ສາດສະດາໂຈເຊັບ ສະມິດ

ໂດຍ ແອວເດີ ລໍເຣນສ໌ ອີ ໂຄບຣິຈ

ແຫ່ງສາວົກເຈັດສິບ

ການເປີດເຜີຍທີ່ໄດ້ຖືກຖອກເທລົງມາເທິງໂຈເຊັບ ສະມິດ ຢືນຢັນວ່າ ເພິ່ນເປັນສາດສະດາຂອງພຣະເຈົ້າ.

ພາບທີ່ມາໃຫ້ເຫັນຄັ້ງທຳອິດ

ຊາຍໜຸ່ມຄົນໜຶ່ງໄດ້ອ່ານພຣະຄຣິສຕະທຳຄຳພີ, ແລະ ຕາຂອງເພິ່ນໄດ້ຢຸດຢູ່ທີ່ຂໍ້ໜຶ່ງ. ນີ້ຄືເວລາທີ່ຈະປ່ຽນໂລກ.

ເພິ່ນຕື່ນເຕັ້ນຢາກຮູ້ວ່າ ສາດສະໜາຈັກແຫ່ງໃດທີ່ຈະພາເພິ່ນໄປສູ່ຄວາມຈິງ ແລະ ຄວາມລອດ. ເພິ່ນໄດ້ພະຍາຍາມເກືອບທຸກສິ່ງ, ແລະ ບັດນີ້ ເພິ່ນໄດ້ຫັນຫາພຣະຄຣິສຕະທຳຄຳພີ ແລະ ໄດ້ອ່ານຖ້ອຍຄຳນີ້ວ່າ: “ຖ້າຄົນໃດຂາດສະຕິປັນຍາ, ກໍໃຫ້ຜູ້ນັ້ນທູນຂໍຈາກພຣະເຈົ້າຜູ້ຊົງໂຜດປະທານໃຫ້ແກ່ຄົນທັງປວງດ້ວຍພຣະກະລຸນາ, ບໍ່ຊົງກ່າວຕິ ແລະ ຜູ້ນັ້ນກໍຈະໄດ້ຮັບສິ່ງທີ່ທູນຂໍ.”¹

ເພິ່ນໄດ້ຄິດກ່ຽວກັບເລື່ອງນີ້ ເທື່ອແລ້ວເທື່ອເລົ່າ. ຄວາມສະຫວ່າງເລັກນ້ອຍໄດ້ສ່ອງແສງເຂົ້າມາໃນຄວາມມືດ. ນີ້ແມ່ນຄຳຕອບບໍ, ຕໍ່ຄວາມສັບສົນ ແລະ ຄວາມມືດ? ມັນງ່າຍເຊັ່ນນີ້ບໍ? ພຽງແຕ່ທູນຖາມພຣະເຈົ້າ ແລ້ວພຣະອົງຈະຕອບບໍ? ໃນທີ່ສຸດ ເພິ່ນຕ້ອງເລືອກເອົາທາງໜຶ່ງ ຫລື ຈະຢູ່ໃນຄວາມບໍ່ຮູ້ຈັກ ແລະ ຄວາມສັບສົນ.

ເຖິງແມ່ນເພິ່ນຮີບຮ້ອນໃຈ, ແຕ່ເພິ່ນບໍ່ໄດ້ແລ່ນໄປຫາແຈເຮືອນ ແລະ ອະທິຖານຢ່າງໄວ. ເພິ່ນມີອາຍຸໄດ້ພຽງແຕ່ 14 ປີ ເທົ່ານັ້ນ, ເຖິງແມ່ນເພິ່ນຢາກຮູ້ໄວ, ແຕ່ເພິ່ນບໍ່ໄດ້ຟ້າວຟັ່ງ. ມັນບໍ່ໄດ້ເປັນພຽງການອະທິຖານເທົ່ານັ້ນ. ເພິ່ນໄດ້ຕັດສິນໃຈວ່າຈະໄປຫາບ່ອນໃດ ແລະ ເມື່ອໃດ. ເພິ່ນໄດ້ຕຽມຕົວທີ່ຈະສົນທະນາກັບພຣະເຈົ້າ.

