ຖ້າພວກເຈົ້າຂາດປັນຍາ
ໂດຍ ແອວເດີ ມາໂກສ ເອ ເອດູຄາອີທິສ
ແຫ່ງສາວົກເຈັດສິບ
ພຣະເຈົ້າຈະເປີດເຜີຍຄວາມຈິງໃຫ້ແກ່ຜູ້ທີ່ສະແຫວງຫາມັນ ດັ່ງທີ່ໄດ້ແນະນຳໄວ້ໃນພຣະຄຳພີ.
ເມື່ອມື້ກ່ອນນີ້, ລູກຊາຍຂອງຂ້າພະເຈົ້າທີ່ມີອາຍຸ 10 ປີກໍໄດ້ຮຽນກ່ຽວກັບສະໝອງຂອງມະນຸດຢູ່ໃນອິນເຕີແນັດ. ລາວຢາກເປັນໝໍຜ່າຕັດໃນມື້ໜຶ່ງ. ກໍເຫັນໄດ້ງ່າຍວ່າລາວເປັນຄົນສະຫລາດຫລາຍກວ່າຂ້າພະເຈົ້າ.
ພວກເຮົາມັກອິນເຕີແນັດ. ຢູ່ທີ່ບ້ານ ພວກເຮົາຕິດຕໍ່ກັບຍາດພີ່ນ້ອງ ແລະ ໝູ່ເພື່ອນຜ່ານການສື່ສານມວນຊົນ, ທາງອີເມວ, ແລະ ຜ່ານທາງອື່ນໆ. ລູກໆຂອງຂ້າພະເຈົ້າເຮັດວຽກບ້ານຂອງພວກເຂົາຜ່ານອິນເຕີແນັດ.
ບໍ່ວ່າຄຳຖາມຈະເປັນອັນໃດກໍຕາມ, ຖ້າຫາກເຮົາຕ້ອງການຂໍ້ມູນ, ເຮົາສາມາດຊອກຫາມັນໄດ້ຈາກອິນເຕີແນັດ. ພາຍໃນສອງສາມວິນາທີ ເຮົາຈະຄົ້ນພົບຂໍ້ມູນຢ່າງຫລວງຫລາຍ. ນີ້ເປັນສິ່ງທີ່ອັດສະຈັນໃຈແທ້ໆ.
ອິນເຕີແນັດໃຫ້ໂອກາດທີ່ຈະຮຽນຮູ້ຫລາຍສິ່ງ. ເຖິງຢ່າງໃດກໍຕາມ, ຊາຕານຢາກໃຫ້ເຮົາໂສກເສົ້າ, ແລະ ມັນບິດເບືອນຈຸດປະສົງທີ່ແທ້ຈິງຂອງເລື່ອງຕ່າງໆ. ມັນໃຊ້ເຄື່ອງມືທີ່ດີນີ້ເພື່ອກໍ່ໃຫ້ເກີດຄວາມສົງໄສ ແລະ ຄວາມຢ້ານກົວ, ແລະ ເພື່ອທຳລາຍສັດທາ ແລະ ຄວາມຫວັງ.
ໂດຍທີ່ມີຂໍ້ມູນຢ່າງຫລວງຫລາຍໃນອິນເຕີແນັດ, ເຮົາຕ້ອງພິຈາລະນາຢ່າງລະມັດລະວັງເຖິງບ່ອນທີ່ເຮົາຈະນຳໃຊ້ຄວາມພະຍາຍາມຂອງເຮົາ. ຊາຕານສາມາດເຮັດໃຫ້ເຮົາຫຍຸ້ງຢູ່, ຂາດຄວາມຕັ້ງໃຈ, ແລະ ບໍ່ສະອາດໂດຍການຈັດແຈງຂໍ້ມູນ, ທີ່ສ່ວນຫລາຍແລ້ວສົກກະປົກ ແລະ ໄຮ້ປະໂຫຍດ.
ເຮົາບໍ່ຄວນຫລົງໄຫລໄປຕາມສິ່ງທີ່ສົກກະປົກ.
