ( សូមមើល នីហ្វៃទី៣ ២៧:២៧ ) ។ សូមរកមើលវិធីដើម្បីគូសបញ្ជាក់អំពីគំរូដ៏ល្អឥតខ្ចោះរបស់ទ្រង់ និងរបស់ព្រះវរបិតាសួគ៌ នៅពេលអ្នកពិភាក្សាអំពីសេចក្ដីពិតនៅក្នុងថ្នាក់រៀន ។
សូមពន្យល់ថា យើងអាចរៀនគោលការណ៍នៃភាពជាឪពុកដ៏សុចរិត ចេញពីការសិក្សាអំពីគំរូរបស់ព្រះយេស៊ូវគ្រីស្ទផងដែរ ។ សូមពិនិត្យមើល យ៉ូហាន ១០:១១–១៥ ជាមួយគ្នាឡើងវិញ ហើយពិភាក្សាអំពីអ្វីដែលសិស្សបានរៀនអំពីភាពជាឪពុកដ៏សុចរិត មកពីតួនាទីរបស់ព្រះអង្គសង្គ្រោះក្នុងនាមជាអ្នកគង្វាលដ៏ល្អរបស់យើង ។
-
តើបុរសអាចធ្វើអ្វីខ្លះដើម្បី « ស៊ូប្តូរជីវិត » ( ខទី ១៥ ) ឬចុះចាញ់ ដើម្បីបំពេញតាមទំនួលខុសត្រូវដ៏ពិសិដ្ឋរបស់ពួកគេក្នុងនាមជាឪពុក ? ( សូមពិចារណាចែកចាយសេចក្ដីថ្លែងការណ៍ដូចតទៅនេះដោយអែលឌើរ គ្រីស្តូហ្វឺសិន ទុកជាផ្នែកមួយនៃការពិភាក្សានេះ ៖ « ចូរយើង [ បុរសៗ ] កុំជឿទៅលើការយល់ឃើញដ៏ហួសហេតុនៃបុគ្គលនិយម និងស្វ័យភាពនៅក្នុងវប្បធម៌សព្វថ្ងៃនេះឡើយ ចូរគិតដំបូងគេអំពីសុភមង្គល និងសុខុមាលភាពរបស់អ្នកដទៃ » [ « Fathers » Liahona ខែ ឧសភា ឆ្នាំ ២០១៦ ទំព័រ ៩៦ ] ) ។
ដើម្បីជួយសិស្សឲ្យស្គាល់គោលការណ៍បន្ថែមទៀតនៃភាពជាឪពុក មកពីគំរូរបស់ព្រះវរបិតាសួគ៌ និងព្រះយេស៊ូវគ្រីស្ទ សូមរៀបចំសិស្សឲ្យធ្វើការជាក្រុមតូចៗ ហើយចាត់តាំងឲ្យមានមេក្រុមសម្រាប់ក្រុមនីមួយៗ ។ សូមអញ្ជើញសិស្សឲ្យជជែកគ្នាអំពីកិច្ចការរបស់ពួកគេនៅក្នុងសកម្មភាព « កត់ត្រាគំនិតរបស់អ្នក » នៅក្នុងផ្នែកទី ១ នៃឯកសាររៀបចំ ទុកជាផ្នែកមួយនៃការពិភាក្សារបស់ពួកគេ ។
បន្ទាប់ពីទុកពេលគ្រប់គ្រាន់ហើយនោះ សូមឲ្យសិស្សពីរបីនាក់ចែកចាយដល់សិស្សក្នុងថ្នាក់នូវអ្វី ដែលពួកគេបានពិភាក្សានៅក្នុងក្រុមរបស់ពួកគេ ។ អ្នកអាចអញ្ជើញសិស្សម្នាក់ឲ្យធ្វើជាអ្នកសរសេរ ហើយកត់ត្រាគោលការណ៍ទាំងនេះនៅលើក្ដារខៀន ។
ឪពុកមានទំនួលខុសត្រូវដ៏ពិសិដ្ឋក្នុងការការពារដល់ក្រុមគ្រួសាររបស់ខ្លួន ។
សូមអញ្ជើញសិស្សឲ្យធ្វើការនៅក្នុងក្រុមតូចៗដដែល សម្រាប់សកម្មភាពខាងក្រោមនេះ ។ សូមចែកច្បាប់ចម្លង « សំណៅចែកក្រុម ក » ដល់មេក្រុមចំនួនពាក់កណ្ដាល ហើយចែកច្បាប់ចម្លង « សំណៅចែកក្រុម ខ » ដល់មេក្រុមពាក់កណ្ដាលទៀត ។ សូមអញ្ជើញសិស្សឲ្យធ្វើតាមការណែនាំនៅលើសំណៅចែកនោះ ។
សំណៅចែកក្រុម ក—ឥទ្ធិពលការពាររបស់ឪពុកដែលពេញដោយក្ដីស្រឡាញ់ និងមានវត្តមានពេញលេញ
ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ២០
សូមអញ្ជើញឲ្យសមាជិកមួយក្រុមអានឮៗក្នុង សេចក្ដីថ្លែងការណ៍ដោយប្រធាន អិម រ័សុល បាឡឺដ នៅក្នុងផ្នែកទី ២ នៃឯកសាររៀបចំ ។ បន្ទាប់មក សូមសួរក្រុមរបស់អ្នក ៖
-
តើឪពុកអាចបំពេញទំនួលខុសត្រូវដ៏ពិសិដ្ឋរបស់គាត់ដើម្បីការពារគ្រួសាររបស់គាត់តាមវិធីណាខ្លះ ?
