មេរៀនទី ៥ ឯកសារគ្រូបង្រៀន ៖ បទពិសោធន៍ជីវិតរមែងស្លាប់របស់យើង និងអំណោយទាននៃរូបកាយជាសាច់ឈាម

« មេរៀនទី ៥ ឯកសារគ្រូបង្រៀន ៖ បទពិសោធន៍ជីវិតរមែងស្លាប់របស់យើង និងអំណោយទាននៃរូបកាយជាសាច់ឈាម » ឯកសារគ្រូបង្រៀន គ្រួសារដ៏នៅអស់កល្បជានិច្ច ( ឆ្នាំ ២០២២ )

« មេរៀនទី ៥ ឯកសារគ្រូបង្រៀន » ឯកសារគ្រូបង្រៀន គ្រួសារដ៏នៅអស់កល្បជានិច្ច

មេរៀនទី ៥ ឯកសារគ្រូបង្រៀន

បទពិសោធន៍ជីវិតរមែងស្លាប់របស់យើង និងអំណោយទាននៃរូបកាយជាសាច់ឈាម

នៅក្នុងជីវិតមុនផែនដី យើង « បានទទួលផែនការរបស់ [ ព្រះ ] ដែលនាំឲ្យកូនចៅទាំងឡាយអាចទទួលរូបកាយ ហើយនិងទទួលបទពិសោធន៍នៅលើផែនដី ដើម្បីរីកចម្រើនទៅរកភាពល្អឥតខ្ចោះ » ( « ក្រុមគ្រួសារ ៖ ការប្រកាសដល់ពិភពលោក » នៅលើគេហទំព័រ ChurchofJesusChrist.org ) ។ នៅក្នុងមេរៀននេះ សិស្សនឹងត្រូវបានអញ្ជើញឲ្យពន្យល់ពីគោលបំណងនៃជីវិតរមែងស្លាប់របស់យើង និងរបៀបដែលរូបកាយសាច់ឈាមរបស់យើងជួយយើងឲ្យរីកចម្រើន ដើម្បីប្រែក្លាយដូចជាព្រះ ។ សិស្សក៏នឹងពិចារណាពីអ្វីដែលពួកគេអាចធ្វើបាន ដើម្បីកែលម្អទំនាក់ទំនងគ្រួសាររបស់ពួកគេផ្ទាល់ផងដែរ តាមរយៈការយកឈ្នះលើភាពជាមនុស្សខាងសាច់ឈាម និងការកាន់តែប្រែក្លាយដូចជាព្រះយេស៊ូវគ្រីស្ទ ។

ការអភិវឌ្ឍការបង្រៀន និងការរៀនសូត្ររបស់យើង

សូមលើកទឹកចិត្តសិស្សឲ្យខិតខំអនុវត្តសេចក្ដីពិតនៃដំណឹងល្អ តាមរយៈការសួរតាមដាន ។ គោលដៅដ៏ធំបំផុតនៃការរៀនសូត្រដំណឹងល្អ គឺការប្រែចិត្តជឿលើព្រះវរបិតាសួគ៌ និងព្រះយេស៊ូវគ្រីស្ទ ហើយប្រែក្លាយដូចជាទ្រង់ទាំងទ្វេ ។ ការសម្រេចបានគោលដៅទាំងនេះ តម្រូវឲ្យយើងអនុវត្តតាមអ្វីដែលយើងបានរៀនសូត្រ ។ គ្រូបង្រៀនអាចជួយសិស្សឲ្យខិតខំអនុវត្តតាមការរៀនសូត្ររបស់ពួកគេបាន តាមរយៈការតាមដានដោយសមរម្យ លើការអញ្ជើញដែលបានធ្វើឡើងនៅក្នុងម៉ោងបង្រៀន ។ សិស្សមិនចាំបាច់ចែកចាយអ្វីដែលផ្ទាល់ខ្លួនពេកនោះទេ ។ ប្រសិនបើសិស្សមិនផ្ដល់ចម្លើយណាមួយទេ នោះគ្រូបង្រៀនអាចអញ្ជើញសិស្សឲ្យពិចារណាពីអារម្មណ៍ ឬការសរសេររបស់ពួកគេមកពីមេរៀនមុនៗ ហើយលើកទឹកចិត្តឲ្យពួកគេធ្វើសកម្មភាព ។ អ្នកគួរតែចំណាយពេលតែពីរបីនាទីក្នុងម៉ោងបង្រៀនប៉ុណ្ណោះ ដើម្បីសួរតាមដានសិស្ស ។

