មេរៀនទី ៧ ឯកសារគ្រូបង្រៀន ៖ និស្ស័យដ៏អស់កល្បជានិច្ច និងគោលបំណងនៃភេទ

« មេរៀនទី ៧ ឯកសារគ្រូបង្រៀន ៖ និស្ស័យដ៏អស់កល្បជានិច្ច និងគោលបំណងនៃភេទ » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ៧ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ៧ ឯកសារគ្រូបង្រៀន

និស្ស័យដ៏អស់កល្បជានិច្ច និងគោលបំណងនៃភេទ

ភេទរបស់យើងត្រូវបានបង្កើតឡើងនៅក្នុងជីវិតមុនផែនដីរបស់យើង ហើយវាគឺជាកត្តាដ៏ចាំបាច់ក្នុងការបំពេញផែនការរបស់ព្រះវរបិតាសួគ៌នៃយើងសម្រាប់សេចក្ដីសង្គ្រោះរបស់យើង និងភាពតម្កើងឡើងនៅក្នុងក្រុមគ្រួសារ ។ នៅក្នុងមេរៀននេះ សិស្សនឹងមានឱកាសពន្យល់ពីរបៀបដែលផែនការរបស់ព្រះជួយយើងឲ្យយល់ដឹងពីសារៈសំខាន់ដ៏អស់កល្បជានិច្ចនៃភេទរបស់យើង ។ មេរៀននេះក៏នឹងផ្ដល់នូវការណែនាំសម្រាប់សិស្សដែលអាចនឹងមានសំណួរទាក់ទងនឹងភេទផងដែរ ។

យោបល់សម្រាប់ការបង្រៀន

ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗ ។

កំណត់ចំណាំ ៖ អ្នកគួរតែប្រាប់សិស្សអំពីភាពរសើបនៃប្រធានបទនេះ និងប្រធានបទផ្សេងទៀតនៅក្នុងវគ្គសិក្សានេះ ហើយរំឭកសិស្សឲ្យចូលរួមក្នុងការពិភាក្សាក្នុងថ្នាក់ដោយសេចក្ដីស្រឡាញ់ ការយកចិត្តទុកដាក់ និងការយល់ដឹងដូចជាព្រះគ្រីស្ទ ។ ចូរប្រុងប្រយ័ត្នកុំប្រើគោលលទ្ធិតាមរបៀបមួយដែលអញ្ជើញឲ្យមានស្មារតីនៃការចោទប្រកាន់ និងការដាក់ទោស ។ ផ្ទុយទៅវិញ សូមធ្វើតាមគំរូរបស់ព្រះអង្គសង្គ្រោះនៅពេលអ្នកបង្រៀនតាមរបៀបមួយដែលនាំមកនូវការយល់ដឹង សេចក្ដីសង្ឃឹម និងការព្យាបាល ។

សូមអញ្ជើញសិស្សឲ្យនឹកស្រមៃថា ពួកគេគឺជាគ្រូបង្រៀនសាលាថ្ងៃអាទិត្យសម្រាប់ថ្នាក់អាយុ ១៤ ឆ្នាំដែលមានសំណួរមួយចំនួនអំពីភេទ ។ មានសិស្សម្នាក់បានសួរថា « ហេតុអ្វីក៏ភេទគឺជាបញ្ហាសំខាន់ ? »

សូមអញ្ជើញសិស្សឲ្យរំឭក ផ្នែកទី ១ នៃឯកសាររៀបចំ ជាមួយនឹងដៃគូ ឬជាក្រុមតូចៗ ហើយពិចារណាពីរបៀបដែលពួកគេឆ្លើយតបទៅនឹងសំណួរនេះ ដោយផ្អែកលើការបង្រៀនរបស់សាសនាចក្រ ។ បន្ទាប់ពីទុកពេលឲ្យពួកគេពិភាក្សាគ្នាមក សូមអញ្ជើញសិស្សពីរបីនាក់ឲ្យចែកចាយចម្លើយរបស់ពួកគេ ។

