មេរៀនទី ២៤ ឯកសារគ្រូបង្រៀន ៖ ការនិយាយពីសុខភាពផ្លូវចិត្តដោយមានសេចក្ដីសង្ឃឹម និងសេចក្ដីមេត្តាករុណា

« មេរៀនទី ២៤ ឯកសារគ្រូបង្រៀន ៖ ការនិយាយពីសុខភាពផ្លូវចិត្តដោយមានសេចក្ដីសង្ឃឹម និងសេចក្ដីមេត្តាករុណា » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ២៤ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ២៤ ឯកសារគ្រូបង្រៀន

ការនិយាយពីសុខភាពផ្លូវចិត្តដោយមានសេចក្ដីសង្ឃឹម និងសេចក្ដីមេត្តាករុណា

បញ្ហាសុខភាពផ្លូវចិត្តអាចជាផ្នែកមួយដ៏សំខាន់នៃជីវិតរមែងស្លាប់របស់យើង ។ នៅក្នុងមេរៀននេះ សិស្សនឹងមានឱកាសស្គាល់ពីរបៀបដែលពួកគេអាចបង្កើនសុខភាពផ្លូវចិត្ត និងផ្លូវអារម្មណ៍របស់ពួកគេបាន ។ សិស្សក៏នឹងពិចារណាពីរបៀបដែលពួកគេឆ្លើយតបទៅកាន់សមាជិកគ្រួសារ និងមនុស្សដទៃដែលអាចជួបនឹងបញ្ហាសុខភាពផ្លូវចិត្ត ឬនៅក្នុងស្ថានភាពដែលទាក់ទងនឹងការធ្វើអត្តឃាតប្រកបដោយចិត្តអាណិតអាសូរកាន់តែខ្លាំងជាងមុន ។

យោបល់សម្រាប់ការបង្រៀន

យើងផ្ដល់ពរជ័យឲ្យខ្លួនឯង និងក្រុមគ្រួសាររបស់យើង នៅពេលយើងខិតខំថែរក្សា និងកែលម្អសុខភាពផ្លូវចិត្តរបស់យើង ។

សូមដាក់បង្ហាញសេចក្ដីយោងបទគម្ពីរដូចតទៅនេះ ៖ យ៉ូប ៦:១–៣; នីហ្វៃទី១ ១៨:១៧–១៨; អាលម៉ា ២៦:២៦–២៧ ។ សូមអញ្ជើញសិស្សឲ្យអានវគ្គបទគម្ពីរទាំងនេះមួយដោយស្ងៀមស្ងាត់ ហើយរកមើលឧបសគ្គចំពោះសុខុមាលភាពខាងផ្លូវចិត្ត ឬផ្លូវអារម្មណ៍របស់បុគ្គលទាំងនោះ ។ សូមឲ្យសិស្សចែកចាយអ្វីដែលពួកគេរកឃើញ ។ នៅពេលសិស្សចែកចាយ អ្នកគួរសរសេរចម្លើយរបស់ពួកគេនៅលើក្តារខៀន ។

តើប្រភេទនៃឧបសគ្គ និងស្ថានភាពផ្សេងទៀតណាខ្លះដែលអាចជះឥទ្ធិពលអវិជ្ជមានលើសុខុមាលភាពផ្លូវចិត្ត ឬផ្លូវអារម្មណ៍របស់យើង ? ( សូមសរសេរចម្លើយរបស់សិស្សនៅលើក្ដារខៀន ) ។
ហេតុអ្វីវាអាចមានប្រយោជន៍ដើម្បីដឹងថា ការប្រឈមនឹងឧបសគ្គចំពោះសុខភាពផ្លូវចិត្ត និងផ្លូវអារម្មណ៍របស់យើងអាចជាផ្នែកធម្មតាមួយនៃបទពិសោធន៍ជីវិតរមែងស្លាប់របស់យើង ?

សូមរំឭកសិស្សថា ព្រះយេស៊ូវគ្រីស្ទគឺជា « មនុស្សទូទុក្ខ ហើយក៏ធ្លាប់ស្គាល់សេចក្តីឈឺចាប់ » ដែរ ( អេសាយ ៥៣:៣ ) ។ សូមអញ្ជើញសិស្សឲ្យចែកចាយបទពិសោធន៍ដែលព្រះអង្គសង្គ្រោះបានមាន ដើម្បីឆ្លុះបញ្ចាំងពីការបំពេញការព្យាកររបស់អេសាយ ។

