« មេរៀនទី ១១ ឯកសារគ្រូបង្រៀន ៖ ការជ្រើសរើសដៃគូដ៏អស់កល្បជានិច្ច » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )
« មេរៀនទី ១១ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច
មេរៀនទី ១១ ឯកសារគ្រូបង្រៀន
ការជ្រើសរើសដៃគូដ៏អស់កល្បជានិច្ច
ព្រះអម្ចាស់សព្វព្រះទ័យចង់ជួយយើងនៅក្នុងការខិតខំរបស់យើង ដើម្បីស្វែងរកដៃគូដ៏អស់កល្បជានិច្ចម្នាក់ ។ នៅក្នុងមេរៀននេះ សិស្សនឹងពន្យល់ពីរបៀបដែលពួកគេអាចអនុវត្តសេចក្ដីជំនឿលើព្រះយេស៊ូវគ្រីស្ទ នៅពេលពួកគេខិតខំបង្កើតទំនាក់ទំនងជាមួយនឹងសមាជិកដែលមានភេទផ្ទុយគ្នា ហើយរៀបអាពាហ៍ពិពាហ៍ ។ សិស្សក៏នឹងត្រូវបានអញ្ជើញឲ្យជ្រើសរើសយកគុណលក្ខណៈដូចជាព្រះគ្រីស្ទ ដែលពួកគេអាចព្យាយាមអភិវឌ្ឍបាន ដែលនឹងជួយពួកគេឲ្យរៀបចំខ្លួនសម្រាប់អាពាហ៍ពិពាហ៍ដ៏នៅអស់កល្បជានិច្ច ឬសមនឹងអាពាហ៍ពិពាហ៍ដ៏នៅអស់កល្បជានិច្ចបានកាន់តែប្រសើរឡើង ។
យោបល់សម្រាប់ការបង្រៀន
ព្រះអម្ចាស់រំពឹងឲ្យយើងធ្វើសកម្មភាពដោយសេចក្ដីជំនឿទៅលើទ្រង់ នៅពេលយើងស្វែងរកដៃគូដ៏អស់កល្បជានិច្ចម្នាក់ ។
សូមបែងចែកសិស្សក្នុងថ្នាក់ជាក្រុមតូចៗ ហើយចាត់តាំងឲ្យមានមេក្រុមម្នាក់សម្រាប់ក្រុមនីមួយៗ ។ សូមចែកដល់សិស្សម្នាក់ៗនូវផ្នែកទី ១ នៃសាច់រឿងខាងក្រោមនេះ ព្រមទាំងសំណួរដែលមានបន្ដបន្ទាប់ ។ សូមណែនាំសិស្សឲ្យអានសាច់រឿងនេះឲ្យឮៗរួមគ្នា ហើយពិភាក្សាអំពីសំណួរទាំងនេះ ។ ( ប្រសិនបើអាចធ្វើទៅបាន អ្នកអាចផ្ញើផ្នែកទី ១ នៃសាច់រឿងនេះទៅកាន់សិស្សជាមុន ដើម្បីឲ្យពួកគេអាចមករៀនដោយបានអាន និងគិតអំពីវាទុកជាមុន ) ។
កំណត់ចំណា ៖ សូមពិចារណាពីរបៀបដែលអ្នកអាចសម្របសាច់រឿងនេះបាន ដើម្បីឲ្យវាកាន់តែពាក់ព័ន្ធនឹងកាលៈទេសៈ សំណួរ ឬវប្បធម៌របស់សិស្ស ។
ការអភិវឌ្ឍការបង្រៀន និងការរៀនសូត្ររបស់យើង
ការពិភាក្សាជាក្រុមតូចៗអាចជួយសិស្សឲ្យរៀនសូត្របានកាន់តែស៊ីជម្រៅខ្លាំងឡើង ។ ក្រុមតូចៗអនុញ្ញាតឲ្យសិស្សកាន់តែច្រើនចូលរួមក្នុងការពិភាក្សាយ៉ាងសកម្ម ។ ការមានឱកាសចែកចាយនៅក្នុងក្រុមតូចៗ ក៏អាចបណ្ដុះឲ្យមានទំនុកចិត្តដល់សិស្សដែលអៀនច្រើនផងដែរ ។ សូមពិចារណាចាត់តាំងឲ្យមានមេក្រុមម្នាក់ ហើយផ្ដល់ការណែនាំច្បាស់លាស់អំពីអ្វីដែលសិស្សត្រូវធ្វើ ការដាក់ម៉ោងកំណត់ ការអញ្ជើញសមាជិកម្នាក់ៗឲ្យចូលរួម និងការលើកទឹកចិត្តសិស្សឲ្យរៀបចំខ្លួនចែកចាយអ្វីដែលពួកគេបានរៀន ។
