1 என்னுடைய ஊழியக்காரனாகிய பிரடெரிக் ஜி. வில்லியம்ஸ், மெய்யாகவே, மெய்யாகவே நான் உனக்குச் சொல்லுகிறேன்: உன்னுடைய தேவனாகிய கர்த்தரின் வார்த்தையை பேசுகிற அவனுடைய சத்தத்துக்கு செவிகொடு, என்னுடைய சபையில் ஒரு பிரதான ஆசாரியனாக இருக்கவும், என்னுடைய ஊழியக்காரனாகிய ஜோசப் ஸ்மித் இளையவனுக்கு ஒரு ஆலோசகராகவும் நீ அழைக்கப்பட்ட அழைப்புக்குச் செவிகொடு.

2 எப்போதுமே பிரதான ஆசாரியத்துவத்தின் தலைமைக்கு சொந்தமான ராஜ்யத்தின் திறவுகோல்களை நான் அவனிடம் கொடுத்திருக்கிறேன்.

3 ஆகவே, மெய்யாகவே நான் அவனை ஏற்றுக்கொள்கிறேன், அவனை ஆசீர்வதிப்பேன், நான் உன்னை நியமித்த அலுவலில் ஆலோசனையிலும், உன்னுடைய இருதயத்தில், பகிரங்கமாகவும் தனியாகவும், சத்தமாகவும் எப்போதுமே ஜெபிப்பதிலும், ஜீவிக்கிறவர்களின் தேசத்திலும் உன்னுடைய சகோதரருக்கு மத்தியிலும் உன்னுடைய சுவிசேஷத்தை பிரசங்கிக்கிற ஊழியத்தில் நீ உண்மையுள்ளவனாயிருக்கிற அளவில் உன்னையும் ஆசீர்வதிப்பேன்.

4 இந்த காரியங்களைச் செய்வதில் உன்னுடைய சக மனுஷர்களுக்கு நீ மகத்தான நன்மையைச் செய்வாய், உன்னுடைய கர்த்தரின் மகிமையை கனம்பண்ணுவாய்.

5 ஆகவே, உண்மையுள்ளவனாயிரு; நான் உன்னை நியமித்த அலுவலில் உறுதியாய் இரு; பலவீனமானவர்களுக்கு உதவு, தொங்கிய கைகளை நிமிர்த்து, தளர்ந்த முழங்கால்களை பெலப்படுத்து.

6 முடிவுபரியந்தம் நீ உண்மையுள்ளவனாயிருந்தால் அழியாமையின் கிரீடத்தையும், என்னுடைய பிதாவின் வீட்டில் நான் ஆயத்தம் செய்து வைத்திருக்கிற வாசஸ்தலங்களில் நித்திய ஜீவனையும் பெறுவாய்.

7 இதோ, இந்த வார்த்தைகள் அல்பாவும் ஓமெகாவுமான இயேசு கிறிஸ்துவின் வார்த்தைகள். ஆமென்.