នៅពេលសិស្សចែកចាយចម្លើយរបស់ពួកគេរួច អ្នកគួរតែរំឭក លោកុប្បត្តិ ១:២៦–២៧ កថាខណ្ឌនៅក្នុង « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រ ChurchofJesusChrist.org ) និង សេចក្ដីថ្លែងការណ៍របស់អែលឌើរ ដេវីឌ អេ បែដណា រួមគ្នាឡើងវិញ ដែលមាននៅក្នុងផ្នែកទី ១ នៃឯកសាររៀបចំ ។ បន្ទាប់មក អ្នកអាចជួយសិស្សឲ្យស្គាល់សេចក្ដីពិតដូចតទៅនេះ ៖ ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច ។ តាមផែនការរបស់ព្រះ បុរស និងស្ត្រីគឺត្រូវបានបង្កើតឡើងដើម្បីឲ្យជួយគ្នា បំពេញឲ្យគ្នា និងឲ្យបានល្អឥតខ្ចោះទាំងពីរនាក់ ។ ( សូមរំឭកសិសថា « អត្ថន័យពិតរបស់ ភេទ នៅក្នុងការប្រកាសអំពីក្រុមគ្រួសារគឺជា ភេទជីវសាស្ត្រនៅពេលកើតមក » [ ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ៣៨.៦.២៣ ] ។ ឯកសារគ្រូបង្រៀននេះមានគោលបំណងប្រើប្រាស់អត្ថន័យដូចគ្នានេះអំពីភេទ លើកលែងតែមានការផ្ដល់ណែនាំផ្សេងទៀត ) ។

ការអភិវឌ្ឍការបង្រៀន និងការរៀនសូត្ររបស់យើង

សូមជួយសិស្សឲ្យយល់គោលលទ្ធិ និងគោលការណ៍ទាំងឡាយ ។ នៅពេលសិស្សយល់ដឹងកាន់តែស៊ីជម្រៅអំពីគោលលទ្ធិ និងគោលការណ៍ទាំងឡាយ នោះពួកគេអាចអនុវត្តវាបានកាន់តែពេញលេញជាងនេះប្រកបដោយអត្ថន័យ ។ បន្ទាប់ពីស្គាល់គោលការណ៍ និងគោលលទ្ធិហើយ សូមជួយសិស្សឲ្យមើលឃើញវាចេញពីទស្សនវិស័យដ៏អស់កល្បជានិច្ចមួយ ។ សូមសួរសំណួរនានាដែលដឹកនាំសិស្សទៅរកការយល់ដឹងកាន់តែច្បាស់អំពីព្រះរាជបំណងរបស់ព្រះវរបិតាសួគ៌នៅជុំវិញគោលលទ្ធិនោះ ។ សូមលើកទឹកចិត្តសិស្សឲ្យគិតពីគោលលទ្ធិនោះ ហើយពន្យល់ពីរបៀបដែលសេចក្ដីពិតទាំងនេះអាចអនុវត្តបានចំពោះជីវិតរបស់ពួកគេនាសព្វថ្ងៃនេះ ។

អ្នកអាចប្រើសំណួរ ឬសកម្មភាពខាងក្រោមនេះខ្លះដើម្បីជួយសិស្សឲ្យយល់កាន់តែស៊ីជម្រៅអំពីសេចក្ដីពិតដែលពួកគេបានស្គាល់ ៖