សាច់រឿង ផ្នែកទី ១
ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១១
លូអ៊ីស បានត្រឡប់មកផ្ទះពីបេសកកម្មរបស់គាត់វិញជិតពីរឆ្នាំហើយ ។ ដោយសារគាត់បារម្ភពីការផ្គត់ផ្គង់ដល់គ្រួសារនាពេលអនាគត នោះគាត់បានសម្រេចចិត្តធ្វើការក្រៅម៉ោងបណ្តើរ ចូលរៀនបណ្ដើរ ។ ពេលវេលារបស់គាត់មានកំណត់ ប៉ុន្ដែគាត់រីករាយនឹងថ្នាក់វិទ្យាស្ថានប្រចាំសប្ដាហ៍របស់គាត់ ហើយដាក់វាជាអាទិភាព ។ ជាទូទៅ លូអ៊ីស បើកមើលប្រព័ន្ធផ្សព្វផ្សាយសង្គម និងលេងហ្គេមនៅលើឡានក្រុង ឬមុនពេលចូលរៀន ។ គាត់មិនបានណាត់ជួបនឹងនារីណាឡើយ តាំងពីគាត់មកដល់ផ្ទះវិញ ។ គាត់ប្រាប់គ្រួសាររបស់គាត់ថា គាត់មានអារម្មណ៍ថា វាល្អជាងដើម្បីរង់ចាំរហូតដល់គាត់រៀនចប់សិន ហើយចាំរៀបការពិតប្រាកដតែម្ដង ។ គាត់គិតថា ប្រសិនបើគាត់ត្រូវរៀបការក្នុងពេលឆាប់ៗ នោះវានឹងកើតឡើងដោយឯកឯង ។
អិមម៉ា ចូលរៀនថ្នាក់វិទ្យាស្ថានដូចគ្នានឹង លូអ៊ីស ដែរ ប៉ុន្ដែមិនដែលបានជួបគាត់ទេ ។ ជាធម្មតា នាងអង្គុយជាមួយមិត្តរបស់នាង ហើយកម្រនឹងនិយាយជាមួយអ្នកផ្សេងទៀតណាស់ ។ ជាទូទៅ នាងមានអារម្មណ៍ធុញថប់ ពេលជួបនឹងបុរសៗ និងពេលដើរលេងជាគូ ។ នាងព្រួយចិត្តថា បើនាងចាប់ផ្ដើមទំនាក់ទំនងម្ដងទៀត នោះវានឹងបញ្ចប់ដូចជាទំនាក់ទំនងផ្សេងទៀតទាំងអស់ពីមុនរបស់នាងដែរ ។ នាងនឿយហត់ខាងសតិអារម្មណ៍ ហើយមានអារម្មណ៍ថា នាងមិនមានកម្លាំងគ្រប់គ្រាន់ដើម្បីនឹងចូលទៅក្នុងទំនាក់ទំនងមួយទៀតនោះទេ ។ នាងបានរៀនចប់កាលពីឆ្នាំមុន ហើយមានការងារពេញម៉ោងមួយ ។ នាងព្រួយបារម្ភថា នាងអាចនឹងមិនបានជួបសេ្នហាដ៏ពិតប្រាកដមួយ ឬមិនបានផ្សារភ្ជាប់នៅក្នុងព្រះវិហារបរិសុទ្ធឡើយ ហើយគិតថា តើនាងគួរតែដើរលេងជាគូជាមួយនឹងអ្នកនៅក្រៅសាសនាចក្រដែរឬអត់ ។
ក្រោយពីបានអានសាច់រឿងរួមគ្នាហើយ សូមពិភាក្សាសំណួរដូចខាងក្រោមនេះ ៖
-
តើអ្នកគិតថា អ្វីទៅជាការព្រួយបារម្ភរបស់ លូអ៊ីស និង អិមម៉ា ?
-
ដោយគិតពីអ្វីដែលយើងបានរៀននៅក្នុង ផ្នែកទី ១ នៃឯកសាររៀបចំ តើដំបូន្មានអ្វីខ្លះដែលអាចមានប្រយោជន៍ដល់ លូអ៊ីស ? តើដំបូន្មានអ្វីខ្លះដែលអាចមានប្រយោជន៍ដល់ អិមម៉ា ?
