មេរៀនទី ២២ ឯកសារគ្រូបង្រៀន ៖ ការចិញ្ចឹមបីបាច់កូនៗដោយសេចក្ដីសុចរិត

« មេរៀនទី ២២ ឯកសារគ្រូបង្រៀន ៖ ការចិញ្ចឹមបីបាច់កូនៗដោយសេចក្ដីសុចរិត » ឯកសារគ្រូបង្រៀនគ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ២២ ឯកសារគ្រូបង្រៀន » ឯកសារគ្រូបង្រៀន គ្រួសារដ៏នៅអស់កល្បជានិច្ច

មេរៀនទី ២២ ឯកសារគ្រូបង្រៀន

ការចិញ្ចឹមបីបាច់កូនៗដោយសេចក្ដីសុចរិត

« ឪពុកម្ដាយមានកាតព្វកិច្ចដ៏ពិសិដ្ឋដើម្បីចិញ្ចឹមបីបាច់កូនចៅរបស់ខ្លួនដោយ … សេចក្ដីសុចរិត » ( « ក្រុមគ្រួសារ ៖ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ មេរៀននេះនឹងជួយសិស្សឲ្យយល់ពីអ្វីដែលពួកគេអាចធ្វើបាន ដើម្បីជួយកូនៗរបស់ខ្លួនឲ្យរៀនអំពីព្រះអង្គសង្រ្គោះ និងដំណឹងល្អរបស់ទ្រង់ ។ សិស្សក៏នឹងស្វែងយល់ពីរបៀបជួយមនុស្សជាទីស្រឡាញ់ ដែលវង្វេងចេញពីផ្លូវដំណឹងល្អផងដែរ ។

យោបល់សម្រាប់ការបង្រៀន

ការអភិវឌ្ឍការបង្រៀននិងការរៀនសូត្ររបស់យើង

ប្រើប្រាស់កម្មវិធីសិក្សា ។ នៅពេលអ្នករៀបចំមេរៀននីមួយៗ សូមពិនិត្យមើលប្រកបដោយការអធិស្ឋានទាំងឯកសារគ្រូបង្រៀន និងឯកសាររៀបចំឡើងវិញ ។ នៅពេលអ្នកធ្វើដូច្នោះ ព្រះវិញ្ញាណបរិសុទ្ធអាចជួយអ្នកឲ្យសម្របមេរៀនទៅតាមតម្រូវការរបស់សិស្សបាន ។ អ្នកអាចជ្រើសរើសប្រើប្រាស់យោបល់សម្រាប់ការបង្រៀនទាំងអស់ ឬតែមួយចំនួន ឬក៏អ្នកអាចសង្ខេបផ្នែកមួយចំនួននៃមេរៀននេះ ហើយកែសម្រួលគំនិតដែលបានណែនាំទៅតាមតម្រូវការ និងស្ថានភាពរបស់សិស្សក្នុងថ្នាក់រៀនអ្នក ។

ព្រះអម្ចាស់បង្គាប់ឲ្យឪពុកម្ដាយចិញ្ចឹមបីបាច់កូនៗរបស់ខ្លួននៅក្នុងពន្លឺ និងសេចក្ដីពិត ។

សូមពិចារណាចាប់ផ្ដើមមេរៀន ដោយការអញ្ជើញសិស្សឲ្យពិចារណាអំពីឥទ្ធិពលនៅក្នុងជំនាន់របស់យើង ដែលអាចធ្វើឲ្យមានការលំបាកក្នុងការចិញ្ចឹមកូនឲ្យមានភាពរឹងមាំខាងវិញ្ញាណ ។ សូមឲ្យសិស្សពីរបីនាក់ចែកចាយគំនិតរបស់ពួកគេ ។

សូមអញ្ជើញសិស្សឲ្យពិនិត្យមើល គោលលទ្ធិ និង សេចក្ដីសញ្ញា ៦៨:២៥, ២៨ និង ៩៣:៤០ ឡើងវិញ ហើយសរសេរប្រយោគមួយដែលសង្ខេបតាមពាក្យសម្តីរបស់ខ្លួនថា តើព្រះវរបិតាសួគ៌រំពឹងអ្វីខ្លះពីឪពុកម្ដាយ ។ សូមអញ្ជើញឲ្យសិស្សពីរបីនាក់ចែកចាយ អ្វីដែលពួកគេបានសរសេរ ។ បន្ទាប់ពីសិស្សចែកចាយសេចក្ដីសង្ខេបរបស់ពួកគេហើយ សូមបង្ហាញសេចក្ដីពិតដូចតទៅនេះចេញពី ការប្រកាសអំពីក្រុមគ្រួសារ ៖ ឪពុកម្ដាយមានកាតព្វកិច្ចដ៏ពិសិដ្ឋ ដើម្បីចិញ្ចឹមបីបាច់កូនចៅរបស់ខ្លួនដោយសេចក្ដីសុចរិត ។