តើផែនការនៃសេចក្តីសង្រ្គោះជួយអ្នកឲ្យយល់ថា « ភេទប្រុសស្រីគឺជាលក្ខណៈពិសេសនៃអត្តសញ្ញាណ និងគោលបំណងរបស់បុគ្គលម្នាក់ៗនៅជីវិតមុនផែនដី ជីវិតរមែងស្លាប់ និងនៅអស់កល្បជានិច្ច » ដោយរបៀបណា ? ( « ក្រុមគ្រួសារ ៖ ការប្រកាសដល់ពិភពលោក » ) ។
តើវិញ្ញាណមនុស្សប្រុស និងមនុស្សស្រីបំពេញគ្នាឲ្យបានល្អឥតខ្ចោះយ៉ាងដូចម្ដេច ? ( សូមមើល សេចក្ដីថ្លែងការណ៍របស់អែលឌើរ ដេវីឌ អេ បែដណា និង អែលឌើរ ឌេល ជី រេនឡាន់ និងស៊ីស្ទើរ រស់ អិល រេនឡាន់ នៅក្នុងផ្នែកទី ១ នៃឯកសាររៀបចំ ) ។ តើអ្នកធ្លាប់ឃើញគំរូអ្វីខ្លះស្ដីពីសមត្ថភាពបំពេញបន្ថែមរបស់បុរស និងស្ត្រីក្នុងការបំពេញផែនការរបស់ព្រះវរបិតាសួគ៌យើង ?
សូមអញ្ជើញសិស្សឲ្យសរសេរគំរូប្រពៃណី ឬវប្បធម៌មួយចំនួនដែលកំណត់ពីបុរស ឬស្ត្រី ។ ក្នុងចំណោមគំរូទាំងនេះ តើគំរូណាមួយដែលមិនទាក់ទងនឹងអត្តសញ្ញាណ និងគោលបំណងដ៏អស់កល្បជានិច្ចរបស់យើងក្នុងផែនការរបស់ព្រះ ? តើធាតុអ្វីខ្លះនៃភេទរបស់យើងជាមនុស្សប្រុស និងមនុស្សស្រី ដែលសំខាន់ចំពោះអត្តសញ្ញាណ និងគោលបំណងដ៏អស់កល្បជានិច្ចរបស់យើង ?

សូមពិចារណាចែកចាយពីរបៀបដែលជីវិតរបស់អ្នកមានពរដោយសារតែមានទស្សនវិស័យមួយដ៏អស់កល្បជានិច្ចស្ដីពីភេទ និងរបៀបដែលទស្សនវិស័យនោះបានមានឥទ្ធិពលលើអត្តសញ្ញាណ និងគោលបំណងរបស់អ្នក ។

ព្រះអម្ចាស់អាចណែនាំ និងគាំទ្រអ្នកដែលមានអារម្មណ៍មិនស្របតាមភេទ ឬមានសំណួរទាក់ទងនឹងភេទផ្សេងទៀត ។

សូមរំឭកសិស្សថា ផ្នែកទី ២ និងទី ៣ នៃឯកសាររៀបចំ បានលើកឡើងពីស្ថានភាពដែលបុគ្គលម្នាក់ៗអាចមានអារម្មណ៍មិនស្រមតាមភេទរវាងភេទកំណើតរបស់ពួកគេ និងអត្តសញ្ញាណភេទរបស់ពួកគេ អាចកំណត់ជាអ្នកប្ដូរភេទ ឬអាចមានសំណួរទាក់ទងនឹងភេទផ្សេងទៀត ។

តើការបង្រៀនជាក់លាក់អ្វីខ្លះនៅក្នុង ផ្នែកទី ២ និងទី ៣ នៃឯកសាររៀបចំ ដែលមានន័យបំផុតចំពោះអ្នក ? ( ប្រសិនបើចាំបាច់ សូមទុកពេលឲ្យសិស្សរំឭកផ្នែកទី ២ និងទី ៣ នៃឯកសាររៀបចំ ) ។
តើយើងអាចគិតគូរ និងមានភាពប្រុងប្រយ័ត្នកាន់តែច្រើនដោយរបៀបណា ពេលពិភាក្សាអំពីភេទជាមួយនឹងមនុស្សដទៃ និងពេលពិចារណាពីការពិតដ៏ស្មុគស្មាញរបស់មនុស្សដទៃដែលយើងអាចស្គាល់ ឬមានទំនាក់ទំនងជាមួយនោះ ?

