Mensaje Ñemog̃uahẽporãrã
Tapeĝuahẽ porãite ko conferencia general-pe ha upe privilegio ñahendu hag̃ua Ñandejára ñe’ẽpu.
Che hermano ha hermana ha angirũnguéra yvóra jerére, ame’ẽ peẽme che ñemog̃uahẽporã personal ko conferencia general-hápe. Ñande’aty peteĩ tuicha familia global ramo ñatupãitũ hag̃ua Ñandejára ha Salvador Jesucristo-pe. Aguyje pejoaju haguére orendive.
Ko ary ohasava’ekue ha’e peteĩ oñemoĩkuaáva record ramo kuatiañe’ẽme. Naipóri dúda peteĩteĩ ñañemoarandúkuri mba’e ndajaikuaáivape. Katu oĩ mbo’epy ymaaikuaamava’ekue ko’ág̃a ojehaíva che korasõme forma pyahu ha omyesakãvévape.
Tembiecharã, che aikuaaporã Ñandejára oisãmbyhyha Itupao mba’ekuéra. Ha’e he’i, “ahechaukáta [peẽme] che ajapokuaaha che rembiapo.”1
Py’ỹi, che consejero-kuéra ha che romaña tesay ore rováre mba’éichapa Ha’e ointerveni umi circunstancia hasyvévape, rojapo rire ore ñeha’ãporãvépe ha ndaikatuveimahápe. Ore ropyta añetehápe orejurujái.
Avei antende porãve ko’ág̃a mba’épa he’isékuri Ha’e he’i vove: “Péina ápe, ambopya’éta che rembiapo hi’árape.”2 Jey Jey avy’a Ha’e oisãmbyhy ha omotenondévo Hembiapo ñembopya’e – jepe ko pandemia global aja.
Che hermano ha hermana-kuéra pohayhuetéva, ko tupao mbaretekue opytu’u imiembrokuéra ñeha’ã ha testimonio okakuaa mantéva ári. Umi testimonio okakuaa porãve ogapýpe. Ko ary ohasava’ekue aja, hetapeẽ tuicha rasa pemboheta pe evanhélio jestudia pende rógape. Cheaguyje peẽme, ha pende ta’yrakuéra penemboaguyjéta avei.
Pe proyecto guasu Lago Salado templo ñembopyahu oiko meme. Che oficina guie areko apyka “primera fila”-pe(fila peteĩháme) amaña hag̃ua tembiapo oikóva hína upe templo plaza-pe.
Amañávo umi omba’apóvare ojo’o ha oguenohẽ umi yvyramáta rapo, cañeria, cable ha peteĩ fuente otykýva, ajepy’amongeta mba’éichapa tekotevẽ ñande avei ñaguenohẽ, pe Salvador pytyvõ reheve, umi kusugue ñande rekovégui.
Jesucristo evanhélio ha’e peteĩ evanhélio arrepentimiento rehegua.3 Pe Salvador expiasiõ rupi, Iñevanhélio oikuave’ẽ peteĩ invitación ñakontinua hag̃ua ñañemoambuévo, jakakuaa ha ñanepotĩve. Ha’e peteĩ evanhélio ñeha’arõkuaa, ñemonguera ha jekakuaa rehegua. Upéicha, pe evanhélio ha’e peteĩ vy’apavẽmensáhe! Ñande espíritu oguerovy’a káda guata michĩ ramo jepe ñame’ẽva tenonderã.
Parte pe Israel ñembyatýpe, ha peteĩ parte imba’eguasuetéva, ha’e pe responsabilida jarekóva tavayguakuéraicha ñaime hag̃ua dignoha dispuestoñaipytyvõ hag̃ua ko yvóra ñembosako’ípe Ñandejára Jejujey Mokõihápe g̃uarã.
Ñahendu aja umi mensáhe ñande lider-kuéra ombosako’iva’ekue jesarekópe Espiritu Santo ñeisãmbyhy guýpe, Poinvita peñembo’e ha pehechakuaa hag̃ua umi kusugue peguenohẽva’erã pende rekovégui ikatu hag̃uáicha penderekojojave.
Pohayhu, che hermano ha hermana-kuéra, ha atestifika ñande Ru Yvagagua ha Ita’ýra Ohayhuetéva pendekuaa ha penderayhuha peteĩ teĩme. Ha’ekuéra oĩ listo penepytyvõ haĝua káda pyrũ peme’ẽvape tenonde gotyo. Tapeĝuahẽ porãite ko conferencia general-pe ha pe privilegio ñahendu hag̃ua Ñandejára ñe’ẽpu. Jesucristo rérape, amén.