សូមដាក់បង្ហាញសេចក្ដីយោងបទគម្ពីរដូចតទៅនេះ ៖ ម៉ាថាយ ១៤:២២–២៣; ម៉ាកុស ១:៣៥; ៦:៣១, ៤៦; លូកា ៥:១៦ ។ សូមអញ្ជើញសិស្សឲ្យអានវគ្គបទគម្ពីរទាំងនេះមួយ ឬច្រើនដោយស្ងៀមស្ងាត់ ហើយស្វែងរកមេរៀនដែលយើងអាចរៀនមកពីសកម្មភាពរបស់ព្រះអម្ចាស់ ។ សូមឲ្យពួកគេចែកចាយអ្វីដែលពួកគេរកឃើញ ហើយជួយពួកគេឲ្យស្គាល់សេចក្ដីពិតដូចតទៅនេះ ៖ យើងធ្វើតាមគំរូរបស់ព្រះយេស៊ូវគ្រីស្ទ នៅពេលយើងចំណាយពេលសម្រាក នៅស្ងៀម ហើយអធិស្ឋាន ។

ហេតុអ្វីវាសំខាន់ដើម្បីមើលថែសុខភាពផ្លូវចិត្ត និងផ្លូវអារម្មណ៍របស់អ្នកយ៉ាងសកម្ម ? ( សូមពិចារណាអានសេចក្ដីថ្លែងការណ៍ដោយប្រធាន អិម រ័សុល បាឡឺដ នៅក្នុងផ្នែកទី ១ នៃឯកសាររៀបចំ ) ។

សូមទុកពេលពីរបីនាទីឲ្យសិស្សសញ្ជឹងគិត ហើយកត់ត្រាវិធីមួយដែលពួកគេអាចពង្រឹងសុខភាពផ្លូវចិត្ត ឬផ្លូវអារម្មណ៍របស់ពួកគេបាន ហើយបង្កើតផែនការដ៏សាមញ្ញមួយសម្រាប់ការធ្វើដូច្នោះ ។ សូមពិចារណាឲ្យសិស្សយោងទៅ សំណួរ នៅក្នុងផ្នែកទី ១ នៅក្នុងឯកសាររៀបចំសម្រាប់គំនិតនានា ។

យើងអាចឆ្លើយតបដោយសេចក្ដីស្រឡាញ់ និងសេចក្ដីមេត្តាករុណាដូចជាព្រះគ្រីស្ទទៅកាន់បុគ្គលដែលជួបប្រទះនឹងឧបសគ្គផ្លូវចិត្តបាន ។

សូមដាក់បង្ហាញ ហើយអានដំណើររឿងដូចតទៅនេះស្ដីពីបុគ្គលដែលបានជួបប្រទះនឹងឧបសគ្គសុខភាពផ្លូវចិត្ត ដូចដែលស៊ីស្ទើរ រ៉េណា អ៊ី អាប៊ើតូ បានចែកចាយ ។ ឬប្រសិនបើអ្នកចង់ធ្វើ សូមបង្ហាញផ្នែកទីមួយនៃវីដេអូ « Like a Broken Vessel » ( លេខកូដម៉ោង ០:០០–៣:១៦ នៅលើគេហទំព័រ ChurchofJesusChrist.org ) ។ សូមឲ្យសិស្សសញ្ជឹងគិតពីអារម្មណ៍ដែលពួកគេមាន នៅពេលពួកគេស្ដាប់ឮដំណើររឿងទាំងនេះ ។

11:36

មានពេលមួយកូនស្រីខ្ញុំបានសរសេរថា « មានគ្រាមួយ … [ ជាពេលដែល ] ខ្ញុំមានភាពសោកសៅយ៉ាងខ្លាំងគ្រប់ពេល ។ ខ្ញុំតែងគិតថា ភាពសោកសៅគឺជារឿងមួយដែលគួរឲ្យខ្មាសអៀន ហើយថាវាគឺជាសញ្ញានៃភាពទន់ខ្សោយ ។ ដូច្នេះខ្ញុំបានលាក់ទុកភាពសោកសៅរបស់ខ្ញុំ ។ … ខ្ញុំបានទទួលអារម្មណ៍ដូចជាមនុស្សគ្មានតម្លៃសោះ » [ Hermana Elena Aburto blog នៅលើគេហទំព័រ hermanaelenaaburto.blogspot.com/2015/08 ] ។