ຂໍໃຫ້ຟັງຄຳຊີ້ນຳນີ້, ທີ່ພຣະຄຳພີໄດ້ໃຫ້ໄວ້ວ່າ: “ພຣະວິນຍານຂອງພຣະຄຣິດໄດ້ຖືກມອບໃຫ້ແກ່ມະນຸດທຸກຄົນ, ເພື່ອເຂົາຈະຮູ້ຈັກຄວາມດີຈາກຄວາມຊົ່ວ; ດັ່ງນັ້ນ, ຂ້າພະເຈົ້າຈຶ່ງຂໍສະແດງວິທີທີ່ຈະຕັດສິນໃຫ້ແກ່ທ່ານ; ເພາະວ່າທຸກສິ່ງທຸກຢ່າງທີ່ເຊື້ອເຊີນໃຫ້ເຮັດຄວາມດີ, ແລະ ຊັກຊວນໃຫ້ເຊື່ອໃນພຣະຄຣິດ, ຖືກສົ່ງມາໂດຍອຳນາດ ແລະ ຂອງປະທານຂອງພຣະຄຣິດ; ດັ່ງນັ້ນ ທ່ານຈະຮູ້ … ສິ່ງນັ້ນມາຈາກພຣະເຈົ້າ.”1
ຕາມຄວາມຈິງແລ້ວ, ເຮົາກໍປະເຊີນຄວາມສັບສົນອັນດຽວກັນທີ່ ໂຈເຊັບ ສະມິດ ໄດ້ປະເຊີນມາໃນໄວເຍົາຂອງເພິ່ນ. ສ່ວນຫລາຍເຮົາກໍພົບເຫັນວ່າຕົນເອງຂາດປັນຍາຄືກັນ.
ໃນອານາຈັກຂອງພຣະເຈົ້າ, ການຄົ້ນຫາຄວາມຈິງເປັນສິ່ງທີ່ມີຄຸນຄ່າ, ໜ້າສົ່ງເສີມ, ແລະ ບໍ່ໄດ້ເປັນສິ່ງທີ່ຕ້ອງບັງຄັບໄວ້ ຫລື ຢ້ານກົວເລີຍ. ອົງພຣະຜູ້ເປັນເຈົ້າພຣະອົງເອງໄດ້ແນະນຳສະມາຊິກຂອງສາດສະໜາຈັກຢ່າງໜັກແໜ້ນວ່າໃຫ້ສະແຫວງຫາຄວາມຮູ້.2 ພຣະອົງໄດ້ບອກ ໃຫ້ເຮົາສະແຫວງຫາຄຳແຫ່ງປັນຍາຢ່າງພາກພຽນ … ; ຈາກໜັງສືທີ່ດີທີ່ສຸດ; ໃຫ້ສະແຫວງຫາການຮຽນຮູ້, ແມ່ນແຕ່ໂດຍການສຶກສາ ແລະ ໂດຍສັດທານຳອີກ.”3 ເຖິງຢ່າງໃດກໍຕາມ, ເຮົາຈະຮັບຮູ້ຄວາມຈິງໄດ້ແນວໃດໃນໂລກທີ່ນັບມື້ນັບຫຍາບຄາຍຂຶ້ນໃນການໂຈມຕີຂອງມັນ ຕໍ່ສິ່ງທີ່ກ່ຽວກັບພຣະເຈົ້າ?
ພຣະຄຳພີສອນເຮົາເຖິງວິທີນັ້ນວ່າ:
ທຳອິດ, ເຮົາສາມາດຮູ້ຄວາມຈິງໄດ້ໂດຍການສັງເກດເຫັນໝາກຜົນຂອງມັນ.