កំណត់ចំណាំ ៖ នៅក្នុងមេរៀននីមួយៗកន្លងមក សិស្សត្រូវបានអញ្ជើញឲ្យអនុវត្តការរៀនសូត្ររបស់ពួកគេតាមរបៀបខុសៗគ្នា ។ ឧទាហរណ៍ នៅក្នុង មេរៀនទី ៤ សិស្សបានពិចារណាពីរបៀបដែលពួកគេអាចធ្វើឲ្យក្រុមគ្រួសាររបស់ពួកគេ កាន់តែមានសារៈសំខាន់នៅក្នុងជីវិតរបស់ពួកគេ ។ អ្នកអាចសូមឲ្យសិស្សរំឭកចំណាប់់អារម្មណ៍ ដែលពួកគេបានកត់ត្រាទុកឡើងវិញ ហើយពិចារណាពីកិច្ចខិតខំរបស់ពួកគេ ដើម្បីធ្វើសកម្មភាពតាមអារម្មណ៍របស់ពួកគេ ។ បន្ទាប់មក សូមពិចារណាអញ្ជើញសិស្សម្នាក់ ឬពីរនាក់ដែលមានអារម្មណ៍ចង់ចែកចាយ ឲ្យឡើងមកចែកចាយបទពិសោធន៍ដែលពួកគេមាន នៅពេលពួកគេព្យាយាមរស់នៅតាមការបង្រៀននេះឲ្យបានកាន់តែប្រសើរឡើង ។ អ្នកអាចដាក់វាជាលំហាត់អនុវត្ត ដើម្បីតាមដាននៅក្នុងមេរៀនក្រោយៗ នៅពេលអ្នកមានអារម្មណ៍បំផុសឲ្យធ្វើដូច្នេះ ។

យោបល់សម្រាប់ការបង្រៀន

រូបកាយសាច់ឈាម និងបទពិសោធន៍ជីវិតរមែងស្លាប់របស់យើងគឺចាំបាច់ ដើម្បីឲ្យយើងទទួលបានជីវិតដ៏នៅអស់កល្បជានិច្ច ។

សូមបង្ហាញសាច់រឿងខាងក្រោមនេះ ( សូមពិចារណាសម្របសាច់រឿងនេះតាមការចាំបាច់ ដើម្បីឲ្យវាទាក់ទងកាន់តែខ្លាំងទៅនឹងសិស្សរបស់អ្នក ) ។

មិត្តរួមការងាររបស់អ្នកឈ្មោះ ឌីមីទ្រី ជាមនុស្សរួសរាយ និងស្រស់ស្រាយណាស់ ។ គាត់ជឿលើការមាន « ពេលដ៏ល្អ » ។ គាត់រស់នៅដើម្បីក្ដីសប្បាយរីករាយ និងការកម្សាន្ដ ។ គាត់ជប់លៀងរាល់ចុងសប្ដាហ៍ ដែលជាធម្មតាមានការប្រើប្រាស់គ្រឿងស្រវឹង ឬថ្នាំញៀនខ្លះៗដែរ ។ គាត់មិនបានរៀបការទេ ប៉ុន្ដែបានគេងនៅជាមួយជាមួយគ្នា ។ ជារឿយៗ គាត់និយាយពាក្យថា « បើវាមានអារម្មណ៍ល្អ ចឹងធ្វើវាទៅ » ឬ « អ្នករស់បានតែម្ដងទេ » ។ គាត់គិតថា អ្នករស់នៅក្នុងជីវិតមួយដ៏តឹងរឹង និងគួរឲ្យធុញទ្រាន់ ដោយសារអ្នករក្សាបទដ្ឋានសីលធម៌នៃសាសនាចក្រ ។ ថ្មីៗនេះ គាត់បានសួរអ្នកថា « ហេតុអ្វីឯងមិនមានការសប្បាយ ហើយរីករាយនឹងជីវិតខ្លះទៅ ? »

សូមអញ្ជើញសិស្សឲ្យពិភាក្សាជាមួយដៃគូម្នាក់ ឬជាក្រុមតូចមួយ អំពីរបៀបដែលពួកគេឆ្លើយតបនឹងសំណួររបស់ឌីមីទ្រី ។ សូមលើកទឹកចិត្តសិស្សឲ្យពិចារណាពីរបៀបដែលសេចក្ដីពិតអំពីរូបកាយសាច់ឈាមរបស់យើង និងគោលបំណងនៃជីវិតរមែងស្លាប់របស់យើង ដែលបានបង្រៀននៅក្នុង ផ្នែកទី ១ នៃឯកសាររៀបចំ អាចគាំទ្រដល់ចម្លើយរបស់ពួកគេ ។ បន្ទាប់ពីទុកពេលគ្រប់គ្រាន់ហើយ សូមអញ្ជើញសិស្សពីរបីនាក់ឲ្យចែកចាយចម្លើយរបស់ពួកគេ ។ បន្ទាប់មក សូមសរសេរសេចក្ដីពិតដូចតទៅនេះនៅលើក្ដារខៀន ៖ រូបកាយសាច់ឈាមរបស់យើង និងស្ថានភាពនៃជីវិតរមែងស្លាប់រៀបចំយើងឲ្យប្រែក្លាយដូចជាព្រះ ។

