ຈົນກວ່າເຮົາຈະພົບກັນອີກ
ໂດຍ ປະທານທອມມັສ ແອັສ ມອນສັນ
ຂໍໃຫ້ພຣະວິນຍານທີ່ເຮົາໄດ້ຮູ້ສຶກພາຍໃນສອງມື້ຜ່ານມານີ້ສະຖິດຢູ່ກັບເຮົາ ຂະນະທີ່ເຮົາດຳເນີນຊີວິດຕໍ່ໄປແຕ່ລະວັນ.
ອ້າຍເອື້ອຍນ້ອງທັງຫລາຍ, ນີ້ໄດ້ເປັນກອງປະຊຸມທີ່ປະເສີດແທ້ໆ. ເຮົາໄດ້ຮັບການບຳລຸງລ້ຽງທາງວິນຍານ ຂະນະທີ່ເຮົາໄດ້ຮັບຟັງຖ້ອຍຄຳທີ່ດົນໃຈຂອງບຸລຸດ ແລະ ສະຕີຜູ້ທີ່ໄດ້ກ່າວກັບເຮົາ. ສຽງເພງກໍມ່ວນອອນຊອນຫລາຍທີ່ສຸດ, ຂ່າວສານກໍຖືກຕຽມ ແລະ ກ່າວອອກມາດ້ວຍອິດທິພົນຂອງການກະຕຸ້ນຂອງພຣະວິນຍານບໍລິສຸດ, ແລະ ຄຳອະທິຖານກໍໄດ້ເຮັດໃຫ້ເຮົາຮູ້ສຶກວ່າໄດ້ຢູ່ໃກ້ສະຫວັນຫລາຍຂຶ້ນ. ເຮົາໄດ້ຮັບການເຊີດຊູໃນທຸກວິທີທາງຂະນະທີ່ເຮົາໄດ້ມີສ່ວນຮ່ວມນຳກັນ.
ຂ້າພະເຈົ້າຫວັງວ່າເຮົາຈະໃຊ້ເວລາອ່ານຂ່າວສານຈາກກອງປະຊຸມເມື່ອມັນມີຢູ່ໃນ LDS.org ພາຍໃນສອງສາມມື້ໜ້ານີ້ ແລະ ເມື່ອມັນຖືກພິມຢູ່ໃນວາລະສານEnsign ແລະ Liahona ໃນສະບັບທີ່ຈະອອກມາ, ເພາະມັນສົມຄວນທີ່ເຮົາຈະທົບທວນ ແລະ ສຶກສາມັນດ້ວຍຄວາມລະມັດລະວັງ.
ຂ້າພະເຈົ້າຮູ້ວ່າທ່ານກໍຮ່ວມໃຈນຳຂ້າພະເຈົ້າ ໃນການສະແດງຄວາມກະຕັນຍູທີ່ຈິງໃຈຂອງເຮົາ ຕໍ່ອ້າຍເອື້ອຍນ້ອງຜູ້ທີ່ໄດ້ຖືກປົດຈາກຕຳແໜ່ງໃນລະຫວ່າງກອງປະຊຸມນີ້. ພວກເພິ່ນໄດ້ຮັບໃຊ້ດີຫລາຍ ແລະ ໄດ້ໃຫ້ສ່ວນບໍລິຈາກທີ່ສຳຄັນຕໍ່ວຽກງານຂອງພຣະຜູ້ເປັນເຈົ້າ. ພວກເພິ່ນໄດ້ໃຫ້ການອຸທິດຕົນຢ່າງສົມບູນຄົບຖ້ວນຕໍ່ວຽກງານນັ້ນ.
ເຮົາໄດ້ສະໜັບສະໜູນອ້າຍນ້ອງຜູ້ທີ່ຖືກເອີ້ນຕໍ່ຕຳແໜ່ງຂອງໜ້າທີ່ຮັບຜິດຊອບໂດຍການຍົກມືຂຶ້ນ. ເຮົາຍິນດີຕ້ອນຮັບພວກເພິ່ນ ແລະ ຢາກໃຫ້ພວກເພິ່ນຮູ້ວ່າເຮົາຕື່ນເຕັ້ນທີ່ຈະຮັບໃຊ້ກັບພວກເພິ່ນໃນວຽກງານຂອງພຣະອາຈານ.
ເມື່ອເຮົາຄິດໄຕ່ຕອງຂ່າວສານທີ່ເຮົາໄດ້ຍິນ, ຂໍໃຫ້ເຮົາຕັ້ງໃຈເຮັດໃຫ້ໄດ້ດີກວ່າທີ່ເຮົາໄດ້ເຮັດມາໃນອາດີດ. ຂໍໃຫ້ເຮົາມີເມດຕາ ແລະ ໃຫ້ຄວາມຮັກຕໍ່ຜູ້ຄົນທີ່ບໍ່ມີຄວາມເຊື່ອ ແລະ ມາດຕະຖານຄືກັນກັບເຮົາ. ພຣະຜູ້ຊ່ອຍໃຫ້ລອດໄດ້ນຳຂ່າວສານແຫ່ງຄວາມຮັກ ແລະ ຄວາມປາດຖະໜາດີມາສູ່ໂລກ ໃຫ້ແກ່ຊາຍ ແລະ ຍິງທຸກໆຄົນ. ເຮົາຄວນເຮັດຕາມຕົວຢ່າງຂອງພຣະອົງສະເໝີໄປ.