ໃນລະຫວ່າງການເທດສະໜາຂອງພຣະອົງຢູ່ເທິງເນີນພູ, ພຣະຜູ້ເປັນເຈົ້າໄດ້ກ່າວວ່າ:
“ດັ່ງດຽວກັນ ຕົ້ນໄມ້ດີຍ່ອມເກີດຜົນດີ; ແຕ່ຕົ້ນໄມ້ບໍ່ດີກໍຍ່ອມເກີດຜົນບໍ່ດີ. …
“ຈັ່ງຊັ້ນແຫລະ ພວກທ່ານຈຶ່ງຈະຮູ້ຈັກຜູ້ປະກາດພຣະຄຳປອມດ້ວຍການກະທຳຂອງພວກເຂົາ.”4
ສາດສະດາມໍມອນໄດ້ສອນຫລັກທຳຂໍ້ດຽວກັນນີ້ເມື່ອເພິ່ນໄດ້ກ່າວວ່າ, “ໂດຍວຽກງານຂອງເຂົາ ທ່ານຈະຮູ້ຈັກເຂົາ; ເພາະຖ້າຫາກວຽກງານຂອງເຂົາດີ, ແລ້ວເຂົາກໍເປັນຄົນດີເໝືອນກັນ.”5
ເຮົາເຊື້ອເຊີນທຸກຄົນໃຫ້ສຶກສາໝາກຜົນ ແລະ ວຽກງານຂອງສາດສະໜາຈັກນີ້.
ຜູ້ຄົນທີ່ສົນໃຈນຳຄວາມຈິງຈະສາມາດໄດ້ເຫັນຄວາມແຕກຕ່າງທີ່ສາດສະໜາຈັກ ແລະ ສະມາຊິກໄດ້ເຮັດໄປໃນຊຸມຊົນບ່ອນທີ່ເຂົາເຈົ້າໄດ້ອາໄສຢູ່. ເຂົາເຈົ້າຈະສັງເກດເຫັນຄວາມກ້າວໜ້າໃນຊີວິດຂອງຜູ້ຄົນທີ່ຕິດຕາມຄຳສອນຂອງສາດສະໜາຈັກນຳອີກ. ຜູ້ຄົນທີ່ກວດສອບໝາກຜົນເຫລົ່ານີ້ຈະພົບເຫັນວ່າໝາກຜົນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ງົດງາມ ແລະ ເປັນສິ່ງທີ່ເພິ່ງປາດຖະໜາ.
ສອງ, ເຮົາສາມາດພົບເຫັນຄວາມຈິງໄດ້ໂດຍການທົດລອງຖ້ອຍຄຳນັ້ນດ້ວຍຕົວເຮົາເອງ.
ສາດສະດາ ແອວມາ ໄດ້ສອນວ່າ:
“ພວກເຮົາຈະປຽບທຽບພຣະຄຳໃສ່ກັບເມັດພືດ. … ຖ້າຫາກພວກທ່ານໃຫ້ບ່ອນ, ເພື່ອຈະປູກເມັດພືດໃນໃຈຂອງພວກທ່ານ, ຈົ່ງເບິ່ງ, ຖ້າຫາກເປັນເມັດພືດທີ່ແທ້ຈິງ, [ແລະ] … ຖ້າຫາກພວກທ່ານບໍ່ໂຍນມັນຖິ້ມໂດຍຄວາມບໍ່ເຊື່ອຖືຂອງພວກທ່ານ, … ຈົ່ງເບິ່ງ, ມັນຈະເລີ່ມພອງຢູ່ໃນເອິກຂອງພວກທ່ານ; ແລະ … ພວກທ່ານຈະເລີ່ມກ່າວຢູ່ພາຍໃນຕົວເອງວ່າ—ມັນຕ້ອງ … ເປັນເມັດດີ, … ເພາະມັນເລີ່ມເຮັດໃຫ້ຈິດວິນຍານຂອງເຮົາຂະຫຍາຍອອກ; ແທ້ຈິງແລ້ວ, ມັນເລີ່ມເຮັດໃຫ້ຄວາມເຂົ້າໃຈຂອງເຮົາແຈ້ງອອກ, ແທ້ຈິງແລ້ວ, ມັນເລີ່ມມີລົດແຊບສຳລັບເຮົາ. …