ແລ້ວມື້ນັ້ນກໍມາເຖິງ. ມັນເປັນເຊົ້າຂອງມື້ທີ່ສວຍງາມແຈ່ມໃສ, ໃນຕົ້ນລະດູໃບໄມ້ປົ່ງຂອງປີ [1820].”² ເພິ່ນໄດ້ຍ່າງໄປຄົນດຽວ ເຂົ້າໄປໃນປ່າ ບ່ອນທີ່ມີຕົ້ນໄມ້ສູງອ້ອມຮອບຕົວເພິ່ນ. ເພິ່ນໄດ້ໄປເຖິງບ່ອນທີ່ເພິ່ນຕັ້ງໃຈຈະໄປຫາ. ເພິ່ນໄດ້ຄຸເຂົ່າລົງ ແລະ ໄດ້ກ່າວຄຳອະທິຖານຈາກໃຈຂອງເພິ່ນ.

ເມື່ອອະທິບາຍເຖິງສິ່ງທີ່ໄດ້ເກີດຂຶ້ນ, ເພິ່ນໄດ້ກ່າວວ່າ:

“ຂ້າພະເຈົ້າໄດ້ເຫັນແສງສະຫວ່າງເປັນເລົາລົງມາ, ແຈ້ງກວ່າຄວາມສະຫວ່າງຂອງດວງຕາເວັນ, ຊຶ່ງຄ່ອຍໆເລື່ອນລົງມາ ຈົນເຖິງຕົວຂອງຂ້າພະເຈົ້າ.

“… ເມື່ອແສງນັ້ນລົງມາເຖິງຂ້າພະເຈົ້າ, ຂ້າພະເຈົ້າໄດ້ເຫັນສອງພຣະອົງປະທັບຢືນຢູ່ໃນອາກາດຊື່ຫົວຂອງຂ້າພະເຈົ້າ. ຄວາມສະຫວ່າງ ແລະ ລັດສະໝີພາບຂອງທັງສອງພຣະອົງນັ້ນເກີນກວ່າທີ່ຈະພັນລະນາໄດ້. ອົງໜຶ່ງໄດ້ຮັບສັ່ງກັບຂ້າພະເຈົ້າ ໂດຍເອີ້ນຊື່ຂອງຂ້າພະເຈົ້າ ແລະ ຊີ້ພຣະຫັດໄປຫາອີກອົງໜຶ່ງ—[ໂຈເຊັບ,] ນີ້ຄືບຸດທີ່ຮັກຂອງເຮົາ. ຈົ່ງຟັງທ່ານ!”³

ພຽງແຕ່ 24 ປີຈາກນັ້ນ, ໂຈເຊັບ ສະມິດ ແລະ ໄຮຣຳ ອ້າຍຂອງເພິ່ນ ໄດ້ຕາຍໄປ ເພາະສິ່ງທີ່ເພິ່ນໄດ້ເລີ່ມຕົ້ນຢູ່ບ່ອນນີ້.

ການຕໍ່ຕ້ານ

ໂຈເຊັບໄດ້ກ່າວວ່າ ຕອນເພິ່ນມີອາຍຸໄດ້ 17 ປີ, ທູດອົງໜຶ່ງໄດ້ບອກເພິ່ນວ່າ “ຊື່ຂອງເພິ່ນ [ຈະ] ເປັນທີ່ຮູ້ຈັກທັງໃນທາງດີ ແລະ ຊົ່ວໃນບັນດາປະຊາຊາດທັງປວງ, … ຢູ່ໃນບັນດາຜູ້ຄົນທັງປວງ,”⁴ ການທຳນາຍທີ່ໜ້າອັດສະຈັນໃຈນີ້ ໄດ້ສຳເລັດຄົບຖ້ວນແລ້ວໃນວັນເວລາຂອງເຮົາ ເມື່ອສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍໄດ້ຂະຫຍາຍອອກໄປຢ່າງກວ້າງໄກທົ່ວໂລກ.

