មេរៀនទី ១៤ ឯកសារគ្រូបង្រៀន ៖ ការដោះស្រាយបញ្ហាប្រើប្រាស់រូបអាសគ្រាម

« មេរៀនទី ១៤ ឯកសារគ្រូបង្រៀន ៖ ការដោះស្រាយបញ្ហាប្រើប្រាស់រូបអាសគ្រាម » ឯកសារគ្រូបង្រៀន គ្រួសារដ៏អស់កល្បជានិច្ច ( ឆ្នាំ ២០២២ )

« មេរៀនទី ១៤ ឯកសារគ្រូបង្រៀន » ឯកសារគ្រូបង្រៀន គ្រួសារដ៏អស់កល្បជានិច្ច

មេរៀនទី ១៤ ឯកសារគ្រូបង្រៀន

ការដោះស្រាយបញ្ហាប្រើប្រាស់រូបអាសគ្រាម

ព្រះវរបិតាសួគ៌ និងព្រះយេស៊ូវគ្រីស្ទអាចជួយការពារយើងពីឥទ្ធិពលដ៏រាលដាលនៃរូបអាសគ្រាមបាន ។ នៅក្នុងមេរៀននេះ សិស្សនឹងត្រូវបានអញ្ជើញឲ្យកំណត់ពីអ្វីដែលពួកគេអាចធ្វើបាន ដើម្បីទទួលបានជំនួយដ៏ទេវភាពនេះ ។ សិស្សក៏នឹងពិចារណាពីរបៀបដែលពួកគេអាចស្វែងរកព្រះចេស្ដារបស់ព្រះអម្ចាស់ ដើម្បីព្យាបាលពួកគេពីឥទ្ធិពលនៃការប្រើប្រាស់រូបអាសគ្រាមផងដែរ ។

យោបល់សម្រាប់ការបង្រៀន

ការយល់អំពីអត្តសញ្ញាណ និងគោលបំណងដ៏ទេវភាពរបស់យើង ជួយយើងឲ្យទប់ទល់នឹងរូបអាសគ្រាមបាន ។

ការអភិវឌ្ឍការបង្រៀន និងការរៀនសូត្ររបស់យើង

សូមបន្ដនិយាយគ្នាដោយវិជ្ជមាន និងពេញទៅដោយក្ដីសង្ឃឹមនៅក្នុងមេរៀននេះ ។ សំឡេងដែលអ្នក និងសិស្សរបស់អ្នកនិយាយពិភាក្សាគ្នាអំពីការបង្រៀនដំណឹងល្អ អាចមានឥទ្ធិពលដល់ឥរិយាបថ និងបទពិសោធន៍រៀនសូត្ររបស់សិស្សផ្សេងទៀត ។ វាមានសារៈសំខាន់ ដើម្បីពិភាក្សាពីប្រធានបទដូចជារូបអាសគ្រាមនេះ តាមរបៀបមួយដែលទទួលស្គាល់ពីភាពធ្ងន់ធ្ងររបស់វា ដោយមិនបង្កើតឲ្យមានអារម្មណ៍អៀនខ្មាសនោះទេ ។ ការបញ្ចេញសំឡេងនៃមេរៀននេះ អាចជួយអស់អ្នកដែលមានជីវិតទទួលរងឥទ្ធិពលអវិជ្ជមានពីរូបអាសគ្រាម ឲ្យមានសេចក្ដីសង្ឃឹមលើព្រះចេស្ដាព្យាបាលរបស់ព្រះយេស៊ូវគ្រីស្ទ ។

សូមដាក់បង្ហាញសេចក្ដីថ្លែងការណ៍ និងសំណួរខាងក្រោមនេះ ហើយអញ្ជើញសិស្សឲ្យឆ្លើយតប ៖

ការប្រើប្រាស់រូបអាសគ្រាមកំពុងតែកើនឡើង ។ តើមានមូលហេតុអ្វីខ្លះ ដែលមនុស្សមួយចំនួនមានក្នុងការដោះសាដើម្បីប្រើប្រាស់រូបអាសគ្រាម ?