តើការមានរូបកាយសាច់ឈាម និងការដកពិសោធន៍ស្ថានភាពនៃជីវិតរមែងស្លាប់ រៀបចំយើងឲ្យប្រែក្លាយដូចជាព្រះដោយរបៀបណា ? ( សូមពិចារណាអញ្ជើញសិស្សឲ្យរំំឭកសេចក្ដីថ្លែងការណ៍ដោយអែលឌើរ ឌី ថត គ្រីស្តូហ្វឺសិន និង ដេវីឌ អេ បែដណា នៅក្នុងផ្នែកទី ១ នៃឯកសាររៀបចំ ។ នៅពេលសិស្សចែកចាយការយល់ដឹងនានា សូមសួរសំណួរតាមដាន ដើម្បីជួយពួកគេឲ្យយល់ដឹងបានកាន់តែជ្រៅជ្រះ ) ។

តាមរយៈព្រះយេស៊ូវគ្រីស្ទ យើងអាចយកឈ្នះលើភាពជាមនុស្សខាងសាច់ឈាមបាន ។

សូមសរសេរពាក្យដូចតទៅនេះនៅលើក្ដារខៀន ៖ មនុស្សខាងសាច់ឈាម ។ សូមអញ្ជើញសិស្សពីរនាក់ឲ្យអាន អាលម៉ា ៤១:១១ និង កូរិនថូស ទី១ ២:១៤ ឮៗ ។ សូមឲ្យសិស្សក្នុងថ្នាក់ផ្ទៀងតាម ហើយរកមើលពាក្យ ឬឃ្លាដែលពិពណ៌នាពីមនុស្សខាងសាច់ឈាម ។ សូមសរសេរចម្លើយរបស់សិស្សនៅលើក្ដារខៀន ។ សូមឲ្យសិស្សពិនិត្យឡើងវិញនូវ សេចក្ដីថ្លែងការណ៍របស់អែលឌើរ បែដណា នៅក្នុងផ្នែកទី ២ នៃឯកសាររៀបចំ ដើម្បីស្វែងរកបុគ្គលិកលក្ខណៈបន្ថែមទៀត ដើម្បីដាក់បញ្ចូលទៅក្នុងបញ្ជីនៅលើក្ដារខៀន ។

សូមជ្រើសរើសបុគ្គលិកលក្ខណៈមួយនៃមនុស្សខាងសាច់ឈាម ដែលបានសរសេរនៅលើក្ដារខៀន ។ តើបុគ្គលិកលក្ខណៈនោះអាចមានឥទ្ធិពលលើទំនាក់ទំនងពេលណាត់គ្នាដើរលេង ឬទំនាក់ទំនងគ្រួសារយ៉ាងដូចម្ដេច ?

សូមសរសេរឃ្លានេះនៅលើក្ដារខៀន ៖ បុរស ឬស្ដ្រីដែលបានផ្លាស់ប្ដូរដោយព្រះយេស៊ូវគ្រីស្ទ ។ សូមអញ្ជើញឲ្យសិស្សអាន ម៉ូសាយ ៣:១៩ ហើយរកមើលរបៀបដែលយើងអាចយកឈ្នះលើមនុស្សខាងសាច់ឈាមបាន ។

តើព្រះវិញ្ញាណបរិសុទ្ធ និងព្រះអង្គសង្គ្រោះអាចជួយយើង ឲ្យយកឈ្នះលើភាពជាមនុស្សខាងសាច់ឈាមតាមរបៀបណា ? ( សិស្សអាចចែកចាយចម្លើយ ដែលមានគោលការណ៍ស្រដៀងគ្នាដូចនេះ ៖ នៅពេលយើងព្រមធ្វើតាមសេចក្តីទូន្មាននៃព្រះវិញ្ញាណបរិសុទ្ធ នោះព្រះយេស៊ូវគ្រីស្ទនឹងជួយយើងឲ្យសម្រាតភាពជាមនុស្សខាងសាច់ឈាម ហើយក្លាយជាពួកបរិសុទ្ធតាមរយៈដង្វាយធួនរបស់ទ្រង់បាន ។ អ្នកក៏អាចប្រើ សេចក្ដីថ្លែងការណ៍ដោយអែលឌើរ បែដណា និងប៊ីស្សព ហ្គែរ៉ល កូសសែ នៅក្នុងផ្នែកទី ៣ នៃឯកសាររៀបចំ ដើម្បីជួយសិស្សឲ្យយល់ពីគោលការណ៍នេះផងដែរ ) ។