ហេតុអ្វីបានជាវាសំខាន់សម្រាប់ឪពុកម្តាយក្នុងការធ្វើជា « គ្រូបង្រៀនដំណឹងល្អ និងគំរូដ៏សំខាន់ » របស់កូនៗខ្លួន ? ( ថាត អរ ខាលីស្ទើរ « Parents: The Prime Gospel Teachers of Their Children » Liahona ខែ វិច្ឆិកា ឆ្នាំ ២០១៤ ទំព័រ ៣២ ) ។ ( អ្នកអាចអញ្ជើញឲ្យសិស្សរំឭកសេចក្ដីថ្លែងការណ៍ដោយ ប្រធាន ថាត អរ ខាលីស្ទើរ និង ប្រធាន ចយ ឌី ចូនស៍ នៅក្នុងផ្នែកទី ១ នៃឯកសាររៀបចំបាន ) ។
តើសាតាំងព្យាយាមរំខានឪពុកម្ដាយពីកាតព្វកិច្ចដ៏ពិសិដ្ឋនេះតាមរបៀបណា? ( អ្នកអាចនឹងចង់លើកឡើងពីវិធីមួយចំនួន ដែលបានរាយនៅក្នុងកថាខណ្ឌពីរចុងក្រោយនៃវគ្គ « The Adversary’s Attacks on the Family » នៅក្នុងអត្ថបទនេះ « The Sacred Responsibilities of Parenthood » ដោយប្រធាន អិម រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ [ Ensign ខែ មីនា ឆ្នាំ ២០០៦ ទំព័រ ២៦–៣៣ ] ) ។
តើក្រុមគ្រួសារអាចធ្វើអ្វីខ្លះ ដើម្បីទទួលបានជោគជ័យក្នុងការធ្វើការអធិស្ឋានក្នុងគ្រួសារ ការសិក្សាព្រះគម្ពីរជាគ្រួសារ និងរាត្រីជួបជុំក្រុមគ្រួសារឲ្យបានខ្ជាប់ខ្ជួន ?

សូមពិនិត្យឡើងវិញជាមួយគ្នានូវ សេចក្តីថ្លែងការណ៍ដោយស៊ីស្ទើរ ឆារិល អេ អេសព្លីន នៅក្នុងផ្នែកទី ១ នៃឯកសាររៀបចំ ។

តើឪពុកម្ដាយអាចជួយកូនៗរបស់ខ្លួនឲ្យ « ទទួលគោលលទ្ធិដាក់ក្នុងចិត្តពួកគេក្នុងរបៀបមួយ ដែលវាក្លាយទៅជាចំណែកមួយនៃខ្លួនពួកគេ » ដោយរបៀបណា ? ( « Teaching Our Children to Understand » Liahona ខែ ឧសភា ឆ្នាំ ២០១២ ទំព័រ ១០ ) ។ តើឪពុកម្ដាយអាចជួយកូនៗរបស់ខ្លួនឲ្យទទួលអារម្មណ៍ និងរៀនពីព្រះវិញ្ញាណបរិសុទ្ធបានយ៉ាងដូចម្ដេច ? ( ជាផ្នែកមួយនៃការពិភាក្សានេះ អ្នកអាចពិចារណាធ្វើការបង្ហាញ និងពិភាក្សាអំពីវីដេអូនេះ « The Music of the Gospel » [ ៥:៤៣ ] ដែលមាននៅក្នុង ផ្នែក « ចង់បានបន្ថែមទៀតទេ ? » នៃឯកសាររៀបចំ ) ។
តើពាក្យសម្ដី ឬគំរូរបស់ឪពុកម្ដាយ ឬបុគ្គលដូចជាឪពុកម្ដាយបានជួយអ្នកឲ្យស្គាល់ និងធ្វើតាមព្រះអង្គសង្គ្រោះដោយរបៀបណា ? ( សូមពិចារណាពិនិត្យមើលជាមួយគ្នាក្នុង នីហ្វៃទី២ ២៥:២៦ និងសេចក្ដីថ្លែងការណ៍របស់ អែលឌើរ នែល អិល អាន់ឌើរសិន និង ប្រធាន ចយ ឌី ចូនស៍ នៅក្នុងផ្នែកទី ២ នៃឯកសាររៀបចំ ) ។