( សិស្សអាចផ្តល់យោបល់ខ្លះៗដូចតទៅនេះ ៖ វាជាទម្លាប់មួយ ។ ខ្ញុំចេះតែចង់មើលវា ។ វាមិនធ្វើបាបអ្នកផ្សេងទៀតនោះទេ ។ វាជារឿងធម្មជាតិ ។ វាគ្រាន់តែជាការកម្សាន្ដ ។ ការសិក្សាមួយចំនួនផ្ដល់យោបល់ថា វាមានប្រយោជន៍សម្រាប់ការអភិវឌ្ឍខាងផ្លូវភេទ និងទំនាក់ទំនងដ៏ជិតស្និទ្ធ ) ។

តើព្រះអម្ចាស់បានបង្រៀនអ្វីខ្លះ ទាក់ទងទៅនឹងការប្រឆាំងនឹងរូបអាសគ្រាម ? ( អ្នកអាចចង់ឲ្យសិស្សយោងទៅការបង្រៀននៅក្នុង ផ្នែកទី ១ នៅក្នុងឯកសាររៀបចំ ។ ជាផ្នែកមួយនៃការពិភាក្សានេះ អ្នកអាចអញ្ជើញសិស្សម្នាក់ឲ្យអាន ម៉ាថាយ ៥:២៨ ឬ គោលលទ្ធិ និង សេចក្ដីសញ្ញា ៦៣:១៦ ឮៗ ) ។
តើរូបអាសគ្រាមអាចមានឥទ្ធិពលគ្រោះថ្នាក់អ្វីខ្លះ ទៅលើអ្នកដែលប្រើប្រាស់វា និងទៅលើក្រុមគ្រួសាររបស់ពួកគេ ?

សូមបង្ហាញសេចក្ដីថ្លែងការណ៍ខាងក្រោមនេះដោយអែលឌើរ ថាត អរ ខាលីស្ទើរ ខណៈដែលលោកបានបម្រើនៅក្នុងគណៈប្រធាននៃពួកចិតសិបនាក់ ៖

នៅក្នុងសម័យប្រជុំបំពាក់បំប៉ននាពេលថ្មីៗសម្រាប់ពួកអ្នកមានសិទ្ធអំណាចទូទៅ សំណួរមួយបានសួរថា « តើយើងអាចជួយអ្នកដែលកំពុងពុះពារនឹងរូបអាសគ្រាមតាមរបៀបណា ? »

អែលឌើរ រ័សុល អិម ណិលសុន បានក្រោកឈរ ហើយបានឆ្លើយតបថា « បង្រៀនពួកគេអំពីអត្តសញ្ញាណ និងគោលបំណងរបស់ពួកគេ » ។ ( « Our Identity and Our Destiny » [ ការប្រជុំធម្មនិដ្ឋាន Brigham Young University Education Week នៅថ្ងៃទី ១៤ ខែ សីហា ឆ្នាំ ២០១២ ] នៅលើគេហទំព័រ speeches.byu.edu )

សូមសរសេរសេចក្ដីពិតដូចតទៅនេះដាក់នៅលើក្ដារខៀន ៖ ការយល់ដឹងអំពីអត្តសញ្ញាណ និងគោលបំណងដ៏ទេវភាពរបស់យើងអាចជួយយើងឲ្យទប់ទល់នឹងការប្រើប្រាស់រូបអាសគ្រាម ។