ການຕໍ່ຕ້ານ, ການວິຈານ, ແລະ ການປໍລະປັກ ມັກຈະຄຽງຄູ່ໄປກັບຄວາມຈິງ. ເມື່ອໃດກໍຕາມທີ່ ຈຸດປະສົງ ແລະ ວິຖີຊີວິດຂອງມະນຸດຖືກເປີດເຜີຍ, ແລ້ວຈະມີພະລັງຕໍ່ຕ້ານສະເໝີ. ເລີ່ມຕົ້ນຈາກອາດາມ ແລະ ເອວາ ຢູ່ໃນສວນເອເດນ, ລົງມາຈົນເຖິງການປະຕິບັດສາດສະໜາກິດຂອງພຣະຄຣິດ, ແລະ ຈົນມາເຖິງວັນເວລາຂອງເຮົາ, ເຄີຍໄດ້ມີ ແລະ ກໍຈະມີການຫລອກລອງ, ນຳຜິດທາງ, ຂັດແຍ້ງ, ແລະ ສະກັດກັ້ນແຜນຂອງຊີວິດ.

ໃຫ້ຊອກຫາຜູ້ທີ່ໄດ້ຖືກຂົ່ມເຫັງຫລາຍກວ່າຄົນອື່ນໆ, ພຣະອົງໄດ້ຖືກຕໍ່ຕ້ານຫລາຍທີ່ສຸດ, ຖືກທ້າທາຍ, ແລະ ຖືກປະຕິເສດ, ຖືກຂ້ຽນຕີ, ຖືກປະຖິ້ມ, ແລະ ຖືກຄຶງ, ຜູ້ຊຶ່ງໄດ້ສະເດັດລົງຕ່ຳກວ່າທຸກສິ່ງ, ແລ້ວທ່ານຈະພົບຄວາມຈິງ, ພຣະບຸດຂອງພຣະເຈົ້າ, ພຣະຜູ້ຊ່ອຍໃຫ້ລອດຂອງມວນມະນຸດທັງປວງ. ເປັນຫຍັງເຂົາເຈົ້າຈຶ່ງບໍ່ເຊົາຂົ່ມເຫັງພຣະອົງ?

ເປັນຫຍັງ? ເພາະວ່າພຣະອົງເປັນຄວາມຈິງ, ແລະ ຄວາມຈິງຈະມີສິ່ງທີ່ຕໍ່ຕ້ານສະເໝີ.

ແລ້ວໃຫ້ຊອກຫາຜູ້ໄດ້ນຳປະຈັກພະຍານອີກຢ່າງໜຶ່ງເຖິງພຣະເຢຊູຄຣິດ ແລະ ພຣະຄຳພີເຫລັ້ມອື່ນໆອອກມາ, ໃຫ້ຊອກຫາຜູ້ເປັນເຄື່ອງມື ໂດຍການນັ້ນ ຈຶ່ງໄດ້ນຳພຣະກິດຕິຄຸນທີ່ສົມບູນມາໃຫ້ ແລະ ສາດສະໜາຈັກຂອງພຣະເຢຊູຄຣິດໄດ້ຖືກຟື້ນຟູຄືນມາໃໝ່ສູ່ໂລກ, ໃຫ້ຊອກຫາເພິ່ນ ແລ້ວທ່ານຈະເຫັນວ່າເພິ່ນຖືກຂົ່ມເຫັງເໝືອນກັນ. ເປັນຫຍັງເຂົາເຈົ້າຈຶ່ງບໍ່ເຊົາຂົ່ມເຫັງເພິ່ນ?

ເປັນຫຍັງ? ເພາະວ່າ ເພິ່ນໄດ້ສອນຄວາມຈິງ, ແລະ ຄວາມຈິງຈະມີສິ່ງທີ່ຕໍ່ຕ້ານສະເໝີ.

ການເປີດເຜີຍທີ່ຫລັ່ງໄຫລມາ

ການເປີດເຜີຍທີ່ໄດ້ຖືກຖອກເທລົງມາເທິງໂຈເຊັບ ສະມິດ ຢືນຢັນວ່າ ເພິ່ນເປັນສາດສະດາຂອງພຣະເຈົ້າ. ຂໍໃຫ້ເຮົາເບິ່ງບາງສິ່ງ, ຂໍໃຫ້ເຮົາເບິ່ງຄວາມສະຫວ່າງ ແລະ ຄວາມຈິງທີ່ໄດ້ເປີດເຜີຍຜ່ານເພິ່ນ ຊຶ່ງແຕກຕ່າງຈາກຄວາມເຊື່ອອື່ນໆໃນວັນເວລາຂອງເພິ່ນ ແລະ ຂອງເຮົາ.

