មេរៀនទី ២៨ ឯកសារគ្រូបង្រៀន ៖ ការមានសេចក្ដីសង្ឃឹមក្នុងការបង្កើតគ្រួសារដ៏អស់កល្បជានិច្ច

« មេរៀនទី ២៨ ឯកសារគ្រូបង្រៀន ៖ ការមានសេចក្ដីសង្ឃឹមក្នុងការបង្កើតគ្រួសារដ៏អស់កល្បជានិច្ច » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ២៨ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ២៨ ឯកសារគ្រូបង្រៀន

ការមានសេចក្ដីសង្ឃឹមក្នុងការបង្កើតគ្រួសារដ៏អស់កល្បជានិច្ច

យើងគ្រប់គ្នាអាចមានសេចក្ដីសង្ឃឹមថា យើងអាចបង្កើតគ្រួសារដ៏អស់កល្បជានិច្ចមួយបាន ទោះជាស្ថានភាពគ្រួសាររបស់យើងយ៉ាងណាក៏ដោយ ។ មេរៀននេះនឹងជួយសិស្សឲ្យយល់ដឹងកាន់តែច្បាស់ថា ព្រះអម្ចាស់អាចជួយពួកគេឲ្យទទួលបានជោគជ័យនៅក្នុងការបង្កើតគ្រួសារដ៏អស់កល្បជានិច្ចមួយ ។ សិស្សក៏នឹងមានឱកាសដើម្បីចែកចាយ ហើយកំណត់ពីរបៀបអនុវត្តអ្វីដែលពួកគេបានរៀន និងដកពិសោធន៍នៅក្នុងដំណើរឆ្ពោះទៅរកគ្រួសារដ៏អស់កល្បជានិច្ចផងដែរ ។

យោបល់សម្រាប់ការបង្រៀន

ព្រះអម្ចាស់សព្វព្រះទ័យចង់ជួយយើងឲ្យមានភាពជោគជ័យក្នុងការបង្កើតក្រុមគ្រួសារដ៏អស់កល្បជានិច្ច ។

កំណត់ចំណាំ ៖ សូមជ្រើសរើសដោយប្រុងប្រយ័ត្ននូវជម្រើសក្នុងការបង្រៀនសម្រាប់ផ្នែកទីមួយនៃមេរៀននេះ ដែលនឹងផ្ដល់ពរជ័យច្រើនបំផុតដល់សិស្សរបស់អ្នក ។ សូមធានាឲ្យបានថា អ្នកទុកពេល ២០ នាទីសម្រាប់ផ្នែកចុងក្រោយនៃមេរៀននេះ ។

សូមចាប់ផ្ដើមមេរៀននេះដោយការអញ្ជើញសិស្សឲ្យពិចារណា ហើយកត់ត្រាគំនិតរបស់ពួកគេអំពីសំណួរខាងក្រោមនេះ ៖

តើអ្នកមានសេចក្ដីសង្ឃឹមអ្វីខ្លះក្នុងការបង្កើតគ្រួសារដ៏អស់កល្បជានិច្ច ?

ក្រោយពីមានពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យចែកចាយគំនិតរបស់ពួកគេ នៅពេលពួកគេយល់ព្រមធ្វើដូច្នោះ ។

សូមដាក់បង្ហាញសេចក្ដីពិតដូចតទៅនេះមកពីសេចក្ដីថ្លែងការណ៍របស់អែលឌើរ ដេវីឌ អេ បែដណា នៅក្នុង ផ្នែកទី ២ នៃឯកសាររៀបចំ ៖ « ដោយមានជំនួយរបស់ព្រះអម្ចាស់ បងប្អូនអាចបង្កើតគ្រួសារដ៏អស់កល្បជានិច្ចបាន » ( « A Welding Link » [ ការប្រជុំធម្មនិដ្ឋានសម្រាប់យុវមជ្ឈិមវ័យទូទាំងពិភពលោក ថ្ងៃទី ១០ ខែ កញ្ញា ឆ្នាំ ២០១៧ ] នៅលើគេហទំព័រ broadcasts.ChurchofJesusChrist.org ) ។

