1 அதாவது, அவிசுவாசியான புருஷன் மனைவியால் பரிசுத்தமாக்கப்படுகிறான், அவிசுவாசியான மனைவியும் புருஷனால் பரிசுத்தமாக்கப்படுகிறாள், இல்லாவிட்டால் உங்கள் பிள்ளைகள் அசுத்தமாயிருப்பார்களே, ஆனால் இப்பொழுதோ அவர்கள் பரிசுத்தமாயிருக்கிறார்கள்.

2 இப்பொழுது, அப்போஸ்தலர்களின் நாட்களில், இயேசு கிறிஸ்துவின் சுவிசேஷத்தை நம்பாத யூதர்களுக்கு மத்தியில், விருத்தசேதன நியாயப்பிரமாணமிருந்தது.

3 அந்தப்படியே, விருத்தசேதன நியாயப்பிரமாணத்தைப்பற்றி ஜனங்களுக்கு மத்தியில் பயங்கர வாக்குவாதங்கள் எழுந்தன, ஏனெனில், தன்னுடைய பிள்ளைகள் விருத்தசேதனம் பண்ணப்படவேண்டுமெனவும், நிறைவேறிவிட்ட மோசேயின் நியாயப்பிரமாணத்திற்கு கீழ்ப்படவேண்டுமெனவும் அவிசுவாசியான புருஷன் விரும்பினான்.

4 மோசேயின் நியாயப்பிரமாணத்திற்கு கீழ்ப்படுவதில் வளர்க்கப்பட்டதால் பிள்ளைகள் தங்கள் பிதாக்களின் பாரம்பரியத்திற்கு செவிகொடுத்து, கிறிஸ்துவின் சுவிசேஷத்தை நம்பவில்லை, இதனால் அவர்கள் அசுத்தமானார்கள்.

5 ஆகவே, இந்தக்காரணத்திற்காக, மோசேயின் நியாயப்பிரமாணம் அவர்களுக்கு மத்தியிலிருந்து எடுக்கப்படவேண்டுமென்பதைத் தவிர, ஒரு விசுவாசி ஒரு அவிசுவாசியோடு சேரக்கூடாது என்று, கர்த்தருடையதல்லாமல், அவனாகவே அவர்களுக்கு ஒரு கட்டளையைக் கொடுத்தான், இந்தக் காரணத்துக்காகவே அப்போஸ்தலன் சபைக்கு எழுதினான்.

6 அவர்களுடைய பிள்ளைகள் விருத்தசேதனம் இல்லாமலிருக்க வேண்டும்; சிறுபிள்ளைகள் அசுத்தமானவர்கள் என்று சொல்கிற பாரம்பரியம் எடுத்துப்போடப்பட வேண்டும்; ஏனெனில் அது யூதர்களுக்கு மத்தியிலிருந்தது;

7 ஆனால் இயேசு கிறிஸ்துவின் பாவநிவர்த்தியின் மூலமாக பரிசுத்தப்படுத்தப்பட்டு, சிறுபிள்ளைகள் பரிசுத்தமாயிருக்கிறார்கள்; இதைத்தான் வேதங்கள் சொல்லுகின்றன.