មានមិត្តម្នាក់បានរៀបរាប់វាតាមរបៀបនេះថា « តាំងពីក្មេងមក ខ្ញុំបានធ្វើការតតាំងនឹងអារម្មណ៍នៃភាពអស់សង្ឃឹម ភាពខ្មៅងងឹត ភាពឯកោ និងភាពភ័យខ្លាច ព្រមទាំងអារម្មណ៍ដែលមានបញ្ហា ឬជំងឺ ។ ខ្ញុំបានធ្វើអ្វីគ្រប់យ៉ាងដើម្បីលាក់ទុកការឈឺចាប់របស់ខ្ញុំ ហើយខិតខំបង្ហាញថា ខ្ញុំធ្វើបានអ្វីៗទាំងអស់ ថាខ្ញុំជាមនុស្សដែលព្យាយាម និងរឹងមាំ » [ ការឆ្លើយឆ្លងដោយផ្ទាល់ ] ។ ( « Thru Cloud and Sunshine, Lord, Abide with Me! » Liahona ខែ វិច្ឆិកា ឆ្នាំ ២០១៩ ទំព័រ ៥៧ )

តើអ្នកមានគំនិត និងអារម្មណ៍អ្វីខ្លះ នៅពេលអ្នកស្តាប់ឮដំណើររឿងទាំងនេះ ?

សូមចែកសំណៅដែលភ្ជាប់មកជាមួយដល់សិស្សម្នាក់ៗ ឬដាក់បង្ហាញសំណួរទាំងនោះឲ្យសិស្សគ្រប់គ្នាបានឃើញ ។ សូមអញ្ជើញសិស្សឲ្យអាន ហើយពិចារណាពីសំណួរទាំងនោះដោយខ្លួនឯង ។ បន្ទាប់ពីសិស្សមានពេលគ្រប់គ្រាន់ហើយ សូមរៀបចំសិស្សជាក្រុមតូចៗ ហើយសុំឲ្យសិស្សចែកចាយគំនិតរបស់ពួកគេអំពីសំណួរមួយ ឬច្រើនដែលសមស្របនឹងពួកគេ ។

ឧបសគ្គសុខភាពផ្លូវចិត្ត

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ២៤

តើបុគ្គលដែលជួបប្រទះឧបសគ្គសុខភាពផ្លូវចិត្តអាចទទួលបានពរជ័យដោយការទទួលស្គាល់ និងការនិយាយអំពីឧបសគ្គទាំងនោះដោយរបៀបណា ? ហេតុអ្វីវាសំខាន់ចំពោះបុគ្គលទាំងនេះដើម្បីស្វែងរកជំនួយពីថ្នាក់ដឹកនាំសាសនាចក្រ ឬគ្រូពេទ្យជំនាញ ?
ប្រសិនបើសមាជិកគ្រួសារ ឬមិត្តម្នាក់ចែកចាយជាមួយនឹងអ្នកថា គាត់កំពុងជួបប្រទះឧបសគ្គសុខភាពផ្លូវចិត្ត តើរឿងមួយ ( ឬច្រើន ) ដ៏សំខាន់បំផុតដែលអ្នកអាចនិយាយ ឬធ្វើបានគឺជាអ្វី ? ( សូមពិចារណាពិនិត្យឡើងវិញនូវសេចក្តីថ្លែងការណ៍ដោយ ស៊ីស្ទើរ រ៉េណា អ៊ី អាប៊ើតូ នៅក្នុងផ្នែកទី ២ នៃឯកសាររៀបចំ ) ។ តើរឿងមួយចំនួនណាខ្លះដែលគ្មានប្រយោជន៍ដើម្បីនិយាយ ឬធ្វើ ? តើអ្នកធ្លាប់ឃើញនរណាម្នាក់ឆ្លើយតបតាមរបៀបដូចជាព្រះគ្រីស្ទទៅកាន់ឧបសគ្គសុខភាពផ្លូវចិត្តរបស់មនុស្សម្នាក់ទៀតនៅពេលណា ?
សូមសញ្ជឹងគិតពីអ្វីដែលព្រះយេស៊ូវគ្រីស្ទយល់ពីឧបសគ្គសុខភាពផ្លូវចិត្តរបស់យើង ។ ( អ្នកគួរតែអាន អាលម៉ា ៧:១១–១២ ) ។ តើអ្នកអាចស្វែងរកជំនួយរបស់ទ្រង់ដោយរបៀបណា ប្រសិនបើអ្នករងទុក្ខដោយសារតែឧបសគ្គសុខភាពផ្លូវចិត្ត ឬប្រសិនបើអ្នកកំពុងជួយដល់មនុស្សម្នាក់ដែលជួបនឹងបញ្ហានេះ ?