សូមជ្រើសយកសកម្មភាពមួយដូចខាងក្រោមនេះដើម្បីជួយសិស្សឲ្យយល់កាន់តែស៊ីជម្រៅអំពីសេចក្ដីពិតនេះ ហើយអនុញ្ញាតឲ្យពួកគេចែកចាយអ្វីដែលពួកគេបានរៀន កាលកំពុងរៀបចំខ្លួនសម្រាប់មេរៀននេះ ៖

ជម្រើសទី ១

សូមរំឭកសិស្សថា នៅក្នុងសកម្មភាព « កត់ត្រាគំនិតរបស់អ្នក » នៅក្នុងផ្នែកទី ១ នៃឯកសាររៀបចំ ពួកគេត្រូវបានអញ្ជើញឲ្យរកមើលគំរូមួយនៅក្នុងបទគម្ពីរ ឬបទពិសោធន៍គ្រួសាររបស់ពួកគេផ្ទាល់អំពីរបៀបដែលព្រះអម្ចាស់ជួយដល់អស់អ្នកដែលទុកចិត្តលើទ្រង់ ហើយស្វែងរកជំនួយរបស់ទ្រង់ ។ សូមទុកពេលឲ្យសិស្សពីរបីនាទីដើម្បីពិនិត្យមើលពីគំរូ និងចម្លើយរបស់ពួកគេចំពោះសំណួរទាំងនោះ ។

សូមបំបែកសិស្សជាគូ ឬជាក្រុមតូចៗ ។ សូមទុកពេលឲ្យសិស្សគ្រប់គ្រាន់ដើម្បីចែកចាយគំរូ និងចម្លើយរបស់ពួកគេ ។

នៅពេលសិស្សបានបញ្ចប់ សូមសរសេរប្រយោគមិនពេញលេញដូចតទៅនេះ ដាក់នៅលើក្តារខៀន ៖ សូមចងចាំជានិច្ចថា ៖ ។ សូមឲ្យក្រដាសមួយបំណែកតូច និងស្កុតមួយបន្ទះដល់សិស្សម្នាក់ៗ ។ សូមអញ្ជើញសិស្សឲ្យសរសេរពីរបៀបដែលពួកគេនឹងបំពេញប្រយោគនៅលើក្ដារខៀននេះ ដើម្បីបង្កើតជាសេចក្ដីពិតមួយដោយផ្អែកទៅលើអ្វីដែលពួកគេបានរៀននៅក្នុងការពិភាក្សាជាក្រុមរបស់ពួកគេ ដែលវាជួយពួកគេឲ្យមានសេចក្ដីសង្ឃឹមក្នុងការបង្កើតគ្រួសារដ៏អស់កល្បជានិច្ចមួយ ។ បន្ទាប់មក សូមឲ្យសិស្សបិទក្រដាសរបស់ពួកគេនៅលើជញ្ជាំងជុំវិញបន្ទប់ ។ ( ប្រសិនបើថ្នាក់របស់អ្នកតូច នោះអ្នកអាចសម្របសកម្មភាពនេះដោយអញ្ជើញសិស្សឲ្យសរសេរចម្លើយរបស់ពួកគេនៅលើក្ដារខៀនបាន ) ។

សូមទុកពេលពីរបីនាទីឲ្យសិស្សដើរជុំវិញបន្ទប់ ហើយអានសេចក្ដីថ្លែងការណ៍របស់គ្នាទៅវិញទៅមក ។ នៅពេលសិស្សបញ្ចប់ សូមលើកទឹកចិត្តពួកគេឲ្យកត់ត្រាសេចក្ដីពិតបន្ថែមទៀតណាមួយដែលពួកគេចង់ចងចាំ ឬចំណាប់អារម្មណ៍ណាមួយដែលពួកគេអាចទទួលបាន ។

ជម្រើសទី ២

សូមពន្យល់ថា ពួកយើងមួយចំនួនប្រហែលជាពិបាកនឹងមានសង្ឃឹមថាអាចបង្កើតឲ្យមានគ្រួសារដ៏អស់កល្បជានិច្ចមួយ ដោយសារយើងមិនបានដកពិសោធន៍នូវគន្លងគ្រួសារសុចរិតក្នុងក្រុមគ្រួសាររបស់យើងផ្ទាល់នៅឡើយ ។