ພຣະເຈົ້າມີຕົນຕົວ, ເປັນຜູ້ທີ່ສູງສົ່ງ, ເປັນພຣະບິດານິລັນດອນ. ພຣະອົງເປັນພຣະບິດາຂອງເຮົາ.
ພຣະເຈົ້າອົງເປັນພຣະບິດາ, ພຣະເຢຊູຄຣິດ, ແລະ ພຣະວິນຍານບໍລິສຸດ ມີຕົນຕົວທີ່ແຕກຕ່າງກັນ.⁵
ທ່ານບໍ່ໄດ້ເປັນມະນຸດທຳມະດາ. ທ່ານເປັນລູກຂອງພຣະເຈົ້າ ພຣະບິດານິລັນດອນ ແລະ ອາດກາຍເປັນເໝືອນດັ່ງພຣະອົງ⁶ ຖ້າຫາກທ່ານມີສັດທາ ໃນພຣະບຸດຂອງພຣະອົງ, ກັບໃຈ, ຮັບເອົາພິທີການ, ຮັບເອົາພຣະວິນຍານບໍລິສຸດ, ແລະ ອົດທົນຈົນເຖິງທີ່ສຸດ.⁷
ສາດສະໜາຈັກຂອງພຣະເຢຊູຄຣິດໃນວັນເວລານີ້ ມີພື້ນຖານແບບດຽວກັນກັບສາດສະໜາຈັກທີ່ພຣະອົງໄດ້ຈັດຕັ້ງຂຶ້ນໃນຕອນທີ່ພຣະອົງໄດ້ປະຕິບັດສາດສະໜາກິດ, ໂດຍມີສາດສະດາ, ອັກຄະສາວົກ, ຖານະປະໂລຫິດເມນຄີເສເດັກ ແລະ ເລວີ, ແອວເດີ, ມະຫາປະໂລຫິດ, ມັກຄະນາຍົກ, ຄູສອນ, ແລະ ສາວົກເຈັດສິບ, ດັ່ງທີ່ມີບັນຍາຍໄວ້ຢູ່ໃນພຣະຄຣິສຕະທຳຄຳພີ.
ສິດອຳນາດຖານະປະໂລຫິດໄດ້ຖືກເອົາໄປຈາກໂລກ ຫລັງຈາກພຣະຜູ້ຊ່ອຍໃຫ້ລອດໄດ້ສິ້ນພຣະຊົນ ແລະ ອັກຄະສາວົກຂອງພຣະອົງໄດ້ຖືກຂ້າ ແລະ ໄດ້ຖືກຟື້ນຟູຄືນມາໃໝ່ອີກ ໃນວັນເວລາຂອງເຮົາ.
ການເປີດເຜີຍໄດ້ບໍ່ສິ້ນສຸດລົງ, ແລະ ສະຫວັນກໍຍັງບໍ່ໄດ້ປິດ. ພຣະເຈົ້າຍັງກ່າວກັບສາດສະດາຢູ່ໃນທຸກວັນນີ້, ແລະ ພຣະອົງຈະກ່າວກັບທ່ານ ແລະ ຂ້າພະເຈົ້າດ້ວຍ.⁸
ມີສິ່ງອື່ນອີກຫລັງຈາກຊີວິດນີ້ ຫລາຍໄປກວ່າສະຫວັນ ແລະ ນະລົກ. ມັນມີລັດສະໝີພາບທີ່ແຕກຕ່າງກັນ, ແລະ ການກະທຳຢູ່ໃນໂລກນີ້ແມ່ນສຳຄັນຫລາຍ.⁹
ບໍ່ແມ່ນພຽງແຕ່ມີຄວາມເຊື່ອໃນພຣະຄຣິດລ້າໆ, ແຕ່ເຮົາຄວນ “ເບິ່ງທີ່ [ພຣະອົງ] ໃນຄວາມນຶກຄິດທຸກຢ່າງ,”¹⁰ “ເຮັດທຸກສິ່ງ [ທີ່ເຮົາເຮັດ] ໃນພຣະນາມຂອງພຣະບຸດ,”¹¹ ແລະ “ລະນຶກເຖິງພຣະອົງຕະຫລອດເວລາ ແລະ ຮັກສາພຣະບັນຍັດຂອງພຣະອົງ … ເພື່ອ [ເຮົາ] ຈະມີພຣະວິນຍານຂອງພຣະອົງຢູ່ດ້ວຍຕະຫລອດເວລາ.”¹²
ຜູ້ທີ່ໄດ້ມີຊີວິດຢູ່ ແລະ ໄດ້ຕາຍໄປປາດສະຈາກພຣະກິດຕິຄຸນ ແລະ ພິທີການທີ່ຈຳເປັນສຳລັບຄວາມລອດ ບໍ່ໄດ້ສູນເສຍໄປ. ຜ່ານການຊົດໃຊ້ຂອງພຣະຄຣິດ, ມະນຸດທັງປວງ “ຈະລອດໄດ້ ໂດຍການປະຕິບັດຕາມກົດ ແລະ ພິທີການແຫ່ງພຣະກິດຕິຄຸນ,”¹³ ທີ່ປະຕິບັດສຳລັບທັງຄົນເປັນ ແລະ ຄົນຕາຍ.¹⁴
ທຸກສິ່ງບໍ່ໄດ້ເລີ່ມຕົ້ນໃນຕອນທີ່ເກີດມາ. ທ່ານໄດ້ມີຊີວິດຢູ່ກ່ອນແລ້ວໃນທີ່ປະທັບຂອງພຣະເຈົ້າ ເປັນບຸດ ຫລື ທິດາ ແລະ ໄດ້ຕຽມສຳລັບຊ່ວງມະຕະນີ້.¹⁵
ການແຕ່ງງານ ແລະ ຄອບຄົວ ບໍ່ໄດ້ເປັນແບບແຜນຂອງມະນຸດ ພຽງແຕ່ຢູ່ໃນໂລກນີ້ເທົ່ານັ້ນ. ສິ່ງເຫລົ່ານີ້ໄດ້ຖືກເຈດຕະນາໃຫ້ເປັນນິລັນດອນ ຜ່ານພັນທະສັນຍາທີ່ເຮົາໄດ້ເຮັດໄວ້ນຳພຣະເຈົ້າ. ຄອບຄົວເປັນແບບແຜນຂອງສະຫວັນ.¹⁶