“… ແລະ ບັດນີ້, … ສິ່ງນີ້ຈະບໍ່ເຮັດໃຫ້ສັດທາຂອງພວກທ່ານເຂັ້ມແຂງຂຶ້ນບໍ? ແທ້ຈິງແລ້ວ, ມັນຈະເຮັດໃຫ້ສັດທາຂອງພວກທ່ານເຂັ້ມແຂງຂຶ້ນ. …
“… ເພາະທຸກເມັດໄດ້ອອກຜົນໃນລັກສະນະຂອງມັນເອງ.”6
ນີ້ຊ່າງເປັນການເຊື້ອເຊີນທີ່ປະເສີດຈາກສາດສະດາຂອງພຣະຜູ້ເປັນເຈົ້າ! ນີ້ອາດປຽບທຽບໃສ່ກັບການທົດລອງທາງດ້ານວິທະຍາສາດ. ເຮົາຖືກເຊື້ອເຊີນໃຫ້ທົດສອບພຣະຄຳ, ເຮົາໄດ້ຮັບຂອບເຂດ, ແລະ ເຮົາຖືກບອກເຖິງຜົນຂອງການທົດສອບ, ຖ້າຫາກເຮົາເຮັດຕາມຄຳແນະນຳນັ້ນ.
ສະນັ້ນ, ພຣະຄຳພີສອນເຮົາວ່າເຮົາສາມາດຮູ້ຄວາມຈິງໄດ້ໂດຍການສັງເກດເບິ່ງໝາກຜົນຂອງມັນ; ຫລື, ໂດຍການທົດລອງມັນດ້ວຍຕົວເຮົາເອງ, ໃຫ້ບ່ອນເພື່ອພຣະຄຳນັ້ນໃນຫົວໃຈຂອງເຮົາ, ແລະ ປູກຝັງມັນ, ເໝືອນດັ່ງເມັດພືດ.
ເຖິງຢ່າງໃດກໍຕາມ, ຍັງມີອີກວິທີທີສາມທີ່ຈະຮູ້ຄວາມຈິງ, ແລະ ນັ້ນກໍໂດຍການເປີດເຜີຍສ່ວນຕົວ.
ພຣະຄຳພີ Doctrine and Covenants ພາກທີ 8 ສອນວ່າການເປີດເຜີຍຄືຄວາມຮູ້—“ຄວາມຮູ້ເຖິງສິ່ງໃດໆກໍຕາມທີ່ [ເຮົາ] ທູນຂໍໃນສັດທາ, ດ້ວຍໃຈທີ່ຊື່ສັດ, ເຊື່ອວ່າ [ເຮົາ] ຈະໄດ້ຮັບ.”7
ແລະ ພຣະຜູ້ເປັນເຈົ້າບອກເຮົາເຖິງວິທີທີ່ເຮົາຈະໄດ້ຮັບການເປີດເຜີຍນີ້. ພຣະຜູ້ເປັນເຈົ້າຈະບອກເຮົາໃນຄວາມຄິດຂອງເຮົາ ແລະ ໃນໃຈຂອງເຮົາ, ໂດຍພຣະວິນຍານບໍລິສຸດ, ຊຶ່ງຈະສະເດັດມາສູ່ເຮົາ ແລະ ຊຶ່ງຈະສະຖິດຢູ່ໃນໃຈຂອງເຮົາ.”8
ດັ່ງນັ້ນ, ເຮົາຖືກສອນວ່າເຮົາສາມາດໄດ້ຮັບການເປີດເຜີຍໂດຍການທູນຂໍດ້ວຍສັດທາ, ດ້ວຍຫົວໃຈທີ່ຊື່ສັດ, ແລະ ການເຊື່ອວ່າເຮົາຈະໄດ້ຮັບ.