-
ប្រសិនបើអ្នកមិនទាន់បានជជែកគ្នាអំពីវគ្គបទគម្ពីរដូចតទៅនេះនៅក្នុងការពិភាក្សាក្រុមរបស់អ្នកនៅឡើយទេ សូមអានវារួមគ្នា ហើយពិភាក្សាពីរបៀបដែលវាអាចទាក់ទងនឹង លូអ៊ីស និង អិមម៉ា ៖ សុភាសិន ៣:៥–៦; នីហ្វៃទី២ ២២:២; គោលលទ្ធិ និង សេចក្ដីសញ្ញា ៥៨:២៦–២៨ ។ តើអ្នកបានអនុវត្តសេចក្ដីជំនឿ ឬតើអ្នកអាចអនុវត្តសេចក្ដីជំនឿលើព្រះអម្ចាស់នៅក្នុងកិច្ចខិតខំរបស់អ្នក ដើម្បីស្វែងរកដៃគូដ៏អស់កល្បជានិច្ចតាមរបៀបណា ?
© 2022 by Intellectual Reserve, Inc. All rights reserved
សាច់រឿង ផ្នែកទី ១
បន្ទាប់ពីសិស្សមានពេលគ្រប់គ្រាន់ដើម្បីពិភាក្សាពីសាច់រឿងនេះ និងសំណួរទាំងឡាយហើយ សូមអញ្ជើញសិស្សពីរបីនាក់ឲ្យចែកចាយអ្វីដែលពួកគេបានរៀន ឬមានអារម្មណ៍នៅអំឡុងពេលពិភាក្សារបស់ពួកគេ ។ នៅពេលសិស្សចែកចាយ អ្នកអាចជួយពួកគេឲ្យរកឃើញសេចក្ដីពិត ដែលស្រដៀងនឹងសេចក្ដីពិតដូចតទៅនេះ ៖ សេចក្ដីជំនឿលើព្រះយេស៊ូវគ្រីស្ទនឹងជួយយើងឲ្យមានសេចក្ដីក្លាហាន និងសេចក្ដីអំណត់នៅក្នុងកិច្ចខិតខំរបស់យើង ដើម្បីស្វែងរកដៃគូដ៏អស់កល្បជានិច្ច ។ ព្រះរំពឹងឲ្យយើងប្រើប្រាស់សិទ្ធិជ្រើសរើសរបស់យើង ដើម្បីបន្ដធ្វើតាមផែនការរបស់ទ្រង់ ។ សូមពិចារណាសរសេរសេចក្ដីពិតដែលសិស្សរកឃើញដាក់នៅលើក្ដារខៀន ។
ការអភិវឌ្ឍគុណលក្ខណៈដូចជាព្រះគ្រីស្ទ និងការស្វែងរកវិវរណៈនឹងជួយយើងឲ្យរៀបចំខ្លួនដើម្បីរៀបអាពាហ៍ពិពាហ៍ ។
សូមចែកដល់សិស្សម្នាក់ៗនូវផ្នែកទី ២ នៃសាច់រឿងខាងក្រោមនេះ ។ សូមណែនាំពួកគេឲ្យអានសាច់រឿងនេះ ហើយពិភាក្សានៅក្នុងក្រុមរបស់ពួកគេអំពីសំណួរបន្ដ ។
សាច់រឿង ផ្នែកទី ២
ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១១
បន្ទាប់ពីមេរៀនថ្នាក់វិទ្យាស្ថានស្ដីពីអាពាហ៍ពិពាហ៍ដ៏នៅអស់កល្បជានិច្ច ទាំង លូអ៊ីស និង អិមម៉ា មានអារម្មណ៍ចង់ធ្វើការផ្លាស់ប្ដូរមួយចំនួន ហើយទុកចិត្តទៅលើព្រះអម្ចាស់កាន់តែខ្លាំងឡើង ។ នៅពេល លូអ៊ីស មកដល់ថ្នាក់វិទ្យាស្ថាននៅសប្ដាហ៍ក្រោយ គាត់ទៅអង្គុយជិត អិមម៉ា ហើយណែនាំខ្លួនគាត់ ។ យូរៗទៅ ពួកគេក្លាយជាមិត្តល្អនឹងគ្នា ។ ពួកគេដាក់ផែនការធ្វើសកម្មភាពជាច្រើន ដែលអនុញ្ញាតឲ្យពួកគេចំណាយពេលជាមួយគ្នា និងរៀនអំពីគ្នាទៅវិញទៅមក ។ មិនយូរប៉ុន្មាន ពួកគេមានអារម្មណ៍កាន់តែជិតដិតនឹងគ្នា ។