តើការយល់ដឹងអំពីអត្តសញ្ញាណ និងគោលបំណងដ៏ទេវភាពរបស់យើងផ្ទាល់ និងរបស់អ្នកដទៃ អាចជួយយើងឲ្យទប់ទល់នឹងការប្រើប្រាស់រូបអាសគ្រាមដោយរបៀបណា ? តើយើងអាចធ្វើអ្វីខ្លះ ដើម្បីយល់ដឹងអំពីអត្តសញ្ញាណ និងគោលបំណងរបស់យើងឲ្យបានកាន់តែច្បាស់ ?
តើមានគោលការណ៍ ការអនុវត្ត ឬធនធានផ្សេងទៀតណាខ្លះ ដែលបានជួយអ្នកឲ្យការពារខ្លួនពីរូបអាសគ្រាម ? ( ជាផ្នែកមួយនៃការពិភាក្សានេះ សូមពិចារណាអញ្ជើញសិស្សឲ្យទាញយកអ្វីដែលពួកគេបានរៀនមកពី ផ្នែកទី ២ នៃឯកសាររៀបចំ ) ។

ព្រះយេស៊ូវគ្រីស្ទអាចព្យាបាលបុគ្គលម្នាក់ៗពីឥទ្ធិពលនៃរូបអាសគ្រាមបាន ។

ប្រសិនបើអាចធ្វើទៅបាន សូមបង្ហាញរូបភាពស្ដ្រីដែលមានជំងឺធ្លាក់ឈាម ដែលបានឈោងទៅព្រះអង្គសង្គ្រោះ ដែលមាននៅក្នុង ផ្នែកទី ៣ នៃឯកសាររៀបចំ ។ សូមអញ្ជើញសិស្សម្នាក់ឲ្យតំណាលពីបទពិសោធន៍របស់ស្ដ្រីរូបនេះម្ដងទៀត ដូចបានកត់ត្រានៅក្នុង លូកា ៨:៤៣–៤៨ ។

ប្រសិនបើអ្នកស្ថិតនៅក្នុងស្ថានភាពរបស់ស្ដ្រីរូបនេះ តើអ្នកនឹងមានអារម្មណ៍យ៉ាងណា ក្រោយពីអ្នកបានពុះពារជាច្រើនឆ្នាំមកនេះ ?
តើអ្នកដែលស្វែងរកការព្យាបាលពីឥទ្ធិពលនៃរូបអាសគ្រាម អាចរៀនអ្វីខ្លះមកពីគំរូរបស់ស្ដ្រីរូបនេះ ? ( សិស្សអាចរកឃើញគោលការណ៍មួយដែលស្រដៀងនឹងគោលការណ៍ដូចតទៅនេះ ៖ នៅពេលយើងព្យាយាមឈោងទៅរកព្រះអម្ចាស់ដោយមានសេចក្ដីជំនឿ នោះទ្រង់អាចជួយយើងឲ្យជាសះស្បើយពីឥទ្ធិពលនៃការប្រើប្រាស់រូបអាសគ្រាម ) ។
ហេតុអ្វីបានជាវាមានសារៈសំខាន់ដើម្បីឈោងទៅរកព្រះយេស៊ូវគ្រីស្ទ នៅក្នុងការខិតខំរបស់យើងដើម្បីយកឈ្នះលើការប្រើប្រាស់រូបអាសគ្រាម ឬការឈឺចាប់ដែលបង្កដោយការប្រើប្រាស់រូបអាសគ្រាមរបស់នរណាម្នាក់ទៀតនោះ ?

សូមពិចារណាអញ្ជើញសិស្សម្នាក់ឲ្យអានឮៗនៅក្នុង សេចក្ដីថ្លែងការណ៍ដោយប្រធាន រ័សុល អិម ណិលសុន ដែលមាននៅក្នុងផ្នែកទី ៣ នៃឯកសាររៀបចំ ។

តើវាមានភាពខុសគ្នាអ្វីខ្លះ នៅពេលបុគ្គលម្នាក់ស្ម័គ្រចិត្តធ្វើអ្វីៗគ្រប់យ៉ាងដែលចាំបាច់ ដើម្បីទទួលការព្យាបាលពីព្រះអម្ចាស់ ?