សូមចែកចាយសេចក្តីថ្លែងការណ៍ដូចតទៅនេះដោយអែលឌើរ ឌី ថត គ្រីស្តូហ្វឺសិន ជាមួយនឹងក្រុមរបស់អ្នក ៖ « ឪពុកគឺសំខាន់ ហើយមិនអាចជំនួសបានទេ » ( « Fathers » Liahona ខែ ឧសភា ឆ្នាំ ២០១៦ ទំព័រ ៩៣ ) ។ បន្ទាប់មក សូមសួរក្រុមរបស់អ្នក ៖
-
តើឪពុក « សំខាន់ ហើយមិនអាចជំនួសបាន » តាមរបៀបណា ? ( អ្នកអាចស្នើឲ្យក្រុមរបស់អ្នកយោងទៅលើការបង្រៀននៅក្នុង ផ្នែកទី ២ នៃឯកសាររៀបចំ នៅពេលពួកគេពិភាក្សាពីសំណួរនេះ ) ។
-
តើអ្នកបានទទួលពរជ័យ និងការការពារដោយសេចក្ដីស្រឡាញ់ និងការចូលរួមរបស់ឪពុក ឬបុរសដែលដូចជាឪពុកដ៏សុចរិតម្នាក់នៅក្នុងជីវិតរបស់អ្នកតាមរបៀបណា ?
© 2022 by Intellectual Reserve, Inc. All rights reserved.
សំណៅចែកក្រុម ក—ឥទ្ធិពលការពាររបស់ឪពុកដែលពេញដោយក្ដីស្រឡាញ់ និងមានវត្តមានពេញលេញ
សំណៅចែកក្រុម ខ—ការការពារក្រុមគ្រួសារតាមរយៈវិវរណៈដ៏ទេវភាព និងអំណាចបព្វជិតភាព
ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ២០
សូមពិនិត្យមើល ម៉ាថាយ ២:១៣–១៥ ជាមួយគ្នាសាឡើងវិញ ហើយរកមើលរបៀបដែលយ៉ូសែបបានការពារម៉ារា និងព្រះយេស៊ូវ ។
-
តើយើងអាចរៀនអ្វីខ្លះមកពីដំណើររឿងនេះ អំពីទីកន្លែងដែលឪពុកអាចទទួលបានជំនួយដើម្បីដឹកនាំ និងការពារក្រុមគ្រួសាររបស់ពួកគេ ? តើវិវរណៈអាចជួយដល់លោកឪពុកនៅជំនាន់របស់យើងដោយរបៀបណា ?
សូមអញ្ជើញសមាជិកមួយក្រុមឲ្យអានឮៗនូវសេចក្តីថ្លែងការណ៍ដោយ ប្រធាន ប៊យដ៏ ឃេ ផាកកឺ និង ប្រធាន រ័សុល អិម ណិលសុន នៅផ្នែកទី ៣ នៃឯកសាររៀបចំ ។ បន្ទាប់មក សូមសួរក្រុមរបស់អ្នក ៖
-
តើអ្នកចាប់អារម្មណ៍អ្វីខ្លះចេញពីក្នុងសេចក្ដីថ្លែងការណ៍ទាំងនេះ ហើយមូលហេតុអ្វី ?
-
តើអ្នកទទួលបានការការពារដោយវិវរណៈដ៏ទេវភាព ឬអំណាចបព្វជិតភាពរបស់ឪពុកដ៏សុចរិត ឬបុរសដែលដូចជាឪពុកនៅក្នុងជីវិតរបស់អ្នកតាមរបៀបណា ?
© 2022 by Intellectual Reserve, Inc. All rights reserved.