ប៉ុន្ដែ អិមម៉ា មានកង្វល់មួយចំនួន ។ នាងមានបញ្ជីគុណសម្បត្តិមួយ ដែលនាងចង់ឲ្យស្វាមីម្នាក់មាន ។ លូអ៊ីស មានគុណសម្បត្តិទាំងនេះជាច្រើន ប៉ុន្ដែមិនមែនទាំងអស់នោះទេ ។
លូអ៊ីស ក៏ចាប់ផ្ដើមមានអារម្មណ៍ភ័យដែរ ។ គាត់ស្រឡាញ់អិមម៉ា ប៉ុន្ដែដោយបានឃើញអាពាហ៍ពិពាហ៍របស់ឪពុកម្ដាយគាត់ផ្ទាល់បែកបាក់ នោះគាត់់ខ្លាចថានឹងមានកំហុស ក្នុងការជ្រើសរើសមនុស្សដែលត្រូវរៀបការជាមួយ ។ គាត់ពិចារណាដោយប្រុងប្រយ័ត្នពីអ្វីៗគ្រប់យ៉ាង ដែលគាត់បានដឹងអំពីអិមម៉ា ចេញមកពីការសន្ទនាជាច្រើនរបស់ពួកគេ និងបទពិសោធន៍ជាមួយគ្នា ។ គាត់មានអារម្មណ៍ថា គោលដៅរបស់ពួកគេដូចគ្នា ហើយចង់សុំអិមម៉ាឲ្យរៀបការនឹងគាត់ ប៉ុន្ដែវានៅតែមានកត្តាជាច្រើនដែលគាត់មិនដឹង ។ លូអ៊ីស អធិស្ឋានសូមទីសម្គាល់មួយដែលបញ្ជាក់ថា អិមម៉ាគឺជាជម្រើសដ៏ត្រឹមត្រូវ ។ តែគ្មានអ្វីកើតឡើងនោះទេកន្លងមកនេះ ។
-
សូមពិចារណាពីអ្វីដែលអ្នកបានរៀនមកពី ផ្នែកទី ២ នៃឯកសាររៀបចំ ។ តើមានអ្វីដែលអាចជួយ អិមម៉ា ទាក់ទងទៅនឹងបញ្ជីស្វែងរកអនាគតស្វាមីរបស់នាង ? តើយើងអាចប្រឈមមុខនឹងបញ្ហាអ្វីខ្លះ ប្រសិនបើការរំពឹងទុករបស់យើងអំពីអនាគតស្វាមី ឬភរិយាទាបពេក ឬខ្ពស់ពេកនោះ ?
-
តើមានអ្វីខ្លះដែលមានប្រយោជន៍ ដែលលូអ៊ីសត្រូវយល់អំពីការភ័យខ្លាចរបស់គាត់ ? តើមានអ្វីខ្លះដែលមានប្រយោជន៍ ដែលគាត់ត្រូវយល់អំពីការទទួលបានវិវរណៈ ? ( អ្នកអាចពិនិត្យ ផ្នែកទី ៣ នៃឯកសាររៀបចំ ឡើងវិញបាន ) ។
-
តើមានសកម្មភាព ឬបទពិសោធន៍អ្វីខ្លះ ដែលអាចជួយបុគ្គលទាំងពីររូបនេះឲ្យបង្កើតចំណងមិត្តភាព ហើយរៀនស្គាល់គុណសម្បត្តិ អត្តចរិត និងគុណតម្លៃរបស់គ្នាទៅវិញទៅមកបានកាន់តែច្បាស់នោះ ? តើអ្វីទៅជាគុណសម្បត្តិរបស់ព្រះអង្គសង្គ្រោះមួយ ឬពីរ ដែលអ្នកសង្ឃឹមថានឹងអភិវឌ្ឍឲ្យបាន ដើម្បីរៀបចំខ្លួនសម្រាប់អាពាហ៍ពិពាហ៍ ឬនៅពេលអ្នកបន្ដនៅក្នុងអាពាហ៍ពិពាហ៍ ?