តើយើងអាចរៀនអ្វីខ្លះ ចេញពីបទពិសោធន៍របស់ព្យាការីអ័ប្រាហាំដែលអាចផ្ដល់សេចក្ដីសង្ឃឹមដល់យើងបាន ? ( សូមលើកទឹកចិត្តសិស្សឲ្យរំឭកអ្វីដែលពួកគេបានរៀនអំពីអ័ប្រាហាំនៅក្នុង ផ្នែកទី ២ នៃឯកសាររៀបចំ ។ សូមពិចារណាអាន អ័ប្រាហាំ ១:២ រួមគ្នា ។ បន្ទាប់មក សូមជួយសិស្សឲ្យកំណត់សេចក្ដីពិតមួយដូចតទៅនេះ ៖ យើងអាចជាចំណុចបង្វែរសម្រាប់គ្រួសាររបស់យើងបាន ហើយជ្រើសរើសសេចក្ដីសុចរិត មិនថាស្ថានភាពគ្រួសាររបស់យើងមានសភាពបែបណានោះឡើយ ) ។
ប្រសិនបើមាននរណាម្នាក់ តើនរណាទៅដែលជាឧបករណ៍ក្នុងការចាប់ផ្ដើម ( ឬបន្ត ) គន្លងគ្រួសារសុចរិតនៅក្នុងគ្រួសាររបស់អ្នក ? តើការសម្រេចចិត្តរបស់បុគ្គលនេះបានធ្វើឲ្យមានភាពខុសប្លែកអ្វីខ្លះនៅក្នុងជីវិតរបស់អ្នក ?

សូមឲ្យសិស្សម្នាក់អានឮៗនូវឃ្លាទីបី និងទីប្រាំនៅក្នុងសេចក្ដីថ្លែងការណ៍របស់អែលឌើរ ដេវីឌ អេ បែដណា នៅក្នុង ផ្នែកទី ២ នៃឯកសាររៀបចំ ។

តើព្រះអម្ចាស់អាចជួយអ្នកឲ្យ « បន្ថែមកម្លាំងដល់តំណភ្ជាប់របស់អ្នក ហើយប្រហែលជាជួយស្ដារចំណងដែលដាច់នោះឡើងវិញផង » ដោយរបៀបណា ? ( « A Welding Link » ) ។ ( អ្នកអាចអញ្ជើញសិស្សឲ្យកត់ត្រាចម្លើយរបស់ពួកគេចំពោះសំណួរនេះ ជាជាងការពិភាក្សាវាជាថ្នាក់ ) ។

សូមអញ្ជើញសិស្សឲ្យសញ្ជឹងគិតពីសំណួរដែលពួកគេត្រូវបានអញ្ជើញឲ្យពិចារណាអំពីគន្លងគ្រួសារដែលត្រូវចាប់ផ្ដើម បន្ត ឬផ្ដាច់ចោល ( សូមមើល ផ្នែកទី ២ នៃឯកសាររៀបចំ ) ។ សូមលើកទឹកចិត្តសិស្សឲ្យកត់ត្រារាល់គំនិត ឬចំណាប់អារម្មណ៍ដែលពួកគេមាន ។

យើងនឹងមានពរជ័យ នៅពេលយើងសញ្ជឹងគិតពីអ្វីដែលយើងបានរៀន និងការដាក់ផែនការពីវិធីដើម្បីអនុវត្តវា ។

ការអភិវឌ្ឍការបង្រៀន និងការរៀនសូត្ររបស់យើង

សូមទុកពេលឲ្យសិស្សសញ្ជឹងគិត ។ សិស្សអាចស្វែងរកគោលបំណងដ៏ជ្រាលជ្រៅ និងដ៏មានអត្ថន័យនៅក្នុងការរៀនសូត្ររបស់ពួកគេ នៅពេលពួកគេចំណាយពេលសញ្ជឹងគិតពីរបៀបដែលសេចក្ដីពិតនៃដំណឹងល្អបានជះឥទ្ធិពលលើគំនិត ដួងចិត្ត និងជីវិតរបស់ពួកគេ ។ សូមលើកទឹកចិត្តសិស្សឲ្យគិតពីរបៀបដែលពួកគេនឹងអនុវត្តអ្វីដែលពួកគេបានរៀន និងអារម្មណ៍ដែលពួកគេមានដែលអាចជួយពង្រឹងការប្រែចិត្តជឿរបស់ពួកគេបាន ។