សូមអញ្ជើញសិស្សឲ្យពិនិត្យឡើងវិញនូវចម្លើយ ដែលពួកគេបានសរសេរចំពោះការបំផុសគំនិត « កត់ត្រាគំនិតរបស់អ្នក » នៅក្នុងផ្នែកទី ២ នៃឯកសាររៀបចំ ។ សូមសួរសិស្សមួយចំនួនដែលមានអារម្មណ៍ល្អ ឲ្យឡើងចែកចាយនូវអ្វីដែលពួកគេបានសរសេរ ។ សូមលើកទឹកចិត្តសិស្សឲ្យកត់ត្រាគំនិត ឬចំណាប់អារម្មណ៍ណាមួយដែលទាក់ទងបន្ថែម ដែលពួកគេបានមានកន្លងមកនៅក្នុងថ្នាក់រៀន ។

យើងគួរតែស្រឡាញ់ និងអធិស្ឋានសម្រាប់សមាជិកគ្រួសារ ដែលចាកចេញពីផ្លូវនៃដំណឹងល្អ ។

សូមអញ្ជើញសិស្សឲ្យពិចារណាពីអារម្មណ៍របស់ពួកគេ ប្រសិនបើពួកគេមានកូនម្នាក់ ដែលបានជ្រើសរើសចាកចេញពីផ្លូវនៃដំណឹងល្អនោះ ។ ប្រសិនបើអាចធ្វើបាន សូមបង្ហាញវីដេអូព្រះគម្ពីរមរមន « Lehi Invites His Family to Partake of the Fruit of the Tree (1 Nephi 8:12–18) » ( ៣:២៣ ) ។ ( ប្រសិនបើអ្នកមិនអាចបង្ហាញវីដេអូនេះបានទេ សូមបង្ហាញរូបភាពដែលភ្ជាប់មកជាមួយនេះ ហើយអាន នីហ្វៃទី១ ៨:១២–១៨ ជាមួយគ្នា ) ។ សូមអញ្ជើញសិស្សឲ្យគិតអំពីអារម្មណ៍របស់លីហៃ ដែលបានឮចម្លើយផ្សេងៗគ្នាពីសមាជិកគ្រួសារលោក ចំពោះការអញ្ជើញរបស់លោកឲ្យទទួលទានផ្លែនៃដើមជីវិត ។ សូមឲ្យសិស្សពីរបីនាក់ចែកចាយគំនិតរបស់ពួកគេ ។

តើមានគំរូណាខ្លះទៀតចេញពីព្រះគម្ពីរ ដែលឪពុកម្ដាយដ៏សុចរិតមានកូនម្នាក់ ឬច្រើននាក់បានវង្វេងចេញពីផ្លូវនៃដំណឹងល្អ ? តើអ្នកអាចរៀនអ្វីខ្លះ ចេញពីចម្លើយរបស់ឪពុកម្តាយទាំងនេះ ដែលអាចណែនាំអ្នកក្នុងការឆ្លើយតបទៅនឹងសមាជិកគ្រួសារដែលអាចវង្វេង ?

សូមពិនិត្យ សេចក្តីថ្លែងការណ៍ដោយអែលឌើរ អូលីសេស សូរ៉េស នៅក្នុងផ្នែកទី ៣ នៃឯកសាររៀបចំឡើងវិញ ។

តើយើងអាចរៀនបានរបៀបឆ្លើយតបអ្វីខ្លះ មកពីអែលឌើរ សូរ៉េស នៅពេលសមាជិកគ្រួសារងាកចេញពីផ្លូវនៃដំណឹងល្អ ? ( សិស្សគួររកឃើញគោលការណ៍មួយដែលស្រដៀងគ្នានឹងគោលការណ៍ដូចតទៅនេះ ៖ ប្រសិនបើសមាជិកគ្រួសារងាកចេញពីផ្លូវនៃដំណឹងល្អ នោះយើងគួរតែបន្តស្រឡាញ់ និងអធិស្ឋានសម្រាប់គាត់ ឬនាង ហើយស្វែងរកជំនួយពីព្រះអម្ចាស់ ) ។
តើអ្នកបានឃើញសមាជិកគ្រួសារអនុវត្តតាមការបង្រៀនរបស់អែលឌើរ សូរ៉េស នៅពេលណា ? តើសកម្មភាពរបស់ពួកគេមានឥទ្ធិពលអ្វីខ្លះ ?