© 2022 by Intellectual Reserve, Inc. All rights reserved
សាច់រឿង ផ្នែកទី ២
បន្ទាប់ពីទុកពេលឲ្យគ្រប់គ្រាន់ហើយនោះ សូមឲ្យសិស្សពីរបីនាក់ចែកចាយអំពីអ្វីដែលពួកគេបានរៀន ឬមានអារម្មណ៍ក្នុងអំឡុងពេលការពិភាក្សាជាក្រុមរបស់ពួកគេ ។
សូមពិនិត្យឯកសារមេរៀននានាឡើងវិញនៅក្នុង ផ្នែកទី ២ នៃឯកសាររៀបចំ ដែលអាចមានប្រយោជន៍ដល់សិស្ស ។ អ្នកអាចរកឃើញសេចក្ដីពិតដូចតទៅនេះជាពិសេស ៖ យើងរៀបការនឹងសក្ដានុពលភាព មិនមែននឹងភាពល្អឥតខ្ចោះនោះទេ ។ ប្រសិនបើអ្នកសង្ឃឹមឲ្យដៃគូដ៏អស់កល្បជានិច្ចមានគុណសម្បត្តិខាងវិញ្ញាណមួយចំនួន នោះសូមព្យាយាមអភិវឌ្ឍគុណសម្បត្តិទាំងនោះខ្លួនឯងសិន ។ ប្រសិនបើយើងស្វែងរកការដឹកនាំរបស់ព្រះអម្ចាស់នៅក្នុងការសម្រេចចិត្តរបស់យើង នោះទ្រង់នឹងមានបន្ទូលជាសេចក្ដីសុខសាន្ដដល់គំនិតរបស់យើង ហើយយើងនឹងមានអារម្មណ៍នោះ នៅពេលជម្រើសរបស់យើងត្រឹមត្រូវ ។
ប្រសិនបើមានសិស្សដែលបានរៀបការរួចហើយនៅក្នុងថ្នាក់របស់អ្នក នោះអ្នកអាចអញ្ជើញពួកគេម្នាក់ ឬពីរនាក់ឲ្យឡើងចែកចាយពីបទពិសោធន៍របស់ពួកគេ ជាមួយនឹងសេចក្ដីពិតទាំងនេះណាមួយ ។ ប្រសិនបើអ្នកបានរៀបការរួចហើយ សូមពិចារណាចែកចាយបទពិសោធន៍របស់អ្នកផ្ទាល់ផងដែរ ។ សូមថ្លែងទីបន្ទាល់អំពីព្រះទ័យរបស់ព្រះអម្ចាស់ ដែលចង់ជួយសិស្សនៅក្នុងដំណើរស្វែងរកដៃគូដ៏អស់កល្បជានិច្ចរបស់ពួកគេ ។
អ្នកអាចសួរសិស្សថា តើពួកគេមានសំណួរណាមួយដែលទាក់ទងទៅនឹងមេរៀននៅថ្ងៃនេះដែរឬទេ ។ ប្រសិនបើពួកគេមានសំណួរ សូមចំណាយពេលខ្លះៗដើម្បីពិភាក្សាអំពីសំណួររបស់ពួកគេក្នុងថ្នាក់រួមគ្នា ។ បន្ទាប់មក សូមផ្ដល់ពេលវេលាពីរបីនាទីនៅចុងមេរៀន ដើម្បីឲ្យសិស្សកត់ត្រាចំណាប់អារម្មណ៍នានា ដែលពួកគេអាចមានអំពីស្ថានភាពរបស់ពួកគេផ្ទាល់ ។ សូមអញ្ជើញពួកគេឲ្យកំណត់ពីរបៀប ដែលពួកគេអាចបន្ដអនុវត្តសេចក្ដីជំនឿរបស់ពួកគេលើព្រះអម្ចាស់នៅក្នុងកិច្ចខិតខំដើរលេងជាគូរបស់ពួកគេ ឬអ្វីដែលពួកគេត្រូវធ្វើ ដើម្បីអនុវត្តសេចក្ដីជំនឿកាន់តែខ្លាំងទៅលើទ្រង់ ។
សម្រាប់ពេលក្រោយ
សូមអញ្ជើញសិស្សឲ្យរៀបចំខ្លួនសម្រាប់មេរៀនលើកក្រោយ តាមរយៈការសិក្សា ឯកសាររៀបចំ និងការសួរគូស្វាមីភរិយារីករាយមួយគូដែលបានរៀបការហើយ ពីរបៀបដែលពួកគេថែទាំអាពាហ៍ពិពាហ៍របស់ពួកគេ និងរក្សាទំនាក់ទំនងរបស់ពួកគេឲ្យមានភាពរឹងមាំ ។