សូមពិចារណាដាក់បង្ហាញសំណៅ « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រ ChurchofJesusChrist.org ) ។ សូមរំឭកសិស្សពីឱកាសដែលពួកគេមាននៅក្នុងវគ្គសិក្សានេះ ដើម្បីសិក្សានូវការបង្រៀនស្ដីពីគ្រួសារចេញពីទស្សនវិស័យដ៏អស់កល្បជានិច្ចមួយ ។

សូមដាក់បង្ហាញចំណងជើងមេរៀននៅក្នុងវគ្គសិក្សានេះ ឬអញ្ជើញសិស្សឲ្យមើលវានៅលើឧបករណ៍របស់ពួកគេ ។ សូមទុកពេលឲ្យសិស្សពិនិត្យមើលចំណងជើងមេរៀនទាំងនោះ ដើម្បីជួយពួកគេឲ្យសញ្ជឹងគិតពីអ្វីដែលពួកគេបានរៀន ទទួលអារម្មណ៍ និងដកពិសោធន៍នៅក្នុងវគ្គសិក្សានេះ ។ បន្ទាប់មក សូមអញ្ជើញសិស្សឲ្យចែកចាយគំនិតរបស់ពួកគេ ។ អ្នកគួរតែសួរសំណួរដូចខាងក្រោម ដើម្បីជួយឲ្យមានការពិភាក្សាបន្ថែមទៀត ៖

តើវគ្គសិក្សានេះបានជះឥទ្ធិពលដល់ការយល់ដឹង និងទីបន្ទាល់របស់អ្នកអំពីការបង្រៀនរបស់ព្រះអម្ចាស់ស្ដីពីអាពាហ៍ពិពាហ៍ និងគ្រួសារយ៉ាងដូចម្ដេច ?
តើអ្វីទៅដែលជាចំណុចមួយដ៏សំខាន់បំផុតដែលអ្នកទទួលបានពីវគ្គសិក្សានេះ ?
តើអ្នកបានរៀនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទនៅពេញមួយវគ្គសិក្សានេះ ? តើទំនាក់ទំនងរបស់អ្នកជាមួយនឹងទ្រង់ទាំងទ្វេត្រូវបានពង្រឹងដោយរបៀបណា ?

ដើម្បីបញ្ចប់មេរៀននេះ អ្នកអាចអញ្ជើញសិស្សម្នាក់ឲ្យអានឮៗក្នុងសេចក្ដីថ្លែងការណ៍ដោយប្រធាន អិម រ័សុល បាឡឺដ នៅក្នុង ផ្នែកទី ៣ នៃឯកសាររៀបចំ ។ វាអាចមានប្រយោជន៍ក្នុងការបង្ហាញសំណួរខាងក្រោមនេះ ហើយទុកពេលពីរបីនាទីឲ្យសិស្សកត់ត្រាគំនិត ឬចំណាប់អារម្មណ៍របស់ពួកគេអំពីសំណួរទាំងនោះ ។

តើជីវិតរបស់អ្នកនឹងមានភាពខុសប្លែកយ៉ាងណាទៅ ដោយសារតែអ្វីដែលអ្នកបានរៀន និងដកពិសោធន៍នៅក្នុងវគ្គសិក្សានេះ ? តើអ្នកនឹងប្រែក្លាយកាន់តែដូចជាព្រះយេស៊ូវគ្រីស្ទតាមរបៀបណា ?

សូមពិចារណាអញ្ជើញសិស្សណាម្នាក់ដែលចង់ចែកចាយទីបន្ទាល់របស់ពួកគេអំពីសារៈសំខាន់នៃគ្រួសារនៅក្នុងផែនការនៃសុភមង្គលរបស់ព្រះវរបិតាសួគ៌ឲ្យធ្វើកិច្ចការនោះ ប្រសិនបើមានពេល ។ សូមពិចារណាចែកចាយទីបន្ទាល់របស់អ្នកផ្ទាល់ផងដែរ ។ ហើយសូមលើកទឹកចិត្តសិស្សឲ្យបន្ដចុះឈ្មោះចូលរៀនថ្នាក់វិទ្យាស្ថាន ។