1 இதோ, என்னுடைய ஊழியக்காரனாகிய ஜான் மர்டாக்குக்கு இப்படியாக கர்த்தர் சொல்லுகிறார், துன்புறுத்தலுக்கும் துன்மார்க்கத்திற்கும் மத்தியில் அங்குள்ள குடிகளுக்கு என்னுடைய நித்திய சுவிசேஷத்தை அறிவிக்க வீடு வீடாக, ஊர் ஊராக, பட்டணம் பட்டணமாக கிழக்கு தேசங்களுக்குப் போக நீ அழைக்கப்பட்டாய்.

2 உன்னை ஏற்றுக் கொள்ளுகிறவன் என்னை ஏற்றுக்கொள்ளுகிறான்; என்னுடைய பரிசுத்த ஆவியின் வெளிப்படுத்துதலுடன் என்னுடைய வார்த்தையை அறிவிக்க உனக்கு அதிகாரமிருக்கும்.

3 ஒரு சிறுபிள்ளையைப்போல உன்னை ஏற்றுக் கொள்ளுகிறவன் என்னுடைய ராஜ்யத்தை ஏற்றுக் கொள்ளுகிறான்; அவர்கள் பாக்கியவான்களாயிருப்பார்கள், ஏனெனில் அவர்கள் இரக்கத்தைப் பெறுவார்கள்.

4 உன்னை ஏற்றுக் கொள்ளாதவன் என்னுடைய பிதா மற்றும் அவருடைய ஆலயத்தினால் தள்ளப்படுவான்; அவர்களுக்கு விரோதமாக ஒரு சாட்சிக்காக வழியில் இரகசிய இடங்களில் உன்னுடைய கால்களை சுத்தப்படுத்திக்கொள்.

5 இதோ, புஸ்தகச்சுருளில் என்னைக் குறித்து எழுதப்பட்டதைப்போல, எனக்கு விரோதமாக அவர்கள் செய்த அவர்களுடைய சகல அவபக்தியான கிரியைகளுக்காக நியாயந்தீர்க்க சீக்கிரத்திலே நான் வருகிறேன்.

6 இப்பொழுது, மெய்யாகவே நான் உனக்குச் சொல்லுகிறேன், உன்னுடைய பிள்ளைகள் போஷிக்கப்படும் வரைக்கும் மற்றும் பட்சமாய் சீயோனின் ஆயரிடத்தில் அனுப்பப்படும் வரைக்கும் நீ போக வேண்டுமென்பது அவசியமில்லை.

7 சில வருஷங்களுக்குப் பின்னர், என்னிடம் நீ விரும்பி கேட்டால், உன்னுடைய சுதந்தரங்களை சொந்தமாக்கிக்கொள்ள நன்மையான தேசத்திற்கும் நீ போகலாம்;

8 இல்லையெனில், நீ எடுத்துக் கொள்ளப்படும் வரைக்கும் என்னுடைய சுவிசேஷத்தை அறிவிப்பதில் நீ தொடர்வாயாக. ஆமென்.