ເຮົາປະເຊີນກັບການທ້າທາຍທີ່ຮ້າຍແຮງຫລາຍຢ່າງໃນໂລກໃນວັນເວລານີ້, ແຕ່ຂ້າພະເຈົ້າໃຫ້ທ່ານໝັ້ນໃຈວ່າພຣະບິດາເທິງສະຫວັນຂອງເຮົາຫ່ວງໄຍເຮົາ. ພຣະອົງຈະນຳພາ ແລະ ອວຍພອນເຮົາ ຂະນະທີ່ເຮົາມີສັດທາ ແລະ ຄວາມໄວ້ວາງໃຈໃນພຣະອົງ ແລະ ພຣະອົງຈະຊ່ອຍຫລືອເຮົາຜ່ານຜ່າຄວາມຫຍຸ້ງຍາກໃດໆກໍຕາມທີ່ຈະມາສູ່ເຮົາ.
ຂໍໃຫ້ພອນແຫ່ງສະຫວັນຈົ່ງສະຖິດຢູ່ກັບເຮົາແຕ່ລະຄົນ. ຂໍໃຫ້ບ້ານເຮືອນຂອງເຮົາຈົ່ງເຕັມໄປດ້ວຍຄວາມຮັກ ແລະ ຄວາມສຸພາບ ແລະ ດ້ວຍພຣະວິນຍານຂອງພຣະຜູ້ເປັນເຈົ້າ. ຂໍໃຫ້ເຮົາບຳລຸງລ້ຽງປະຈັກພະຍານຂອງເຮົາເລື່ອງພຣະກິດຕິຄຸນເປັນປະຈຳ, ເພື່ອວ່າມັນຈະປົກປ້ອງເຮົາຈາກອຳນາດຂອງຜູ້ປໍລະປັກ. ຂໍໃຫ້ພຣະວິນຍານທີ່ເຮົາໄດ້ຮູ້ສຶກພາຍໃນສອງມື້ຜ່ານມານີ້ສະຖິດຢູ່ກັບເຮົາ ຂະນະທີ່ເຮົາດຳເນີນຊີວິດຕໍ່ໄປແຕ່ລະວັນ, ແລະ ຂໍໃຫ້ເຮົາຈົ່ງຖືກພົບເຫັນວ່າກຳລັງເຮັດວຽກງານຂອງພຣະຜູ້ເປັນເຈົ້າຢູ່ສະເໝີ.
ຂ້າພະເຈົ້າເປັນພະຍານວ່າວຽກງານນີ້ຈິງ, ວ່າພຣະຜູ້ຊ່ອຍໃຫ້ລອດຂອງເຮົາຊົງພຣະຊົນຢູ່, ແລະ ວ່າພຣະອົງຊີ້ນຳ ແລະ ນຳພາສາດສະໜາຈັກຂອງພຣະອົງຢູ່ເທິງໂລກນີ້. ຂ້າພະເຈົ້າແບ່ງປັນພະຍານ ແລະ ປະຈັກພະຍານກັບທ່ານວ່າ ພຣະເຈົ້າພຣະບິດານິລັນດອນຂອງເຮົາຊົງພຣະຊົນຢູ່ ແລະ ຮັກເຮົາ. ພຣະອົງເປັນພຣະບິດາຂອງເຮົາແທ້ໆ, ແລະ ພຣະອົງມີຕົວຕົນແທ້ໆ. ຂໍໃຫ້ເຮົາຮັບຮູ້ໄວ້ວ່າ ພຣະອົງພໍພຣະໄທທີ່ຈະສະຖິດຢູ່ໃກ້ໆເຮົາພຽງໃດ, ເພື່ອຊ່ອຍເຫລືອເຮົາ, ແລະ ວ່າພຣະອົງຮັກເຮົາຫລາຍພຽງໃດ.
ອ້າຍເອື້ອຍນ້ອງທັງຫລາຍຂອງຂ້າພະເຈົ້າ, ຂໍໃຫ້ພຣະເຈົ້າຈົ່ງອວຍພອນທ່ານ. ຂໍໃຫ້ຄຳສັນຍາແຫ່ງຄວາມສະຫງົບສຸກຂອງພຣະອົງຈົ່ງສະຖິດຢູ່ນຳທ່ານໃນເວລານີ້ ແລະ ຕະຫລອດໄປດ້ວຍເຖີດ.
ຂ້າພະເຈົ້າຂໍສັ່ງລາທ່ານໄປ ຈົນກວ່າເຮົາຈະພົບກັນອີກໃນຫົກເດືອນຂ້າງໜ້າ, ແລະ ຂ້າພະເຈົ້າຂໍກ່າວສິ່ງເຫລົ່ານີ້ ໃນພຣະນາມຂອງພຣະເຢຊູຄຣິດ, ພຣະຜູ້ເປັນເຈົ້າ ແລະ ພຣະຜູ້ຊ່ອຍໃຫ້ລອດຂອງເຮົາ, ອາແມນ.