ພຣະຜູ້ເປັນເຈົ້າໄດ້ເຮັດໃຫ້ແຈ່ມແຈ້ງເມື່ອພຣະອົງໄດ້ເຕືອນ, ໃຫ້ເຮົາຈຳໄວ້ວ່າ ປາດສະຈາກສັດທາ ເຮົາຈະເຮັດຫຍັງບໍ່ໄດ້; ສະນັ້ນ ເຮົາຕ້ອງທູນຂໍດ້ວຍສັດທາ.9 ສັດທາຮຽກຮ້ອງວຽກງານ—ວຽກງານດັ່ງເຊັ່ນການສຶກສາໄຕ່ຕອງມັນໃນຄວາມຄິດຂອງເຮົາ, ແລ້ວທູນຖາມໃນຄຳອະທິຖານຖ້າຫາກວ່າມັນຖືກຕ້ອງຫລືບໍ່.
ພຣະຜູ້ເປັນເຈົ້າໄດ້ກ່າວວ່າ
ຖ້າຫາກມັນຖືກຕ້ອງພຣະອົງຈະເຮັດໃຫ້ຊວງເອິກຂອງເຮົາໄໝ້ຢູ່ພາຍໃນເຮົາ; ດັ່ງນັ້ນ, ເຮົາຈະຮູ້ສຶກວ່າມັນຖືກຕ້ອງ.
ແຕ່ຫາກມັນບໍ່ຖືກຕ້ອງເຮົາຈະບໍ່ມີຄວາມຮູ້ສຶກເຊັ່ນນັ້ນ, ແຕ່ເຮົາຈະມີຄວາມນຶກຄິດງົງງັນ ຈົນຈະເຮັດໃຫ້ເຮົາຫລົງລືມສິ່ງທີ່ຜິດ.10
ຄວາມເຊື່ອຢ່າງດຽວ ໂດຍບໍ່ມີການປະຕິບັດ ກໍເປັນຄວາມເຊື່ອທີ່ຕາຍແລ້ວ.11 ສະນັ້ນ, ຈົ່ງ “ອ້ອນວອນ, ແລະ ຢ່າສົງໄສຈັກດີ້.”12
ຂ້າພະເຈົ້າມີເພື່ອນຄົນໜຶ່ງ, ທີ່ບໍ່ໄດ້ເປັນສະມາຊິກຂອງສາດສະໜາຈັກຂອງເຮົາ, ຜູ້ທີ່ໄດ້ບອກຂ້າພະເຈົ້າວ່າລາວບໍ່ເປັນຄົນທີ່ເຊື່ອໃນສາດສະໜາ. ລາວຈະບໍ່ສຶກສາພຣະຄຳພີ ຫລື ອະທິຖານ ເພາະລາວວ່າລາວບໍ່ເຂົ້າໃຈພຣະຄຳຂອງພຣະເຈົ້າ, ທັງລາວບໍ່ແນ່ໃຈວ່າພຣະເຈົ້າມີແທ້ໆຫລືບໍ່. ທ່າທາງແບບນີ້ອະທິບາຍເຖິງການຂາດຄວາມເຊື່ອທາງພຣະເຈົ້າ ແລະ ຈະນຳໄປສູ່ສິ່ງກົງກັນຂ້າມກັບການເປີດເຜີຍ, ດັ່ງທີ່ແອວມາໄດ້ອະທິບາຍ. ເພິ່ນເວົ້າວ່າ: “ແລະ ດັ່ງນັ້ນ, ຄົນທີ່ຈະເຮັດໃຫ້ໃຈແຂງກະດ້າງ, ຈະໄດ້ຮັບສ່ວນໜ້ອຍຂອງພຣະຄຳ.”