សូមរំឭកសិស្សថា សាសនាចក្របានផ្ដល់ធនធានដើម្បីគាំទ្រដល់បុគ្គលម្នាក់ៗដែលជួបប្រទះនឹងអារម្មណ៍នៃការមិនស្របតាមភេទនៅក្នុងផ្នែក « Transgender »នៃគេហទំព័រ ChurchofJesusChrist.org ។

ជារបៀបមួយដើម្បីជួយសិស្សឲ្យអនុវត្តតាមគោលការណ៍ដែលបានបង្រៀននៅក្នុងមេរៀននេះ អ្នកអាចអាន ហើយពិភាក្សាពីសាច់រឿងដូចតទៅនេះរួមគ្នានៅក្នុងថ្នាក់ ( សូមសម្របស្ថានភាពនោះតាមការគួរ ដើម្បីបំពេញសេចក្ដីត្រូវការរបស់សិស្សអ្នកឲ្យបានល្អបំផុត ) ៖

ជារឿយៗ អាឡិចសាន់ដ្រា មានអារម្មណ៍មិនស្រណុកក្នុងចិត្តសោះអំឡុងពេលសន្ទនាអំពីអ្វីដែលមនុស្សទូទៅចាត់ទុកថាជាលក្ខណៈដើមរបស់បុរស និងស្ត្រី ។ នាងមិនមានអារម្មណ៍ថា នាងមានលក្ខណៈជាច្រើនដែលត្រូវបានគេចាត់ទុកថាជាស្ត្រីនោះទេ ។ នាងក៏មានចំណាប់អារម្មណ៍ផ្ទាល់ខ្លួនជាច្រើនដែលត្រូវគ្នានឹងចំណាប់អារម្មណ៍នៃបុរសមួយចំនួនដែលនាងស្គាល់ផងដែរ ។ នៅពេលការសន្ទនាអំពីភេទបានកើតឡើងនៅក្នុងព្រះវិហារ នាងងឿងឆ្ងល់ថាតើនាងពិតជាអាចចុះសម្រុងនឹងស្ត្រីផ្សេងទៀតដែរឬទេ ។ នាងជឿលើព្រះយេស៊ូវគ្រីស្ទ ហើយទុកចិត្តលើព្រះចេស្ដានៃដង្វាយធួនរបស់ទ្រង់ ប៉ុន្តែនាងមិនប្រាកដពីរបៀបដែលទ្រង់អាចជួយនាងបាននៅឡើយ ។ នៅទីបញ្ចប់ អាឡិចសាន់ដ្រា ពិតជាចង់ដឹងថាតើបុគ្គលិកលក្ខណៈរបស់នាងនឹងអនុញ្ញាតឲ្យនាងបំពេញសក្ដានុពលដ៏ទេវភាពរបស់នាងក្នុងនាមជាបុត្រីរបស់ព្រះបានដែរទេ ។

អ្នកអាចនឹងសួរសំណួរដូចខាងក្រោម ដើម្បីជួយសិស្សឲ្យពិភាក្សាពីសាច់រឿងនេះបាន ៖

ប្រសិនបើ អាឡិចសាន់ដ្រា បានសុំឲ្យអ្នកជួយ តើអ្នកនឹងប្រឹក្សានាងឲ្យធ្វើអ្វីខ្លះ ដើម្បីទទួលបានការយល់ដឹងកាន់តែច្បាស់មួយអំពីអត្តសញ្ញាណ និងគោលបំណងដ៏អស់កល្បជានិច្ចរបស់នាង ?
តើអ្នកអាចចែកចាយអ្វីខ្លះជាមួយនឹង អាឡិចសាន់ដ្រា អំពីរបៀបដែលផែនការរបស់ព្រះបានជួយអ្នកឲ្យយល់ដឹងពីអត្តសញ្ញាណ និងគោលបំណងដ៏អស់កល្បជានិច្ចរបស់អ្នកក្នុងនាមជាបុរស ឬស្ត្រីម្នាក់ ?
តើអាឡិចសាន់ដ្រា អាចក្លាយជាកម្លាំងមួយនៅក្នុងសាសនាចក្ររបស់ព្រះអម្ចាស់តាមរបៀបណា ?