អ្នកអាចពន្យល់ថា យើងអាចព្យាយាមជួយមនុស្សដទៃដែលកំពុងប្រឈមមុខជាមួយនឹងឥទ្ធិពលនៃរូបអាសគ្រាម និងមើលទៅដំណើរព្យាបាលរបស់ពួកគេតាមរបៀបដូចជាព្រះគ្រីស្ទដោយចិត្តអំណត់បាន ។ សូមអានរួមគ្នានូវសេចក្ដីថ្លែងការណ៍ខាងក្រោមនេះដោយប្រធាន ដាល្លិន អេក អូក នៃគណៈប្រធានទីមួយ ៖

ឥឡូវនេះ ពាក្យមួយម៉ាត់ដែលទាក់ទងទៅនឹងរបៀបដែលយើងអាចប្រព្រឹត្តចំពោះអស់អ្នកដែលជាប់អន្ទាក់នៃរូបអាសគ្រាមនេះ ។ ពួកយើងទាំងអស់គ្នាត្រូវការដង្វាយធួនរបស់ព្រះយេស៊ូវគ្រីស្ទ ។ អស់អ្នកដែលពុះពារជាមួយនឹងរូបអាសគ្រាមត្រូវការសេចក្តីអាណិតអាសូរ និងសេចក្តីស្រឡាញ់របស់យើង នៅពេលពួកគេធ្វើតាមគោលការណ៍ដ៏ចាំបាច់ និងជំហាននៃការជាសះស្បើយនានា ។ សូមកុំផ្តន្ទាទោសពួកគេឡើយ ។ ពួកគេទាំងនោះពុំមែនជាមនុស្សអាក្រក់ ឬមនុស្សគ្មានសង្ឃឹមនោះឡើយ ។ ពួកគេគឺជាបុត្រា និងបុត្រីរបស់ព្រះវរបិតាសួគ៌របស់យើង ។ តាមរយៈការប្រែចិត្តត្រឹមត្រូវ និងពេញលេញ នោះពួកគេអាចប្រែជាស្អាតស្អំ បរិសុទ្ធ ហើយស័ក្តិសមសម្រាប់គ្រប់សេចក្តីសញ្ញា និងពរជ័យនៃព្រះវិហារបរិសុទ្ធដែលបានសន្យាដោយព្រះ ។ ( « Recovering from the Trap of Pornography » Ensign ខែ តុលា ឆ្នាំ ២០១៥ ទំព័រ ៣៧ )

សូមបែងចែកសិស្សឲ្យធ្វើការជាក្រុមតូចៗ ។ សូមជ្រើសរើសមេក្រុមម្នាក់សម្រាប់ក្រុមនីមួយៗ ហើយចែកច្បាប់ចម្លងនៃសំណៅចែកខាងក្រោមនេះដល់មេក្រុមម្នាក់ៗ ។ សូមណែនាំសិស្សឲ្យធ្វើតាមសេចក្តីណែនាំនៅក្នុងសំណៅចែកនេះ ។