ແຕ່, ແອວມາໄດ້ກ່າວຕື່ມວ່າ, “ຄົນທີ່ຈະບໍ່ເຮັດໃຈແຂງກະດ້າງ, ກໍຈະໄດ້ຮັບສ່ວນໃຫຍ່ຂອງພຣະຄຳ, ຈົນວ່າມັນຖືກມອບໃຫ້ເຂົາເພື່ອຈະໄດ້ຮູ້ຈັກເຖິງຄວາມລຶກລັບຂອງພຣະເຈົ້າ ຈົນກວ່າເຂົາຈະຮູ້ຢ່າງເຕັມທີ່.”13
ແອວມາ ແລະ ພວກລູກຊາຍຂອງໂມໄຊຢາ ເປັນຕົວຢ່າງເຖິງຫລັກທຳທີ່ວ່າສັດທາຮຽກຮ້ອງວຽກງານ. ໃນພຣະຄຳພີມໍມອນ, ເຮົາອ່ານວ່າ:
“ເຂົາເຈົ້າໄດ້ຄົ້ນຄວ້າພຣະຄຳພີຢ່າງພາກພຽນ, ເພື່ອເຂົາເຈົ້າຈະໄດ້ຮູ້ຈັກພຣະຄຳຂອງພຣະເຈົ້າ.
“ແຕ່ນີ້ຍັງບໍ່ໝົດ; ເຂົາເຈົ້າຍອມຕົນໃນການອະທິຖານ, ແລະ ການຖືສິນອົດເຂົ້າຫລາຍທີ່ສຸດ; ດັ່ງນັ້ນ ເຂົາເຈົ້າຈຶ່ງມີວິນຍານແຫ່ງການທຳນາຍ, ແລະ ວິນຍານແຫ່ງການເປີດເຜີຍ.”14
ການທູນຂໍດ້ວຍໃຈຈິງກໍເປັນຂະບວນການທີ່ສຳຄັນເທົ່າທຽມກັນ. ຖ້າຫາກເຮົາສະແຫວງຫາຄວາມຈິງດ້ວຍໃຈຈິງ, ເຮົາຈະເຮັດທຸກສິ່ງໃນຄວາມສາມາດຂອງເຮົາທີ່ຈະພົບເຫັນມັນ, ຊຶ່ງຈະສາມາດຮ່ວມດ້ວຍການອ່ານພຣະຄຳພີ, ການໄປໂບດ, ແລະ ການເຮັດສຸດຄວາມສາມາດຂອງເຮົາທີ່ຈະຮັກສາພຣະບັນຍັດຂອງພຣະເຈົ້າ. ມັນຍັງໝາຍຄວາມວ່າເຮົາເຕັມໃຈທີ່ຈະເຮັດຕາມພຣະປະສົງຂອງພຣະເຈົ້າເມື່ອເຮົາໄດ້ພົບເຫັນພຣະປະສົງນັ້ນນຳອີກ.
ການກະທຳຂອງ ໂຈເຊັບ ສະມິດ ເມື່ອເພິ່ນສະແຫວງຫາປັນຍາ ກໍເປັນຕົວຢ່າງທີ່ດີພ້ອມ ເຖິງຄວາມໝາຍຂອງການມີໃຈທີ່ຊື່ສັດ. ເພິ່ນໄດ້ເວົ້າວ່າເພິ່ນຢາກຮູ້ວ່ານິກາຍໃດຈິງ, “ເພື່ອ [ເພິ່ນ] ຈະຮູ້ວ່າ ເພິ່ນຄວນເຂົ້າຮ່ວມນິກາຍໃດ.”15 ແມ່ນແຕ່ກ່ອນເພິ່ນໄດ້ອະທິຖານ, ເພິ່ນກໍພ້ອມແລ້ວທີ່ຈະກະທຳຕາມຄຳຕອບທີ່ເພິ່ນຈະໄດ້ຮັບ.
