1 சுதந்தரத்தின் தேசத்திலும் சுற்றியுள்ள பகுதிகளிலும் என்னுடைய சபைக்கு ஒரு தலைமை தாங்கும் பிரதான ஆசாரியனாக என்னுடைய ஊழியக்காரனாகிய வாரன் எ. கௌட்ரி பணிக்கப்பட்டு நியமனம் செய்யப்படவேண்டுமென்பது என்னுடைய சித்தமாயிருக்கிறது;

2 என்னுடைய நித்திய சுவிசேஷத்தை பிரசங்கிக்கவேண்டும், அவனுடைய குரலை உயர்த்தி ஜனங்களை எச்சரிக்கவேண்டும், அவனுடைய சொந்த இடத்தில் மட்டுமல்ல, பக்கத்து மாகாணங்களிலும்கூட;

3 இப்பொழுது நான் அவனுக்குக் கொடுக்கிற இந்த உயர்ந்த மற்றும் பரிசுத்த அழைப்பை, பரலோகத்தின் ராஜ்யத்தையும் அதன் நீதியையும் கருத்தாய் நாடுவதில் அவனுடைய முழுநேரத்தையும் அர்ப்பணிப்பானாக, அவசியமான சகல காரியங்களும் அதனுடன் கூடக் கொடுக்கப்படும்; ஏனெனில் வேலையாள் அவனது கூலிக்கு பாத்திரனாயிருக்கிறான்.

4 மீண்டும் மெய்யாகவே நான் உங்களுக்குச் சொல்லுகிறேன், கர்த்தரின் வருகை சமீபமாயிருக்கிறது, இரவிலே திருடன் வருகிறவிதமாக அது உலகத்தை ஆட்கொள்ளும்,

5 ஆகவே, ஒளியின் பிள்ளைகளைப் போல இருக்கும்படிக்கு உங்களுடைய அரைக்கச்சையைக் கட்டிக் கொள்ளுங்கள், ஒரு திருடனைப்போல அந்த நாள் உங்களை முந்தாது.

6 மீண்டும், மெய்யாகவே நான் உங்களுக்குச் சொல்லுகிறேன், என்னுடைய ஊழிக்காரனாகிய வாரன் என்னுடைய செங்கோலுக்கு தலைவணங்கி மனுஷர்களின் தந்திரங்களிலிருந்து தன்னை பிரித்துக்கொண்டபோது பரலோகத்தில் சந்தோஷமுண்டாயிருந்தது;

7 ஆகவே, என்னுடைய ஊழியக்காரனாகிய வாரன் பாக்கியவான், ஏனெனில் அவனிடத்தில் நான் இரக்கமாயிருப்பேன், அவனுடைய இருதயத்தில் மாயை இருந்தாலும், எனக்கு முன்பாக அவன் தன்னைத் தாழ்த்துகிற அளவில் நான் அவனை மேலாக உயர்த்துவேன்.

8 அவன் நிற்கும்படியாக அவனுக்கு நான் கிருபையையும் நிச்சயத்தையும் கொடுப்பேன்; ஒரு உண்மையுள்ள சாட்சியாகவும் சபைக்கு ஒளியாகவும் அவன் தொடர்ந்திருந்தால் என்னுடைய பிதாவின் வாசஸ்தலங்களில் அவனுக்காக ஒரு கிரீடத்தை நான் ஆயத்தப்படுத்தியிருக்கிறேன். அப்படியே ஆகக்கடவது. ஆமென்.