ແລະ ນີ້ຄືພາກສ່ວນໜຶ່ງຂອງການເປີດເຜີຍທີ່ຫລັ່ງໄຫລມາເທິງໂຈເຊັບ ສະມິດ. ມັນມາຈາກໃສ, ການເປີດເຜີຍເຫລົ່ານີ້ ຊຶ່ງສ່ອງຄວາມສະຫວ່າງໃສ່ຄວາມມືດ, ໃຫ້ຄວາມແຈ່ມແຈ້ງແກ່ຄວາມສົງໄສ, ແລະ ໃຫ້ການດົນໃຈ, ເປັນພອນ, ແລະ ເສີມສ້າງຫລາຍລ້ານຄົນ? ເພິ່ນຄິດຄົ້ນຂຶ້ນມາເອງບໍ ຫລື ເພິ່ນໄດ້ຮັບຄວາມຊ່ອຍເຫລືອຈາກສະຫວັນ? ພຣະຄຳພີທີ່ເພິ່ນໄດ້ຈັດພິມ ຟັງແລ້ວເປັນຖ້ອຍຄຳຂອງມະນຸດບໍ ຫລື ເປັນພຣະຄຳຂອງພຣະເຈົ້າ?

ສະຫລຸບ

ບໍ່ມີໃຜສາມາດຖຽງກ່ຽວກັບສິ່ງທີ່ໂຈເຊັບ ສະມິດ ໄດ້ເຮັດສຳເລັດຜົນ, ພຽງແຕ່ກ່ຽວກັບວິທີທີ່ເພິ່ນເຮັດ ແລະ ສິ່ງທີ່ເພິ່ນເຮັດ ແລະ ດ້ວຍເຫດໃດ. ແລະ ກໍບໍ່ມີຫລາຍຢ່າງທີ່ຈະໃຫ້ເລືອກ. ຖ້າເພິ່ນບໍ່ແມ່ນຜູ້ທຳທ່າເຮັດ ເພິ່ນກໍເປັນສາດສະດາ. ຖ້າເພິ່ນບໍ່ໄດ້ເຮັດດ້ວຍຕົວຄົນດຽວ, ເພິ່ນກໍຕ້ອງໄດ້ຮັບການຊ່ອຍເຫລືອຈາກສະຫວັນ. ໃຫ້ເບິ່ງຫລັກຖານ, ແຕ່ໃຫ້ເບິ່ງຫລັກຖານທັງໝົດ, ໃຫ້ເບິ່ງທຸກສິ່ງທີ່ໄດ້ເກີດຂຶ້ນກັບຊີວິດຂອງເພິ່ນ, ບໍ່ແມ່ນເບິ່ງແຕ່ສິ່ງດຽວເທົ່ານັ້ນ. ສິ່ງທີ່ສຳຄັນທີ່ສຸດ, ໃຫ້ເຮັດຕາມສິ່ງທີ່ຊາຍໜຸ່ມໂຈເຊັບໄດ້ເຮັດຄື “ທູນຂໍ … ຈາກພຣະເຈົ້າ, ຜູ້ຊົງໂຜດປະທານໃຫ້ແກ່ຄົນທັງປວງດ້ວຍພຣະກະລຸນາ ບໍ່ຊົງກ່າວຕິ ແລະ ຜູ້ນັ້ນກໍຈະໄດ້ຮັບສິ່ງທີ່ທູນຂໍ.”¹⁷ ນີ້ບໍ່ແມ່ນພຽງແຕ່ວິທີທີ່ທ່ານອາດຮຽນຮູ້ເຖິງຄວາມຈິງກ່ຽວກັບພຣະຄຳພີມໍມອນ ແລະ ໂຈເຊັບ ສະມິດ ເທົ່ານັ້ນ, ແຕ່ມັນເປັນແບບແຜນທີ່ຈະຮູ້ທຸກສິ່ງ.¹⁸