ເຮົາຕ້ອງທູນຖາມດ້ວຍສັດທາ ແລະ ດ້ວຍຫົວໃຈທີ່ຊື່ສັດ. ແຕ່ນັ້ນຍັງບໍ່ພຽງພໍ. ເຮົາຕ້ອງເຊື່ອນຳອີກວ່າເຮົາຈະໄດ້ຮັບການເປີດເຜີຍ. ເຮົາຕ້ອງໄວ້ວາງໃຈໃນພຣະຜູ້ເປັນເຈົ້າ ແລະ ມີຄວາມຫວັງໃນຄຳສັນຍາຂອງ ພຣະອົງ. ຂໍໃຫ້ຈື່ຈຳຄຳທີ່ຖືກຂຽນໄວ້ວ່າ: “ຖ້າມີຄົນໃດໃນພວກເຈົ້າຂາດປັນຍາ, ກໍໃຫ້ຄົນນັ້ນຂໍຈາກພຣະເຈົ້າ, ຜູ້ຈະໂຜດໃຫ້ແກ່ຕົນ, ເພາະພຣະເຈົ້າໂຜດໃຫ້ແກ່ທຸກຄົນດ້ວຍໃຈກວ້າງຂວາງ ແລະ ດ້ວຍໃຈກະລຸນາ.”16 ນີ້ຊ່າງເປັນຄຳສັນຍາທີ່ປະເສີດແທ້ໆ!
ຂ້າພະເຈົ້າຂໍເຊື້ອເຊີນທຸກຄົນໃຫ້ສະແຫວງຫາຄວາມຈິງຈາກວິທີເຫລົ່ານີ້ ແຕ່ໂດຍສະເພາະຈາກພຣະເຈົ້າ ຜ່ານການເປີດເຜີຍສ່ວນຕົວ. ພຣະເຈົ້າຈະເປີດເຜີຍຄວາມຈິງໃຫ້ແກ່ຜູ້ທີ່ສະແຫວງຫາມັນ ດັ່ງທີ່ໄດ້ແນະນຳໄວ້ໃນພຣະຄຳພີ. ມັນຮຽກຮ້ອງຄວາມພະຍາຍາມຫລາຍກວ່າພຽງແຕ່ຈະຄົ້ນຄວ້າໃນອິນເຕີແນັດເທົ່ານັ້ນ, ແຕ່ຄວາມຈິງນີ້ກຸ້ມຄ່າແທ້ໆ.
ຂ້າພະເຈົ້າສະແດງປະຈັກພະຍານຂອງຂ້າພະເຈົ້າວ່າ ນີ້ຄືສາດສະໜາຈັກທີ່ແທ້ຈິງຂອງພຣະເຢຊູຄຣິດ. ຂ້າພະເຈົ້າໄດ້ເຫັນໝາກຜົນຂອງມັນແລ້ວໃນຊຸມຊົນ ແລະ ໃນຊີວິດຂອງຫລາຍພັນຄົນ, ຮ່ວມທັງສະມາຊິກໃນຄອບຄົວ; ສະນັ້ນ ຂ້າພະເຈົ້າຮູ້ວ່າມັນຈິງ. ຂ້າພະເຈົ້າໄດ້ທົດລອງພຣະຄຳນັ້ນອີກໃນຊີວິດຂອງຂ້າພະເຈົ້າເປັນເວລາຫລາຍປີ ແລະ ໄດ້ຮູ້ສຶກເຖິງອິດທິພົນຂອງມັນໃນຈິດວິນຍານຂອງຂ້າພະເຈົ້າ; ສະນັ້ນ ຂ້າພະເຈົ້າຮູ້ວ່າມັນຈິງ. ແຕ່ສຳຄັນໄປກວ່ານັ້ນ, ຂ້າພະເຈົ້າໄດ້ຮຽນຮູ້ເຖິງຄວາມຈິງຂອງມັນດ້ວຍຕົວເອງ ໂດຍການເປີດເຜີຍ ຜ່ານອຳນາດຂອງພຣະວິນຍານບໍລິສຸດ; ສະນັ້ນ ຂ້າພະເຈົ້າຮູ້ວ່າມັນຈິງ. ຂ້າພະເຈົ້າຂໍເຊື້ອເຊີນພວກທ່ານທຸກຄົນໃຫ້ເຮັດເຊັ່ນດຽວກັນ. ໃນພຣະນາມຂອງພຣະເຢຊູຄຣິດ, ອາແມນ.