ការជួយនរណាម្នាក់ឲ្យជាសះស្បើយពីឥទ្ធិពលនៃរូបអាសគ្រាម

ឯកសារគ្រូបង្រៀន គ្រួសារដ៏អស់កល្បជានិច្ច—មេរៀនទី ១៤

សូមពិនិត្យមើលសាច់រឿងខាងក្រោមនេះរួមគ្នាឡើងវិញ ហើយជ្រើសរើសសាច់រឿងមួយយកមកពិភាក្សា ៖

មិត្តរួមថ្នាក់ម្នាក់ប្រាប់អាថ៌កំបាំងមួយដល់អ្នកថា ពួកគេទើបតែបានមើលរូបអាសគ្រាមជាលើកដំបូង ។
មិត្តប្រុសរបស់មិត្តម្នាក់បានប្រាប់នាងកាលពីយប់មិញថា គាត់កំពុងពុះពារនឹងការប្រើប្រាស់រូបអាសគ្រាម ។
មិត្តម្នាក់មើលរូបអាសគ្រាមជាប្រចាំ ហើយបានព្យាយាមឈប់ដោយខ្លួនឯងជាច្រើនដងហើយ ប៉ុន្ដែមិនបានជោគជ័យសោះ ទោះបីជានាងមានអារម្មណ៏ថាបានធ្វើអ្វីៗស្ទើរតែគ្រប់យ៉ាង ដែលនាងអាចធ្វើបានដើម្បីឈប់ក៏ដោយ ។
មិត្តម្នាក់បានចែកចាយជាមួយអ្នកថា ស្វាមីរបស់នាងពុះពារនឹងរូបអាសគ្រាម ហើយនាងមិនដឹងជួយគាត់យ៉ាងណានោះទេ ។ វាបង្កគ្រោះថ្នាក់ដល់អាពាហ៍ពិពាហ៍របស់ពួកគេ ហើយនាងមានអារម្មណ៍ខ្ទេចខ្ទាំចិត្ត ។

សូមពិភាក្សាសំណួរខាងក្រោម ៖

សូមស្រមៃថា បុគ្គលនេះមករកអ្នកឲ្យជួយ ។ ដោយប្រើប្រាស់នូវអ្វីដែលអ្នកបានរៀនមកពីការសិក្សាក្នុងឯកសាររៀបចំ និងផ្នែក « ចង់បានបន្ថែមទៀតទេ ? » តើអ្នកនឹងផ្ដល់ការប្រឹក្សាអ្វីខ្លះទៅដល់បុគ្គលនេះ ?
តើបុគ្គលនេះអាចទទួលបានជំនួយរបស់ព្រះអម្ចាស់នៅក្នុងកាលៈទេសៈនេះតាមរបៀបណា ?

បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សម្នាក់ ឬពីរនាក់ឲ្យចែកចាយនូវអ្វីដែលពួកគេបានរៀន ឬមានអារម្មណ៍នៅអំឡុងពេលនៃការពិភាក្សាជាក្រុមរបស់ពួកគេ ។

សូមពិចារណាឲ្យសិស្សមានពេលខ្លះសញ្ជឹងគិត និងកត់ត្រាចម្លើយរបស់ពួកគេចំពោះសំណួរខាងក្រោមនេះមួយ ៖

តើខ្ញុំអាចធ្វើអ្វីខ្លះ ដើម្បីឈោងទៅរកព្រះចេស្ដារបស់ព្រះអម្ចាស់ ដើម្បីទទួលបានការការពារពីរូបអាសគ្រាម និងទទួលបានជំនួយរបស់ទ្រង់ដើម្បីបានជាសះស្បើយពីឥទ្ធិពលរបស់វា ?
តើខ្ញុំអាចជួយនរណាម្នាក់ ដែលកំពុងពុះពារនឹងឥទ្ធិពលនៃរូបអាសគ្រាមដោយក្ដីស្រឡាញ់តាមរបៀបណា ?

សូមបញ្ចប់មេរៀននេះ ដោយការអះអាងប្រាប់ដល់សិស្សអំពីសេចក្ដីពិតពេញលេញនៃគោលការណ៍ទាំងឡាយ ដែលបានរកឃើញនៅក្នុងមេរៀននេះ ។

សម្រាប់ពេលក្រោយ

អ្នកអាចបង្ហាញសិស្សនូវសកម្មភាពពិភាក្សាដែលមាននៅចុងបញ្ចប់នៃ ផ្នែកទី ១ នៃឯកសាររៀបចំសម្រាប់មេរៀនក្រោយ បាន ហើយលើកទឹកចិត្តពួកគេឲ្យចាប់ផ្ដើមគិតអំពីអ្នក ដែលពួកគេអាចជជែកអំពីសកម្មភាពនេះជាមួយបាន ។