បន្ទាប់ពីទុកពេលគ្រប់គ្រាន់ហើយនោះ សូមឲ្យសិស្សពីរបីនាក់ចែកចាយអំពីអ្វីដែលពួកគេបានរៀននៅក្នុងក្រុមរបស់ពួកគេ ។

យើងអាចជួយទប់ស្កាត់ការធ្វើអត្តឃាត និងជួយដល់អ្នកដែលបាត់បង់មនុស្សជាទីស្រឡាញ់ដោយសារតែការធ្វើអត្តឃាតបាន ។

សូមរំឭកសិស្សថា ឧបសគ្គសុខភាពផ្លូវចិត្តធ្ងន់ធ្ងរអាចជាកត្តាដ៏មានហានិភ័យឈានទៅរកការធ្វើអត្តឃាត ។ សូមអញ្ជើញសិស្សឲ្យរំឭក ម៉ូសាយ ១៨:៨–៩ ហើយចែកចាយពីរបៀបដែលការបង្រៀននៅក្នុងសារលិខិតនេះអាចដឹកនាំយើងឲ្យជួយដល់អ្នកដែលកំពុងពុះពារគំនិតចង់ធ្វើអត្តឃាត ។ ( នៅពេលសិស្សចែកចាយ ពួកគេអាចស្គាល់នូវសេចក្ដីពិតស្រដៀងគ្នាមួយទៅនឹងសេចក្ដីពិតដូចតទៅនេះ ៖ ក្នុងនាមជាពួកសិស្សរបស់ព្រះយេស៊ូវគ្រីស្ទ យើងត្រូវបានហៅឲ្យសម្រាលបន្ទុកគ្នាទៅវិញទៅមក ហើយទួញយំជាមួយនឹងអ្នកដែលទួញយំ ) ។

តើអ្នកធ្លាប់ឃើញគេអនុវត្តគោលការណ៍នេះតាមរបៀបណា ? តើទង្វើជាក់លាក់ណាផ្សេងទៀតដែលអ្នកអាចធ្វើបានក្នុងនាមជាសិស្សម្នាក់របស់ព្រះយេស៊ូវគ្រីស្ទ ដើម្បីជួយទប់ស្កាត់ការធ្វើអត្តឃាត ? ( អ្នកគួរតែបង្ហាញវីដេអូ « Preventing Suicide » [ ១:៤៣ ] ដែលធ្វើបទបង្ហាញដោយស៊ីស្ទើរ ខារ៉ុល អេហ្វ ម៉ាកខន់ឃី ដែលមានសេចក្ដីយោងនៅក្នុង ផ្នែកទី ៣ នៃឯកសាររៀបចំ ) ។

1:43
តើព្រះវរបិតាសួគ៌ និងព្រះយេស៊ូវគ្រីស្ទអាចជួយដល់អ្នកដែលកំពុងពុះពារនឹងគំនិតធ្វើអត្តឃាតដោយរបៀបណា ? តើទ្រង់ទាំងទ្វេអាចជួយបុគ្គលដែលបានបាត់បង់មនុស្សជាទីស្រឡាញ់ដោយសារតែការធ្វើអត្តឃាតដោយរបៀបណា ?

សូមទុកពេលពីរបីនាទីឲ្យសិស្សកត់ត្រាពីអ្វីដែលពួកគអាចធ្វើបាន ដើម្បីឆ្លើយតបដោយសេចក្ដីស្រឡាញ់ និងសេចក្ដីមេត្តាករុណាដូចជាព្រះគ្រីស្ទចំពោះបញ្ហាសុខភាពផ្លូវចិត្ត ឬនៅក្នុងស្ថានភាពដែលទាក់ទងនឹងការធ្វើអត្តឃាតរបស់មនុស្សម្នាក់ផ្សេងទៀត ។

សម្រាប់ពេលក្រោយ

សូមពិចារណាសួរសំណួរខាងក្រោមនេះនៅចុងបញ្ចប់នៃមេរៀន ឬក្នុងសារលិខិតមួយអំឡុងសប្ដាហ៍នេះ ។ សូមអញ្ជើញសិស្សឲ្យសិក្សា ឯកសាររៀបចំសម្រាប់ថ្នាក់លើកក្រោយ ដោយគិតដល់សំណួរទាំងនេះក្នុងចិត្ត ។

តើការប្រែចិត្តរបស់អ្នកអាចជះឥទ្ធិពលដល់សុខុមាលភាពនៃគ្រួសាររបស់អ្នកយ៉ាងដូចម្ដេច ?
តើអ្នកអាចទទួលជំនួយដើម្បីអភ័យទោសឲ្យសមាជិកគ្រួសារម្នាក់ដែលបានធ្វើឲ្យអ្នកអាក់អន់ចិត្ត ឬឈឺចាប់ដោយរបៀបណា ?