សូមពិចារណាសួរសំណួរខាងក្រោមនេះមួយ ឬច្រើនដើម្បីជួយសិស្សឲ្យយល់ដឹងបានកាន់តែជ្រៅជ្រះ ៖

តើគោលការណ៍នេះអាចជួយនរណាម្នាក់ ដែលអាចមានអារម្មណ៍ថា គាត់ ឬនាងមិនអាចផ្លាស់ប្ដូរ ឬគ្រប់គ្រងលើចំណង់ និងសន្ទុះចិត្តនៃភាពជាមនុស្សខាងសាច់ឈាមបានដោយរបៀបណា ?
តើមានកិច្ចការណាខ្លះ ដែលព្រះអង្គសង្គ្រោះទ្រង់យល់ពីឧបសគ្គនៃការមានរូបកាយសាច់ឈាម ?
តើអ្នកបានរៀនអ្វីខ្លះអំពីព្រះអង្គសង្គ្រោះ ចេញពីរបៀបដែលទ្រង់បានជួយអ្នកឲ្យ « សម្រាត » ឬយកឈ្នះលើភាពជាមនុស្សខាងសាច់ឈាម ហើយប្រែក្លាយកាន់តែដូចជាទ្រង់នោះ ? តើព្រះវិញ្ញាណបរិសុទ្ធបានជួយអ្នកនៅក្នុងកិច្ចខិតខំទាំងនេះដោយរបៀបណា ?

ដើម្បីជួយសិស្សឲ្យអនុវត្តសេចក្ដីពិត ដែលពួកគេបានរៀននៅក្នុងមេរៀននេះ សូមបង្ហាញសំណួរដូចខាងក្រោមនេះ ហើយសូមឲ្យសិស្សកត់ត្រាគំនិត និងចំណាប់អារម្មណ៍របស់ពួកគេ ។ ( សិស្សមួយចំនួនអាចចង់បន្ថែមទៅលើចម្លើយរបស់ពួកគេ នៅក្នុងសកម្មភាព « កត់ត្រាគំនិតរបស់អ្នក » នៅចុងបញ្ចប់ផ្នែកទី ៣ នៃឯកសាររៀបចំ ) ។

តើគុណលក្ខណៈដូចជាព្រះគ្រីស្ទណាខ្លះ ដែលបានរៀបរាប់នៅក្នុង ម៉ូសាយ ៣:១៩ ដែលខ្ញុំត្រូវអភិវឌ្ឍឲ្យបានកាន់តែពេញលេញថែមទៀតនោះ ?
តើខ្ញុំត្រូវធ្វើអ្វីខ្លះ ដើម្បីពឹងផ្អែកលើព្រះអង្គសង្គ្រោះ និងឥទ្ធិពលនៃព្រះវិញ្ញាណបរិសុទ្ធកាន់តែពេញលេញ ដើម្បីជួយខ្ញុំឲ្យសម្រាតភាពជាមនុស្សខាងសាច់ឈាមចេញ ហើយអភិវឌ្ឍគុណលក្ខណៈដូចជាព្រះគ្រីស្ទនេះ ?
តើការផ្លាស់ប្ដូរនេះអាចមានឥទ្ធិពលអ្វីខ្លះ ទៅលើទំនាក់ទំនងគ្រួសាររបស់ខ្ញុំ ?

សូមលើកទឹកចិត្តសិស្សនៅក្នុងកិច្ចខិតខំរបស់ពួកគេ ដើម្បីយកឈ្នះលើភាពទន់ខ្សោយរបស់ពួកគេ ហើយកាន់តែប្រែក្លាយដូចជាព្រះអង្គសង្គ្រោះ ។ សូមពិចារណាថ្លែងទីបន្ទាល់ថា ព្រះអម្ចាស់នឹងប្រទានពរដល់ពួកគេឲ្យមានអំណាចអភិវឌ្ឍគុណលក្ខណៈរបស់ទ្រង់ និងកែលម្អទំនាក់ទំនងគ្រួសាររបស់ពួកគេ ។

សម្រាប់ពេលក្រោយ

សូមអញ្ជើញសិស្សឲ្យពិចារណាពីអ្វីដែលពួកគេដឹង អំពីសារៈសំខាន់ខាងគោលលទ្ធិស្ដីពីអាពាហ៍ពិពាហ៍រវាងបុរសម្នាក់ និងស្ត្រីម្នាក់នៅក្នុងផែនការរបស់ព្រះ ។ នៅពេលពួកគេសិក្សា មេរៀនទី ៦ សូមលើកទឹកចិត្តពួកគេឲ្យខិតខំពង្រីកការយល់ដឹងរបស់ពួកគេ អំពីគោលលទ្ធិនេះ និងអត្ថន័យនៃការធ្វើជាសិស្សរបស់ព្រះយេស៊ូវគ្រីស្ទសម្រាប់ពួកគេ ។