ໂຈເຊັບ ສະມິດ ໄດ້ເປັນສາດສະດາຂອງພຣະເຈົ້າ, ດັ່ງທີ່ ທ່ານທອມມັສ ແອັສ ມອນສັນ ເປັນສາດສະດາໃນທຸກວັນນີ້. ຜ່ານ ໂຈເຊັບ ສະມິດ, ຂໍກະແຈແຫ່ງອານາຈັກຂອງພຣະເຈົ້າ “ໄດ້ຖືກມອບໃຫ້ແກ່ມະນຸດເທິງແຜ່ນດິນໂລກຄືນອີກ, ແລະ … ພຣະກິດຕິຄຸນ [ຈະ] ຂະຫຍາຍອອກໄປ ... ຄືກັນກັບຫີນກ້ອນໜຶ່ງຊຶ່ງແຕກອອກມາເອງຈາກໜ້າຜາໂດຍບໍ່ມີໃຜເຮັດ … , ຈົນເຕັມແຜ່ນດິນໂລກ.”¹⁹

ພຣະເຈົ້າເປັນພຣະບິດານິລັນດອນຂອງເຮົາ, ແລະ ພຣະເຢຊູຄືພຣະຄຣິດ. ເຮົາຮັກພວກພຣະອົງ. ບໍ່ມີສິ່ງໃດທີ່ສາມາດເອົາມາປຽບທຽບໃສ່ກັບການສ້າງ, ແຜນແຫ່ງຄວາມລອດ, ແລະ ການເສຍສະລະຊົດໃຊ້ຂອງລູກແກະຂອງພຣະເຈົ້າໄດ້. ໃນຍຸກນີ້, ເຮົາບັນລຸແຜນຂອງພຣະບິດາ ແລະ ຮັບເອົາຜົນຂອງການຊົດໃຊ້ ພຽງແຕ່ໂດຍການເຊື່ອຟັງຕໍ່ກົດ ແລະ ພິທີການຂອງພຣະກິດຕິຄຸນເທົ່ານັ້ນ ຊຶ່ງໄດ້ຖືກຟື້ນຟູຄືນມາໃໝ່ຜ່ານທາງສາດສະດາໂຈເຊັບ ສະມິດ. ຂ້າພະເຈົ້າເປັນພະຍານເຖິງພວກພຣະອົງ ເຖິງພຣະເຈົ້າ ພຣະບິດານິລັນດອນ ແລະ ພຣະເຢຊູຄຣິດ ພຣະຜູ້ຊ່ອຍໃຫ້ລອດຂອງໂລກ. ແລະ ຂ້າພະເຈົ້າເຮັດສິ່ງນີ້ ໃນພຣະນາມອັນສັກສິດຂອງພຣະເຢຊູຄຣິດ, ອາແມນ.