វាប្រហែលជាមានប្រយោជន៍ដើម្បីបញ្ចប់ការពិភាក្សារបស់អ្នកអំពីអាឡិចសាន់ដ្រា ដោយការគូសបញ្ជាក់ថា អ្នកដែលមានសំណួរអំពីភេទរបស់ពួកគេ ឬអ្នកដែលជួបប្រទះនឹងអារម្មណ៍នៃការមិនស្របតាមភេទអាចរីករាយនឹងពរជ័យទាំងអស់នៃភាពអស់កល្បជានិច្ច និងសមាជិកភាពនៅក្នុងសាសនាចក្ររបស់ព្រះអង្គសង្គ្រោះបាន ប្រសិនបើពួកគេគោរពតាមសេចក្ដីសញ្ញារបស់ពួកគេ ហើយបដិសេធមិនប្ដូរភេទរបស់ពួកគេ ។ អ្នកអាចរំឭកជាមួយសិស្សនូវ ការព្រមានរបស់ប្រធាន អូក នៅក្នុងផ្នែកទី ៣ អំពីការដាក់ឈ្មោះឲ្យខ្លួនឯងជាសាធារណៈតាមរបៀបដែលអាចនឹងកំណត់លទ្ធភាពរបស់យើង ដើម្បីឈានទៅសម្រេចគោលដៅដ៏អស់កល្បជានិច្ចរបស់យើង ។

ដើម្បីបញ្ចប់មេរៀននេះ សូមអញ្ជើញសិស្សឲ្យកត់ត្រាអ្វីដែលពួកគេនឹងធ្វើដើម្បីបង្ហាញសេចក្ដីស្រឡាញ់ សេចក្ដីមេត្តាករុណា និងការរាប់អានដល់នរណាម្នាក់ដែលមានអារម្មណ៍នៃការមិនស្របតាមភេទកំណើតរបស់ពួកគេ និងអត្តសញ្ញាណភេទរបស់ពួកគេ អ្នកដែលគេស្គាល់ថាជាបុគ្គលប្ដូរភេទ ឬអ្នកមានសំណួរទាក់ទងនឹងភេទផ្សេងទៀត ។

អ្នកអាចចែកចាយទីបន្ទាល់របស់អ្នកថា ទោះជាយើងមិនអាចយល់ដឹងគ្រប់យ៉ាងអំពីអារម្មណ៍នៃការមិនស្របតាមភេទ ឬប្រធានបទផ្សេងទៀតទាក់ទងនឹងភេទក្ដី ប៉ុន្តែព្រះអង្គសង្គ្រោះទ្រង់ជ្រាបពីរឿងនេះ ។ ទ្រង់អាចណែនាំ និងគាំទ្រអ្នកដែលងាកមករកទ្រង់បាន ។

សម្រាប់ពេលក្រោយ

សូមលើកទឹកចិត្តឲ្យសិស្សអាន ហើយពិចារណាដោយប្រុងប្រយ័ត្ននូវ ឯកសាររៀបចំសម្រាប់មេរៀនលើកក្រោយ ស្ដីពីការប្រតិព័ទ្ធភេទដូចគ្នា ។ អ្នកអាចអញ្ជើញសិស្សឲ្យរកមើលវិធីដើម្បីយល់ដឹងកាន់តែប្រសើរឡើងអំពីការប្រតិព័ទ្ធភេទដូចគ្នា ហើយពិចារណាពីរបៀបដែលពួកគេអាចពិភាក្សាអំពីវាដោយការគោរព និងដោយប្រុងប្រយ័ត្ន ។