សំណៅចែកក្រុម ខ—ការការពារក្រុមគ្រួសារតាមរយៈវិវរណៈដ៏ទេវភាព និងអំណាចបព្វជិតភាព
បន្ទាប់ពីទុកពេលគ្រប់គ្រាន់ហើយនោះ សូមអញ្ជើញសិស្សម្នាក់មកពីក្រុមដែលបានសិក្សា « សំណៅចែកក្រុម ក » និងសិស្សម្នាក់ទៀតមកពីក្រុមដែលបានសិក្សា « សំណៅចែកក្រុម ខ » ឲ្យឡើងចែកចាយជាមួយនឹងសិស្សក្នុងថ្នាក់នូវអ្វី ដែលពួកគេបានរៀនមកពីការពិភាក្សារបស់ពួកគេ ។ ដើម្បីបន្ថែមទៅលើការរៀនសូត្ររបស់សិស្ស សូមពិចារណាចែករំលែកគំរូមួយអំពីរបៀបដែលអ្នកបានទទួលពរជ័យ និងការការពារដោយសេចក្ដីស្រឡាញ់ ការចូលរួម វិវរណៈដ៏ទេវភាព ឬអំណាចបព្វជិតភាពរបស់ឪពុកដ៏សុចរិត ឬបុរសដែលដូចជាឪពុកដ៏សុចរិតម្នាក់នៅក្នុងជីវិតរបស់អ្នក ។ ( ឬអ្នកអាចចែកចាយគំរូមួយមកពីជីវិតរបស់អែលឌើរ ហ្គែរី អ៊ី ស្ទីវ៉ែនសុន ក្នុងកូរ៉ុមនៃពួកសាវកដប់ពីរនាក់បាន ។ ឪពុករបស់អែលឌើរ ស្ទីវ៉ែនសុន បានទទួលការព្រមានមួយមកពីព្រះវិញ្ញាណ ដែលបានការពារអែលឌើរ ស្ទីវ៉ែនសុន ពីពស់មួយ នៅពេលគាត់នៅក្មេង [ សូមមើល រ៉ូបឺត ឌី ហែល « Elder Gary E. Stevenson: An Understanding Heart,” Ensign ខែ មិថុនា ឆ្នាំ ២០១៦ ទំព័រ ២៦ ] ) ។
អ្នកគួរតែពន្យល់ថា ក្នុងនាមជាដៃគូស្មើភាពគ្នានៅក្នុងចំណងអាពាហ៍ពិពាហ៍ នោះឪពុក និងម្តាយចែកចាយទំនួលខុសត្រូវក្នុងការការពារគ្រួសាររបស់ពួកគេ ។ ស្វាមី និងភរិយាគួរតែធ្វើការ និងប្រឹក្សារួមគ្នា នៅពេលពួកគេបំពេញកាតព្វកិច្ចដ៏ពិសិដ្ឋនេះ ។
សូមឲ្យសិស្សចំណាយពេលពិចារណាអំពីសំណួរខាងក្រោមនេះ ហើយកត់ត្រាចំណាប់អារម្មណ៍ទាំងឡាយ ដែលពួកគេទទួលបាន ( អ្នកគួរតែបង្ហាញសំណួរទាំងនេះ ) ៖
-
តើអ្នកអាចធ្វើអ្វីខ្លះនៅពេលនេះ ដើម្បីស្រឡាញ់ និងការពារគ្រួសាររបស់អ្នក និងមនុស្សដទៃឲ្យបានកាន់តែប្រសើរឡើង ?
-
តើអ្នកអាចគាំទ្របុរសក្នុងជីវិតរបស់អ្នកក្នុងការធ្វើជាអ្នកការពារដ៏ស័ក្ដិសមរបស់ក្រុមគ្រួសារពួកគេ និងមនុស្សដទៃដោយរបៀបណា ?
-
តើព្រះអម្ចាស់អាចជួយអ្នកនៅក្នុងកិច្ចខិតខំទាំងនេះបានយ៉ាងដូចម្តេច ?
ដើម្បីបញ្ចប់មេរៀននេះ អ្នក ឬសិស្សម្នាក់អាចថ្លែងទីបន្ទាល់អំពីសារៈសំខាន់របស់ឪពុក និងតម្រូវការរបស់ពួកគេដើម្បីធ្វើតាមគំរូរបស់ព្រះវរបិតាសួគ៌ និងព្រះយេស៊ូវគ្រីស្ទក្នុងការបំពេញនូវទំនួលខុសត្រូវដ៏ពិសិដ្ឋរបស់ពួកគេក្នុងគ្រួសារ ។
សម្រាប់ពេលក្រោយ
សូមពិចារណាលើកទឹកចិត្តសិស្សឲ្យគិតអំពីកូនៗនាពេលបច្ចុប្បន្ន ឬពេលអនាគតរបស់ពួកគេ នៅពេលពួកគេសិក្សា ឯកសាររៀបចំសម្រាប់ថ្នាក់លើកក្រោយ ។ អ្នកក៏អាចសូមឲ្យសិស្សចងចាំពេលវេលាកាលពីកុមារភាពរបស់ពួកគេផងដែរ ជាពេលពួកគេមានអារម្មណ៍ថាមានគេស្រឡាញ់ ត្រូវមានវិន័យ ឬរៀនបម្រើអ្នកដទៃ ។