សូមពិចារណាអានសេចក្តីថ្លែងការណ៍ដូចតទៅនេះដោយប្រធាន ហិនរី ប៊ី អាវរិង នៃគណៈប្រធានទីមួយ ៖

… ចំពោះមនុស្សមួយចំនួន អំណរដ៏នៅអស់កល្បជានិច្ចនោះអាចហាក់ដូចជាគ្មានសង្ឃឹមនឹងទទួលបានឡើយ ។ ឪពុកម្ដាយ កូនៗ បងប្អូនប្រុស និងបងប្អូនស្រីអាចនឹងធ្វើការជ្រើសរើសជាច្រើន ដែលហាក់ដូចជាធ្វើឲ្យពួកគេពុំស័ក្ដិសមនឹងជីវិតអស់កល្បជានិច្ចឡើយ ។ …

ព្យាការីរបស់ព្រះម្នាក់បានផ្ដល់ការប្រឹក្សាដល់ខ្ញុំ ដែលផ្ដល់ជាភាពសុខសាន្ដដល់ខ្ញុំ ។ ខ្ញុំបានបារម្ភថា ការជ្រើសរើសរបស់សមាជិកគ្រួសារអ្នកដទៃទៀតអាចនឹងធ្វើឲ្យគ្រួសាររបស់យើងមិនអាចរស់នៅជាមួយគ្នាជារៀងរហូតបាន ។ លោកបានមានប្រសាសន៍ថា « អ្នកកំពុងបារម្ភអំពីបញ្ហាខុសឆ្គង ។ អ្នកគ្រាន់តែរស់នៅឲ្យស័ក្ដិសមនឹងនគរសេឡេស្ទាលទៅបានហើយ នោះការរៀបចំគ្រួសាររបស់អ្នកនឹងកាន់តែអស្ចារ្យជាង ដែលអ្នកអាចនឹកគិតដល់ទៅទៀត » ។ ( « TheHopeofEternalFamilyLove » Ensign ខែ សីហា ឆ្នាំ ២០១៦ ទំព័រ ៤, ៥ )

តើការបង្រៀននេះអាចផ្ដល់សេចក្ដីសង្ឃឹម និងការលួងលោមដល់អស់អ្នកដែលមានមនុស្សជាទីស្រឡាញ់ វង្វេងចេញពីផ្លូវនៃដំណឹងល្អបានយ៉ាងដូចម្ដេច ?

សូមពិចារណាបញ្ចប់មេរៀននេះដោយការថ្លែងទីបន្ទាល់ថា ព្រះអម្ចាស់មានព្រះឆន្ទៈជួយយើង នៅពេលយើងព្យាយាមចិញ្ចឹមបីបាច់កូនៗរបស់យើងនៅក្នុងសេចក្ដីសុចរិត ។

សម្រាប់ពេលក្រោយ

សូមពិចារណាបង្ហាញសេចក្ដីថ្លែងការណ៍ដូចខាងក្រោមនេះដោយអែលឌើរ អាន់ឌើរសិន ៖

មានមនុស្សជាច្រើនទាំងក្មេងទាំងចាស់ ដែលស្មោះត្រង់ និងពិតចំពោះដំណឹងល្អរបស់ព្រះយេស៊ូវគ្រីស្ទ ទោះជាបទពិសោធន៍ថ្មីៗផ្ទាល់ខ្លួនគេមិនត្រូវនឹងការប្រកាសពីក្រុមគ្រួសារនេះក្ដី ។ ( « The Eye of Faith » Liahona ខែ ឧសភា ឆ្នាំ ២០១៩ ទំព័រ ៣៦ )

នៅពេលសិស្សសិក្សា ឯកសារនេះសម្រាប់មេរៀនលើកក្រោយ សូមអញ្ជើញពួកគេឲ្យស្វែងរកការបង្រៀន ដែលអាចប្រទានពរដល់ក្រុមគ្រួសារ ឬបុគ្គលទាំងឡាយដែលពួកគេស្គាល់ ដែលកំពុងមានបទពិសោធន៍គ្រួសារបច្ចុប្បន្ន ដែលអាចមិនមែនជាអ្វីដែលពួកគេបានរំពឹងទុក ។